2 Samuele ܫܡܘܐܝܠ 23

¹ܗܠܝܢ ܡ̈ܠܘܗܝ ܕܕܘܝܕ ܐܚܪ̈ܝܬܐ ܐܡܪ ܕܘܝܕ ܒܪ ܐܝܫܝ ܐܡܪ ܓܒܪܐ ܕܐܩܝܡ ܢܝܪܐ ܕܡܫܝܚܗ ܘܐܠܗܗ ܕܝܥܩܘܒ ܡܒܣܡ ܙܡܝܪ̈ܬܗ ܕܐܝܣܪܝܠ²ܪܘܚܗ ܕܡܪܝܐ ܡܠܠܬ ܒܝ ܘܡܠܬܗ ܥܠ ܠܫܢܝ³ܐܡܪ ܐܠܗܐ ܕܐܝܣܪܝܠ ܘܠܝ ܐܡܪ ܬܩܝܦܐ ܕܐܝܣܪܝܠ ܕܫܠܝܛ ܒܐܢܫܐ ܙܕܝܩ̈ܐ ܕܫܠܝܛ ܒܕܚ̈ܠܐ ܕܐܠܗܐ⁴ܐܝܟ ܢܘܗܪܐ ܕܨܦܪܐ ܡܐ ܕܕܢܚ ܫܡܫܐ ܨܦܪܐ ܕܠܐ ܥܢ̈ܢܐ ܡܢ ܢܘܓܗܐ ܘܡܢ ܡܛܪܐ ܕܡܫܘܚ ܐܪܥܐ⁵ܠܐ ܗܘܐ ܗܟܢܐ ܒܝܬܝ ܥܡ ܐܠܗܐ ܘܩܝܡܐ ܕܥܠܡܐ ܣܡ ܠܝ ܘܡܛܝܒ ܟܠ ܡܕܡ ܘܢܛܝܪ ܡܛܠ ܕܟܠܗ ܨܒܝܢܝ ܘܟܠܗ ܦܘܩܕܢܝ ܗܘܝܘ ܡܫܠܡ⁶ܘܥܘ̈ܠܐ ܐܝܟ ܟܘܒ̈ܐ ܩܫ̈ܝܐ ܟܠܗܘܢ ܡܛܠ ܕܠܐ ܗܘܐ ܒܐܝܕܐ ܡܬܢܣܒܝܢ ܟܘܠܗܘܢ⁷ܘܓܒܪܐ ܡܐ ܕܩܪܒ ܠܗܘܢ ܒܫܘܝܐ ܗܘ ܕܢܪܓܐ ܘܒܦܪܙܠܐ ܡܟܢܫ ܠܗܘܢ ܘܝܩܕܝܢ ܒܢܘܪܐ ܠܢܝܚܬܐ⁸ܘܗܠܝܢ ܫܡ̈ܗܐ ܕܓܒܪ̈ܐ ܕܕܘܝܕ ܝܬ̇ܒ ܒܡܘܬܒܐ ܩܕܡܝܐ ܒܕܪܓܐ ܬܠܝܬܝܐ ܫܡܗ ܓܕܚܘ ܓܒܪܐ ܕܢܚܬ ܘܩܛܠ ܬܡܢܡܐܐ ܩ̈ܛܝܠܝܢ ܒܫܥܬܐ ܚܕܐ⁹ܒܬܪܗ ܐܠܝܥܙܪ ܒܪ ܐܚܘܗܝ ܕܐܒܘܗܝ ܟܕ ܢܚܬ ܒܬܠܬܐ ܓܒܪ̈ܝܢ ܥܡ ܕܘܝܕ ܟܕ ܚܣܕܘ ܐܢܘܢ ܦܠܫ̈ܬܝܐ ܘܐܬܟܢܫܘ ܬܡܢ ܠܡܥܒܕ ܩܪܒܐ ܘܣܠܩܘ ܓܒܪ̈ܐ ܕܐܝܣܪܐܝܠ¹⁰ܘܗܘ ܩܡ ܘܚܪܒ ܒ̈ܦܠܫܬܝܐ ܥܕܡܐ ܕܠܐܝܬ ܐܝܕܗ ܘܕܒܩܬ ܐܝܕܗ ܒܐܣܬܩܐ ܕܣܝܦܗ ܘܥܒܕ ܡܪܝܐ ܦܘܪܩܢܐ ܒܝܘܡܐ ܗܘ ܘܥܡܐ ܗܦܟ ܒܬܪܗ ܠܡܚܠܨܘ ܩ̈ܛܝܠܐ¹¹ܒܬܪܗ ܩܡ ܫܡܐ ܒܪ ܐܓܐ ܡܢ ܛܘܪ ܡܠܟܐ ܟܕ ܐܬܟܢܫܘ ܦܠܫܬ̈ܝܐ ܠܡܒܙ ܚܝܘܬܐ ܘܗܘܬ ܬܡܢ ܐܫܟܪܐ ܚܕܐ ܕܙܪܝܥܐ ܛܠܦܚ̈ܐ ܘܥܡܐ ܥܪܩܘ ܡܢ ܩܕܡ ܦܠܫܬ̈ܝܐ¹²ܘܩܡ ܗܘ ܒܓܘ ܚܩܠܐ ܘܦܨܝ ܚܝܘܬܐ ܘܚܪܒ ܠܦܠܫ̈ܬܝܐ ܘܥܒܕ ܡܪܝܐ ܦܘܪܩܢܐ ܪܒܐ ܒܐܝܕܗ¹³ܘܢܚܬܘ ܬܠܬܐ ܡܢ ܓܒܪ̈ܐ ܘܐܬܘ ܒܙܒܢܐ ܕܚܨܕܐ ܠܘܬ ܕܘܝܕ ܠܡܥܪܬܐ ܕܥܪܠܡ ܘܚܝܘܬܐ ܕܦܠܫܬ̈ܝܐ ܫܪܝܐ ܗܘܬ ܒܦܩܥܬܐ ܕܓܢܒܪ̈ܐ¹⁴ܘܕܘܝܕ ܫܪܐ ܗܘܐ ܗܝܕܝܢ ܒܡܨܪܘܬ ܘܪ̈ܘܪܒܢܐ ܕܦܠܫܬ̈ܝܐ ܫܪܝܢ ܗܘܘ ܒܝܬ ܠܚܡ¹⁵ܘܐܬܪܓܪܓ ܕܘܝܕ ܘܐܡܪ ܨܒܐ ܗܘܝܬ ܡ̇ܢ ܕܢܫܩܝܢܝ ܡ̈ܝܐ ܡܢ ܓܘܒܐ ܪܒܐ ܕܐܝܬ ܒܝܬ ܠܚܡ ܩܪܝܬܐ¹⁶ܘܒܙܥܘ ܬܠܬܐ ܓܒܪ̈ܝܢ ܡܫܪ̈ܝܬܗܘܢ ܕܦܠܫܬ̈ܝܐ ܘܡܠܘ ܡ̈ܝܐ ܡܢ ܓܘܒܐ ܪܒܐ ܕܐܝܬ ܒܝܬ ܠܚܡ ܩܪܝܬܐ ܘܫܩܠܘ ܘܐܝܬܝܘ ܠܕܘܝܕ ܘܠܐ ܨܒܐ ܠܡܫܬܐ ܐܢܘܢ ܘܢܣܟ ܐܢܘܢ ܩܕܡ ܡܪܝܐ¹⁷ܘܐܡܪ ܚܣ ܠܝ ܡܢ ܩܕܡ ܡܪܝܐ ܕܐܥܒܕ ܗܕܐ ܥܠ ܕܡܐ ܕܢܦܫܬ̈ܗܘܢ ܐܙܠܘ ܓܒܪ̈ܐ ܗܠܝܢ ܘܠܐ ܨܒܐ ܕܢܫܬܐ ܐܢܘܢ ܗܠܝܢ ܥܒܕܘ ܬܠܬܐ ܓܒܪ̈ܝܢ¹⁸ܘܐܒܝܫܝ ܐܚܘܗܝ ܕܝܘܐܒ ܒܪ ܨܘܪܝܐ ܗܘ ܗܘܐ ܪܝܫܐ ܕܬܠܬܝܢ ܓܒܪ̈ܝܢ ܘܗܘ ܫܡܛ ܪܘܡܚܐ ܥܠ ܬܠܬܡܐܐ ܩ̈ܛܝܠܝܢ¹⁹ܘܡܢ ܬܠܬܝܢ ܡܝܩܪ ܗܘܐ ܘܗܘܐ ܥܠܝܗܘܢ ܪܝܫܐ ܘܢܨܚܢܐ ܐܝܟ ܬܠܬܝܢ ܥܒܕ ܗܘܐ²⁰ܒܢܝܐ ܒܪ ܝܘܝܕܥ ܓܒܪܐ ܓܢܒܪ ܚܝܠܐ ܕܫܦܝܪ̈ܝܢ ܗܘܘ ܥܒ̈ܕܘܗܝ ܡܢ ܩܒܨܝܠ ܘܗܘ ܩܛܠ ܠܬܪ̈ܝܢ ܓܢܒܪ̈ܝܢ ܕܡܘܐ̈ܒܝܐ ܘܗܘ ܢܚܬ ܘܩܛܠ ܠܐܪܝܐ ܒܓܘ ܥܒܐ ܒܝܘܡܐ ܕܬܠܓܐ²¹ܘܗܘ ܩܛܠ ܠܓܒܪܐ ܡܨܪܝܐ ܠܓܒܪܐ ܫܦܝܪ ܚܙܘܐ ܘܒܐܝܕܗ ܕܡܨܪܝܐ ܐܝܬ ܗܘܬ ܪܘܡܚܐ ܘܢܚܬ ܥܠܘܗܝ ܗܘ ܒܚܘܛܪܐ ܘܢܣܒܗ̇ ܠܪܘܡܚܐ ܡܢ ܐܝܕܗ ܕܡܨܪܝܐ ܘܩܛܠܗ ܒܪܘܡܚܗ²²ܗܠܝܢ ܥܒܕ ܒܢܝܐ ܒܪ ܝܘܝܕܥ ܘܠܗ ܐܝܬ ܗܘܐ ܫܡܐ ܘܢܨܚܢܐ ܒܬܠܬܝܢ ܓܒܪ̈ܝܢ²³ܘܢܨܚܢܐ ܐܝܟ ܬܠܬܝܢ ܥܒܕ ܗܘܐ ܘܥܒܕܗ ܕܘܝܕ ܠܡܦܩ ܘܠܡܥܠ²⁴ܥܫܐܝܠ ܐܚܘܗܝ ܕܝܘܐܒ ܒܬܠܬܝܢ ܓܒܪ̈ܝܢ²⁵ܫܡܐ ܕܡܢ ܛܘܪ ܡܠܟܐ²⁶ܚܠܨ ܕܡܢ ܦܠܛ ܥܝܪܐ ܒܪ ܥܩܝܣ ܕܡܢ ܬܩܘܥ²⁷ܐܒܝܥܙܪ ܕܡܢ ܥܢܬܘܬ ܡܒܢܝ ܕܡܢ ܚܘܫܬ²⁸ܨܠܡܘܢ ܕܡܢ ܛܘܪ ܒܝܬܐ ܡܗܪ ܕܡܢ ܛܘܦܬ²⁹ܚܠܒ ܒܪ ܒܥܢܐ ܕܡܢ ܢܛܘܦܬ ܐܬܝ ܒܪ ܪܒܝ ܡܢ ܪܡܬܐ ܕܒܢܝ̈ ܒܢܝܡܝܢ³⁰ܒܢܝܐ ܒܪ ܦܪܥܬܘܢ ܕܡܢ ܓܒܥ ܚܕܝ ܕܡܢ ܢܚܝܠܓܫ³¹ܐܒܝ ܒܪ ܐܒܝܥܠܡܘܢ ܕܡܢ ܓܠܥܕ ܥܪܒܘܬ ܕܡܢ ܚܘܪܝܡ³²ܐܠܚܢܐ ܕܡܢ ܫܥܠܒ ܝܘܢܬܢ ܕܡܢ ܒܝܬ ܢܫܘܪ³³ܫܡܐ ܕܡܢ ܛܘܪ ܙܝ̈ܬܐ ܐܚܝܡ ܒܪ ܐܫܕܕ ܕܡܢ ܐܕܪܝ³⁴ܐܠܝܦܠܛ ܒܪ ܚܘܣܒܝ ܕܡܢ ܡܥܟܬ ܐܠܝܥܡ ܒܪ ܐܚܝܬܘܦܝܠ ܓܠܝܘܢܝܐ³⁵ܚܨܪܝ ܕܡܢ ܛܘܪ ܟܪܡܠܐ ܥܕܝ ܕܡܢ ܐܪܘܒ³⁶ܢܓܐܝܠ ܒܪ ܢܬܢ ܕܡܢ ܨܒܐ ܒܥܢܐ ܕܡܢ ܓܕ³⁷ܨܠܩ ܕܡܢ ܥܡܘܢ ܢܚܕܝ ܕܡܢ ܒܪܘܬܝ ܫܩ̇ܠ ܡܐ̈ܢܐ ܕܙܝܢܗ ܕܝܘܐܒ ܒܪ ܨܘܪܝܐ³⁸ܚܝܪܐ ܕܡܢ ܝܬܝܪ ܥܪܒ ܕܡܢ ܠܟܝܫ³⁹ܐܘܪܝܐ ܚܬܝܐ ܟܠܗܘܢ ܥܒ̈ܕܘܗܝ ܕܕܘܝܕ ܒܡܢܝܢܐ ܬܠܬܝܢ ܘܫܒܥܐ

Cambia Bibbia

Confronta con un'altra Bibbia

Versetti esaminati