Lamentationes 5

VULGATA	NOVA VULGATA
1 Recordare, Domine, quid acciderit nobis ; intuere et respice opprobrium nostrum.	1 Recordare, Domine, quid acci derit nobis; intuere et respice opprobrium nostrum.
2 Hæreditas nostra versa est ad alienos, domus nostræ ad extraneos.	2 Hereditas nostra versa est ad alienos, domus nostrae ad extraneos.
3 Pupilli facti sumus absque patre, matres nostræ quasi viduæ.	3 Pupilli facti sumus absque patre, matres nostrae quasi viduae.
4 Aquam nostram pecunia bibimus ; ligna nostra pretio comparavimus.	4 Aquam nostram pecunia bibimus, ligna nostra pretio comparamus.
5 Cervicibus nostris minabamur, lassis non dabatur requies.	5 Iugum in cervicibus nostris minamur; lassis non datur requies.
6 Ægypto dedimus manum et Assyriis, ut saturaremur pane.	6 Aegyptiis dedimus manum et Assyriis, ut saturaremur pane.
7 Patres nostri peccaverunt, et non sunt : et nos iniquitates eorum portavimus.	7 Patres nostri peccaverunt et non sunt, et nos iniquitates eorum portamus.
8 Servi dominati sunt nostri : non fuit qui redimeret de manu eorum.	8 Servi dominantur nostri; non est qui redimat de manu eorum.
9 In animabus nostris afferebamus panem nobis, a facie gladii in deserto.	9 Vitae nostrae periculo afferimus panem nobis a facie gladii in deserto.
10 Pellis nostra quasi clibanus exusta est, a facie tempestatum famis.	10 Pellis nostra quasi clibanus exusta est propter aestum famis.
11 Mulieres in Sion humiliaverunt, et virgines in civitatibus Juda.	11 Mulieres in Sion humiliaverunt et virgines in civitatibus Iudae.
12 Principes manu suspensi sunt ; facies senum non erubuerunt.	12 Principes manu eorum suspensi sunt; facies senum honorem non habuerunt.
13 Adolescentibus impudice abusi sunt, et pueri in ligno corruerunt.	13 Adulescentes molam portaverunt, et pueri sub lignis corruerunt.
14 Senes defecerunt de portis, juvenes de choro psallentium.	14 Senes deficiunt de portis, iuvenes de choro psallentium.
15 Defecit gaudium cordis nostri ; versus est in luctum chorus noster.	15 Defecit gaudium cordis nostri; versus est in luctum chorus noster.
16 Cecidit corona capitis nostri : væ nobis, quia peccavimus !	16 Cecidit corona capitis nostri; vae nobis, quia peccavimus!
17 Propterea mœstum factum est cor nostrum ; ideo contenebrati sunt oculi nostri,	17 Propterea maestum factum est cor nostrum, ideo contenebrati sunt oculi nostri,
18 propter montem Sion quia disperiit ; vulpes ambulaverunt in eo.	18 propter montem Sion, quia desolatus est: vulpes ambulant in eo.
19 Tu autem, Domine, in æternum permanebis, solium tuum in generationem et generationem.	19 Tu autem, Domine, in aeternum permanebis, solium tuum in generationem et generationem.
20 Quare in perpetuum oblivisceris nostri, derelinques nos in longitudine dierum ?	20 Quare in perpetuum oblivisceris nostri, derelinques nos in longitudinem dierum?
21 Converte nos, Domine, ad te, et convertemur ; innova dies nostros, sicut a principio.	21 Converte nos, Domine, ad te, et convertemur; innova dies nostros sicut a principio.
22 Sed projiciens repulisti nos : iratus es contra nos vehementer.	22 Ergone proiciens reppulisti nos, iratus es contra nos vehementer?