Genesi ܒܪܝܬܐ 50

¹ ܘܰܢܦܰܠ ܝܰܘܣܶܦ ܥܰܠ ܐܰܦܰܘ̈ܗܝ ܕܰܐܒܽܘܗܝ: ܘܰܒܟܳܐ ܥܠܰܘܗ̱ܝ ܘܢܰܫܩܶܗ.

² ܘܦܰܩܶܕ ܝܰܘܣܶܦ ܠܥܰܒܕܰܘ̈ܗܝ ܐܳܣܰܘ̈ܳܬܳܐ ܠܡܶܚܢܰܛ ܠܰܐܒܽܘܗܝ: ܘܚܰܢܛܽܘܗܝ ܐܳܣܰܘ̈ܳܬܳܐ ܠܺܝܣܪܳܐܶܝܠ.

³ ܘܰܡܠܰܘ ܠܶܗ ܐܰܪܒܥܺܝܢ ܝܰܘܡܺܝ̈ܢ: ܡܶܛܽܠ ܕܗܳܟܰܢܳܐ ܫܳܠܡܺܝܢ ܝܰܘ̈ܡܳܬܳܐ ܕܰܚܢܺܝ̈ܛܶܐ: ܘܰܒܟܰܐܗܝ ܡܶܨܖ̈ܳܝܶܐ ܫܰܒܥܺܝܢ ܝܰܘ̈ܡܳܬܳܐ.

⁴ ܘܰܥܒܰܪܘ ܝܰܘ̈ܡܰܝ ܒܟܳܬܶܗ: ܘܶܐܡܰܪ ܝܰܘܣܶܦ ܠܰܕܒܶܝܬ ܦܶܪܥܽܘܢ: ܐܶܢ ܐܶܫܟܚܶܬ ܖ̈ܰܚܡܶܐ ܒܥܰܝ̈ܢܰܝܟܽܘܢ: ܐܶܡܰܪܘ ܩܕܳܡ ܦܶܪܥܽܘܢ.

⁵ ܐܳܒܝ ܐܰܘܡܝܰܢܝ ܘܶܐܡܰܪ ܠܺܝ: ܗܳܐ ܐܶܢܳܐ ܡܳܐܶܬ ܐ̱ܢܳܐ: ܒܩܰܒܪܝ ܕܙܶܒܢܶܬ ܠܺܝ ܒܰܐܪܥܳܐ ܕܰܟܢܰܥܢ: ܬܰܡܳܢ ܬܶܩܒܪܰܢܝ: ܗܳܫܳܐ ܐܶܣܰܩ ܐܶܩܒܽܘܪ ܠܳܐܒܝ ܘܶܐܗܦܽܘܟ.

⁶ ܘܶܐܡܰܪ ܦܶܪܥܽܘܢ: ܣܰܩ ܘܰܩܒܽܘܪ ܠܰܐܒܽܘܟ ܐܰܝܟ ܕܰܐܘܡܝܳܟ.

⁷ ܘܰܣܠܶܩ ܝܰܘܣܶܦ ܠܡܶܩܒܰܪ ܠܰܐܒܽܘܗܝ: ܘܰܣܠܶܩܘ ܥܰܡܶܗ ܟܽܠܗܽܘܢ ܥܰܒܕܰܘ̈ܗܝ ܕܦܶܪܥܽܘܢ: ܘܣܳܒ̈ܶܐ ܕܒܰܝܬܶܗ: ܘܟܽܠܗܽܘܢ ܣܳܒ̈ܶܐ ܕܰܐܪܥܳܐ ܕܡܶܨܪܶܝܢ.

⁸ ܘܟܽܠܶܗ ܒܶܝܬ ܝܰܘܣܶܦ: ܘܰܐܚܰܘ̈ܗܝ ܘܒܶܝܬ ܐܰܒܽܘܗܝ ܣܠܶܩܘ ܥܰܡܶܗ: ܒܰܠܚܽܘܕ ܝܺܩܰܪܬܗܽܘܢ ܘܥܳܢ̈ܗܽܘܢ ܘܬܰܘܖ̈ܰܝܗܽܘܢ: ܫܒܰܩܘ ܒܰܐܪܥܳܐ ܕܓܶܫܳܢ.

⁹ ܘܰܣܠܶܩܘ ܥܰܡܶܗ ܐܳܦ ܡܰܖ̈ܟܒܳܬܳܐ ܘܦܰܖ̈ܳܫܶܐ: ܘܰܗܘܳܬ ܡܰܫܪܺܝܬܳܐ ܕܥܰܫܺܝܢܳܐ ܛܳܒ.

¹⁰ ܘܶܐܬܰܘ ܥܕܰܡܳܐ ܠܶܐܕܪܳܐ ܕܳܐܛܳܪ ܕܰܒܥܶܒܪܳܐ ܕܝܽܘܪܕܢܳܢ: ܘܰܐܪܩܶܕܘ ܬܰܡܳܢ ܡܰܪܩܽܘܕܬܳܐ ܪܰܒܬܳܐ ܘܥܰܫܺܝܢܬܳܐ: ܘܰܥܒܰܕ ܠܰܐܒܽܘܗܝ ܒܶܝܬ ܒܳܟܶܐ ܫܰܒܥܳܐ ܝܰܘܡܺܝ̈ܢ.

¹¹ ܘܰܚܙܰܘ ܝܳܬܒܰܝ̈ ܐܰܪܥܳܐ ܟܢܰܥܢܳܝ̈ܶܐ ܠܶܐܒܠܳܐ ܒܶܐܕܪܳܐ ܕܳܐܛܳܪ: ܘܶܐܡܰܪܘ: ܐܶܒܠܰܐ ܗ̱ܘ ܪܰܒܳܐ ܗܳܢܳܐ ܠܡܶܨܖ̈ܳܝܶܐ: ܡܶܛܽܠ ܗܳܢܳܐ ܩܪܰܘ ܫܡܶܗ: ܐܶܒܰܠ ܡܶܨܪܶܝܢ ܕܰܒܥܶܒܪܳܐ ܕܝܽܘܪܕܢܳܢ.

¹² ܘܰܥܒܰܕܘ ܠܶܗ ܒܢܰܘ̈ܗܝ ܗܳܟܰܢܳܐ ܐܰܝܟ ܕܦܰܩܶܕ ܐܶܢܽܘܢ.

¹³ ܘܫܰܩܠܽܘܗܝ ܘܰܐܘܒܠܽܘܗܝ ܠܰܐܪܥܳܐ ܕܰܟܢܰܥܢ: ܘܩܰܒܪܽܘܗܝ ܒܰܡܥܰܪܬܳܐ ܕܰܒܚܰܩܠܳܐ ܐܰܥܺܝܦܬܳܐ: ܕܰܙܒܰܢ ܐܰܒܪܳܗܳܡ ܚܰܩܠܳܐ ܠܝܽܘܪܬܳܢܳܐ ܕܩܰܒܪܳܐ: ܡܶܢ ܥܶܦܪܽܘܢ ܚܺܝܬܳܝܳܐ ܕܰܩܕܳܡ ܡܰܡܪܶܐ.

¹⁴ ܘܰܗܦܰܟ ܝܰܘܣܶܦ ܠܡܶܨܪܶܝܢ ܗܽܘ ܘܰܐܚܰܘ̈ܗܝ ܘܟܽܠ ܕܰܣܠܶܩܘ ܥܰܡܶܗ ܠܡܶܩܒܰܪ ܠܰܐܒܽܘܗܝ ܡܶܢ ܒܳܬܰܪ ܕܰܩܒܰܪ ܠܰܐܒܽܘܗܝ.

¹⁵ ܚܙܰܘ ܐܰܚܰܘ̈ܗܝ ܕܝܰܘܣܶܦ ܕܡܺܝܬ ܐܰܒܽܘܗܽܘܢ ܘܰܕܚܶܠܘ: ܘܳܐܡܪܺܝܢ ܕܰܠܡܳܐ ܢܰܗܪܰܢ ܝܰܘܣܶܦ: ܘܕܰܠܡܳܐ ܢܶܦܪܥܰܢ ܟܽܠܳܗ̇ ܒܺܝܫܬܳܐ ܕܰܥܒܰܕܢ ܠܶܗ.

¹⁶ ܘܰܩܪܶܒܘ ܠܘܳܬ ܝܰܘܣܶܦ ܘܶܐܡܰܪܘ ܠܶܗ: ܐܰܒܽܘܟ ܦܰܩܶܕ ܩܕܳܡ ܡܰܘܬܶܗ ܘܶܐܡܰܪ.

¹⁷ ܗܳܟܰܢܳܐ ܬܺܐܡܪܽܘܢ ܠܝܰܘܣܶܦ: ܒܒܳܥܽܘ ܫܒܽܘܩ ܣܰܟܠܽܘܬܳܐ ܠܰܐܚܰܝ̈ܟ ܘܠܰܚܛܳܗܰܝ̈ܗܽܘܢ: ܕܰܥܒܰܕܘ ܠܳܟ ܒܺܝܫܬܳܐ: ܘܗܳܫܳܐ ܫܒܽܘܩ ܣܰܟܠܽܘܬܳܐ ܕܥܰܒ̈ܕܰܝ ܐܰܠܳܗܶܗ ܕܰܐܒܽܘܟ: ܘܰܒܟܳܐ ܝܰܘܣܶܦ ܟܰܕ ܐܶܡܰܪܘ ܠܶܗ.

¹⁸ ܘܶܐܙܰܠܘ ܐܰܚܰܘ̈ܗܝ ܘܰܢܦܰܠܘ ܩܕܳܡܰܘܗܝ: ܘܶܐܡܰܪܘ: ܗܳܐ ܚܢܰܢ ܠܳܟ ܥܰܒܕ̈ܶܐ.

¹⁹ ܘܶܐܡܰܪ ܠܗܽܘܢ ܝܰܘܣܶܦ: ܠܳܐ ܬܶܕܚܠܽܘܢ: ܡܶܛܽܠ ܕܰܬܚܶܝܬ ܐܰ‌ܠܳܗܳܐ ܐ̱ܢܳܐ.

²⁰ ܐܰܢ̱ܬܽܘܢ ܐܶܬܚܰܫܰܒܬܽܘܢ ܥܠܰܝ ܒܺܝܫܬܳܐ: ܘܰܐ‌ܠܳܗܳܐ ܐܶܬܚܰܫܒܳܗ̇ ܠܛܳܒܬܳܐ: ܕܢܶܥܒܶܕ ܐܰܝܟ ܕܝܰܘܡܳܢܳܐ: ܘܢܺܚܶܐ ܥܰܡܳܐ ܣܰܓܺܝܐܳܐ.

²¹ ܘܗܳܫܳܐ ܠܳܐ ܬܶܕܚܠܽܘܢ: ܐܶܢܳܐ ܐܶܬܰܪܣܶܝܟܽܘܢ ܘܠܺܝܩܰܪܬܟܽܘܢ: ܘܒܰܝܰܐ ܐܶܢܽܘܢ: ܘܰܡܠܳܐ ܒܠܶܒܗܽܘܢ.

²² ܘܺܝܬܶܒ ܝܰܘܣܶܦ ܒܡܶܨܪܶܝܢ: ܗܽܘ ܘܟܽܠܶܗ ܒܶܝܬ ܐܰܒܽܘܗܝ: ܘܰܚܝܳܐ ܝܰܘܣܶܦ ܡܳܐܐ ܘܰܥܣܰܪ ܫܢܺܝ̈ܢ.

²³ ܘܰܚܙܳܐ ܝܰܘܣܶܦ ܠܰܐܦܪܶܝܡ ܒܢܰܝ̈ܳܐ ܬܠܺܝܬܳܝ̈ܶܐ: ܐܳܦ ܒܢܰܘ̈ܗܝ ܕܡܳܟܺܝܪ ܒܰܪ ܡܢܰܫܶܐ: ܐܶܬܺܝܠܶܕܘ ܠܶܗ ܥܰܠ ܒܽܘܖ̈ܟܰܘܗܝ ܕܝܰܘܣܶܦ.

²⁴ ܘܶܐܡܰܪ ܝܰܘܣܶܦ ܠܰܐܚܰܘ̈ܗܝ: ܐܶܢܳܐ ܡܳܐܶܬ ܐ̱ܢܳܐ: ܘܰܐ‌ܠܳܗܳܐ ܡܶܬܕܟܳܪܽܘ ܡܶܬܕܟܰܪ ܠܟܽܘܢ: ܘܡܰܣܶܩ ܠܟܽܘܢ ܡܶܢ ܐܰܪܥܳܐ ܗܳܕܶܐ: ܠܰܐܪܥܳܐ ܕܺܝܡܳܐ ܠܰܐܒܪܳܗܳܡ ܘܠܺܐܝܣܚܳܩ ܘܰܠܝܰܥܩܽܘܒ.

²⁵ ܘܰܐܘܡܺܝ ܝܰܘܣܶܦ ܠܰܒܢܰܝ̈ ܝܺܣܪܳܐܶܝܠ ܘܶܐܡܰܪ: ܡܶܬܕܟܳܪܽܘ ܡܶܬܕܟܰܪ ܠܟܽܘܢ ܐܰ‌ܠܳܗܳܐ: ܐܰܣܶܩܘ ܓܰܖ̈ܡܰܝ ܡܶܟܐ ܥܰܡܟܽܘܢ.

²⁶ ܘܡܺܝܬ ܝܰܘܣܶܦ ܒܰܪ ܡܳܐܐ ܘܰܥܣܰܪ ܫܢܺܝ̈ܢ: ܘܚܰܢܛܽܘܗܝ ܘܣܳܡܽܘܗܝ ܒܕܽܘܦܢܳܐ ܒܡܶܨܪܶܝܢ.