Sapienza ܚܟܡܬܐ 16

¹ ܡܛܠ ܗܢܐ ܐܬܢܩܡ ܡܢܗܘܢ ܐܝܟ ܡܐ ܕܫܘܝܢ ܗܘܘ ܕܒܟܠܗ ܪܚܫܐ ܘܫܪܨܐ ܐܬܢܓܕܘ

² ܘܥܒܕܬ ܛܒܬ̈ܐ ܣ̈ܓܝܐܬܐ ܥܡ ܥܡܟ ܘܡܐܟܘܠܬܐ ܐܟܣܢܝܬܐ ܐܝܬܝܬ ܠܗܘܢ ܠܪܓܬܗܘܢ ܘܬܪܒܝܬܐ ܕܣܠܘܝ ܐܝܬܝܬ ܠܗܘܢ ܠܪܓܬܗܘܢ

³ ܘܠܡܐܟܘܠܬܐ ܐܬܪܓܪܓܘ ܘܫܕܪܬ ܠܗܘܢ ܘܒܪ̈ܓܝܓܬܗܘܢ ܐܬܗܦܟܘ ܘܗܢܘܢ ܩܠܝܠ ܒܥܝܢ ܗܘܘ ܘܐܬܚܫܚܘ ܒܡܐܟܘܠܬܐ ܕܠܐ ܝܕܥܝܢ ܗܘܘ ܘܐܬܚܝܠܘ ܘܠܐ ܐܥܒܪܬ ܡܢܗܘܢ ܡܕܡ ܕܡܬܒܥܐ ܠܗܘܢ

⁴ ܘܠܗܢܘܢ ܫܕܪܬ ܡܛܠ ܪܛܘܢܘܬܗܘܢ ܘܡܛܠ ܛܪܘܢܘܬܗܘܢ ܟܦܢܐ ܘܡܣܟܢܘܬܐ ܘܠܗܠܝܢ ܚܘܝܬ ܕܢܓܕܬ ܠܣ̈ܢܐܝܗܘܢ

⁵ ܘܐܝܬܝܬ ܥܠܝܗܘܢ ܚܡܬܐ ܕܚ̈ܘܘܬܐ ܘܢܟܬܘ ܐܢܘܢ ܚܘ̈ܘܬܐ ܒܣܘܪܚܢܐ ܘܠܐ ܗܘܐ ܠܣܘܦܐ ܗܘܐ ܪܘܓܙܐ

⁶ ܐܠܐ ܠܡܪܕܘܬܐ ܩܠܝܠ ܐܬܪܕܝܘ ܕܢܬܕܟܪܘܢ ܚ̈ܝܐ ܒܦܘܩܕܢܗ ܕܢܡܘܣܟ

⁷ ܕܗܢܐ ܕܬܒ ܠܐ ܗܘܐ ܡܛܠ ܕܚܙܐ ܚܝܠܐ ܚܝܐ ܗܘܐ ܐܠܐ ܡܛܠܬܟ ܕܐܢܬ ܗܘ ܡܐܚܝܢܐ ܕܟܠ

⁸ ܘܒܗܠܝܢ ܐܦܝܣܬ ܠܣ̈ܢܐܝܢ ܕܐܢܬ ܗܘ ܕܦܪܩ ܡܢ ܟܠ ܒܝܫ̈ܬܐ

⁹ ܠܗܢܘܢ ܓܝܪ ܩܡ̈ܨܐ ܘܕܒ̈ܒܐ ܡܢܟܬܝܢ ܗܘܘ ܠܗܘܢ ܘܡܝܬܝܢ ܗܘܘ ܘܠܐ ܗܘܬ ܐܣܝܘܬܐ ܠܢܦܫ̈ܬܗܘܢ ܡܛܠ ܕܫܘܝܢ ܗܘܘ ܕܒܗܠܝܢ ܢܬܢܩܡ ܡܢܗܘܢ

¹⁰ ܒܢܝ̈ܟ ܕܝܢ ܨܡܘܪܬܐ ܕܬܢܝ̈ܢܐ ܘܠܪ̈ܫܝܗܘܢ ܙܟܝܢ ܗܘܘ ܕܛܝܒܘܬܟ ܫܕܪܬ ܘܐܣܝܬ ܐܢܘܢ

¹¹ ܘܕܢܬܕܟܪܘܢ ܡ̈ܠܝܟ ܕܦܨܝܬ ܐܢܘܢ ܘܐܣܬܪܗܒܬ ܐܢܝܚܬ ܐܢܘܢ ܕܠܐ ܢܦܠܘܢ ܠܥܘܡܩܐ ܘܢܛܥܘܢܟ ܕܫܘܝܢ ܗܘܘ ܠܛܒ̈ܬܟ

¹² ܡܛܠ ܕܠܐ ܥܩܪ̈ܐ ܘܠܐ ܡܠܓܡ̈ܐ ܐܣܝܘ ܐܢܘܢ ܐܠܐ ܡܠܬܟ ܡܪܝܐ ܕܗܝ ܡܐܣܝܐ ܠܟܠ

¹³ ܡܛܠ ܕܐܢܬ ܫܠܝܛ ܐܢܬ ܒܡܘܬܐ ܘܒܚ̈ܝܐ ܡܚܬ ܐܢܬ ܠܬܪ̈ܥܐ ܕܫܝܘܠ ܘܡܣܩ

¹⁴ ܓܒܪܐ ܓܝܪ ܩܛܝܠ ܒܒܝܫܬܗ ܘܢܦܩܐ ܪܘܚܐ ܘܠܐ ܬܝܒܐ ܘܠܐ ܗܦܟܐ ܢܦܫܐ ܕܡܬܢܣܒܐ

¹⁵ ܘܐܢܫ ܠܐ ܡܫܟܚ ܠܡܬܦܨܝܘ ܡܢ ܐ̈ܝܕܝܟ

¹⁶ ܪ̈ܫܝܥܐ ܓܝܪ ܕܟܦܪܘ ܒܟ ܒܚܝܠܗ ܕܕܪܥܟ ܢܓܕܬ ܐܢܘܢ ܘܚܠܦܬ ܠܗܘܢ ܡܛܪܐ ܒܟܐ̈ܦܐ ܕܒܪܕܐ ܘܕܠܐ ܡܦܨܝܢܐ ܪܕܦܬ ܐܢܘܢ ܘܒܢܘܪܐ ܐܣܝܦܬ ܐܢܘܢ

¹⁷ ܘܒܬܫܒܘܚܬܟ ܪܒܬܐ ܡ̈ܝܐ ܠܐ ܕܥܟܘܗ̇ ܘܗܕܐ ܗܝ ܡܝܬܪܘܬܐ ܕܒܡ̈ܝܐ ܡܕܥ̈ܟܝ ܢܘܪܐ ܝܬܝܪܐܝܬ ܡܬܓܘܙܠܐ ܗܘܬ ܢܘܪܐ ܡܛܠ ܕܟܠܗ̇ ܒܪܝܬܐ ܡܣܝܥܐ ܠܙܕܝ̈ܩܐ ܒܩܪܒܐ

¹⁸ ܘܟܕ ܨܒܐ ܐܢܬ ܡܬܛܦܝܣܐ ܢܘܪܐ ܕܠܐ ܬܘܩܕ ܚ̈ܝܘܬܐ ܕܫܕܪܬ ܥܠ ܪ̈ܫܝܥܐ ܕܗܢܘܢ ܟܕ ܚܙܘ ܗܝܡܢܘ ܕܒܕܝܢܗ ܕܐܠܗܐ ܡܬܕܝܢܝܢ

¹⁹ ܘܟܕ ܨܒܝܬ ܝܩܕܐ ܢܘܪܐ ܒܡ̈ܝܐ ܘܡܬܓܘܙܠܐ ܕܬܘܩܕ ܦܐܪ̈ܐ ܕܐܪܥܗܘܢ ܕܛܠܘ̈ܡܐ

²⁰ ܘܐܢܬ ܐܘܟܠܬ ܠܥܡܟ ܡܐܟܘܠܬܐ ܕܡܠܐ̈ܟܐ ܘܠܚܡܐ ܡܛܝܒܐ ܡܢ ܫܡܝܐ ܝܗܒܬ ܠܗܘܢ ܕܠܐ ܠܐܘܬܐ ܒܣܝܡ ܡܢ ܟܘܠܗ̇ ܚܠܝܘܬܐ ܘܛܥܝܡ ܡܢ ܟܠܗܘܢ ܛܥܘ̈ܡܐ

²¹ ܘܬܘ̈ܩܢܝܟ ܝܗܒܬ ܠܒ̈ܢܝܟ ܚܠܝܘܬܐ ܓܠܝܐܝܬ ܘܐܝܟ ܪ̈ܓܝܓܬܗܘܢ ܫܡܫܬ ܐܢܘܢ ܘܐܝܟ ܨܒܝܢܗ ܕܐܢܫ ܐܢܫ ܡܬܡܙܓܐ ܗܘܬ ܠܗ

²² ܒܬܠܓܐ ܘܒܐܓܠܝܕܐ ܩܡܬ ܢܘܪܐ ܘܠܐ ܐܬܦܫܪܘ ܕܢܗܘܘܢ ܝܕܥܝܢ ܕܦܐܪ̈ܝܗܘܢ ܕܒ̈ܥܠܕܒܒܐ ܚܒܠܬ ܢܘܪܐ ܟܕ ܡܬܓܘܙܠܐ ܒܓܘ ܒܪܕܐ ܘܒܟܐ̈ܦܝ ܒܪܕܐ ܘܒܡܛܪܐ ܝܗܒܬ ܒܪ̈ܩܐ

²³ ܡܛܠ ܕܢܬܦܪܫܘܢ ܙܕܝܩ̈ܐ ܘܠܐ ܢܛܥܘܢ ܚܝܠܟ

²⁴ ܡܛܠ ܕܟܘܠܗ̇ ܒܪܝܬܟ ܠܟ ܡܫܬܥܒܕܐ ܘܦܪܫܬ ܦܘܪܥܢܐ ܠܛܠܘ̈ܡܐ ܘܝܗܒܬ ܚܠܝܡܘܬܐ ܠܐܝܠܝܢ ܕܬܟܝܠܝܢ ܥܠܝܟ

²⁵ ܡܛܠ ܗܢܐ ܒܟܠ ܗܝ ܡܬܗܦܟܐ ܘܡܫܡܫܐ ܡܘܗܒܬܟ ܕܡܦܪܢܣܐ ܠܟܠ ܐܢܫ ܐܢܫ ܐܝܟ ܕܨܒܐ

²⁶ ܠܡܕܥ ܠܒܢ̈ܝܐ ܐܝܠܝܢ ܕܪܚܡ ܡܪܝܐ ܕܠܐ ܗܘܐ ܡܘܠܕܐ ܕܦܐܪ̈ܐ ܙܐ̇ܢ ܠܒܪܢܫܐ ܐܠܐ ܡܠܬܟ ܠܐܝܠܝܢ ܕܡܗܝܡܢܝܢ ܒܗ̇ ܗܝ ܢܛܪܐ ܠܗܘܢ

²⁷ ܣܓܝ ܙܒ̈ܢܝܢ ܐܬܬ ܢܘܪܐ ܘܠܐ ܐܬܢܟܝܘ ܘܐܝܠܝܢ ܕܡܢ ܢܘܪܐ ܠܐ ܐܬܦܫܪܘ ܟܕ ܐܬܐ ܫܡܫܐ ܒܚܘܡܗ ܫܚܘ ܡܢܗ

²⁸ ܕܢܗܘܘܢ ܝܕܥܝܢ ܕܐܦ ܫܡܫܐ ܩܐܡ ܒܬܘܕܝܬܐ ܘܒܕܢܚܐ ܕܢܘܗܪܗ ܡܩܝܡ ܠܟ

²⁹ ܣܒܪܐ ܓܝܪ ܕܒܝܫ̈ܐ ܐܝܟ ܐܓܠܝܕܐ ܕܣܬܘܐ ܡܬܦܫܪ ܘܐܝܟ ܡ̈ܝܐ ܕܡܣܬܠܝܢ ܡܬܐܫܕ