Siracide ܝܫܘܥ ܒܪ ܐܣܝܪܐ 39

¹ ܐܝܟ ܚܟܡܬܐ ܕܟܠܗܘܢ ܩܕܡ̈ܝܐ ܢܒܥܐ ܘܠܘܬ ܢܒܝ̈ܐ ܩܕܡ̈ܝܐ ܢܬܦܢܐ

² ܘܫܘ̈ܥܝܬܐ ܕܟܠ ܐܢܫܐ ܕܥܠܡܐ ܢܐܠܦ ܘܒܕܥܡ̈ܝܩܢ ܢܬܚ̇ܫܒ

³ ܚܟܡܬܐ ܕܡ̈ܬܠܐ ܢܐܠܦ ܘܒܟܠ ܣܬܝܪ̈ܬܐ ܢܣܬܟܠ

⁴ ܘܒܝܢܬ ܫܠܝ̈ܛܢܐ ܢܗܠܟ ܘܒܝܢܬ ܡ̈ܠܟܐ ܘܪ̈ܘܪܒܢܐ ܢܫܡܫ ܒܡܕ̈ܝܢܬܐ ܕܥܠܡܐ ܢܗ̇ܠܟ ܛܒ ܘܒܝܫ ܒܐܢܫܐ ܢܟܣܐ

⁵ ܘܒܠܒܗ ܢܣܝܡ ܠܡܨܠܝܘ ܘܡܢ ܩܕܡ ܐܠܗܐ ܢܒܥܐ ܪ̈ܚܡܐ ܢܦܬܚ ܦܘܡܗ ܒܨܠܘܬܗ ܘܥܠ ܚܛܗ̈ܘܗܝ ܢܒܥܐ ܛܒܬܐ

⁶ ܘܒܪܘܚܐ ܕܣܟܘܠܬܢܘܬܐ ܢܬܚܟܡ ܗ̣ܘ ܢܦܩ ܡ̈ܬܠܐ ܚܕ ܬܪܝܢ ܘܢܘܕܘܢ ܠܗ ܒܬܪ̈ܥܝܬܗ

⁷ ܗ̣ܘ ܢܣܬܟܠ ܡ̈ܬܠܐ ܕܚܟ̈ܝܡܐ ܘܒܣܬܝܪ̈ܬܐ ܢܣܬܟܠ

⁸ ܗ̣ܘ ܢܦܩ ܝܘܠܦܢܐ ܕܚܟܡܬܐ ܘܒܢܡܘܣܐ ܕܚ̈ܝܐ ܢܫܬܒ̇ܚ

⁹ ܘܢܐܠܦܘܢ ܣܓܝܐ̈ܐ ܡܢ ܚܟܡܬܗ ܘܒܥܠܡܐ ܠܐ ܢܬܛܥܐ ܫܡܗ ܘܠܐ ܢܒܛܠ ܕܘܟܪܢܗ ܥܕܡܐ ܠܥܠܡ ܘܫܡܗ ܠܐ ܢܬܛܥܐ ܡܢ ܕܪ ܠܕܪ

¹⁰ ܚܟܡܬܗ ܢܬ̈ܢܝܢ ܟܢܘ̈ܫܬܐ ܘܬܫܒ̈ܚܬܗ ܢܐܡܪ ܥܡܐ

¹¹ ܐܢ ܢܨܒܐ ܒܐܠܦ ܢܫܬܒܚ ܘܐܢ ܢܫܬܘܩ ܒܥܡܐ ܙܥܘܪܐ

¹² ܐܣܬܟܠܘ ܘܐܡܪ ܝܘܠܦܢܝ ܐܝܟ ܣܗܪܐ ܒܝܘ̈ܡܝ ܬܪܥܣܪܐ

¹³ ܫܘܡܥܘܢܝ ܙܕܝܩ̈ܐ ܘܢܦܪܥ ܒܣܪܟܘܢ ܐܝܟ ܫܘܫ̈ܢܐ ܘܐܝܟ ܐܪ̈ܙܐ ܕܫܬܝܠܝܢ ܥܠ ܡܝ̈ܐ ܘܐܝܟ ܒܣ̈ܡܐ ܛ̈ܒܐ ܢܒܣܡ ܪܝܚܟܘܢ

¹⁴ ܐܝܟ ܪܝܚܐ ܕܠܒܢܢ ܒܐܪ̈ܙܘܗܝ ܘܐܝܟ ܥ̇ܩܪܐ ܕܫܘܫܢܬ ܡܠܟܐ ܐܪܝܡܘ ܩܠܟܘܢ ܘܫܒܚܘ ܐܟܚܕܐ ܘܐܘܕܘ ܠܐܠܗܐ ܥܠ ܟܠܗܘܢ ܥ̈ܒܕܘܗܝ

¹⁵ ܡܢܘ ܓܒܪܘܬܗ ܒܬܫܒ̈ܚܬܐ ܘܒܬܘܕܝܬܐ ܘܒܩܠܐ ܪܡܐ ܘܗܟܢܐ ܐܡܪܘ

¹⁶ ܟܠܗܘܢ ܥܒ̈ܕܘܗܝ ܕܐܠܗܐ ܝܐܝܢ ܐܟܚܕܐ ܘܟܠܗܘܢ ܠܨܒܘܬܗܘܢ ܐܬܒܪܝܘ

¹⁷ ܘܠܝܬ ܕܢܐܡܪ ܗܢܐ ܠܡܢܐ ܘܗܢܐ ܠܡܢܐ ܡܛܘܠ ܕܟܠܗܘܢ ܒܘܠܝܬܐ ܥܒܝܕܝܢ ܘܠܝܬ ܕܢܐܡܪ ܕܗܢܐ ܒܝܫ ܘܗܢܐ ܛܒ ܡܛܠ ܕܟܠܗܘܢ ܒܥܕܢܗܘܢ ܡܬܓܒܪܝܢ ܒܡܐܡܪܗ̣ ܡܕܢܚ ܫܡܫܐ ܘܒܡܐܡܪܗ ܗܘ ܡܥܪܒ ܠܗ

¹⁸ ܒܚܕܘܬܐ ܨܒܝܢܗ ܡܬܥܒܕ ܘܠܝܬ ܕܡܫܘܚܪ ܠܦܘܩܕܢܗ

¹⁹ ܥܒ̈ܕܝܗܘܢ ܕܟܠ ܒ̈ܢܝ ܒܣܪܐ ܠܩܘܒܠܗ ܘܠܝܬ ܕܛ̇ܫܐ ܡܢ ܩܕܡܘܗܝ

²⁰ ܠܝܬ ܕܩܠܝܠ ܘܣ̇ܓܝ ܩܕܡܘܗܝ ܘܠܝܬ ܕܥܫܝܢ ܘܩܫܐ ܠܩܘܒܠܗ

²² ܒܘܪܟܬܗ ܐܝܟ ܢܗܪܐ ܪܕܝܐ ܘܐܝܟ ܢܗܪܐ ܥܠܡ̈ܐ ܡܫܩܝܐ

²³ ܗܟܢܐ ܒܪܘܓܙܗ ܥܡܡ̈ܐ ܕܐܢ ܘܗ̇ܦܟ ܐܪܥܐ ܕܫܩܝܗܘܢ ܠܡܠܚܐ

²⁴ ܐܘܪ̈ܚܬܗܘܢ ܕܙܕܝܩ̈ܐ ܬܪ̈ܝܨܢ ܩܕܡ ܐܦܘ̈ܗܝ ܘܐܦ ܠܪ̈ܫܝܥܐ ܗ̈ܢܝܢ ܡܬ̈ܦܢܝܢ

²⁵ ܛܒܬܐ ܡܢ ܒܪܫܝܬ ܠܛܒ̈ܐ ܐܬܒܪܝܬ ܘܐܦ ܠܥܘ̈ܠܐ ܐܢ ܠܛܒ ܘܐܢ ܠܒܝܫ

²⁶ ܪܝܫ ܟܠܗܝܢ ܨܒܘ̈ܬܐ ܕܡܬ̈ܒܥܝܢ ܠܚܝ̈ܐ ܕܒܢܝܢ̈ܫܐ ܡܝ̈ܐ ܘܢܘܪܐ ܘܦܪܙܠܐ ܘܡܠܚܐ ܘܬܪܒܐ ܘܚܛܐ ܘܚܠܒܐ ܘܕܒܫܐ ܘܥܢܒܐ ܘܚܡܪܐ ܘܡܫܚܐ ܘܬܟܣܝܬܐ ܘܠܒܘܫܐ

²⁷ ܟܠܗܝܢ ܗܠܝܢ ܠܛܒ̈ܐ ܡܛܐ̈ܒܝܢ ܘܠܒܝ̣ܫ̈ܐ ܠܠܘܛܬܐ ܡܬܗ̈ܦܟܢ

²⁸ ܐܝܬ ܪܘܚܐ ܕܠܦܪ̈ܥܐ ܐܬܒܪܝ ܘܒܪܘܓܙܗܝܢ ܛܘܪ̈ܐ ܥܩܪ̈ܢ ܘܒܥܕܢ ܪܘܓܙܐ ܚܝܠܗܝܢ ܡܚܘܝܢ ܘܪܘܚܐ ܕܡ̇ܢ ܕܒܪܐ ܐ̈ܢܝܢ ܡܢܝ̈ܚܢ

²⁹ ܢܘܪܐ ܘܒܪܕܐ ܘܟܐ̈ܦܐ ܕܡܘܬܐ ܟܠܗܝܢ ܗܠܝܢ ܠܕܝܢܐ ܐܬܒܪܝ

³⁰ ܚܝܘܬ ܫܢܐ ܘܥܩܪ̈ܒܐ ܘܚܘ̈ܘܬܐ ܚܪܒܐ ܕܦܘܪܥܢܐ ܠܡܘܒܕܘ ܠܪ̈ܫܝܥܐ

³¹ ܒܥܕܢܐ ܕܦܩܕ ܠܗܘܢ ܚܕܝܢ ܘܟܘܠ ܝܘܡ̈ܝܗܘܢ ܠܐ ܡܥܒܪܝܢ ܡܠܬܗ

³² ܡܛܠ ܕܡܢ ܒܪܫܝܬ ܐܬܒܪܝܘ ܐܣܬܟܠܘ ܒܢܝ̈ܢܫܐ ܕܒܟܬܒܐ ܟܬ̈ܝܒܢ ܟܠܗܝܢ ܗܠܝܢ

³³ ܘܟܠܗܘܢ ܥܒܕ̈ܘܗܝ ܛ̇ܒܝܢ ܘܟܘܠ ܨܒܘ ܠܙܒܢܗ̇ ܐܬܒܪܝܬ

³⁴ ܘܠܝܬ ܕܢܐܡܪ ܗܢܐ ܒܝܫ ܡܢ ܗܢܐ ܡܛܠ ܕܟܠܗܘܢ ܩܦܝܣܝܢ ܒܐܘܨܪܐ ܘܠܥܕܢ ܙܒܢܗܘܢ ܡܬܓܒܪܝܢ

³⁵ ܡܟܝܠ ܒܟܘܠܗ ܠܒܟܘܢ ܒ̇ܪܟܘ ܠܐܠܗܐ ܘܫܒܚܘ ܠܫܡܗ