Geremia ܐܪܡܝܐ 17

¹ܚܛܝܬܗ ܕܝܗܘܕܐ ܟܬܝܒܐ ܒܩܢܝܐ ܕܦܪܙܠܐ ܘܒܛܦܪܐ ܕܫܡܝܪܐ ܘܪܫܝܡܐ ܥܠ ܠܘܚ̈ܐ ܕܠܒܗܘܢ ܘܥܠ ܩܪ̈ܢܬܐ ܕܡܕܒܚ̈ܝܗܘܢ²ܡܐ ܕܡܬܕܟܪܝܢ ܒܠܒܗܘܢ ܡܕܒܚ̈ܝܗܘܢ ܘܕܚ̈ܠܬܗܘܢ ܬܚܝܬ ܟܘܠ ܐܝܠܢ ܕܥܒܝܛ ܘܥܠ ܟܠ ܪܡܬܐ ܕܪܡܐ³ܘܒܛܘܪ̈ܐ ܘܒܕܒܪܐ ܢܟܣ̈ܝܟ ܘܟܠܗܘܢ ܓܙܝ̈ܟ ܘܬܚ̈ܘܡܝܟ ܠܒܙܬܐ ܐܬܠ ܡܛܠ ܚ̈ܛܗܝܟ⁴ܘܐܥܒܪܟ ܡܢ ܝܪܬܘܬܟ ܕܝܗܒܬ ܠܟ ܘܐܫܥܒܕܟ ܠܒ̈ܥܠܕܒܒܝܟ ܒܐܪܥܐ ܕܠܐ ܝܕܥ ܐܢܬ ܡܛܠ ܕܢܘܪܐ ܐܩܕܚܬܘܢ ܒܪܘܓܙܝ ܥܕܡܐ ܠܥܠܡ ܬܐܩܕ⁵ܗܟܢܐ ܐܡܪ ܡܪܝܐ ܠܝܛ ܗܘ ܓܒܪܐ ܕܢܬܬܟܠ ܥܠ ܒܪܢܫܐ ܘܢܥܒܕ ܒܪ ܒܣܪܐ ܕܪܥܗ ܘܡܢ ܡܪܝܐ ܢܣܛܐ ܠܒܗ⁶ܢܗܘܐ ܐܝܟ ܥܩܪܐ ܒܦܩܥܬܐ ܘܠܐ ܢܚܙܐ ܟܕ ܬܐܬܐ ܛܒܬܐ ܘܢܫܪܐ ܒܚ̈ܘܠܢܐ ܒܡܕܒܪܐ ܒܐܪܥܐ ܡܠܚܬܐ ܕܠܐ ܐܬܝܬܒܬ⁷ܒܪܝܟ ܗܘ ܓܒܪܐ ܕܢܬܬܟܠ ܥܠ ܡܪܝܐ ܘܢܗܘܐ ܡܪܝܐ ܬܘܟܠܢܗ⁸ܢܗܘܐ ܐܝܟ ܐܝܠܢܐ ܕܢܨܝܒ ܥܠ ܡ̈ܝܐ ܘܥܠ ܝܒܠܐ ܡܫܪܪ ܥܩܪ̈ܘܗܝ ܘܠܐ ܢܕܚܠ ܟܕ ܢܐܬܐ ܚܘܡܐ ܘܢܗܘܘܢ ܛܪ̈ܦܘܗܝ ܪܘܙܝܢ ܘܒܫܢܬܐ ܕܒܨܝܪ ܒܗ̇ ܡܛܪܐ ܠܐ ܢܕܚܠ ܘܠܐ ܢܬܒܨܪ ܡܢ ܕܠܡܥܒܕ ܦܐܪ̈ܐ⁹ܥܫܝܢ ܠܒܐ ܡܢ ܟܠ ܐܢܫܐ ܗܘ ܡܢܘ ܝܕܥ ܠܗ¹⁰ܐܢܐ ܡܪܝܐ ܒܨܐ ܠܒܐ ܘܒܚܪ ܟܘ̈ܠܝܬܐ ܘܝܗܒ ܠܓܒܪܐ ܐܝܟ ܐܘܪ̈ܚܬܗ ܘܐܝܟ ܦܐܪ̈ܝ ܥܒ̈ܕܘܗܝ¹¹ܐܝܟ ܚܓܠܐ ܕܩܪܐ ܠܐܝܠܝܢ ܕܠܐ ܝܠܕ ܗܟܢܐ ܡ̇ܢ ܕܩܢܐ ܥܘܬܪܐ ܕܠܐ ܒܕܝܢܐ ܒܦܠܓܘܬ ܝܘܡ̈ܘܗܝ ܢܫܒܩܝܘܗܝ ܘܚܪܬܗ ܬܗܘܐ ܡܨܥܪܐ¹²ܟܘܪܣܝܐ ܕܐܝܩܪܐ ܕܐܬܬܪܝܡ ܡܢ ܠܘܩܕܡ ܡܢ ܐܬܪܐ ܕܡܩܕܫܢ¹³ܣܒܪܗ ܕܐܝܣܪܝܠ ܡܪܝܐ ܗܘ ܟܠ ܕܫܒܩܘܟ ܢܒܗܬܘܢ ܘܡܪ̈ܘܕܐ ܒܐܪܥܐ ܢܬܟܬܒܘܢ ܡܛܠ ܕܫܒܩܘ ܠܡܪܝܐ ܡܒܘܥܐ ܕܡ̈ܝܐ ܚ̈ܝܐ¹⁴ܐܣܢܝ ܡܪܝܐ ܘܐܬܐܣܐ ܦܪܘܩܝܢܝ ܘܐܬܦܪܩ ܡܛܠ ܕܬܫܒܘܚܬܝ ܐܢܬ ܗܘ¹⁵ܗܐ ܗܢܘܢ ܐܡܪܝܢ ܠܝ ܐܝܟܐ ܗܘ ܦܬܓܡܗ ܕܡܪܝܐ ܢܐܬܐ ܗܫܐ¹⁶ܘܐܢܐ ܒܒܝܫܬܐ ܠܐ ܦܫܬ ܡܢܟ ܐܢܬ ܝܕܥ ܐܢܬ ܕܝܘܡܗ ܕܒܪܢܫܐ ܠܐ ܪܓܬ ܘܡܕܡ ܕܢܦ̣ܩ ܡܢ ܣܦ̈ܘܬܝ ܩܕܡ ܐ̈ܦܝܟ ܗܘܐ¹⁷ܠܐ ܬܗܘܐ ܠܝ ܠܬܒܪܐ ܐܠܐ ܐܓܢ ܥܠܝ ܒܝܘܡܐ ܒܝܫܐ¹⁸ܢܒܗܬܘܢ ܪ̈ܕܘܦܝ ܘܠܐ ܐܒܗܬ ܐܢܐ ܢܬܬܒܪܘܢ ܗܢܘܢ ܘܠܐ ܐܬܬܒܪ ܐܢܐ ܐܝܬܐ ܥܠܝܗܘܢ ܝܘܡܐ ܕܒܝܫܬܐ ܘܚܕ ܬܪ̈ܝܢ ܬܒܪܐ ܬܒܪ ܐܢܘܢ¹⁹ܗܟܢܐ ܐܡܪ ܠܝ ܡܪܝܐ ܙܠ ܩܘܡ ܒܬܪܥܐ ܕܒܢ̈ܝ ܥܡܐ ܕܥܐܠܝܢ ܒܗ ܡ̈ܠܟܐ ܕܝܗܘܕܐ ܘܕܢܦܩܝܢ ܒܗ ܘܒܟܠܗܘܢ ܬܪ̈ܥܝܗ̇ ܕܐܘܪܫܠܡ²⁰ܘܐܡܪ ܠܗܘܢ ܫܡܥܘ ܦܬܓܡܗ ܕܡܪܝܐ ܡ̈ܠܟܐ ܕܝܗܘܕܐ ܘܟܠܗ ܒܝܬ ܝܗܘܕܐ ܘܟܠܗܘܢ ܥܡܘܪ̈ܝܗ̇ ܕܐܘܪܫܠܡ ܕܥܐܠܝܢ ܒܬܪ̈ܥܐ ܗܠܝܢ²¹ܗܟܢܐ ܐܡܪ ܡܪܝܐ ܐܙܕܗܪܘ ܒܢܦܫܟܘܢ ܘܠܐ ܬܫܩܠܘܢ ܫܩܘܠܬܐ ܒܝܘܡܐ ܕܫܒܬܐ ܘܬܥܠܘܢ ܒܬܪ̈ܥܝܗ̇ ܕܐܘܪܫܠܡ²²ܘܠܐ ܬܦܩܘܢ ܫܩܘܠܬܐ ܡܢ ܒܬ̈ܝܟܘܢ ܒܝܘܡܐ ܕܫܒܬܐ ܘܟܠ ܥܒܕ ܠܐ ܬܥܒܕܘܢ ܘܬܩܕܫܘܢ ܝܘܡܐ ܕܫܒܬܐ ܐܝܟ ܕܦܩܕܬ ܠܐ̈ܒܗܝܟܘܢ²³ܘܠܐ ܫܡܥܘ ܘܠܐ ܐܪܟܢܘ ܐܕܢܗܘܢ ܠܡܫܡܥ ܘܩܫܝܘ ܩܕܠܗܘܢ ܕܠܐ ܢܫܡܥܘܢ ܘܠܐ ܢܩܒܠܘܢ ܡܪܕܘܬܐ²⁴ܘܐܢ ܡܫܡܥ ܬܫܡܥܘܢܢܝ ܐܡܪ ܡܪܝܐ ܕܠܐ ܬܥܠܘܢ ܫܩܘܠܬܐ ܒܬܪ̈ܥܝܗ̇ ܕܩܪܝܬܐ ܗܕܐ ܒܝܘܡܐ ܕܫܒܬܐ ܘܬܩܕܫܘܢ ܝܘܡܐ ܕܫܒܬܐ ܘܠܐ ܬܥܒܕܘܢ ܒܗ ܟܠ ܥܒܕ²⁵ܢܥܠܘܢ ܒܬܪ̈ܥܝܗ̇ ܕܩܪܝܬܐ ܗܕܐ ܡ̈ܠܟܐ ܘܪ̈ܘܪܒܢܐ ܕܝܬܒܝܢ ܥܠ ܟܘܪܣܝܗ ܕܕܘܝܕ ܟܕ ܪ̈ܟܝܒܝܢ ܒܡܪ̈ܟܒܬܐ ܘܒܪ̈ܟܫܐ ܗܢܘܢ ܘܪ̈ܘܪܒܢܝܗܘܢ ܘܓܒܪ̈ܐ ܕܝܗܘܕܐ ܘܥܡܘܪ̈ܝܗ̇ ܕܐܘܪܫܠܡ ܘܬܬܒ ܩܪܝܬܐ ܗܕܐ ܠܥܠܡ²⁶ܘܢܐܬܘܢ ܡܢ ܩܘܪ̈ܝܐ ܕܝܗܘܕܐ ܘܡܢ ܚܕܪ̈ܝ ܐܘܪܫܠܡ ܘܡܢ ܐܪܥܐ ܕܒܢܝܡܝܢ ܘܡܢ ܦܩܥܬܐ ܘܡܢ ܛܘܪܐ ܘܡܢ ܬܝܡܢܐ ܕܡܝܬܝܢ ܕܒܚ̈ܐ ܘܩܘܪ̈ܒܢܐ ܘܠܒܘܢܬܐ ܘܡܝܬܝܢ ܬܘܕܝܬܐ ܠܒܝܬܗ ܕܡܪܝܐ²⁷ܘܐܠܐ ܬܫܡܥܘܢܢܝ ܠܡܩ̇ܕܫܘ ܝܘܡܐ ܕܫܒܬܐ ܕܠܐ ܬܫܩܠܘܢ ܫܩܘܠܬܐ ܘܬܥܠܘܢ ܒܬܪ̈ܥܝܗ̇ ܕܐܘܪܫܠܡ ܒܝܘܡܐ ܕܫܒܬܐ ܐܫܒܘܩ ܢܘܪܐ ܒܬܪ̈ܥܝܗ̇ ܘܬܐܟܘܠ ܣܚܪ̈ܬܗ ܕܐܘܪܫܠܡ ܘܠܐ ܬܕܥܟ

Cambia Bibbia

Confronta con un'altra Bibbia

Versetti esaminati