Siracide ܝܫܘܥ ܒܪ ܐܣܝܪܐ 8

Peshitta	SMITH VAN DYKE
1 ܠܐ ܬܥܢܐ ܥܡ ܓܒܪܐ ܕܩܫܐ ܡܢܟ ܕܠܡܐ ܬܦܠ ܒܐܝܕ̈ܘܗܝ
2 ܠܐ ܬܥܢܐ ܥܡ ܡܪܐ ܕܗܒܐ ܕܠܡܐ ܢܬܩܘܠ ܡܬܩܠܟ ܡܛܠ ܕܠܣܓ̈ܝܐܐ ܐܘܒܕ ܕܗܒܐ ܐܦ ܠܒܐ ܕܡ̈ܠܟܐ ܗ̣ܘ ܡܫܛܐ
3 ܠܐ ܬܨܐ ܥܡ ܓܒܪܐ ܦܟܢܐ ܘܠܐ ܬܣܝܡ ܥܠ ܢܘܪܐ ܩܝ̈ܣܐ
4 ܠܐ ܬܨܐ ܥܡ ܙܠܝܠܐ ܕܠܐ ܢܨܥܪܘܢܟ ܝܩܝ̈ܪܐ
5 ܠܐ ܬܚܣܕ ܠܐܢܫܐ ܕܬܐܒ ܡܢ ܚܛܗܘ̈ܗܝ ܐܬܕܟܪ ܕܟܠܢ ܚܬ̈ܝܝܢ
6 ܠܐ ܬܓܚܟ ܥܠ ܐܢܫܐ ܕܣܐܒ ܐܬܕܟܪ ܕܡܢܢ ܣܐܒܝܢ
7 ܠܐ ܬܚܕܐ ܥܠ ܐܢܫܐ ܕܡܐܬ ܐܬܕܟܪ ܕܟܘܠܢ ܡܝܬܝܢ
8 ܠܐ ܬܫܒܘܩ ܫܘܥ̈ܝܬܐ ܕܚܟ̈ܝܡܐ ܘܒܡܬ̈ܠܝܗܘܢ ܗܘܝܬ ܕܪܫ ܡܛܠ ܕܡܢܗܘܢ ܬܩܒܠ ܝܘܠܦܢܐ ܒܥܕܢܐ ܕܬܩܘܡ ܩܕܡ ܫܠܝ̈ܛܢܐ
9 ܠܐ ܬܬܥܝܩ ܒܫܘܥ̈ܝܬܐ ܕܣܒ̈ܐ ܕܫܡܥܘ ܡܢ ܐܒܗ̈ܝܗܘܢ ܡܛܠ ܕܡܢܗܘܢ ܬܩܒܠ ܝܘܠܦܢܐ ܒܙܒܢܐ ܕܡܬܒܥܐ ܠܡܦܢܝܘ ܦܬܓܡܐ
10 ܠܐ ܬܗܘܐ ܫܘܬܦܐ ܠܪܫܝܥܐ ܓܡܝܪܐ ܕܠܐ ܬܐܩܕ ܒܓܘܙܠܬܐ ܕܢܘܪܗ
11 ܠܐ ܬܩܘܡ ܡܢ ܩܕܡ ܥܘܠܐ ܕܠܡܐ ܢܗܘܐ ܟܡܐܢܐ ܩܕܡܝܟ
12 ܠܐ ܬܘܙܦ ܠܡܢ ܕܥܫܝܢ ܡܢܟ ܘܐܢ ܐܘܙܦܬ ܗܘܝ ܐܝܟ ܡܘܒܕ
13 ܠܐ ܬܥܪܘܒ ܠܡ̇ܢ ܕܥܫܝܢ ܡܢܟ ܘܐܢ ܥܪܒܬ ܗܘܝ ܐܝܟ ܦܪܥ
14 ܠܐ ܬܬܒ ܥܡ ܕܝܢܐ ܥܘܠܐ ܒܕܝܢܐ ܕܠܐ ܐܝܟ ܨܒܝܢܗ ܬܕܘܢ ܥܡܗ
15 ܥܡ ܓܒܪܐ ܩܫܝܐ ܠܐ ܬܐܙܠ ܒܐܘܪܚܐ ܕܠܡܐ ܢܩܫܐ ܒܝܫܬܟ ܡܛܠ ܕܗܘ ܠܘܩܒܠ ܐܦܘ̈ܗܝ ܐܙܠ ܘܐܢܬ ܒܣܟܠܘܬܗ ܬܐܒܕ
16 ܥܡ ܓܒܪܐ ܥܘܠܐ ܠܐ ܬܨܐ ܡܨܘܬܐ ܘܠܐ ܬܨܐ ܥܡܗ ܒܐܬܪܐ ܚܘܪܒܐ ܡܛܠ ܕܫܝܛ ܗܘ ܕܡܟ ܒܥ̈ܝܢܘܗܝ ܘܐܢ ܠܐ ܢܗܘܐ ܠܟ ܡܦܨܝܢܐ ܢܩܛܠܟ
17 ܥܡ ܣܟܠܐ ܠܐ ܬܩܛܘܪ ܪܐܙܐ ܡܛܠ ܕܠܐ ܡܫܟܚ ܠܡܟܣܝܘܬܗ