Tobia ܛܘܒܝܛ 3

¹ ܘܟܕ ܐܬܬܥܝܩܬ ܒܟ̣ܝܬ. ܘܨܠܝܬ ܟܕ ܐܡ̇ܪ ܐܢܐ ܥܡ ܟܐܒܐ̣

² ܙܕܝܩܐ̇ ܐܝܬܝܟ ܡܪܝܐ̣. ܘܟܠܗܘܢ ܥܒ̈ܕܐ ܕܝܠܟ. ܟܠܗܝܢ ܐܘܪ̈ܚܬܐ ܕܝܠܟ ܡܪܚܡܢܘܬܐ ܘܫܪܪܐ ܘܕܝ̣ܢܐ ܟܐܢܐ ܘܫܪܝܪܐ ܐܢܬ ܕܐܢ ܐܢܬ ܠܥܠܡ

³ ܐܬܕܟܪܝܢܝ ܘܐܬܦܢܝ ܥܠܝ. ܘܠܐ ܠܝ ܬܬܒܥ ܒܚ̈ܛܗܝ ܘܒܠܐ ܝܕܝ̈ܥܬܐ ܕܝܠܝ ܘܕܐܒ̈ܗܝ. ܗܠܝܢ ܕܚܛܘ ܩܕܡܝܟ

⁴ ܠܐ ܐܫܬܡܥܘ ܓܝܪ ܠܦܘܩ̈ܕܢܐ ܕܝܠܟ̣. ܘܝܗܒܬ ܠܢ ܠܚܛܘܦܝܐ ܘܠܫܒܝܐ ܘܠܡܘܬܐ̣. ܘܠܦܠܐܬܐ ܕܚܣܕܐ̣. ܠܟܠܗܘܢ ܥܡ̈ܡܐ̇. ܒܗ̇ܢܘܢ ܕܡܒܕܪܝܢܢ

⁵ ܘܗܫܐ ܣ̈ܓܝܐܐ ܐܝܬܝܗܘܢ ܕܝ̣ܢ̈ܐ ܕܝܠܟ ܫܪ̈ܝܪܐ ܡܢܝ̇. ܠܡܥܒܕ ܡܛܠ ܚ̈ܛܗܐ ܕܝܠܝ ܘܕܐܒܗ̈ܝ. ܡܛܠ ܕܠܐ ܥܒܕܢܢ ܦܘܩ̈ܕܢܐ ܕܝܠܟ. ܠܐ ܓܝܪ ܗܠܟܢܢ ܒܫܪܪܐ ܩܕܡܝܟ

⁶ ܘܗܫܐ ܐܝܟ ܗ̇ܝ ܕܫܦܝܪܐ ܠܟ ܥܒܕ ܥܡܝ. ܦܩܘܕ ܠܡܫܩܠ ܠܪܘܚܐ ܕܝܠܝ̣. ܐܝܟܢܐ ܕܐܫܬܪܐ ܘܐܗܘܐ ܐܪܥܐ. ܡܛܠ ܕܦܩܚܐ ܗܝ ܠܝ ܠܡܡܬ ܐܘ ܠܡܚܐ. ܡܛܠ ܕܚ̈ܣܕܐ ܕܓ̈ܠܐ ܫܡܥܬ. ܘܥܩܬܐ ܐܝܬܝܗ̇ ܣܓܝܐܬܐ ܒܝ. ܦܩܘܕ ܕܐܫܬܪܐ ܡܢ ܐܢܢܩܐ̇. ܗܐ ܡܢ ܟܕܘ ܠܕܘܟܬܐ ܕܠܥܠܡ. ܠܐ ܬܗܦܟ ܦܪܨܘܦܐ ܕܝܠܟ ܡܢܝ

⁷ ܒܗ ܟܕ ܒܗ ܒܝܘܡܐ̣. ܓܕܫ ܠܒܪܬܗ ܕܪܥܘܐܝܠ ܣܪܐ ܒܐܩܒܛܢܘܣ ܗ̇ܝ ܕܡܕܝ ܘܠܗܕܐ ܕܬܬܚܣܕ ܡܢ ܐܡܗ̈ܬܐ ܕܐܒܐ ܕܝܠܗ̇

⁸ ܡܛܠ ܕܐܝܬܝܗ̇ ܗܘܬ ܕܐܬܝܗܒܬ ܠܓܒܪ̈ܐ ܫܒܥܐ ܘܐܣܡܘܕܐܘܣ ܫܐܕܐ ܒܝ̣ܫܐ ܩ̇ܛܠ ܗ̣ܘܐ ܠܗܘܢ̣. ܩܕܡ ܕܢܗܘܘܢ ܗܢܘܢ ܥܡܗ̇ ܐܝܟ ܕܒܢ̈ܫܐ. ܘܐܡܪܝܢ ܠܗ̇. ܠܐ ܡܣܬܟܠܐ ܐܢܬܝ ܕܡܚܢ̣ܩܐ ܐܢܬܝ ܠܓܒܪ̈ܐ ܕܝܠܟܝ. ܗܐ ܫܒܥܐ ܩܢ̣ܝܬ. ܘܡܢ ܚܕ ܡܢܗܘܢ ܠܐ ܝܬܪܬ

⁹ ܠܡܢܐ ܠܢ ܡܢܓܕܐ ܐܢܬܝ̇. ܡܛܠ ܓܒܪ̈ܐ ܕܝܠܟܝ. ܐܢ ܡܝܬܘ̣. ܗܠܟܝ ܥܡܗܘܢ. ܠܐ ܢܚܙܐ ܠܟܝ ܒܪܐ ܐܘ ܒܪܬܐ ܠܥܠܡ

¹⁰ ܟܕ ܗܠܝܢ ܫܡ̣ܥܬ. ܐܬܬܥܝܩܬ ܣܓܝ̣. ܐܝܟܢܐ ܕܬܚܢܘܩ ܗ̣ܝ ܠܗ̇. ܘܐܡܪܬ. ܚܕܐ ܡ̇ܢ ܐܝܬܝ ܠܐܒܐ ܕܝܠܝ. ܐܢ ܐܥܒܕ ܗܕܐ̣. ܚܣܕܐ ܠܗ ܗ̇ܘܐ. ܘܣܝܒܘܬܗ ܡܚܬܐ ܐܢܐ ܥܡ ܟܐܒܐ ܠܫܝܘܠ

¹¹ ܘܐܬܟܫܦܬ ܠܘܬ ܟܘܬܐ̣ ܘܐܡܪܬ. ܡܒܪܟܐ ܐܝܬܝܟ ܡܪܝܐ ܐܠܗܐ ܕܝܠܝ̣. ܘܡܒܪܟ ܫܡܐ ܕܝܠܟ ܩܕܝܫܐ ܘܡܝܩܪܐ ܠܥܠܡܝܢ.. ܢܒܪܟܘܢܟ ܟܠܗܘܢ ܥܒ̈ܕܐ ܕܝܠܟ ܠܥܠܡܝܢ

¹² ܘܗܫܐ ܡܪܝܐ̣. ܥܝ̈ܢܐ ܕܝܠܝ ܘܦܪܨܘܦܐ ܒܟ ܝܗ̇ܒܬ

¹³ ܐܡܪܬ ܕܬܫܪܝܢܝ ܡܢ ܐܪܥܐ. ܘܠܐ ܐܫܡܥ ܬܘܒ ܠܚܣܕܐ

¹⁴ ܐܢܬ ܝܕܥ ܐܢܬ ܡܪܝܐ̣. ܕܕܟܝܬܐ ܐܝܬܝ ܡܢ ܟܠܗ̇ ܛܡܐܘܬܐ ܐܦ ܕܓܒܪܐ

¹⁵ ܘܠܐ ܣܝ̇ܒܬ ܠܫܡܐ ܕܝܠܝ̇. ܘܠܐ ܠܫܡܗ ܕܐܒܐ ܕܝܠܝ ܒܐܪܥܐ ܕܫܒܝܬܐ. ܝܚܝܕܝܬܐ ܐܝܬܝ ܠܐܒܐ ܕܝܠܝ. ܘܠܐ ܐܝܬ ܠܗ ܒܪܐ̇. ܐܝܟܢܐ ܕܢܪܬܝܘܗܝ. ܘܠܐ ܐܚܐ ܕܩܪܝܒ̣. ܘܠܐ ܕܐܝܬ ܠܗ ܒܪܐ̇. ܐܝܟܢܐ ܕܐܛܪ ܐܢܐ ܠܝ ܠܗ ܠܐܢܬܬܐ. ܗܐ ܐܒܕܘ ܠܝ ܫܒܥܐ. ܡܛܠ ܡܢܐ ܠܝ ܬܘܒ ܠܡܚܐ. ܘܐܢ ܠܐ ܫ̇ܦܪ ܠܟ ܠܡܩܛܠܢܝ̣. ܦܩܘܕ ܠܡܚܪ ܒܝ ܘܠܡܪܚܡܘ ܥܠܝ. ܘܠܐ ܬܘܒ ܐܫܡܥ ܚܣܕܐ

¹⁶ ܘܐܫܬܡܥܬ ܨܠܘܬܐ ܕܬܪܝܗܘܢ ܩܕܡ ܬܫܒܘܚܬܐ ܕܐܠܗܐ ܪܒܐ

¹⁷ ܘܐܫܬܕܪ ܪܦܐܝܠ ܠܡܐܣܝܘ ܠܬܪܝܗܘܢ. ܠܛܘܒܝܛ̣. ܠܡܩܠܦ ܠܚܘܪ̈ܘܪܘܗܝ̣. ܘܠܣܪܐ ܗ̇ܝ ܕܪܥܘܐܝܠ̣. ܠܡܬܠܗ̇ ܠܛܘܒܝܐ ܒܪܗ ܕܛܘܒܝܛ ܐܢܬܬܐ̣. ܘܠܡܐܣܪܗ ܠܐܣܡܘܕܐܘܣ ܫܐܕܐ ܗ̇ܘ ܒܝ̣ܫܐ. ܡܛܠ ܕܠܛܘܒܝܐ ܡܛܐ ܗܘܐ ܠܡܐܪܬܗ̇.. ܒܗ ܒܙܒܢܐ ܟܕ ܗܦܟ ܛܘܒܝܛ ܥܠ ܠܒܝܬܐ ܕܝܠܗ ܘܣܪܐ ܗ̇ܝ ܕܪܥܘܐܝܠ̣. ܢܚܬܬ ܡܢ ܥܠܝܬܐ ܕܝܠܗ̇