2 Samuele ܫܡܘܐܝܠ 6

¹ ܘܟܰܢܶܫ ܬܽܘܒ ܕܰܘܺܝܕ ܠܟܽܠܗܽܘܢ ܓܰܕܽܘ̈ܕܶܐ ܕܺܝܣܪܳܐܶܝܠ ܬܠܳܬܺܝܢ ܐܰܠܦܺܝ̈ܢ.

² ܘܩܳܡ ܐܶܙܰܠ ܕܰܘܺܝܕ ܘܟܽܠܶܗ ܥܰܡܳܐ ܕܥܰܡܶܗ ܡܶܢ ܓܰܒܪܳܐ ܕܺܝܗܽܘܕܳܐ. ܘܶܐܙܰܠ ܠܰܓܒܰܥ ܠܡܰܣܳܩܽܘ ܡܶܢ ܬܰܡܳܢ ܠܳܐܪܽܘܢܶܗ ܕܰܐ‌ܠܳܗܳܐ. ܕܶܐܬܩܪܺܝ ܬܰܡܳܢ ܫܡܶܗ ܕܡܳܪܝܳܐ ܨܒܰܐܬ. ܝܳܬܶܒ ܥܰܠ ܟܖ̈ܽܘܒܶܐ.

³ ܘܣܳܡܽܘܗܝ ܠܳܐܪܽܘܢܶܗ ܕܰܐ‌ܠܳܗܳܐ ܥܰܠ ܥܓܶܠܬܳܐ ܚܕܰܬܳܐ. ܘܫܰܩܠܽܘܗܝ ܡܶܢ ܒܶܝܬ ܐܰܒܺܝܢܳܕܳܒ ܕܒܰܓܒܰܥܬܳܐ. ܘܥܳܐܙܳܐ ܘܰܐܚܝܳܐ ܒܢܰܝ̈ ܐܰܒܺܝܢܳܕܳܒ. ܡܕܰܒܪܺܝܢ ܠܰܥܓܶܠܬܳܐ ܒܰܐ̱ܚܪܳܝܬܳܐ.

⁴ ܘܫܰܩܠܽܘܗܝ ܡܶܢ ܒܶܝܬ ܐܰܒܺܝܢܳܕܳܒ ܕܒܰܓܒܰܥ ܠܳܐܪܽܘܢܶܗ ܕܰܐ‌ܠܳܗܳܐ. ܘܰܐܚܝܳܐ ܐܳܙܶܠ ܩܕܳܡ ܐܳܪܽܘܢܳܐ.

⁵ ܘܕܰܘܺܝܕ ܘܟܽܠܶܗ ܒܶܝـܬ ܝܺܣܪܳܐܶܝܠ. ܡܶܫܬܥܶܝܢ ܩܕܳܡ ܡܳܪܝܳܐ ܒܩܰܝ̈ܣܶܐ ܕܰܐܪܙܳܐ ܘܕܰܒܪܽܘܬܳܐ. ܘܰܒܟܶܢܳܖ̈ܶܐ ܘܰܒܩܺܝܬܳܖ̈ܶܐ. ܘܒܰܦ̈ܠܓܶܐ ܘܒܰܖ̈ܒܺܝܥܶܐ ܘܰܒܨܺܨ̈ܠܶܐ.

⁶ ܘܶܐܬܰܘ ܥܕܰܡܳܐ ܠܶܐܕܪܶܐ ܬܰܩܢ̈ܶܐ. ܘܰܐܘܫܶܛ ܥܳܐܙܳܐ ܐܺܝܕܶܗ ܥܰܠ ܐܳܪܽܘܢܶܗ ܕܡܳܪܝܳܐ ܘܶܐܚܰܕ ܒܶܗ. ܡܶܛܽܠ ܕܶܐܫܬܰܡܰܛܘ ܠܗܽܘܢ ܬܰܘܖ̈ܶܐ.

⁷ ܘܶܐܬܚܰܡܰܬ ܪܽܘܓܙܳܐ ܕܡܳܪܝܳܐ ܒܥܳܐܙܳܐ. ܘܰܡܚܳܝܗܝ ܬܰܡܳܢ ܡܳܪܝܳܐ. ܥܰܠ ܕܰܐܘܫܶܛ ܐܺܝܕܶܗ. ܘܡܺܝܬ ܬܰܡܳܢ ܠܘܳܬ ܐܳܪܽܘܢܶܗ ܕܰܐ‌ܠܳܗܳܐ.

⁸ ܘܶܐܬܶܒܐܶܫ ܠܕܰܘܺܝܕ ܥܰܠ ܕܰܬܪܰܥ ܡܳܪܝܳܐ ܬܽܘܪܰܥܬܳܐ ܒܥܳܐܙܳܐ. ܘܰܩܪܳܝܗܝ ܠܰܐܬܪܳܐ ܗܰܘ. ܬܽܘܪܰܥܬܳܐ ܕܥܳܐܙܳܐ ܥܕܰܡܳܐ ܠܝܰܘܡܳܢܳܐ.

⁹ ܘܰܕܚܶܠ ܕܰܘܺܝܕ ܡܶܢ ܩܕܳܡ ܡܳܪܝܳܐ ܒܝܰܘܡܳܐ ܗܰܘ. ܘܶܐܡܰܪ. ܐܰܝܟܰܢܳܐ ܐܰܥܶܠ ܠܘܳܬܝ ܠܳܐܪܽܘܢܶܗ ܕܡܳܪܝܳܐ.

¹⁰ ܘܠܳܐ ܨܒܳܐ ܕܰܘܺܝܕ ܠܡܰܥܳܠܽܘ ܠܘܳܬܶܗ ܠܳܐܪܽܘܢܶܗ ܕܰܐ‌ܠܳܗܳܐ. ܠܰܩܪܺܝܬܶܗ ܕܕܰܘܺܝܕ. ܘܰܐܣܛܝܶܗ ܕܰܘܺܝܕ ܠܒܶܝܬ ܥܽܘܒܳܪ ܐܰܕܽܘܡ ܓܳܬܳܝܳܐ.

¹¹ ܘܺܝܬܶܒ ܐܳܪܽܘܢܶܗ ܕܡܳܪܝܳܐ ܒܶܝܬ ܥܽܘܒܳܪ ܐܰܕܽܘܡ ܓܳܬܳܝܳܐ ܬܠܳܬܳܐ ܝܰܖ̈ܚܺܝܢ. ܘܒܰܪܶܟ ܡܳܪܝܳܐ ܠܥܽܘܒܳܪ ܐܰܕܽܘܡ ܓܳܬܳܝܳܐ. ܘܰܠܟܽܠܶܗ ܒܰܝܬܶܗ. ܡܶܛܽܠ ܐܳܪܽܘܢܶܗ ܕܡܳܪܝܳܐ.

¹² ܘܚܰܘܺܝܘ ܠܡܰܠܟܳܐ ܕܰܘܺܝܕ. ܘܶܐܡܰܪܘ ܠܶܗ. ܕܒܰܪܶܟ ܡܳܪܝܳܐ ܠܥܽܘܒܳܪ ܐܰܕܽܘܡ. ܘܰܠܟܽܠ ܕܺܐܝܬ ܠܶܗ. ܡܶܛܽܠ ܐܳܪܽܘܢܶܗ ܕܡܳܪܝܳܐ. ܘܶܐܙܰܠ ܕܰܘܺܝܕ ܘܰܐܣܶܩ ܠܳܐܪܽܘܢܶܗ ܕܡܳܪܝܳܐ ܡܶܢ ܒܶܝܬ ܥܽܘܒܳܪ ܐܰܕܽܘܡ. ܠܰܩܪܺܝܬܶܗ ܕܕܰܘܺܝܕ ܒܚܰܕܽܘܬܳܐ.

¹³ ܘܰܗܘܳܐ ܕܟܰܕ ܗܰܠܶܟܘ ܫܩܺܝ̈ܠܰܝ ܐܳܪܽܘܢܶܗ ܕܡܳܪܝܳܐ ܫܶܬ ܦܣܳܥ̈ܳܢ. ܕܰܒܰܚ ܬܰܘܖ̈ܶܐ ܡܦܰܛ̈ܡܶܐ.

¹⁴ ܘܕܰܘܺܝܕ ܡܫܰܒܰܚ ܒܟܽܠ ܥܽܘܫܢܳܐ ܩܕܳܡ ܡܳܪܝܳܐ. ܘܕܰܘܺܝܕ ܠܒܺܝܫ ܗܘܳܐ ܦܶܕܬܳܐ ܕܒܽܘܨܳܐ.

¹⁵ ܘܕܰܘܺܝܕ ܘܟܽܠܶܗ ܝܺܣܪܳܐܶܝܠ. ܡܰܣܩܺܝܢ ܠܳܐܪܽܘܢܶܗ ܕܡܳܪܝܳܐ. ܒܝܽܘܒܳܒܳܐ ܘܰܒܩܳܠܳܐ ܕܫܺܝܦܽܘܪܳܐ.

¹⁶ ܘܰܗܘܳܐ ܐܳܪܽܘܢܶܗ ܕܡܳܪܝܳܐ ܒܒܰܝܬܶܗ ܕܕܰܘܺܝܕ. ܘܡܰܠܟܶܠ ܒܰܪܬ ܫܳܐܘܳܠ ܐܰܕܺܝܩܰܬ ܡܶܢ ܟܰܘܬܳܐ. ܘܰܚܙܳܬ ܠܡܰܠܟܳܐ ܕܰܘܺܝܕ ܕܚܳܕܶܐ ܘܡܶܫܬܥܶܐ ܩܕܳܡ ܡܳܪܝܳܐ. ܘܒܰܣܪܰܬ ܥܠܰܘܗܝ ܒܠܶܒܳܗ̇.

¹⁷ ܘܰܐܝܬܝܽܘܗ̇ ܠܩܺܐܒܽܘܬܶܗ ܕܡܳܪܝܳܐ. ܘܰܐܩܺܝܡܽܘܗ̇ ܒܓܰܘ ܡܰܫܟܢܳܐ ܕܰܢܩܰܫ ܠܳܗ̇ ܕܰܘܺܝܕ. ܘܰܐܣܶܩ ܕܰܘܺܝܕ ܥܠܰܘ̈ܳܬܳܐ ܩܕܳܡ ܡܳܪܝܳܐ ܘܫܰܠ̈ܡܶܐ.

¹⁸ ܘܟܰܕ ܫܰܠܶܡ ܕܰܘܺܝܕ ܠܡܰܣܳܩܽܘ ܥܠܰܘ̈ܳܬܳܐ ܘܫܰܠ̈ܡܶܐ ܠܡܳܪܝܳܐ. ܒܰܪܶܟ ܠܥܰܡܳܐ ܒܰܫܡܶܗ ܕܡܳܪܝܳܐ ܚܰܝܠܬܳܢܳܐ.

¹⁹ ܘܦܰܠܶܓ ܠܟܽܠܶܗ ܥܰܡܳܐ ܠܟܽܠܶܗ ܟܶܢܫܳܐ ܕܺܝܣܪܳܐܶܝܠ. ܡܶܢ ܓܰܒܪܳܐ ܘܰܥܕܰܡܳܐ ܠܰܐܢ̱ܬܬܳܐ. ܓܪܺܝܨܬܳܐ ܚܕܳܐ ܕܠܰܚܡܳܐ. ܘܢܶܩܣܳܐ ܚܰܕ. ܘܰܣܢܳܪܩܳܐ ܚܰܕ. ܘܶܐܙܰܠܘ ܟܽܠܶܗ ܥܰܡܳܐ ܐ̱ܢܳܫ ܠܒܰܝܬܶܗ.

²⁰ ܘܰܗܦܰܟ ܕܰܘܺܝܕ ܠܡܶܐܬܳܐ ܠܒܰܝܬܶܗ. ܘܢܶܦܩܰܬ ܡܰܠܟܶܠ ܒܰܪܬ ܫܳܐܘܳܠ ܠܽܐܘܪܥܶܗ ܕܕܰܘܺܝܕ. ܘܶܐܡܪܰܬ. ܡܳܐ ܝܰܩܺܝܪ ܝܰܘܡܳܢܳܐ ܡܰܠܟܳܐ ܕܺܝܣܪܳܐܶܝܠ. ܕܶܐܬܓܠܺܝ ܝܰܘܡܳܢܳܐ ܠܥܺܝܢ ܐܰܡ̈ܗܳܬܳܐ ܕܥܰܒܕܰܘ̈ܗܝ. ܡܶܬܓܠܳܝܽܘ ܐܶܬܓܠܺܝ ܐܰܝܟ ܚܰܕ ܡܶܢ ܣܖ̈ܺܝܩܶܐ.

²¹ ܘܶܐܡܰܪ ܕܰܘܺܝܕ ܠܡܰܠܟܶܠ. ܩܕܳܡ ܡܳܪܝܳܐ ܕܰܨܒܳܐ ܒܺܝ ܡܶܢ ܐܰܒܽܘܟܝ ܘܡܶܢ ܟܽܠܶܗ ܒܰܝܬܶܗ. ܘܦܰܩܕܰܢܝ ܕܶܐܗܘܶܐ ܡܕܰܒܪܳܢܳܐ ܥܰܠ ܥܰܡܶܗ ܕܡܳܪܝܳܐ. ܥܰܠ ܝܺܣܪܳܐܶܝܠ. ܡܶܛܽܠ ܗܰܘ ܗܽܘ ܓܶܚܟܶܬ ܩܕܳܡ ܡܳܪܝܳܐ.

²² ܘܰܒܨܺܝܪ ܗܘܺܝܬ ܽܘܒ ܡܶܢ ܗܳܕܶܐ. ܘܰܗܘܺܝܬ ܫܦܰܠ ܒܥܰܝܢܰܝ̈ ܢܰܦܫܝ. ܕܥܰܡ ܐܰܡ̈ܗܳܬܳܐ ܕܶܐܡܰܪܬܝ. ܥܰܡܗܶܝܢ ܐܶܬܝܰܩܰܪ.

²³ ܘܰܠܡܰܠܟܶܠ ܒܰܪܬ ܫܳܐܘܳܠ ܠܳܐ ܗܘܳܐ ܠܳܗ̇ ܝܰܠܕܳܐ ܥܕܰܡܳܐ ܠܝܰܘܡܳܐ ܕܡܺܝܬܰܬ.