2 Samuele ܫܡܘܐܝܠ 8

¹ ܘܰܗܘܳܐ ܡܶܢ ܒܳܬܰܪܟܶܢ. ܘܰܡܚܳܐ ܕܰܘܺܝܕ ܠܰܦܠܶܫܬܳܝ̈ܶܐ. ܘܰܬܒܰܪ ܐܶܢܽܘܢ. ܘܰܢܣܰܒ ܕܰܘܺܝܕ ܠܪܳܡܰܬ ܓܳܡܳܐ ܡܶܢ ܦܠܶܫܬܳܝ̈ܶܐ.

² ܘܰܡܚܳܐ ܠܡܽܘܐܳܒܳܝ̈ܶܐ. ܘܰܡܫܰܚ ܐܶܢܽܘܢ ܒܚܰܒ̈ܠܶܐ. ܘܰܐܫܟܶܒ ܐܶܢܽܘܢ ܥܰܠ ܐܰܪܥܳܐ. ܘܰܡܫܰܚ ܬܪܶܝܢ ܚܰܒ̈ܠܺܝܢ ܠܡܶܩܛܰܠ. ܘܰܡܠܶܐ ܚܰܒܠܳܐ ܠܡܰܚܳܝܽܘ. ܘܰܗܘܰܘ ܡܽܘܐܳܒܳܝ̈ܶܐ ܥܰܒܕ̈ܶܐ ܠܕܰܘܺܝܕ ܡܩܰܖ̈ܒܰܝ ܩܽܘܖ̈ܒܳܢܶܐ.

³ ܘܰܡܚܳܐ ܕܰܘܺܝܕ ܠܰܗܕܰܪܥܙܰܪ ܒܰܪ ܪܳܚܽܘܒ ܡܰܠܟܳܐ ܕܨܽܘܒܳܐ. ܟܰܕ ܐܶܙܰܠ ܕܢܰܗܦܶܟ ܐܺܝܕܶܗ ܒܢܰܗܪܳܐ ܦܪܳܬ.

⁴ ܘܰܚܪܰܒ ܕܰܘܺܝܕ ܡܶܢܶܗ ܐܳܠܶܦ ܘܰܫܒܰܥܡܳܐܐ ܡܰܖ̈ܟܒܳܢ. ܘܥܶܣܪܺܝܢ ܐܰܠܦܺܝ̈ܢ ܓܰܒܖ̈ܺܝܢ ܖ̈ܶܓܠܳܝܺܝܢ. ܘܰܥܩܰܪ ܕܰܘܺܝܕ ܟܽܠܗܶܝܢ ܡܰܖ̈ܟܒܳܬܳܐ. ܘܰܫܒܰܩ ܡܶܢܗܶܝܢ ܡܳܐܐ ܡܰܖ̈ܟܒܳܢ.

⁵ ܘܶܐܬܳܬ ܐܰܕܽܘܡ ܘܕܰܪܡܣܽܘܩ ܠܰܡܥܰܕܳܪܽܘ ܠܰܗܕܰܪܥܙܰܪ ܡܰܠܟܳܐ ܕܨܽܘܒܳܐ. ܘܰܡܚܳܐ ܕܰܘܺܝܕ ܒܰܐܕܽܘܡ. ܥܶܣܪܺܝܢ ܘܰܬܪܶܝܢ ܐܰܠܦܺܝ̈ܢ.

⁶ ܘܰܐܩܺܝܡ ܕܰܘܺܝܕ ܩܳܝܽܘ̈ܡܶܐ ܒܰܐܕܽܘܡ ܘܰܒܕܰܪܡܣܽܘܩ. ܘܰܗܘܳܬ ܐܰܕܽܘܡ ܠܕܰܘܺܝܕ ܥܰܒܕ̈ܶܐ ܡܣ̈ܩܰܝ ܡܕܰܐܬܳܐ. ܘܰܦܪܰܩ ܡܳܪܝܳܐ ܠܕܰܘܺܝܕ ܠܟܪ ܕܶܐܙܰܠ.

⁷ ܘܰܢܣܰܒ ܕܰܘܺܝܕ ܫܳܠ̈ܛܶܐ ܕܕܰܗܒܳܐ ܕܺܐܝܬ ܗܘܰܘ ܥܰܠ ܥܰܒܕܰܘ̈ܗܝ ܕܰܗܕܰܪܥܙܰܪ.

⁸ ܘܰܢܣܰܒ ܡܰܠܟܳܐ ܕܰܘܺܝܕ ܢܚܳܫܳܐ ܣܽܘܓܳܐܐ ܕܛܳܒ. ܘܰܐܝܬܺܝ ܐܶܢܽܘܢ ܠܽܐܘܪܺܫܠܶܡ. ܡܶܢ ܛܒܰܚ. ܘܡܶܢ ܒܪܽܘܬܺܝ. ܩܽܘܖ̈ܳܝܗ ܕܰܗܕܰܪܥܙܰܪ.

⁹ ܘܰܫܡܰܥ ܬܽܘܥ ܡܰܠܟܳܐ ܕܰܚܡܳܬ. ܕܰܡܚܳܐ ܕܰܘܺܝܕ ܠܟܽܠܶܗ ܚܰܝܠܳܐ ܕܰܗܕܰܪܥܙܰܪ.

¹⁰ ܘܫܰܕܰܪ ܬܽܘܥ ܠܝܽܘܪܳܡ ܒܪܶܗ ܠܘܳܬ ܡܰܠܟܳܐ ܕܰܘܺܝܕ. ܕܢܶܫܐܰܠ ܒܰܫܠܳܡܶܗ ܘܰܢܒܰܪܟܺܝܘܗܝ. ܡܶܛܽܠ ܕܓܰܒܪܳܐ ܗܘܳܐ ܩܪܰܒܬܳܢܳܐ ܗܕܰܪܥܙܰܪ. ܘܰܢܣܰܒ ܒܺܐܝܕܶܗ ܝܽܘܪܳܡ ܒܰܪ ܬܽܘܥ. ܡܳܐܢܰܝ̈ ܟܶܣܦܳܐ ܘܡܳܐܢܰܝ̈ ܕܰܗܒܳܐ. ܘܡܳܐܢܰܝ̈ ܢܚܳܫܳܐ. ܘܰܐܝܬܺܝ ܠܕܰܘܺܝܕ.

¹¹ ܘܳܐܦ ܠܗܽܘܢ ܩܰܕܶܫ ܡܰܠܟܳܐ ܕܰܘܺܝܕ ܠܡܳܪܝܳܐ. ܥܰܡ ܟܶܣܦܳܐ ܘܕܰܗܒܳܐ ܕܩܰܕܶܫ ܡܶܢ ܟܽܠܗܽܘܢ ܥܰܡ̈ܡܶܐ ܕܰܟܒܰܫ.

¹² ܡܶܢ ܐܰܕܽܘܡ. ܘܡܶܢ ܡܽܘܐܳܒ. ܘܡܶܢ ܒܢܰܝ̈ ܥܰܡܽܘܢ. ܘܡܶܢ ܦܠܶܫܬܳܝ̈ܶܐ. ܘܡܶܢ ܥܰܡܠܩܳܝ̈ܶܐ. ܘܡܶܢ ܫܽܘܠܛܳܢܶܗ ܕܰܗܕܰܪܥܙܰܪ. ܒܰܪ ܪܳܚܽܘܒ ܡܰܠܟܳܐ ܕܨܽܘܒܳܐ.

¹³ ܘܰܥܒܰܕ ܬܰܡܳܢ ܕܰܘܺܝܕ ܩܪܳܒܳܐ ܟܰܕ ܗܦܰܟ. ܡܶܢ ܒܳܬܰܪ ܕܰܡܚܳܐ ܗܘܳܐ ܠܰܐܕܽܘܡ ܒܢܰܚܠܳܐ ܕܡܶܠܚܳܐ. ܘܰܚܪܰܒ ܬܡܳܢܬܰܥܣܰܪ ܐܰܠܦܺܝ̈ܢ.

¹⁴ ܘܰܐܩܺܝܡ ܕܰܘܺܝܕ ܩܳܝܽܘ̈ܡܶܐ ܒܟܽܠܳܗ̇ ܐܰܕܽܘܡ. ܘܰܗܘܰܘ ܟܽܠܗܽܘܢ ܐܰܕܽܘܡܳܝ̈ܶܐ ܥܰܒܕ̈ܶܐ ܠܕܰܘܺܝܕ. ܘܰܦܪܰܩ ܡܳܪܝܳܐ ܠܕܰܘܺܝܕ ܠܟܰܪ ܕܶܐܙܰܠ.

¹⁵ ܘܰܐܡܠܶܟ ܕܰܘܺܝܕ ܥܰܠ ܟܽܠܶܗ ܝܺܣܪܳܐܶܝܠ. ܘܰܗܘܳܐ ܕܰܘܺܝܕ ܥܳܒܶܕ ܕܺܝܢܳܐ ܘܙܰܕܺܝܩܽܘܬܳܐ ܥܰܠ ܟܽܠܶܗ ܥܰܡܶܗ.

¹⁶ ܘܝܽܘܐܳܒ ܒܰܪ ܨܽܘܪܺܝܳܐ ܥܰܠ ܚܰܝܠܳܐ ܘܝܽܘܫܳܦܳܛ ܒܰܪ ܐܰܚܺܝܠܽܘܕ ܡܥܰܗܕܳܢܳܐ.

¹⁷ ܘܨܳܕܽܘܩ ܒܰܪ ܐܰܚܺܝܛܽܘܒ ܓܶܠܝܽܘܢܳܝܳܐ. ܘܰܐܒܺܝܬܳܪ ܒܰܪ ܐܰܚܺܝܡܰܠܟ ܟܳܗ̈ܢܶܐ. ܘܰܫܪܳܝܳܐ ܣܳܦܪܳܐ.

¹⁸ ܘܰܒܢܳܝܳܐ ܒܰܪ ܝܽܘܝܳܕܰܥ ܥܰܠ ܚܺܐܖ̈ܶܐ ܘܥܰܠ ܦܳܠܚ̈ܶܐ. ܘܰܒܢܰܝ̈ ܕܰܘܺܝܕ ܪܰܘܖ̈ܒܺܝܢ ܗܘܰܘ.