Siracide ܝܫܘܥ ܒܪ ܐܣܝܪܐ 15

Peshitta	Miqra 'al pi ha-Mesorah
1 ܕܕ̇ܚܠ ܠܐܠܗܐ ܢܥܒܕ ܗܟܢܐ ܘܕܝ̇ܠܦ ܢܡܘܣܐ ܢܗ̇ܠܟ ܒܗ̇
2 ܘܬܩܒܠܝܘܗܝ ܐܝܟ ܐܡܐ ܘܐܝܟ ܐܢܬܬ ܥܠܝܡܘܬܐ ܬܩܪܒܝܘܗܝ
3 ܘܬܘܟܠܝܘܗܝ ܠܚܡܐ ܕܚܟܡܬܐ ܘܡ̈ܝܐ ܕܣܟܘܠܬܢܘܬܐ ܬܫܩܝܘܗܝ
4 ܘܢܣܬܡܟ ܥܠܝܗ̇ ܘܠܐ ܢܦܠ ܘܥܠܝܗ̇ ܢܬܬܟܠ ܘܠܐ ܢܒܗܬ
5 ܘܬܪܝܡܝܘܗܝ ܡܢ ܟܠܗܘܢ ܚܒܪ̈ܘܗܝ ܘܒܓܘ ܟܢܘܫܬܐ ܬܦܬܚ ܦܘܡܗ
6 ܚܕܘܬܐ ܘܪܘܙܐ ܬܡܠܝܘܗܝ ܘܫܡܐ ܕܥܠܡܐ ܬܘܪܬܝܘܗܝ
7 ܠܐ ܢܗܠܟܘܢ ܒܗ̇ ܚ̈ܬܝܐ ܘܐܢ̈ܫܐ ܥܘ̈ܠܐ ܠܐ ܢܚܙܘܢܗ̇
8 ܪܚܝܩܐ ܗܝ ܡܢ ܡܪ̈ܘܕܐ ܘܕܐܡܪܝܢ ܒܝܫܬܐ ܠܐ ܢܕܪܟܘܢܗ̇
9 ܠܐ ܗܘܬ ܝܐܝܐ ܒܦܘܡܐ ܕܥܘ̈ܠܐ ܡܛܠ ܕܠܐ ܗܘܐ ܡܢ ܩܕܡ ܐܠܗܐ ܐܬܝܗܒܬ ܠܗܘܢ
10 ܒܦܘܡܐ ܕܚܟܝ̈ܡܐ ܬܬܐܡܪ ܬܫܒܘܚܬܐ ܘܕܫܠܝܛ ܒܗ̇ ܢܐܠܦܝܗ̇
11 ܠܐ ܬܐܡܪ ܕܡܢ ܩܕܡ ܐܠܗܐ ܣܪܚܬ ܘܚܛܝܬ ܡܛܠ ܕܡܕܡ ܕܣܢܐ ܠܐ ܥ̣ܒܕ
12 ܕܠܡܐ ܬܐܡܪ ܕܗܘ ܐܬܩܠܢܝ ܠܝܬ ܠܗ ܓܝܪ ܗܢܝܢܐ ܒܒܪ ܐܢܫܐ ܥܘܠܐ
13 ܟܘܠ ܒܝܫܬܐ ܘܡܪܚܘܬܐ ܣܢܐ ܘܠܐ ܢܬܠ ܐ̈ܢܝܢ ܠܪ̈ܚܡܘܗܝ
14 ܐܠܗܐ ܡܢ ܒܪܫܝܬ ܒܪܐ ܒܢܝܢ̈ܫܐ ܘܐܫܠܡ ܐܢܘܢ ܒܝܕ ܝܨܪܗܘܢ
15 ܐܢ ܬܨܒܐ ܬܛܪ ܦܘܩܕ̈ܢܘܗܝ ܘܐܢ ܬܗܝܡܢ ܒܗ̇ ܐܦ ܐܢܬ ܬܚܐ
16 ܫܒܝܩܝܢ ܩܕܡܝܟ ܢܘܪܐ ܘܡ̈ܝܐ ܒܐܝܢܐ ܕܨܒܐ ܐܢܬ ܐܘܫܛ ܐܝܕܟ
17 ܐܬܝܗܒܘ ܓܝܪ ܠܒܢ̈ܝܢܫܐ ܚܝ̈ܐ ܘܡܘܬܐ ܕܢܓܒܘܢ ܚܝ̈ܐ ܘܢܫܒܩܘܢ ܡܘܬܐ
18 ܡܛܠ ܕܓܢܒܪܐ ܗܝ ܚܟܡܬܗ ܕܐܠܗܐ ܘܬܩܝܦ ܓܒܪ̈ܘܬܐ ܗܘ
19 ܘܟܠ ܡܕܡ ܥ̈ܝܢܘܗܝ ܚ̈ܙܝܢ ܘܚܟܡ ܟܠܗܘܢ ܬܪ̈ܥܝܬܗܘܢ ܕܒܢܝ̈ܢܫܐ
20 ܠܐ ܦܩܕ ܠܒܢ̈ܝ ܐܢܫܐ ܕܢܚܛܘܢ ܘܠܐ ܐܡܪ ܠܒ̈ܢܝ ܒܣܪܐ ܕܢܥܘܠܘܢ ܘܠܐ ܡܪܚܡ ܥܠ ܥܒ̈ܕܝ ܫܘܩܪܐ