Sapienza ܚܟܡܬܐ 12

¹ܡܛܠ ܕܪܘܚܟ ܛܒܬܐ ܫܪܝܐ ܒܟܠ²ܘܠܕܡܫܬܪܥܝܢ ܒܩܠܝܠ ܩܠܝܠ ܡܟܣ ܐܢܬ ܠܗܘܢ ܒܡܕܡ ܕܡܣܟܠܝܢ ܡܟܘܢ ܐܢܬ ܘܟܐܐ ܐܢܬ ܕܢܥܪܩܘܢ ܡܢ ܒܝ̈ܫܬܐ ܘܢܗܝܡܢܘܢ ܒܟ ܡܪܝܐ³ܡܛܠ ܕܐܦ ܠܗܢܘܢ ܩܕܡ̈ܝܐ ܕܥܡܪܝܢ ܗܘܘ ܒܐܪܥܐ ܩܕܝܫܬܐ⁴ܣܢܝܬ ܐܢܘܢ ܡܛܠ ܥܒ̈ܕܝܗܘܢ ܛܢ̈ܦܐ ܥܒ̈ܕܐ ܕܚܪ̈ܫܐ ܘܬܫܡ̈ܫܬܐ ܕܠܐ ܟܫܪ̈ܢ⁵ܡܩܛܠܝܢ ܗܘܘ ܒ̈ܢܝܗܘܢ ܕܠܐ ܚܘܣܢ ܐܟܠܝܢ ܗܘܘ ܒܣܪܐ ܪ̈ܚܡܐ ܕܒܢ̈ܝ ܐܢܫܐ ܒܓܘܗܘܢ ܥܒܕܝܢ ܕܡܘܬܐ ܕܐܒܕܢܐ ܥܒܕܘ ܒܡܨܥܬܐ ܪ̈ܐܙܐ ܕܠܐ ܒܢܡܘܣ⁶ܘܠܐ ܗܘܐ ܥܘܕܪܢܐ ܠܢ̈ܦܫܬܐ ܕܒܢ̈ܝ ܥܡܗܘܢ ܘܐܢܬ ܨܒܝܬ ܕܬܘܒܕ ܐܢܘܢ ܒܐܝܕܐ ܕܐ̈ܒܗܬܐ⁷ܕܢܣܒܘܢ ܥܒ̈ܕܘܗܝ ܕܐܠܗܐ ܥܘܡܪܐ ܢܝܚܐ ܐܪܥܐ ܕܝܗܒܬ ܒܐܝܩܪܐ ܘܒܫܘܒܚܐ⁸ܘܐܦ ܥܠ ܗܠܝܢ ܐܝܟ ܒܢ̈ܝ ܐܢܫܐ ܚܣܬ ܫܕܪܬ ܠܘܩܕܡ ܕܒܘܪ̈ܐ ܠܩܪܒܐ ܕܒܩܠܝܠ ܩܠܝܠ ܢܓܡܪܘܢ ܐܢܘܢ⁹ܐܠܐ ܠܐ ܗܘܐ ܡܛܠ ܕܩܫܝܢ ܗܘܘ ܪ̈ܫܝܥܐ ܡܢ ܙܕܝܩ̈ܐ ܕܢܚܪܒܘܢ ܐܢܘܢ ܐܘ ܒܚܝ̈ܘܬܐ ܒܝܫ̈ܬܐ ܐܘ ܒܩܛܠܐ ܕܡܡܠܠ ܦܘܡܐ ܢܫܬܚܩܘܢ¹⁰ܐܠܐ ܒܩܠܝܠ ܩܠܝܠ ܕܢܬ ܐܢܘܢ ܘܝܗܒܬ ܠܗܘܢ ܐܬܪܐ ܠܬܝܒܘܬܐ ܡܛܠ ܕܝܕܥ ܐܢܬ ܕܒܝܫ ܗܘ ܡܘܠܕܗܘܢ ܘܢܨܝܒܐ ܒܗܘܢ ܒܝܫܘܬܗܘܢ ܘܠܐ ܡܬܚ̈ܠܦܢ ܡܚܫ̈ܒܬܗܘܢ ܠܥܠܡ¹¹ܙܪܥܐ ܓܝܪ ܕܚ̈ܛܝܐ ܠܝܛ ܗܘ ܩܕܡ ܡܪܝܐ ܠܐ ܗܘܐ ܡܛܠ ܕܕܚܠܬ ܡܢ ܚ̈ܛܝܐ ܐܘܪܟܬ ܠܗܘܢ¹²ܡܢܘ ܓܝܪ ܡܫܟܚ ܕܢܐܡܪ ܠܟ ܡܢܐ ܥܒܕ ܐܢܬ ܐܘ ܡ̇ܢ ܩܐܡ ܠܘܩܒܠ ܕܝܢ̈ܝܟ ܐܘ ܡܢܘ ܩܒܠ ܥܠ ܒ̈ܢܝ ܥܡ̈ܡܐ ܟܕ ܡܘܒܕ ܐܢܬ ܠܗܘܢ ܐܘ ܡܢܘ ܢܩܘܡ ܩܕܡܝܟ ܬܒܘܥܐ ܥܠ ܐܢܫܐ ܪ̈ܫܝܥܐ¹³ܐܠܗ ܓܝܪ ܐܚܪܝܢ ܠܝܬ ܠܒܪ ܡܢܟ ܘܐܢܬ ܝܨܦ ܐܢܬ ܥܠ ܟܠ ܘܐܢܬ ܚܘܝܬ ܕܡܕܡ ܒܛܠܘܡܝܐ ܠܐ ܕܢܬ¹⁴ܘܠܐ ܡܠܟܐ ܘܐܦ ܠܐ ܡܕܒܪܢܐ ܡܫܟܚ ܠܡܩܡ ܩܕܡܝܟ ܒܡܐ ܕܚܝܒܬ ܙܕܝܩܐܝܬ¹⁵ܘܒܙܕܩܐ ܟܠ ܡܕܡ ܡܕܒܪ ܐܢܬ ܘܡܕܡ ܕܘܠܐ ܗܘܐ ܠܡܬܚܝܒܘ ܦܘܪܥܢܐ ܐܝܟ ܚܝܠܟ ܡܢ ܒܪ ܢܘܟܪ̈ܝܐ¹⁶ܡܛܠ ܕܚܝܠܟ ܪܝܫ ܟܐܢܘܬܐ ܗܘ ܘܐܢܬ ܫܠܝܛ ܐܢܬ ܥܠ ܟܠ ܘܚܐܣ ܐܢܬ ܥܠ ܟܠ¹⁷ܚܝ̈ܠܐ ܚܘܝܬ ܘܠܐ ܗܝܡܢܘ ܒܠܚܘܕ ܒܚܝܠܐ ܕܫܘܠܡܐ ܠܗܠܝܢ ܕܝܕܥ ܐܢܬ ܬܩܝܦܐܝܬ ܡܟܣ ܐܢܬ ܠܗܘܢ¹⁸ܘܐܢܬ ܡܪܝܐ ܫܠܝܛ ܥܠ ܚܝܠܐ ܘܒܛܝܠܐܝܬ ܕܐ̇ܢ ܐܢܬ ܘܒܟܠ ܚܘܣܢ ܡܕܒܪ ܐܢܬ ܠܢ ܐܢ ܬܨܒܐ ܓܝܪ ܥܬܝܪ ܗܘ ܚܝܠܐ¹⁹ܘܒܗܠܝܢ ܥܒ̈ܕܐ ܐܠܦܬ ܠܥܡܟ ܘܠܒ̈ܢܝܟ ܕܘܠܐ ܗܘ ܠܗ ܠܙܕܝܩܐ ܠܡܪܚܡ ܠܒܪ ܐܢܫܐ ܘܥܒܕܬ ܠܒ̈ܢܝܟ ܣܒܪܐ ܛܒܐ ܘܝܗܒ ܐܢܬ ܬܝܒܘܬܐ ܥܠ ܣܟ̈ܠܘܬܐ²⁰ܕܐܦ ܠܒ̈ܥܠܕܒܒܝܗܘܢ ܕܥܒ̈ܕܝܟ ܚܝܒܬ ܐܢܘܢ ܠܡܘܬܐ ܘܨܥܪܬ ܐܢܘܢ ܒܟܠ ܦܘܪܥܢ ܘܒܥܘ ܕܢܬܝܗܒ ܠܗܘܢ ܙܒܢܐ ܠܬܚܢܢܬܐ ܕܢܥܪܩܘܢ ܡܢ ܒܝܫ̈ܬܐ²¹ܘܒܝܨܝܦܘܬܐ ܪܒܬܐ ܕܢܬ ܐܢܘܢ ܠܥܡܟ ܘܠܒ̈ܢܝܟ ܗܠܝܢ ܕܥܒܕܬ ܥܡ ܐ̈ܒܗܬܢ ܩܝ̈ܡܐ ܘܡܘܡ̈ܬܐ ܘܩܨ̈ܐ ܛܒ̈ܐ²²ܘܠܢ ܥܒܕܬ ܕܝܢܐ ܕܢܓܕܬ ܠܣ̈ܢܐܝܢ ܒܪ̈ܒܘ ܢ̈ܓܕܝܢ ܕܟܕ ܢܗܘܐ ܕܝܢܝܢ ܚܢܢ ܗܘܝܢ ܡܬܕܟܪܝܢ ܚܢܢ ܛܘܒܟ ܘܟܕ ܢܗܘܐ ܡܬܕܝܢܝܢ ܚܢܢ ܢܗܘܐ ܡܣܟܝܢܢ ܠܪ̈ܚܡܝܟ²³ܕܟܕ ܚܝܘ ܦܟܝ̈ܗܐ ܘܓܡܪܘ ܛܠܘܡܐܝܬ ܢܓܕܬ ܐܢܘܢ ܒܛܢܦܘܬܗܘܢ²⁴ܡܛܠ ܕܒܐܘܪ̈ܚܬܐ ܕܛܥܝܘܬܗܘܢ ܥܪܩܘ ܘܛܥܘ ܕܬܟܝܠܝܢ ܗܘܘ ܥܠ ܚ̈ܝܘܬܐ ܘܥܠ ܨܥܪܐ ܕܒ̈ܥܠܕܒܒܝܗܘܢ ܕܐ̈ܠܗܐ ܐܢܘܢ ܦܘܪܥܢܘܬܐ ܕܛ̈ܠܝܐ ܒܦܟܝܗܘܬܐ ܕܕܓܠܘ²⁵ܡܛܠ ܗܢܐ ܗܟܝܠ ܐܝܟ ܛ̈ܠܝܐ ܕܠܐ ܡܣܬܟܠܝܢ ܫܕܪܬ ܥܠܝܗܘܢ ܕܝܢܐ ܕܓܘܚܟܐ²⁶ܘܐܝܠܝܢ ܕܠܐ ܡܣܬܟܠܝܢ ܡܢ ܕܝܢܐ ܕܓܘܚܟܐ ܢܛܥܡܘܢ ܕܝܢܗ ܕܐܠܗܐ ܒܩܘܫܬܐ²⁷ܕܒܗܘ ܡܕܡ ܕܚܫܘ ܪܓܙܘ ܡܛܠ ܕܬܟܝܠܝܢ ܥܠܝܗܘܢ ܕܐ̈ܠܗܐ ܐܢܘܢ ܕܐܦ ܒܗܘܢ ܢܬܢܩܡܘܢ ܡܛܠ ܕܗܢܘܢ ܕܚܙܘ ܩܕܡܐܝܬ ܘܟܦܪܘ ܕܠܐ ܢܒܥܘܢ ܠܐܠܗܐ ܒܩܘܫܬܐ ܥܘܬܕܗ ܕܕܝܢܐ ܢܐܬܐ ܥܠܝܗܘܢ

Cambia Bibbia

Confronta con un'altra Bibbia

Versetti esaminati