Geremia ܐܪܡܝܐ 46

¹ܘܗܘܐ ܦܬܓܡܗ ܕܡܪܝܐ ܥܠ ܐܪܡܝܐ ܢܒܝܐ ܕܢܬܢܒܐ ܥܠ ܥܡ̈ܡܐ²ܘܥܠ ܡܨܪ̈ܝܐ ܘܥܠ ܚܝܠܗ ܕܦܪܥܘܢ ܚܓܝܪܐ ܡܠܟܐ ܕܡܨܪܝܢ ܕܫܪܐ ܗܘܐ ܥܠ ܢܗܪܐ ܦܪܬ ܒܟܪܟܡܘܫ ܕܩܛܠ ܢܒܘܟܕܢܨܪ ܡܠܟܐ ܕܒܒܠ ܒܫܢܬܐ ܪܒܝܥܝܬܐ ܕܝܘܝܩܝܡ ܒܪ ܝܘܫܝܐ ܡܠܟܐ ܕܝܗܘܕܐ ܠܡܐܡܪ³ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܫܩܘܠܘ ܙܝܢܐ ܘܣܟܪ̈ܐ ܘܩܪܘܒܘ ܠܩܪܒܐ⁴ܦܓܕܘ ܪ̈ܟܫܐ ܐܪܟܒܘ ܦܪ̈ܫܐ ܣܝܡܘ ܣܢܘܪ̈ܬܐ ܡܪܘܩܘ ܪ̈ܘܡܚܐ ܠܒܫܘ ܫܪ̈ܝܢܐ⁵ܡܛܠ ܕܚܙܝܬ ܕܗܢܘܢ ܡܬܬܒܪܝܢ ܘܗܦܟܝܢ ܠܒܣܬܪܗܘܢ ܘܓܢܒܪ̈ܝܗܘܢ ܐܬܡܚܝܘ ܘܥܪܩܘ ܘܠܐ ܐܬܦܢܝܘ ܡܛܠ ܕܟܪ̈ܝܟܝܢ ܗܘܘ ܠܗܘܢ ܡܢ ܚܕܪ̈ܝܗܘܢ ܐܡܪ ܡܪܝܐ⁶ܠܐ ܢܥܪܘܩ ܐܝܢܐ ܕܩܠܝܠ ܘܠܐ ܢܬܦܠܛ ܐܝܢܐ ܕܓܢܒܪ ܒܓܢܒܪ̈ܐ ܥܠ ܝܕ ܢܗܪܐ ܦܪܬ ܐܬܬܩܠܘ ܘܢܦܠܘ ܟܠܗܘܢ⁷ܡܢܘ ܗܢܐ ܕܐܝܟ ܢܗܪܐ ܣܠܩ ܘܐܝܟ ܢܗܪ̈ܘܬܐ ܡܬܪܓܫܝܢ ܡ̈ܘܗܝ⁸ܡܠܟܐ ܕܡܨܪܝܢ ܐܝܟ ܢܗܪܐ ܣܠܩ ܘܐܝܟ ܢܗܪ̈ܘܬܐ ܡܬܪܓܫܝܢ ܡ̈ܘܗܝ ܘܐܡܪ ܐܣܩ ܘܐܟܣܐ ܠܐܪܥܐ ܘܐܘܒܕ ܩܪܝܬܐ ܘܥܡܘܪ̈ܝܗ̇⁹ܪܟܒܘ ܪ̈ܟܫܐ ܐܫܬܒܚܘ ܒܡܪ̈ܟܒܬܐ ܢܦܩܘܢ ܓܒܪ̈ܐ ܟܘܫ̈ܝܐ ܘܦܘ̈ܛܝܐ ܐܚ̈ܝܕܝ ܣܟܪ̈ܐ ܘܠܘ̈ܕܝܐ ܕܝܕܥܝܢ ܠܡܫܕܐ ܒܩܫܬܐ¹⁰ܘܢܗܘܐ ܝܘܡܐ ܗ̇ܘ ܠܡܪܝܐ ܚܝܠܬܢܐ ܝܘܡܐ ܕܦܘܪܥܢܐ ܕܦܪܥ ܠܒ̈ܥܠܕܒܒܘܗܝ ܘܬܐܟܘܠ ܚܪܒܐ ܘܬܣܒܥ ܘܬܪܘܐ ܡܢ ܕܡܗܘܢ ܡܛܘܠ ܕܚܪܒܐ ܢܥܒܕ ܡܪܝܐ ܚܝܠܬܢܐ ܒܐܪܥܐ ܕܓܪܒܝܐ ܥܠ ܢܗܪܐ ܦܪܬ¹¹ܣܩܝ ܠܓܠܥܕ ܘܣܒܝ ܐܪ̈ܗܛܢܐ ܒܬܘܠܬܐ ܒܪܬ ܡܨܪܝܢ ܐܝܩܐ ܐܣܓܝܬܝ ܐܣܝܘܬܐ ܘܥܘܕܪܢܐ ܠܐ ܗܘܐ ܠܟܝ¹²ܫܡܥܘ ܥܡ̈ܡܐ ܨܥܪܟܝ ܘܐܝܠܠܬܟܝ ܐܬܡܠܝܬ ܐܪܥܐ ܡܛܠ ܕܓܒܪܐ ܒܓܒܪܐ ܐܬܛܪܝ ܘܬܪ̈ܝܗܘܢ ܒܚܪܒܐ ܢܦܠܘ¹³ܦܬܓܡܐ ܕܐܡܪ ܡܪܝܐ ܠܐܪܡܝܐ ܢܒܝܐ ܕܢܐܬܐ ܢܒܘܟܕܢܨܪ ܡܠܟܐ ܕܒܒܠ ܘܢܚܪܒܝܗ̇ ܠܐܪܥܐ ܕܡܨܪܝܢ¹⁴ܚܘܘ ܒܡܨܪܝܢ ܘܐܫܡܥܘ ܒܡܓܕܘܠ ܘܐܫܡܥܘ ܒܡܦܣ ܘܒܬܚܦܝܣ ܐܡܪܘ ܐܬܛܝܒܘ ܘܐܬܬܩܢܘ ܡܛܠ ܕܐܟܠܬ ܚܪܒܐ ܚܕܪ̈ܝܟܝ¹⁵ܡܛܠ ܡܢܐ ܐܣܬܚܦܘ ܥܫܝܢ̈ܝܟܝ ܘܢܦܠܘ ܘܠܐ ܩܡܘ ܡܛܠ ܕܡܪܝܐ ܣܚܦ ܐܢܘܢ¹⁶ܣܘܓܐܗܘܢ ܐܣܬܚܦܘ ܐܦ ܢܦܠ ܓܒܪܐ ܥܠ ܚܒܪܗ ܘܐܡܪܘ ܩܘܡܘ ܢܗܦܘܟ ܠܥܡܢ ܘܠܐܪܥܐ ܕܐܬܝܠܕܢ ܒܗ̇ ܡܢ ܩܕܡ ܚܪܒܐ ܕܡܕܘܝܐ¹⁷ܘܩܪܘ ܬܡܢ ܫܡܗ ܕܦܪܥܘܢ ܚܓܝܪܐ ܡܠܟܐ ܕܡܨܪܝܢ ܕܠܘܚܐ ܘܡܥܒܪ ܙܒܢ̈ܐ¹⁸ܚܝ ܐܢܐ ܐܡܪ ܡܪܝܐ ܡܠܟܐ ܨܒܐܘܬ ܫܡܗ ܐܠܐ ܢܦܠ ܦܪܥܘܢ ܐܝܟ ܬܒܪܐ ܕܛܘܪܐ ܘܐܝܟ ܟܪܡܠܐ ܒܓܘ ܝܡܐ¹⁹ܡܐ̈ܢܐ ܕܫܒܝܬܐ ܥܒܕܝ ܠܟܝ ܒܬܘܠܬܐ ܒܪܬ ܡܨܪܝܢ ܡܛܠ ܕܡܦܣ ܬܗܘܐ ܠܚܘܪܒܐ ܘܬܨܕܐ ܡܢ ܒܠܝ ܕܝܬܒ²⁰ܡܨܪܝܢ ܥܓܠܬܐ ܫܦܝܪܬܐ ܡܨܝܪܬܐ ܚܝܠܐ ܡܢ ܓܪܒܝܐ ܐܬܐ ܥܠܝܗ̇²¹ܐܓܝܪ̈ܝܗ̇ ܒܓܘܗ̇ ܐܝܟ ܥ̈ܓܠܐ ܕܦܛܡܐ ܘܐܦ ܗܢܘܢ ܐܬܦܢܝܘ ܘܥܪܩܘ ܐܟܚܕܐ ܘܠܐ ܩܡܘ ܡܛܘܠ ܕܝܘܡܐ ܕܬܒܪܗܘܢ ܐܬܐ ܥܠܝܗܘܢ ܙܒܢܐ ܕܦܘܩܕܢܗܘܢ²²ܩܠܗ ܕܚܝܠܐ ܐܝܟ ܚܘܝܐ ܕܪܫܦ ܡܛܠ ܕܥܠ ܚܝܠܐ ܢܐܙܠܘܢ ܘܒܟܘ̈ܠܒܐ ܢܐܬܘܢ ܥܠܝܗ̇ ܐܝܟ ܦܣ̈ܩܝ ܩܝܣ̈ܐ²³ܦܣܘܩܘ ܥܒ̈ܝܗ̇ ܐܡܪ ܡܪܝܐ ܡܛܠ ܕܣܟܐ ܠܝܬ ܠܗܘܢ ܡܛܠ ܕܣܓܝܐ̈ܝܢ ܡܢ ܩܡܨܐ ܘܠܝܬ ܠܗܘܢ ܡܢܝܢ²⁴ܒܗܬܬ ܒܪܬ ܡܨܪܝܢ ܘܐܫܬܠܡܬ ܒܝܕ ܥܡܐ ܕܓܪܒܝܐ²⁵ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܗܐ ܐܢܐ ܦܩܕ ܐܢܐ ܥܠ ܐܡܘܢ ܕܡ̈ܝܐ ܘܥܠ ܦܪܥܘܢ ܘܥܠ ܡܨܪܝܢ ܘܥܠ ܐ̈ܠܗܝܗ̇ ܘܥܠ ܚܝܠܗ̇ ܘܥܠ ܡ̈ܠܟܝܗ̇ ܘܥܠ ܦܪܥܘܢ ܘܥܠ ܟܠ ܕܬܟܝܠܝܢ ܥܠܘܗܝ²⁶ܘܐܫܠܡ ܐܢܘܢ ܒܐܝܕܐ ܕܒ̈ܥܠܕܒܒܝܗܘܢ ܘܒܐܝܕܐ ܕܐܝܠܝܢ ܕܒܥܝܢ ܢܦܫܗܘܢ ܒܐܝܕܐ ܕܢܒܘܟܕܢܨܪ ܡܠܟܐ ܕܒܒܠ ܘܒܐܝܕܐ ܕܥܒ̈ܕܘܗܝ ܘܒܬܪܟܢ ܬܫܪܐ ܐܝܟ ܝܘܡ̈ܬܐ ܕܡܢ ܩܕܝܡ ܐܡܪ ܡܪܝܐ²⁷ܘܐܢܬ ܠܐ ܬܕܚܠ ܥܒܕܝ ܝܥܩܘܒ ܐܡܪ ܡܪܝܐ ܘܠܐ ܬܬܒܪ ܐܝܣܪܝܠ ܕܗܐ ܦܪܩ ܐܢܐ ܠܟ ܡܢ ܪܘܚܩܐ ܘܠܙܪܥܟ ܡܢ ܐܪܥܐ ܕܫܒܝܬܗܘܢ ܘܢܬܒ ܝܥܩܘܒ ܘܢܫܠܐ ܘܢܫܟܬ ܘܢܬܢܝܚ ܘܠܝܬ ܡ̇ܢ ܕܡܗܪ ܠܗ²⁸ܘܐܢܬ ܠܐ ܬܕܚܠ ܥܒܕܝ ܝܥܩܘܒ ܐܡܪ ܡܪܝܐ ܡܛܠ ܕܥܡܟ ܐܢܐ ܡܛܠ ܕܐܥܒܕ ܣܘܦܢܐ ܒܟܠܗܘܢ ܥܡ̈ܡܐ ܕܒܕܪܬܟ ܬܡܢ ܘܠܟ ܠܐ ܐܣܝܦ ܘܐܪܕܝܟ ܒܕܝܢܐ ܘܡܙܟܝܘ ܠܐ ܐܙܟܝܟ

Cambia Bibbia

Confronta con un'altra Bibbia

Versetti esaminati