Hebraeos 5

¹ Omnis namque pontifex ex hominibus assumptus pro homi nibus constituitur in his, quae sunt ad Deum, ut offerat dona et sacrificia pro peccatis;

² qui aeque condolere possit his, qui ignorant et errant, quoniam et ipse circumdatus est infirmitate

³ et propter eam debet, quemadmodum et pro populo, ita etiam pro semetipso offerre pro peccatis.

⁴ Nec quisquam sumit sibi illum honorem, sed qui vocatur a Deo tamquam et Aaron.

⁵ Sic et Christus non semetipsum glorificavit, ut pontifex fieret, sed qui locutus est ad eum:
“ Filius meus es tu;
ego hodie genui te ”;

⁶ quemadmodum et in alio dicit:
“ Tu es sacerdos in aeternum secundum ordinem Melchisedech ”.

⁷ Qui in diebus carnis suae, preces supplicationesque ad eum, qui possit salvum illum a morte facere, cum clamore valido et lacrimis offerens et exauditus pro sua reverentia,

⁸ et quidem cum esset Filius, didicit ex his, quae passus est, oboedientiam;

⁹ et, consummatus, factus est omnibus oboedientibus sibi auctor salutis aeternae,

¹⁰ appellatus a Deo pontifex iuxta ordinem Melchisedech.

¹¹ De quo grandis nobis sermo et ininterpretabilis ad dicendum, quoniam segnes facti estis ad audiendum.

¹² Etenim cum deberetis magistri esse propter tempus, rursum indigetis, ut vos doceat aliquis elementa exordii sermonum Dei, et facti estis, quibus lacte opus sit, non solido cibo.

¹³ Omnis enim, qui lactis est particeps, expers est sermonis iustitiae, parvulus enim est;

¹⁴ perfectorum autem est solidus cibus, eorum, qui pro consuetudine exercitatos habent sensus ad discretionem boni ac mali.