Geremia ܐܪܡܝܐ 12

¹ ܙܕܝܩ ܐܢܬ ܡܪܝܐ ܕܐܕܘܢ ܥܡܟ ܒܪܡ ܕܝܢܐ ܡܡܠܠ ܐܢܐ ܩܕܡܝܟ ܡܛܠ ܡܢܐ ܐܘܪܚܗ ܕܪܫܝܥܐ ܡܨܠܚܐ ܘܟܗܝ̈ܢܝܢ ܟܠܗܘܢ ܫܩܪ̈ܐ

² ܢܨܒܬ ܐܢܘܢ ܘܐܫܪܘ ܥܩܪ̈ܝܗܘܢ ܩܢܘ ܘܐܦ ܥܒܕܘ ܦܐܪ̈ܐ ܩܪܝܒ ܐܢܬ ܒܦܘܡܗܘܢ ܘܪܚܝܩ ܐܢܬ ܡܢ ܟܘ̈ܠܝܬܗܘܢ

³ ܘܐܢܬ ܡܪܝܐ ܝܕܥܬܢܝ ܘܚܙܝܬܢܝ ܘܒܚܪܬ ܠܒܝ ܩܕܡܝܟ ܛܝܒ ܐܢܘܢ ܐܝܟ ܥܢܐ ܠܢܟܣܬܐ ܘܙܡܢ ܐܢܘܢ ܠܝܘܡ ܩܛܠܐ

⁴ ܥܕܡܐ ܠܐܡܬܝ ܬܬܐܒܠ ܐܪܥܐ ܘܥܣܒܐ ܟܠܗ ܕܚܩܠܐ ܝܒܫ ܡܢ ܒܝܫܬܐ ܕܥܡܘܪ̈ܝܗ̇ ܣܦܬ ܒܥܝܪܐ ܘܦܪܚܬܐ ܕܐܡܪܘ ܠܐ ܢܚܙܐ ܚܪܬܢ

⁵ ܗܐ ܥܡ ܪ̈ܓܠܝܐ ܪܗܛܬ ܘܐܠܐܝܘܟ ܘܐܝܟܢܐ ܡܬܚܪܐ ܐܢܬ ܥܡ ܪ̈ܟܫܐ ܘܒܐܪܥܐ ܕܫܠܡܐ ܬܟܝܠ ܐܢܬ ܘܐܝܟܢܐ ܥܒܪ ܐܢܬ ܒܥܘܫܢܗ ܕܝܘܪܕܢܢ

⁶ ܡܛܠ ܕܐܦ ܐܚ̈ܝܟ ܘܒܝܬ ܐܒܘܟ ܐܦ ܗܢܘܢ ܕܓܠܘ ܒܟ ܐܦ ܗܢܘܢ ܐܡܪܘ ܒܬܪܟ ܡ̈ܠܐ ܠܐ ܬܗܝܡܢ ܐܢܘܢ ܟܕ ܢܡܠܠܘܢ ܥܠܝܟ ܛܒܬܐ

⁷ ܫܒܩܬ ܒܝܬܝ ܫܒܩܬ ܝܪܬܘܬܝ ܝܗܒܬ ܚܒܝܒܬ ܢܦܫܝ ܒܐܝܕܐ ܕܒ̈ܥܠܕܒܒܝܗ̇

⁸ ܗܘܬ ܠܝ ܝܪܬܘܬܝ ܐܝܟ ܐܪܝܐ ܒܥܒܐ ܐܪܝܡܬ ܥܠܝ ܒܩܠܗ̇ ܡܛܠ ܗܢܐ ܣܢܝܬܗ̇

⁹ ܛܝܪܐ ܡܨܝܪܬܐ ܗܘܬ ܠܝ ܝܪܬܘܬܝ ܘܛܝܪܐ ܚܕܪ̈ܐ ܠܗ̇ ܙܠܘ ܟܢܫܘ ܟܠܗ̇ ܚܝܘܬܐ ܕܕܒܪܐ ܐܝܬܘ ܠܡܐܟܠܗ̇

¹⁰ ܪ̈ܥܘܬܐ ܣ̈ܓܝܐܐ ܚܒܠܘ ܟܪܡܝ ܕܫܘ ܦܠܓܘܬܝ ܥܒܕܘ ܦܠܓܘܬܐ ܕܪܓܬܝ ܐܝܟ ܡܕܒܪܐ ܚܪܒܐ

¹¹ ܐܨܕܝܘ ܘܐܚܪܒܘܗ̇ ܐܬܐܒܠܬ ܥܠܝ ܚܪܒܬܐ ܨܕܬ ܟܠܗ̇ ܐܪܥܐ ܡܛܠ ܕܠܝܬ ܐܢܫ ܕܡܝܬܐ ܥܠ ܒܠܗ

¹² ܥܠ ܟܠܗܘܢ ܫ̈ܒܝܠܐ ܕܡܕܒܪܐ ܐܬܘ ܒܙܘ̈ܙܐ ܡܛܠ ܕܚܪܒܗ ܕܡܪܝܐ ܐܟܠܐ ܡܢ ܣܘ̈ܦܝܗ̇ ܕܐܪܥܐ ܘܥܕܡܐ ܠܣܘ̈ܦܝܗ ܕܐܪܥܐ ܘܠܝܬ ܫܠܡܐ ܠܟܠ ܒܣܪ

¹³ ܙܪܘܥܘ ܚ̈ܛܐ ܘܚܨܘܕܘ ܟܘܒ̈ܐ ܘܠܐܘ ܘܡܕܡ ܠܐ ܡܘܬܪܝܢ ܐܢܬܘܢ ܘܒܗܬܘ ܡܢ ܥ̈ܠܠܬܟܘܢ ܡܛܠ ܚܡܬܐ ܕܪܘܓܙܗ ܕܡܪܝܐ

¹⁴ ܗܟܢܐ ܐܡܪ ܡܪܝܐ ܥܠ ܟܠܗܘܢ ܫ̈ܒܒܝ ܪ̈ܥܘܬܐ ܕܩܪܒܘ ܒܝܪܬܘܬܐ ܕܐܘܪܬܬ ܠܥܡܝ ܐܝܣܪܐܝܠ ܗܐ ܥܩܪ ܐܢܐ ܠܗܘܢ ܡܢ ܐܬܪܗܘܢ ܘܠܕܒܝܬ ܝܗܘܕܐ ܐܥܩܘܪ ܡܢ ܒܝܢܬܗܘܢ

¹⁵ ܘܡܢ ܒܬܪ ܕܐܥܩܘܪ ܐܢܘܢ ܐܬܘܒ ܘܐܪܚܡ ܥܠܝܗܘܢ ܘܐܗܦܟ ܐܢܘܢ ܓܒܪ ܠܝܪܬܘܬܗ ܘܓܒܪ ܠܐܪܥܗ

¹⁶ ܘܐܢ ܢܠܦܘܢ ܐܘܪ̈ܚܬܝ ܠܥܡܝ ܕܢܐܡܘܢ ܒܫܡܝ ܚܝ ܗܘ ܡܪܝܐ ܐܝܟ ܕܐܠܦܘ ܠܥܡܝ ܕܢܐܡܘܢ ܒܒܥܠܐ ܢܬܒܘܢ ܒܓܘ ܥܡܝ

¹⁷ ܘܐܢ ܠܐ ܢܫܡܥܘܢ ܐܥܩܪܝܘܗܝ ܠܥܡܐ ܗܢܐ ܡܥܩܪ ܘܡܘܒܕܘ ܐܡܪ ܡܪܝܐ