Siracide ܝܫܘܥ ܒܪ ܐܣܝܪܐ 19

Peshitta	Библия Синодальный перевод
1 ܦܥܠܐ ܪܘܝܐ ܠܐ ܢܥܬܪ ܘܕܪ̇ܚܡ ܒܣܪܐ ܢܐܪܬ ܡܣܟܢܘܬܐ
2 ܚܡܪܐ ܘܐܢܬܬܐ ܡܦܚܙܝܢ ܠܒܐ ܘܕܡܬܕܒܩ ܠܙܢܝܬܐ ܢܐܒܕ
3 ܢܦܫܐ ܚܨܝܦܬܐ ܬܘܒܕ ܡܪܗ̇
4 ܘܕܡܗܝܡܢ ܒܥܓܠ ܚܣܝܪ ܪܥܝܢܐ ܗܘ ܕܡܚܛܐ ܢܦܫܗ ܡܢܘ ܢܙܟܝܘܗܝ
5 ܘܕܚ̇ܕܐ ܥܠ ܒܝܫܬܐ ܢܗܘܐ ܬܒܪܗ
6 ܕܬ̇ܢܐ ܡܠܬܐ ܚܣܝܪ ܪܥܝܢܐ ܗܘ
7 ܠܥܠܡ ܠܐ ܬܬܢܐ ܡܠܬܐ ܘܐܢܫ ܠܐ ܢܚܣܕܟ
8 ܒܪܚܡܐ ܘܒܣܢܐܐ ܠܐ ܬܕܓܠ ܘܐܢ ܐܝܬ ܠܟ ܚܛܗ̈ܐ ܒܥܝ ܥܠܝܗܘܢ ܘܠܥܠܡ ܩܪ̈ܨܐ ܕܐܢܫ ܠܐ ܬܐܟܘܠ
9 ܕܠܐ ܡ̇ܢ ܕܫܡܥ ܢܣܢܝܟ ܘܐܝܟ ܣܪܘܚܐ ܢܚܫܒܟ
10 ܫܡܥ̣ܬ ܡܠܬܐ ܬܡܘܬ ܒܠܒܟ ܠܐ ܗܘܬ ܓܐܪܐ ܕܬܒܙܥܟ ܘܬܦܘܩ
11 ܡܢ ܩܕܡ ܡܠܬܐ ܡܚܒܠ ܣܟܠܐ ܐܝܟ ܕܡܚܒܠܐ ܝܠܕܬܐ ܡܢ ܩܕܡ ܥܘܠܗ̇
12 ܐܝܟ ܓܐܪܐ ܕܡܚܐ ܒܚܪܘܬܗ ܕܓܒܪܐ ܗܟܢܐ ܡܠܬܐ ܒܡܥ̈ܘܗܝ ܕܣܟܠܐ
13 ܐܟܣ ܪܚܡܟ ܕܠܐ ܢܥܒܕ ܕܒܝܫ ܘܐܢ ܥܒܕ ܕܠܐ ܢܘܣܦ
14 ܐܟܣ ܩܪܝܒܟ ܕܠܐ ܢܐܡܪ ܘܐܢ ܐܡܪ ܕܠܐ ܢܬܢܐ
15 ܐܟܣ ܪܚܡܟ ܡܛܠ ܕܟܡܐ ܙܒܢܝܢ ܗ̇ܘܐ ܡܐܟܠ ܩܪܨܐ ܣܪܝܩܐ ܘܠܐ ܠܟܠ ܡܠܐ ܢܗܝܡܢ ܠܒܟ
16 ܐܝܬ ܓܝܪ ܕܚ̇ܛܐ ܘܠܐ ܡܢ ܠܒܗ ܘܐܝܬ ܕܡܬܬܩܠ ܘܠܐ ܒܠܫܢܗ
17 ܐܟܣ ܠܒܝܫܐ ܕܠܣ̈ܓܝܐܐ ܛܠܡ ܘܠܐ ܠܟܘܠ ܡܠܐ ܬܗܝܡܢܝܘܗܝ
20 ܡ̈ܠܐ ܕܢܒܝܘܬܐ ܘܟܠ ܚܟܡܬܐ ܕܚܠܬܗ ܕܡܪܝܐ
21 ܘܕܚܠܬܗ ܕܐܠܗܐ ܗ̣ܝ ܗܝ ܚܟܡܬܐ
22 ܠܝܬ ܚܟܝܡܐ ܕܒܝܫ ܘܠܝܬ ܬܪܥܝܬܐ ܕܚܛܝ̈ܐ ܕܣܟܘܠܬܢܝܐ
23 ܐܝܬ ܥܪܝܡܘܬܐ ܕܒ̇ܪܝܐ ܚܛܗ̈ܐ ܘܐܝܬ ܣܟܠܐ ܕܚܣܝܪ ܚܛܗ̈ܐ
24 ܐܝܬ ܚܣܝܪ ܡܕܥܐ ܕܡܬܦܨܐ ܡܢ ܚܛܗ̈ܐ ܘܐܝܬ ܝܬܝܪ ܡܕܥܐ ܕܚ̇ܛܐ
25 ܐܝܬ ܕܥܪܝܡ ܘܨܒܐ ܠܡܕܓܠܘ ܘܡܬܥܩܡ ܠܡܓܠܐ ܕܝܢܐ
26 ܐܝܬ ܕܡܬܚܙܐ ܐܝܟ ܡܟܝܟܐ ܘܐܝܟ ܬܒܝܪ ܢܦܫܐ ܘܓܘ ܠܒܗ ܡܠ̣ܐ ܢܟܠܐ
27 ܐܝܬ ܕܡܪ̈ܟܢܢ ܐܦܘ̈ܗܝ ܘܡܬܪܥܐ ܒܝܫܬܐ ܘܒܐܬܪ ܕܠܐ ܝܕܥܝܢ ܠܗ ܩ̇ܪܝܢ ܠܗ ܟܐܢܐ
28 ܐܝܬ ܕܡܛܠ ܕܠܝܬ ܒܗ ܚܝܠܐ ܡܬܟܠܐ ܡܢ ܕܠܡܚܛܐ ܘܐܢ ܡܫܟܚ ܠܡܒܐܫܘ ܡܒܐܫ