2 Samuele ܫܡܘܐܝܠ 5

¹ ܘܶܐܬܰܘ ܟܽܠܗܽܘܢ ܫܰܒ̈ܛܶܐ ܕܒܶܝܬ ܝܺܣܪܳܐܶܝܠ ܠܘܳܬ ܕܰܘܺܝܕ ܠܚܶܒܪܽܘܢ. ܘܶܐܡܰܪܘ ܠܶܗ. ܗܳܐ ܒܶܣܪܳܟ ܚܢܰܢ ܘܓܰܪܡܳܟ.

² ܐܳܦ ܡܶܢ ܐܶܬܡܳܠܝ ܘܳܐܦ ܡܶܢ ܡܢܳܬܡܳܠܝ ܟܰܕ ܫܳܐܘܳܠ ܗܘܳܐ ܡܰܠܟܳܐ ܥܠܰܝܢ. ܐܰܢ̱ܬ ܗܽܘ ܡܰܦܶܩ ܗܘܰܝܬ ܘܡܰܥܶܠ ܠܺܝܣܪܳܐܶܝܠ. ܘܶܐܡܰܪ ܠܳܟ ܡܳܪܝܳܐ ܕܰܐܢ̱ܬ ܬܶܪܥܶܐ ܠܥܰܡܝ ܝܺܣܪܳܐܶܝܠ. ܘܰܐܢ̱ܬ ܬܶܗܘܶܐ ܡܕܰܒܪܳܢܳܐ ܥܰܠ ܥܰܡܝ ܝܺܣܪܳܐܶܝܠ.

³ ܘܶܐܬܰܘ ܟܽܠܗܽܘܢ ܣܳܒ̈ܶܐ ܕܺܝܣܪܳܐܶܝܠ ܠܘܳܬ ܡܰܠܟܳܐ ܠܚܶܒܪܽܘܢ. ܘܰܐܩܺܝܡ ܠܗܽܘܢ ܡܰܠܟܳܐ ܕܰܘܺܝܕ ܒܚܶܒܪܽܘܢ ܩܝܳܡܳܐ ܩܕܳܡ ܡܳܪܝܳܐ. ܘܰܡܫܰܚܘ ܠܕܰܘܺܝܕ ܕܢܰܡܠܶܟ ܥܰܠ ܝܺܣܪܳܐܶܝܠ.

⁴ ܒܰܪ ܬܠܳܬܺܝܢ ܗܘܳܐ ܫܢܺܝ̈ܢ ܕܰܘܺܝܕ ܟܰܕ ܐܰܡܠܶܟ. ܘܰܐܪܒܥܺܝܢ ܫܢܺܝ̈ܢ ܐܰܡܠܶܟ.

⁵ ܒܚܶܒܪܽܘܢ ܐܰܡܠܶܟ ܥܰܠ ܕܒܶܝܬ ܝܺܗܽܘܕܳܐ. ܫܒܰܥ ܫܢܺܝ̈ܢ ܘܶܫܬܳܐ ܝܰܖ̈ܚܺܝܢ. ܘܒܽܐܘܪܺܫܠܶܡ ܐܰܡܠܶܟ ܬܠܳܬܺܝܢ ܘܰܬܠܬ ܫܢܺܝ̈ܢ ܥܰܠ ܟܽܠܶܗ ܝܺܣܪܳܐܶܝܠ ܘܺܝܗܽܘܕܳܐ.

⁶ ܘܶܐܙܰܠ ܡܰܠܟܳܐ ܕܰܘܺܝܕ ܘܓܰܒܖ̈ܰܘܗܝ ܒܽܐܘܪܺܫܠܶܡ. ܥܰܠ ܝܳܒܽܘܣܳܝ̈ܶܐ. ܝܳܬܒܰܝ̈ ܐܰܪܥܳܐ. ܘܶܐܡܰܪܘ ܠܕܰܘܺܝܕ ܠܡܺܐܡܰܪ. ܠܳܐ ܬܶܥܽܘܠ ܠܗܳܪܟܳܐ. ܐܶܠܳܐ ܐܶܢ ܐܰܥܒܰܪܬ ܥܘܺܝܖ̈ܶܐ ܘܰܚܓܺܝܖ̈ܶܐ. ܘܶܐܡܰܪܘ ܠܳܐ ܢܶܥܽܘܠ ܕܰܘܺܝܕ ܠܗܳܪܟܳܐ.

⁷ ܘܶܐܚܰܕ ܕܰܘܺܝܕ ܠܡܶܨܪܽܘܬ ܨܶܗܝܽܘܢ. ܗܺܝ ܗܺܝ̣ ܩܪܺܝܬܶܗ ܕܕܰܘܺܝܕ.

⁸ ܘܶܐܡܰܪ ܕܰܘܺܝܕ ܒܝܰܘܡܳܐ ܗܰܘ. ܟܽܠ ܕܡܳܚܶܐ ܠܝܳܘܒܽܣܳܝ̈ܶܐ. ܘܩܳܪܶܒ ܒܣܰܟܪܳܐ ܠܰܥܘܺܝܪܳܐ ܘܠܰܚܓܺܝܪܳܐ. ܣܳܢܶܐ ܢܰܦܫܶܗ ܕܕܰܘܺܝܕ. ܡܶܛܽܠ ܗܳܢܳܐ ܐܳܡܪܺܝܢ. ܥܘܺܝܪܳܐ ܘܰܚܓܺܝܪܳܐ ܠܳܐ ܢܶܥܽܘܠ ܠܒܰܝܬܳܐ.

⁹ ܘܺܝܬܶܒ ܕܰܘܺܝܕ ܒܡܶܨܪܽܘܬ ܗܺܝ ܗܺܝ ܨܶܗܝܽܘܢ. ܘܰܩܪܳܗ̇ ܩܪܺܝܬܶܗ ܕܕܰܘܺܝܕ. ܘܰܒܢܳܐ ܕܰܘܺܝܕ ܚܕܳܖ̈ܶܝܗ̇ ܡܶܢ ܠܓܰܘ.

¹⁰ ܘܕܰܘܺܝܕ ܐܳܙܶܠ ܘܝܳܪܶܒ. ܘܡܳܪܝܳܐ ܐܰܠܳܗܶܗ ܨܒܰܐܬ ܥܰܡܶܗ.

¹¹ ܘܫܰܕܰܪ ܚܺܝܪܳܡ ܡܰܠܟܳܐ ܕܨܽܘܪ ܐܺܝܙܓܰܕ̈ܶܐ ܠܘܳܬ ܕܰܘܺܝܕ. ܘܩܰܝ̈ܣܶܐ ܕܰܐܖ̈ܙܶܐ. ܐܘܡܳܢ̈ܶܐ ܕܩܰܝܣܳܐ. ܐܘܡܳܢ̈ܶܐ ܕܟܺܐܦܳܐ ܕܶܐܣܬܳܐ. ܘܰܒܢܰܘ ܒܰܝܬܳܐ ܠܕܰܘܺܝܕ.

¹² ܘܺܝܕܰܥ ܕܰܘܺܝܕ ܕܰܐܬܩܢܶܗ ܡܳܪܝܳܐ ܡܰܠܟܳܐ ܥܰܠ ܝܺܣܪܳܐܶܝܠ. ܘܶܐܬܬܪܺܝܡܰܬ ܡܰܠܟܽܘܬܶܗ ܥܰܠ ܥܰܡܶܗ ܝܺܣܪܳܐܶܝܠ.

¹³ ܘܰܢܣܰܒ ܬܽܘܒ ܕܰܘܺܝܕ ܕܖ̈ܽܘܟܳܬܳܐ ܘܢܶܫ̈ܶܐ ܡܶܢ ܐܽܘܪܺܫܠܶܡ. ܡܶܢ ܒܳܬܰܪ ܕܶܐܬܳܐ ܡܶܢ ܚܶܒܪܽܘܢ ܘܶܐܬܺܝܠܶܕܘ ܠܕܰܘܺܝܕ ܬܽܘܒ ܒܢܰܝ̈ܳܐ ܘܰܒܢ̈ܳܬܳܐ.

¹⁴ ܘܗܳܠܶܝܢ ܫܡܳܗ̈ܶܐ ܕܰܒܢܰܝ̈ܳܐ. ܕܶܐܬܺܝܠܶܕܘ ܠܶܗ ܒܽܐܘܪܺܫܠܶܡ. ܫܳܡܽܘܥ. ܘܫܳܒܽܘܒ. ܘܢܳܬܳܢ. ܘܰܫܠܶܝܡܽܘܢ.

¹⁵ ܘܝܽܘܟܳܒܳܪ. ܘܶܐܠܺܝܫܳܥ. ܘܰܢܦܳܓ. ܘܰܢܦܺܝܠ.

¹⁶ ܘܶܐܠܺܝܫܡܰܥ. ܘܶܐܠܺܝܕܰܥ. ܘܶܐܠܺܝܦܠܰܛ.

¹⁷ ܘܰܫܡܰܥܘ ܦܠܶܫܬܳܝ̈ܶܐ ܕܰܡܫܰܚܘ ܠܕܰܘܺܝܕ ܕܢܰܡܠܶܟ ܥܰܠ ܝܺܣܪܳܐܶܝܠ. ܘܰܣܠܶܩܘ ܟܽܠܗܽܘܢ ܦܠܶܫܬܳܝ̈ܶܐ ܠܡܶܒܥܳܐ ܠܕܰܘܺܝܕ. ܘܰܫܡܰܥ ܕܰܘܺܝܕ. ܘܰܢܚܶܬ ܠܶܗ ܠܡܶܨܪܽܘܬ.

¹⁸ ܘܰܦܠܶܫܬܳܝ̈ܶܐ ܐܶܬܰܘ ܫܪܰܘ ܒܥܽܘܡܩܳܐ ܕܓܰܢ̱ܒܳܖ̈ܶܐ.

¹⁹ ܘܰܫܐܶܠ ܕܰܘܺܝܕ ܒܡܳܪܝܳܐ. ܘܶܐܡܰܪ. ܐܶܣܰܩ ܥܰܠ ܦܠܶܫܬܳܝ̈ܶܐ. ܡܰܫܠܶܡ ܐܰܢ̱ܬ ܠܗܽܘܢ ܒܺܐܝ̈ܕܰܝ. ܘܶܐܡܰܪ ܠܶܗ ܡܳܪܝܳܐ. ܣܰܩ. ܡܶܛܽܠ ܕܒܺܐܝܕܰܝ̈ܟ ܡܰܫܠܶܡ ܐ̱ܢܳܐ ܠܗܽܘܢ.

²⁰ ܘܶܐܬܳܐ ܕܰܘܺܝܕ ܠܰܒܥܶܠ ܦܰܪܨܺܝܡ. ܘܰܡܚܳܐ ܐܶܢܽܘܢ ܬܰܡܳܢ ܕܰܘܺܝܕ. ܘܶܐܡܰܪ ܕܰܘܺܝܕ. ܬܪܰܥ ܡܳܪܝܳܐ ܠܰܒܥܶܠܕܒܳܒܰܘ̈ܗܝ ܩܕܳܡܰܝ ܐܰܝܟ ܬܽܘܪܥܬܳܐ ܕܡܰܝ̈ܳܐ. ܡܶܛܽܠ ܗܳܢܳܐ ܩܪܳܐ ܫܡܶܗ ܕܰܐܬܪܳܐ ܗܰܘ ܒܥܶܠ ܦܰܪܨܺܝܡ.

²¹ ܘܰܫܒܰܩܘ ܬܰܡܳܢ ܦܬܰܟܖ̈ܰܝܗܽܘܢ. ܘܰܫܩܰܠܘ ܐܶܢܽܘܢ ܕܰܘܺܝܕ ܘܓܰܒܖ̈ܰܘܗܝ.

²² ܘܰܐܘܣܶܦܘ ܬܽܘܒ ܦܠܶܫܬܳܝ̈ܶܐ ܠܡܶܣܰܩ. ܘܰܫܪܰܘ ܒܥܽܘܡܩܳܐ ܕܓܰܢ̱ܒܳܖ̈ܶܐ.

²³ ܘܰܫܐܶܠ ܕܰܘܺܝܕ ܒܡܳܪܝܳܐ. ܘܶܐܡܰܪ ܠܶܗ ܡܳܪܝܳܐ. ܠܳܐ ܬܶܣܰܩ. ܐܶܠܳܐ ܗܦܽܘܟ ܠܳܟ ܡܶܢ ܒܶܣܬܰܪܗܽܘܢ. ܘܬܳܐ ܥܠܰܝܗܽܘܢ ܡܶܢ ܠܽܘܩܒܰܠ ܒܳܐܟܺܝܡ.

²⁴ ܘܡܳܐ ܕܰܫܡܰܥܬ ܩܳܠܳܐ ܕܗܶܠܰܟܬܳܐ ܒܪܺܝܫܶܗ ܕܛܽܘܪܳܐ ܕܒܳܐܟܺܝܡ. ܗܳܝܕܶܝܢ ܬܶܬܥܰܫܰܢ. ܡܶܛܽܠ ܕܗܳܝܕܶܝܢ ܢܳܦܶܩ ܡܳܪܝܳܐ ܩܕܳܡܰܝܟ. ܠܡܶܡܚܳܐ ܠܡܰܫܪܺܝܬܳܐ ܕܰܦܠܶܫ̈ܬܳܝܶܐ.

²⁵ ܘܰܥܒܰܕ ܕܰܘܺܝܕ ܗܳܟܰܢܳܐ ܐܰܝܟܰܢܳܐ ܕܦܰܩܕܶܗ ܡܳܪܝܳܐ. ܘܰܡܚܳܐ ܠܰܦܠܶܫܬܳܝ̈ܶܐ ܡܶܢ ܓܒܰܥ ܘܰܥܕܰܡܳܐ ܠܡܰܥܠܳܢܳܐ ܕܓܳܕܳܪ.