Paralipomenon I 14

¹Misit quoque Hiram rex Tyri nuntios ad David et ligna cedrina et artifices parietum lignorumque, ut aedificarent ei domum.²Cognovitque David quod confirmasset eum Dominus in regem super Israel et sublevatum esset regnum suum propter populum eius Israel.
³Accepit quoque David alias uxores in Ierusalem genuitque filios et filias;⁴et haec nomina eorum, qui nati sunt ei in Ierusalem: Samua et Sobab, Nathan et Salomon,⁵Iebahar et Elisua et Eliphalet,⁶Noga quoque et Napheg et Iaphia,⁷Elisama et Beeliada et Eliphalet.
⁸Audientes autem Philisthim quod unctus esset David in regem super universum Israel, ascenderunt omnes, ut quaererent eum; quod cum audisset David, egressus est obviam eis.⁹Porro Philisthim venientes diffusi sunt in valle Raphaim.¹⁰Consuluitque David Deum dicens: “ Si ascendam contra Philisthaeos, et si trades eos in manu mea? ”. Et dixit ei Dominus: “ Ascende, et tradam eos in manu tua ”.¹¹Cumque illi ascendissent in Baalpharasim, percussit eos ibi David et dixit: “ Dirupit Deus inimicos meos per manum meam sicut dirumpuntur aquae ”. Et idcirco vocatum est nomen loci illius Baalpharasim (id est Dominus diruptionum).¹²Dereliqueruntque ibi deos suos, quos David iussit exuri.
¹³Alia etiam vice Philisthim irruerunt et diffusi sunt in valle;¹⁴consuluitque rursum David Deum, et dixit ei Deus: “ Non ascendas post eos; circumdabis eos et venies contra illos ex adverso arborum celthium;¹⁵cumque audieris sonitum gradientis in cacumine arborum celthium, tunc egredieris ad bellum; egressus est enim Deus ante te, ut percutias castra Philisthim ”.¹⁶Fecit ergo David, sicut praeceperat ei Deus, et percussit castra Philisthinorum de Gabaon usque Gazer.¹⁷Divulgatumque est nomen David in universis regionibus, et Dominus dedit pavorem eius super omnes gentes.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati