Sapienza ܚܟܡܬܐ 15

1 2 3 4 5 6 7 8 9 10 11 12 13 14 15 16 17 18 19
Versetti esaminati

1ܐܢܬ ܕܝܢ ܐܠܗܢ ܒܣܝܡܐ ܐܢܬ ܘܚܣܝܐ ܘܢܓܝܪܐ ܪܘܚܟ ܘܣܓܝܐܐ ܛܝܒܘܬܟ ܘܠܟܠ ܡܬܪܣܐ ܐܢܬ2ܘܐܢ ܢܣܟܠ ܕܝܠܟ ܚܢܢ ܕܚܢܢ ܝܕܥܝܢܢ ܬܘܩܦܟ ܒܪܡ ܕܝܢ ܠܐ ܡܣܟܠܝܢܢ ܕܠܟ ܚܫܝܒܝܢܢ3ܙܕܝܩܘܬܐ ܡܫܡܠܝܬܐ ܕܐܢܫ ܢܕܥܟ ܘܕܐܢܫ ܢܕܥ ܫܪܪܟ ܥܩܪܐ ܗܘ ܕܠܐ ܡܐܬ4ܠܐ ܐܛܥܝܘܢ ܥܒܕ ܐ̈ܝܕܝܗܘܢ ܕܒܢ̈ܝ ܐܢܫܐ ܪܝܩܢܘܬܗܘܢ ܛܠܠܐ ܕܟܬ̈ܒܝܗܘܢ ܠܐܘܬܐ ܕܐ̈ܝܕܝܗܘܢ ܠܝܬ ܒܗ̇ ܦܐܪ̈ܐ ܚ̈ܙܘܐ ܣܪ̈ܝܩܐ ܘܕܡ̈ܘܬܐ ܕܡܬܚ̈ܠܦܢ5ܩܕܡ ܐ̈ܦܝܗܘܢ ܕܦܟܝ̈ܗܐ ܗܝ ܚܒܝܒܐ ܕܨܒܝܢ ܒܨܒ̈ܘܬܐ ܡܝ̈ܬܬܐ ܙܝܘܐ ܕܠܝܬ ܒܗ ܪܘܚܐ6ܦܥ̈ܠܐ ܐܢܘܢ ܒܝ̈ܫܐ ܘܠܗܢܐ ܗܘ ܣܒܪܐ ܫܘܝܢ ܐܝܠܝܢ ܕܡܬܟܬܫܝܢ ܒܗܘܢ ܘܪܚܡܝܢ ܠܗܘܢ ܘܕܚܠܝܢ ܠܗܘܢ7ܗܐ ܓܝܪ ܦܚܪܐ ܕܐܫ ܛܝܢܐ ܪܓܝܐ ܒܠܐܘܬܐ ܘܓܒܠ ܡܢܗ ܡܐ̈ܢܐ ܠܚܘܫܚܐ ܡܢܗ ܡܢ ܛܝܢܐ ܥܒܕ ܡܐ̈ܢܐ ܕܕܟܝܢ ܠܬܫܡܫܬܐ ܘܡܐ̈ܢܐ ܕܠܐ ܕܟܝܢ ܠܥܒܕܗܘܢ ܘܗܘ ܥܒܕ ܦܚܪܐ ܡܦܪܫ ܚܕ ܚܕ ܠܬܫܡܫܬܗ8ܘܒܐܘܡܢܘܬܐ ܒܝܫܬܐ ܓܒܠ ܡܢܗ ܐܠܗܐ ܠܣܪܝܩܘܬܐ ܠܗ̇ܘ ܕܡܢ ܩܕܡ ܩܠܝܠ ܡܢ ܐܪܥܐ ܐܦܩܗ ܘܒܬܪ ܩܠܝܠ ܠܐܪܥܐ ܗܦܟ ܘܬܒܥܝܢ ܠܗ ܚܘܒܬܐ ܕܢܦܫܐ9ܘܗܘܝܐ ܠܗ ܨܦܬܐ ܕܠܐ ܡܫܟܚ ܕܢܠܐܐ ܘܠܐ ܗܘܐ ܡܛܠ ܕܗܘܐ ܥܘܡܪܗ ܩܠܝܠ ܐܘ ܣܓܝ ܐܠܐ ܥܘܡܪܐ ܐܒܝܕܐ ܕܕܗܒܐ ܘܕܟܣܦܐ ܘܕܢܚܫܐ ܘܡܕܡܝܢ ܘܥܒܕܝܢ ܠܗ ܒܛܢܦܘܬܐ ܘܡܩܝܡܝܢ ܠܗ ܒܫܘܒܚܐ10ܩܛܡܐ ܗܘ ܠܒܗ ܘܥܦܪܐ ܣܒܪܗ ܛܝܢܐ ܕܨܥܪܐ ܥܘܡܪܗ11ܕܠܐ ܝܕܥ ܠܗ̇ܘ ܕܓܒܠܗ ܘܢܦܫܐ ܓܡܝܪܬܐ ܐܪܡܝ ܒܗ ܘܪܘܚܐ ܕܚ̈ܝܐ ܢܦܚ ܒܗ12ܘܚܫܒܘܗܝ ܥܘܡܪܐ ܕܚܝ̈ܝܗܘܢ ܓܘܚܟܐ ܘܥܘܡܪܗܘܢ ܐܝܟ ܙܒܢܐ ܘܙܒܝܢܬܐ ܕܬܓܪܐ ܘܟܠܗ̇ ܬܐܓܘܪܬܗ ܒܒܝܫܬܐ13ܘܗܘ ܝܬܝܪ ܡܢ ܟܠ ܝܕܥ ܕܡܣܟܠ ܗ̇ܘ ܕܡܢ ܗܘܠܐ ܕܥܦܪܐ ܥܒܕ ܓܠܝܦ̈ܐ ܘܫܡܫ ܐܢܘܢ14ܟܠܗܘܢ ܫܝܛܝܢ ܘܕܘܝܢ ܘܥܠ ܢܦܫܗ ܕܙܥܘܪܐ ܣܢܐ̈ܘܗܝ ܕܥܡܟ ܡܬܚܝܠܝܢ ܥܠܘܗܝ15ܡܛܠ ܕܚܫܒܘ ܟܘܠܗܘܢ ܦܬܟܪ̈ܝܗܘܢ ܕܥܡ̈ܡܐ ܐ̈ܠܗܝܢ ܕܠܐ ܚ̈ܙܝܢ ܥܝܢ̈ܝܗܘܢ ܚܫܚܘ ܐܦ ܠܐ ܢܚܝܪ̈ܝܗܘܢ ܡܪ̈ܝܚܝܢ ܐܐܪ ܘܠܐ ܐ̈ܕܢܝܗܘܢ ܫܡ̈ܥܢ ܘܨܒ̈ܥܬܐ ܕܐ̈ܝܕܝܗܘܢ ܠܐ ܪ̈ܚܫܢ ܘܒܛܝ̈ܠܢ ܪ̈ܓܠܝܗܘܢ ܡܢ ܗܠܟܬܐ16ܡܛܠ ܕܒܪ ܐܢܫܐ ܥܒܕ ܐܢܘܢ ܘܪܘܚܐ ܕܙܐܦܐ ܓܒܠܬ ܐܢܘܢ ܘܐܢܫ ܡܢܗܘܢ ܠܐ ܡܫܟܚ ܕܢܥܒܕ ܐܠܗܐ ܐܝܟ ܒܪ ܐܢܫܐ17ܐܢܫܐ ܗܘ ܡܝܘܬܐ ܘܥܒܕ ܡܝ̈ܬܐ ܒܐ̈ܝܕܝܐ ܚ̈ܛܝܬܐ ܘܗܘ ܡܝܬܪ ܗܘ ܡܢ ܕܚܠܬܗ ܕܗܘ ܡܫܟܚ ܕܢܚܐ ܘܗܢܘܢ ܠܐ ܡܫܟܚܝܢ18ܘܐܦ ܠܚܝ̈ܘܬܐ ܛܢ̈ܦܬܐ ܕܚܠܝܢ ܒܫܛܝܘܬܐ ܘܗܠܝܢ ܒܝܫ̈ܝܢ ܡܢ ܗܠܝܢ19ܕܐܬܪܓܪܓܘ ܠܚܙܘܐ ܕܚܝ̈ܘܬܐ ܕܢܣܒܘܢ ܐܝܟ ܛܒ̈ܬܐ ܘܫܢܝܘ ܡܢ ܬܫܒܘܚܬܗ ܕܐܠܗܐ ܘܡܢ ܒܘܪܟܬܗ