Sapienza ܚܟܡܬܐ 7

¹ܡܛܠ ܕܐܦ ܐܢܐ ܐܝܬܝ ܒܪ ܐܢܫܐ ܡܝܘܬܐ ܕܫܘܐ ܥܠ ܟܠ ܐܢܫ ܒܪܗ ܕܩܕܡܝܐ ܐܝܠܝܕ ܐܪܥܐ ܘܒܟܪܣܗ̇ ܕܐܡܝ ܐܬܓܒܠܬ ܒܣܪܐ²ܘܥܣܪ̈ܐ ܝܪ̈ܚܝܢ ܙܒܢܐ ܐܬܩܒܥܬ ܒܕܡܐ ܡܢ ܙܪܥܐ ܕܓܒܪܐ ܘܡܢ ܪܓܬܐ ܕܡܕܡܟܐ³ܘܟܕ ܐܬܝܠܕܬ ܒܙܥܬ ܐܐܪ ܕܓܘܐ ܘܐܝܟ ܟܠܢܫ ܥܠ ܐܪܥܐ ܢܦܠܬ ܘܩܠܐ ܩܕܡܝܐ ܐܝܟ ܟܠ ܐܢܫ ܫܪܝܬ ܠܡܒܟܐ⁴ܘܒܥܙܪ̈ܘܪܐ ܝܨܝܦܐܝܬ ܐܬܟܪܟܬ⁵ܠܐ ܓܝܪ ܡܡܬܘܡ ܗܘܬ ܬܘܠܕܬܐ ܐܚܪܬܐ ܠܡܠܟ ܐܘ ܠܫܠܝܛ⁶ܚܕ ܗܘ ܓܝܪ ܡܥܠܢܐ ܕܟܠ ܐܢܫ ܠܥܠܡܐ ܘܡܦܩܢܐ ܫܘܝܐܝܬ ܚܕ⁷ܡܛܠ ܗܢܐ ܨܠܝܬ ܘܐܬܝܗܒܬ ܠܝ ܪܘܚܐ ܕܚܟܡܬܐ ܘܩܪܝܬ ܘܐܬܬ ܠܝ ܪܘܚܐ ܕܐܝܕܥܬܐ⁸ܨܒܝܬ ܒܗ̇ ܝܬܝܪ ܡܢ ܫܒ̈ܛܐ ܘܟܘܪ̈ܣܘܬܐ ܘܠܐ ܦܚܡܬ ܥܘܬܪܐ ܠܩܘܒܠܗ̇⁹ܘܠܐ ܕܡܝܬܗ̇ ܠܟܐܦܐ ܝܩܝܪܬ ܕܡ̈ܝܐ ܡܛܠ ܕܟܠܗ ܕܗܒܐ ܩܕܡܝܗ̇ ܐܝܟ ܩܠܝܠ ܥܦܪܐ ܘܐܝܟ ܛܝܢܐ ܚܫܝܒ ܟܣܦܐ ܩܕܡܝܗ̇¹⁰ܪܚܡܬܗ̇ ܝܬܝܪ ܡܢ ܫܘܦܪܐ ܘܡܢ ܚܠܝܡܘܬܐ ܓܒܝܬܗ̇ ܝܬܝܪ ܡܢ ܢܘܗܪܐ ܡܛܠ ܕܠܐ ܕܡܟ ܢܘܗܪܗ̇ ܕܝܠܗ̇ ܕܚܟܡܬܐ¹¹ܐܬ̈ܝ ܠܝ ܕܝܢ ܟܠܗܝܢ ܛܒ̈ܬܐ ܐܟܚܕܐ ܥܡܗ̇ ܘܥܘܬܪܐ ܕܠܐ ܡܬܡܢܐ ܒܐ̈ܝܕܝܗ̇¹²ܘܐܬܒܣܡܬ ܒܗܠܝܢ ܟܠܗܝܢ ܕܚܟܡܬܐ ܡܕܒܪܐ ܠܗܝܢ ܘܠܐ ܝܕܥ ܗܘܝܬ ܕܩܕܡܝܐ ܗܝ ܡܢ ܟܠ¹³ܕܠܐ ܢܟܠܐ ܝܠܦܬ ܘܕܠܐ ܚܣܡܐ ܝܗܒ ܐܢܐ ܘܠܐ ܐܟܣܐ ܡܢܟܘܢ ܥܘܬܪܗ̇¹⁴ܡܛܠ ܕܐܘܨܪܐ ܗܝ ܠܒܢ̈ܝ ܐܢܫܐ ܕܠܐ ܓܡܪ ܗ̇ܢܘܢ ܕܩܢܐܘܗ̇ ܥܒܕܘ ܪܚܡܘܬܐ ܠܘܬ ܐܠܗܐ ܡܛܠ ܕܒܡܪܕܘܬܐ ܕܡܓܢ ܩܡܘ¹⁵ܠܝ ܕܝܢ ܢܬܠ ܐܠܗܐ ܕܐܡܪ ܒܡܠ̣ܟܐ ܐܦ ܐܬܚܫܒ ܫܘܝܐܝܬ ܥܠ ܐܝܠܝܢ ܕܡܬ̈ܡܠܠܢ ܡܛܠ ܕܗܘܝܘ ܡܕܒܪܢܗ̇ ܕܚܟܡܬܐ ܘܠܚ̈ܟܝܡܐ ܗܘ ܡܬܪܨ¹⁶ܘܒܐܝܕܗ ܐܝܬܝܢ ܚܢܢ ܘܡ̈ܠܝܢ ܟܠ ܚܟܡܬܐ ܘܝܕܥܬܐ ܘܥܒ̈ܕܐ¹⁷ܗܘܝܘ ܓܝܪ ܝܗܒ ܠܝ ܐܝܕܥܬܐ ܕܠܐ ܕܓܠܘܬܐ ܠܡܕܥ ܐܝܟܢܐ ܩܡ ܥܠܡܐ ܘܥܒܕܗܝܢ ܕܡܘܙ̈ܠܬܐ¹⁸ܫܘܪܝܐ ܘܫܘܠܡܐ ܘܡܨܥܬܗܘܢ ܕܙܒ̈ܢܐ ܫ̈ܘܚܠܦܐ ܕܨܒ̈ܘܬܐ ܘܕܐܝܟܢܐ ܥܒܪܝܢ ܙܒ̈ܢܐ¹⁹ܪܗܛܗܝܢ ܕܫܢ̈ܝܐ ܘܩܒܥܗܘܢ ܕܟ̈ܘܟܒܐ²⁰ܟܝܢܐ ܕܒܥܝܪܐ ܘܚܡܬܐ ܕܚܝ̈ܘܬܐ ܥܘܙܗܝܢ ܕܪ̈ܘܚܐ ܘܡܚܫ̈ܒܬܗܘܢ ܕܒܢ̈ܝ ܐܢܫܐ ܓܢܣ̈ܐ ܕܢܨ̈ܒܬܐ ܘܚܝܠܗܘܢ ܕܥܩܪ̈ܐ²¹ܟܠ ܡܕܡ ܕܟܣܐ ܘܟܠܡܕܡ ܕܓܠܐ ܝܕܥܬ²²ܡܛܠ ܕܗܝ ܕܒܟܠ ܡܕܡ ܐܘܡܢܝܐ ܐܠܦܬܢܝ ܚܟܡܬܐ ܐܝܬ ܒܗ̇ ܓܝܪ ܪܘܚܐ ܕܐܝܕܥܬܐ ܩܕܝܫܬܐ ܐܝܚܝܕܝܬܐ ܩܛܝܢܬܐ ܣܓܝܐܬ ܡܢ̈ܘܢ ܫܦܝܪ ܡܬܬܙܝܥܐ ܢܨܝܚܬ ܩܠܐ ܕܠܐ ܛܘܠܫܐ ܚܟܝܡܐ ܘܫܪܝܪܐ ܘܠܐ ܡܬܪܟܢܐ ܪܚܡܐ ܛܒܬ̈ܐ ܘܚܟܝܡܐ ܘܠܐ ܡܬܢܟܠܐ ܡܘܬܪܢܝܐ²³ܪܚܡܐ ܒܢ̈ܝ ܐܢܫܐ ܬܩܝܦܐ ܫܪܝܪܐ ܘܕܠܐ ܨܦܬܐ ܗܝ ܚܝܠܬܢܝܐ ܘܟܠ ܡܨܝܐ ܘܠܟܠ ܗܝ ܣܥܪܐ ܣܟܘܠܬܢܝܐ ܕܟܝܐ ܘܠܟܠ ܪ̈ܘܚܐ ܐܚܝܕܐ ܩܛܝܢܐ ܗܝ ܘܢܗܝܪܐ²⁴ܒܟܠ ܗ̈ܘܦܟܝܢ ܡܬܗܦܟܐ ܚܟܡܬܐ ܘܡܬܕܒܪܐ ܗܕܐ ܗܝ ܕܠܥܠ ܐܚܝܕܐ ܡܛܠ ܕܟܝܘܬܗ̇²⁵ܗܒܠܐ ܗܝ ܕܚܝܠܗ ܕܐܠܗܐ ܘܩܝܡܐ ܒܬܫܒܘܚܬܗ ܕܐܠܗܐ ܐܚܝܕ ܟܠ ܕܠܐ ܫܘܩܪܐ ܗܝ ܡܛܠ ܗܢܐ ܡܕܡ ܕܡܣܝܒ ܒܓܘܗ̇ ܠܐ ܢܦܠ²⁶ܙܝܘܐ ܗܝ ܕܢܘܗܪܐ ܚܟܡܬܐ ܘܠܐ ܡܬܚܒܠܐ ܡܚܙܝܬܐ ܗܝ ܕܫܘܒܚܐ ܠܟܠܗܘܢ ܥܒ̈ܕܘܗܝ ܕܐܠܗܐ ܘܨܘܪܬܐ ܗܝ ܕܛܝܒܘܬܗ²⁷ܚܕܐ ܗܝ ܘܡܨܝܐ ܠܟܠ ܘܡܩܘܝܐ ܘܟܠ ܒܗ̇ ܡܬܚܕܬ ܘܒܟܠ ܕܪ ܡܫܝܢܐ ܢܦܫ̈ܬܗܘܢ ܕܚܣ̈ܝܐ ܪ̈ܚܡܘܗܝ ܕܐܠܗܐ ܘܢܒ̈ܝܐ ܗܝ ܡܬܩܢܐ²⁸ܠܐ ܓܝܪ ܪܚܡ ܐܠܗܐ ܐܠܐ ܠܐܝܠܝܢ ܕܥܡܪܐ ܒܗܘܢ ܗܝ ܚܟܡܬܐ²⁹ܐܝܬܝܗ̇ ܓܝܪ ܗܕܐ ܝܐܝܐ ܡܢ ܫܡܫܐ. ܘܝܬܝܪ ܡܢ ܟܘܠܗ ܩܒܥܗܘܢ ܕܟܘ̈ܟܒܐ. ܕܢܬ ܥܡ ܢܗܝܪܐ. ܘܐܫܬܟܚܬ ܕܩܕܡܝܐ ܗܝ ܡܢܗ.³⁰ܘܡܢ ܒܬܪܗ̇ ܗܘܐ ܠܠܝܐ ܥܠ ܚܟܡܬܐ ܓܝܪ ܠܐ ܡܡܠܟܐ ܥܠܝܗ̇ ܒܝܫܬܐ

Cambia Bibbia

Confronta con un'altra Bibbia

Versetti esaminati