2 Samuele ܫܡܘܐܝܠ 9

¹ ܘܐܡܪ ܕܘܝܕ ܐܝܬ ܟܝ ܐܢܫ ܕܐܫܬܚܪ ܡܢ ܕܒܝܬ ܫܐܘܠ ܐܥܒܕ ܥܠܘܗܝ ܪ̈ܚܡܐ ܡܛܠ ܝܘܢܬܢ

² ܘܠܒܝܬ ܫܐܘܠ ܐܝܬ ܗܘܐ ܥܒܕܐ ܘܫܡܗ ܨܝܒܐ ܘܩܪܐܘܗܝ ܠܘܬ ܕܘܝܕ ܘܐܡܪ ܠܗ ܡܠܟܐ ܐܢܬ ܗܘ ܨܝܒܐ ܘܐܡܪ ܐܢܐ ܥܒܕܟ

³ ܘܐܡܪ ܠܗ ܡܠܟܐ ܐܝܬ ܬܘܒ ܐܢܫ ܡܢ ܕܒܝܬ ܫܐܘܠ ܐܥܒܕ ܥܠܘܗܝ ܪ̈ܚܡܐ ܡܛܠ ܐܠܗܐ ܘܐܡܪ ܨܝܒܐ ܠܡܠܟܐ ܩܝܡ ܒܪܐ ܠܝܘܢܬܢ ܘܡܣܪ̈ܚܢ ܪ̈ܓܠܘܗܝ

⁴ ܐܡܪ ܠܗ ܡܠܟܐ ܐܝܟܘ ܐܡܪ ܨܝܒܐ ܠܡܠܟܐ ܗܐ ܒܝܬ ܡܟܝܪ ܗ̣ܘ ܒܪ ܓܡܝܠ ܡܢ ܠܘܕܒܪ

⁵ ܘܫܕܪ ܡܠܟܐ ܘܕܒܪܗ ܡܢ ܒܝܬ ܡܟܝܪ ܒܪ ܓܡܝܠ ܡܢ ܠܘܕܒܪ

⁶ ܘܐܬܐ ܡܦܝܒܫܬ ܒܪ ܝܘܢܬܢ ܒܪ ܫܐܘܠ ܠܘܬ ܕܘܝܕ ܘܢܦܠ ܥܠ ܐ̈ܦܘܗܝ ܘܣܓܕ ܘܐܡܪ ܠܗ ܕܘܝܕ ܡܦܝܒܫܬ ܘܐܡܪ ܐܬܐ ܥܒܕܟ

⁷ ܐܡܪ ܠܗ ܕܘܝܕ ܠܐ ܬܕܚܠ ܡܛܠ ܕܥܒܕ ܐܢܐ ܥܡܟ ܛܝܒܘܬܐ ܡܛܠ ܝܘܢܬܢ ܐܒܘܟ ܘܡܦܢܐ ܐܢܐ ܠܟ ܟܠܗܝܢ ܚܩ̈ܠܬܐ ܕܫܐܘܠ ܐܒܘܟ ܘܐܢܬ ܬܗܘܐ ܐܟ̇ܠ ܠܚܡܐ ܥܠ ܦܬܘܪܝ ܐܡܝܢܐܝܬ

⁸ ܘܣܓܕ ܘܐܡܪ ܡܢܐ ܚܫܝܒ ܥܒܕܟ ܕܚܪܬ ܒܝ ܕܐܝܟ ܟܠܒܐ ܐܢܐ ܡܝܬܐ

⁹ ܘܩܪܐ ܡܠܟܐ ܠܨܝܒܐ ܘܐܡܪ ܠܗ ܟܠ ܕܐܝܬ ܗܘܐ ܠܫܐܘܠ ܘܠܟܠܗ ܒܝܬܗ ܝܗܒܬ ܠܒܪ ܡܪ̈ܝܟ

¹⁰ ܘܬܦܠܘܚ ܠܗ ܐܪܥܐ ܐܢܬ ܘܒܢܝ̈ܟ ܘܥܒ̈ܕܝܟ ܘܬܥܠ ܠܒܪ ܡܪ̈ܝܟ ܠܚܡܐ ܘܢܐܟܘܠ ܘܡܦܝܒܫܬ ܒܪ ܡܪ̈ܝܟ ܢܗܘܐ ܐܟ̇ܠ ܠܚܡܐ ܥܠ ܦܬܘܪܝ ܐܡܝܢܐܝܬ ܘܠܨܝܒܐ ܐܝܬ ܗܘܐ ܠܗ ܚܡܫܬܥܣܪ̈ ܒܢܝ̈ܢ ܘܥܣܪ̈ܝܢ ܥܒ̈ܕܝܢ

¹¹ ܘܐܡܪ ܨܝܒܐ ܠܡܠܟܐ ܟܠ ܕܦܩܕ ܡܪܝ ܡܠܟܐ ܠܥܒܕܗ ܗܟܢܐ ܥܒܕ ܥܒܕܟ ܘܡܦܝܒܫܬ ܐܟܠ ܗܘܐ ܠܚܡܐ ܥܠ ܦܬܘܪܗ ܕܡܠܟܐ ܐܝܟ ܚܕ ܡܢ ܒܢ̈ܝ ܡܠܟܐ

¹² ܘܠܡܦܝܒܫܬ ܐܝܬ ܗܘܐ ܠܗ ܒܪܐ ܙܥܘܪܐ ܘܫܡܗ ܡܝܟܐ ܘܟܠܗ ܝܬܒܐ ܕܒܝܬ ܨܝܒܐ ܗܘܘ ܥܒ̈ܕܐ ܕܡܦܝܒܫܬ

¹³ ܘܡܦܝܒܫܬ ܝܬܒ ܗܘܐ ܒܐܘܪܫܠܡ ܡܛܠ ܕܥܠ ܦܬܘܪܐ ܕܡܠܟܐ ܐܡܝܢܐܝܬ ܠܥܣ ܗܘܐ ܘܡܣܪ̈ܚܢ ܗ̈ܘܝ ܬܪ̈ܬܝܗܝܢ ܪ̈ܓܠܘܗܝ