Sapienza ܚܟܡܬܐ 5

¹ ܗܝ ܕܝܢ ܢܩܘܡ ܙܕܝܩܐ ܒܦܪܗܣܝܐ ܪܒܬܐ ܩܕܡ ܐ̈ܦܝܗܘܢ ܕܐܝܠܝܢ ܕܐܠܨܘܗܝ ܘܕܐܝܠܝܢ ܕܛܠܡܘ ܠܐܘܬܗ

² ܢܚܙܘܢܗ ܓܝܪ ܘܢܕܚܠܘܢ ܒܕܚܠܐ ܥܫܝܢܐ ܘܢܬܡܗܘܢ ܟܕ ܢܚܙܘܢ ܬܫܒܘܚܬܗ

³ ܘܢܐܡܪܘܢ ܒܢܦܫܗܘܢ ܟܕ ܬܘܝܢ ܘܒܐܘܠܨܢܐ ܕܪܘܚܗܘܢ ܢܬܬܢܚܘܢ ܘܢܐܡܪܘܢ ܗܢܘ ܗ̇ܘ ܕܗܝܕܝܢ ܠܓܘܚܟܐ ܥܒܝܕ ܗܘܐ ܠܢ ܘܚܣܕܐ ܘܡܬܠܐ ܠܫ̈ܛܝܐ

⁴ ܐܬܚܫܒܢ ܥܠ ܥܘܡܪܗ ܕܫܛܝܐ ܗܘ ܘܥܠ ܡܘܬܗ ܕܡܦܪܣܝ

⁵ ܐܝܟܢܐ ܐܬܚܫܒ ܒܒܢ̈ܘܗܝ ܕܐܠܗܐ ܘܐܝܬܝܗ̇ ܝܪܬܘܬܗ ܥܡ ܩܕܝܫ̈ܐ

⁶ ܛܥܝܢ ܗܘܝܢ ܗܟܝܠ ܡܢ ܐܘܪܚܐ ܕܩܘܫܬܐ ܘܢܘܗܪܐ ܕܙܕܝܩܘܬܐ ܠܐ ܐܢܗܪ ܠܢ ܘܫܡܫܐ ܠܐ ܕܢܚ ܠܢ

⁷ ܘܐܬܡܠܝܘ ܫܒܝ̈ܠܝܢ ܚ̈ܛܗܝܢ ܘܐܒܕܢܐ ܘܗܠܟܢ ܒܚܘܪܒܐ ܕܠܐ ܕܪܝܫ ܘܠܐܘܪܚܗ ܕܡܪܝܐ ܠܐ ܝܕܥܢ

⁸ ܡܢܐ ܐܘܬܪܬܢ ܫܒܗܪܢܘܬܢ ܐܘ ܡܢܐ ܐܘܬܪܢ ܥܘܡܪܐ ܕܫܒܗܪܢܘܬܢ

⁹ ܕܐܝܟ ܛܠܢܝܬܐ ܥܒܪܬ ܘܡܢܐ ܐܘܬܪܢ ܥܘܡܪܢ ܕܫܒܗܪܢܘܬܐ ܕܐܝܟ ܛ̈ܠܢܝܬܐ ܥܒܪ̈ܢ ܗܠܝܢ ܟܠܗܝܢ ܘܐܝܟ ܣܒܪܬܐ ܕܪܗܛܐ

¹⁰ ܘܐܝܟ ܐܠܦܐ ܕܥܒܪܐ ܥܠ ܓܠܠܘ̈ܗܝ ܕܝܡܐ ܕܡܐ ܕܥܒܪܬ ܠܐ ܝܕܝ̈ܥܢ ܥܩ̈ܒܬܗ̇ ܘܠܐ ܫܒܝ̈ܠܝܗ̇ ܒܫܒ̈ܝܠܐ ܕܓ̈ܠܠܐ

¹¹ ܐܘ ܐܝܟ ܥܘܦܐ ܕܦܪܚ ܒܐܐܪ ܕܠܐ ܡܬܥܩܒܐ ܥܩܒܬܗ ܕܡܚܐ ܒ̈ܓܦܘܗܝ ܘܡܙܝܥ ܘܨܪܐ ܪܘܚܐ ܩܠܝܠܬܐ ܘܒܥܘܫܢܐ ܕܐܒܪ̈ܘܗܝ ܨܪܐ ܐܐܪ ܘܒܛܪܦܐ ܕܓܦܘ̈ܗܝ ܡܗܠܟ ܘܡܢ ܒܬܪܗ ܠܐ ܡܬܝܕܥܐ ܡܥܒܪܬܗ ܘܠܐ ܐܢܫ ܡܫܟܚ ܐܬܐ ܠܐܘܪܚܗ

¹² ܐܘ ܐܝܟ ܓܐܪܐ ܕܡܫܬܕܐ ܒܢܝܫܐ ܕܒܙܥ ܐܐܪ ܘܒܪ ܫܥܬܗ ܗܘܐ ܐܐܪ ܒܕܘܟܬܗ ܘܠܐ ܡܬܝܕܥܐ ܐܘܪܚܗ

¹³ ܗܟܢܐ ܐܦ ܚܢܢ ܐܬܝܠܕܢ ܘܣܦܢ ܘܐܬܐ ܛܒܬܐ ܠܐ ܐܫܟܚܢ ܠܡܚܘܝܘ ܐܠܐ ܒܒܝ̈ܫܬܢ ܐܫܬܟܦܢܢ

¹⁴ ܡܛܠ ܕܣܒܪܗܘܢ ܕܪ̈ܫܝܥܐ ܐܝܟ ܚܠܐ ܕܫܩܠܐ ܪܘܚܐ ܘܐܝܟ ܥܘܪܐ ܕܫܩܠܐ ܥܠܥܠܐ ܘܐܝܟ ܬܢܢܐ ܕܕܪܝܐ ܠܗ ܪܘܚܐ ܘܐܝܟ ܕܘܟܪܢܐ ܕܝܘܡܗ ܕܥܒܪ ܐܘܪܚܐ ܗܟܢܐ ܥܒܪܢ

¹⁵ ܙܕܝܩ̈ܐ ܕܝܢ ܠܥܠܡ ܚܝܝ̈ܢ ܘܒܡܪܝܐ ܗܘ ܐܓܪܗܘܢ ܘܪܢܝܗܘܢ ܒܡܪܝܡܐ

¹⁶ ܡܛܠ ܗܢܐ ܢܩܒܠܘܢ ܡܠܟܘܬܐ ܫܒܝܚܬܐ ܘܟܠܝܠܐ ܕܫܦܝܪ̈ܬܐ ܡܢ ܐܝܕܗ ܕܡܪܝܐ ܘܒܝܡܝܢܗ ܡ̇ܛܠ ܥܠܝܗܘܢ ܘܒܕܪܥܗ ܡܓܢ ܥܠܝܗܘܢ

¹⁷ ܘܡܛܠܬܗܘܢ ܒܛܢܢܗ ܢܙܝܢ ܟܠ ܘܢܙܝܢ ܥܡܗ ܟܠܗ̇ ܒܪܝܬܗ ܠܚܪܒܐ ܕܣ̈ܢܐܘܗܝ

¹⁸ ܘܢܠܒܫ ܫܪܝܢܐ ܕܙܕܝܩܘܬܐ ܘܢܣܝܡ ܒܪܝܫܗ ܣܢܘܪܬܐ ܕܕܝܢܐ ܕܠܐ ܫܘܩܪܐ

¹⁹ ܘܢܣܒ ܣܟܪܐ ܕܚܣܝܘܬܐ ܕܠܐ ܡܙܕܟܝܐ

²⁰ ܘܢܠܛܘܫ ܬܡܝܗܐܝܬ ܠܚܪܒܐ ܕܪܘܓܙܗ ܘܢܥܒܕ ܥܡܗ ܥܡ ܥܠܡܐ ܩܪܒܐ ܥܡ ܫ̈ܛܝܐ

²¹ ܘܢܥܒܪܘܢ ܥܠܝܗܘܢ ܓܐܪ̈ܐ ܕܙܝ̈ܩܐ ܘܕܒܪ̈ܩܐ ܘܐܝܟ ܢܝܫܐ ܕܟܦܬܐ ܕܩܫܬܐ ܕܥܢ̈ܢܐ ܢܫܬܪܘܢ

²² ܘܒܚܡܬܐ ܢܪܡܐ ܥܠܝܗܘܢ ܐ̈ܒܢܝ ܒܪܕܐ ܐܝܟ ܟܐ̈ܦܐ ܘܢܬܚܡܬܘܢ ܥܠܝܗܘܢ ܡ̈ܘܗܝ ܕܝܡܐ ܘܢܗܪ̈ܘܬܐ ܥܙܝܙܐܝܬ ܢܛܒܥܘܢ ܐܢܘܢ

²³ ܘܬܩܘܡ ܥܠܝܗܘܢ ܪܘܚܐ ܕܚܝܠܬܐ ܘܐܝܟ ܥܠܥܠܐ ܢܕܪܐ ܐܢܘܢ ܘܢܚܪܒ ܟܘܠܗ̇ ܐܪܥܐ ܕܪ̈ܫܝܥܐ ܘܢܫܚܘܩ ܠܥܒ̈ܕܝ ܥܘܠܐ ܐܘܚܕܢܗܘܢ ܕܚ̈ܝܠܬܢܐ ܘܟܘܪ̈ܣܘܬܗܘܢ