Levitico ܟܗ̈ܢܐ 21

¹ ܘܶܐܡܰܪ ܡܳܪܝܳܐ ܠܡܽܘܫܶܐ. ܐܶܡܰܪ ܠܟܳܗ̈ܢܶܐ ܒܢܰܝ̈ ܐܰܗܪܽܘܢ. ܕܥܰܠ ܢܰܦܫܳܐ ܕܡܺܝܬܳܐ ܠܳܐ ܢܶܗܘܽܘܢ ܡܶܬܛܰܡܐܺܝܢ ܒܥܰܡܗܽܘܢ.

² ܐܶܠܳܐ ܐܶܢ ܒܩܰܪܺܝܒܶܗ ܕܩܰܪܺܝܒ ܠܶܗ ܒܰܐܒܽܘܗܝ. ܘܒܶܐܡܶܗ. ܘܒܰܒܪܶܗ ܘܒܰܪܬܶܗ. ܘܒܰܐܚܽܘܗܝ.

³ ܘܰܒܚܳܬܶܗ ܒܬܽܘܠܬܳܐ ܕܩܰܪܺܝܒܳܐ ܠܶܗ ܕܠܳܐ ܗܘܳܬ ܠܓܰܒܪܳܐ ܢܶܬܛܰܡܰܐ.

⁴ ܠܳܐ ܢܶܬܛܰܡܰܐ ܒܪܰܒܳܐ ܕܥܰܡܶܗ. ܕܠܳܐ ܢܶܬܛܰܢܰܦ.

⁵ ܘܠܳܐ ܢܶܩܕܚܽܘܢ ܩܽܘܕܚ̈ܳܬܳܐ ܒܖ̈ܺܝܫܰܝܗܽܘܢ. ܘܦܰܐܬܳܐ ܕܕܰܩܢܰܝ̈ܗܽܘܢ ܠܳܐ ܢܶܓܪܥܽܘܢ. ܘܰܒܒܶܣܪܗܽܘܢ ܠܳܐ ܢܶܚܪܛܽܘܢ ܚܽܘܖ̈ܛܳܬܳܐ.

⁶ ܐܶܠܳܐ ܢܶܗܘܽܘܢ ܩܰܕܺܝܫܺܝܢ ܠܰܐܠܳܗܗܽܘܢ. ܘܠܳܐ ܢܛܰܢܦܽܘܢ ܫܡܳܐ ܕܰܐܠܳܗܗܽܘܢ. ܡܶܛܽܠ ܕܩܽܘܖ̈ܒܳܢܰܘܗܝ ܕܡܳܪܝܳܐ ܠܰܚܡܳܐ ܕܰܐ‌ܠܳܗܳܐ ܗܶܢܽܘܢ ܡܩܰܪܒܺܝܢ. ܘܢܶܗܘܽܘܢ ܩܰܕܺܝܫܺܝܢ.

⁷ ܐܰܢ̱ܬܬܳܐ ܙܳܢܺܝܬܳܐ ܘܰܡܛܰܢܰܦܬܳܐ ܠܳܐ ܢܶܣܒܽܘܢ. ܘܰܐܢ̱ܬܬܳܐ ܕܰܫܒܺܝܩܳܐ ܡܶܢ ܒܰܥܠܳܗ̇ ܠܳܐ ܢܶܣܒܽܘܢ. ܡܶܛܽܠ ܕܩܰܕܺܝܫ ܗܽܘ ܠܰܐܠܳܗܶܗ.

⁸ ܩܰܕܶܫܳܝܗܝ. ܡܶܛܽܠ ܕܠܰܚܡܳܐ ܕܰܐܠܳܗܳܟ ܗܽܘܝܽܘ ܡܩܰܪܶܒ. ܩܰܕܺܝܫ ܢܶܗܘܶܐ ܠܳܟ. ܡܶܛܽܠ ܕܩܰܕܺܝܫܽ ܗ̱ܘ. ܐܶܢܳܐ ܐ̱ܢܳܐ ܡܳܪܝܳܐ ܕܰܡܩܰܕܶܫ ܐ̱ܢܳܐ ܠܟܽܘܢ.

⁹ ܘܒܰܪܬ ܓܰܒܪܳܐ ܟܳܗܢܳܐ ܟܰܕ ܬܫܰܪܶܐ ܠܰܡܙܰܢܳܝܽܘ. ܠܰܐܒܽܘܗܝ ܡܛܰܢܦܳܐ. ܒܢܽܘܪܳܐ ܬܺܐܩܰܕ.

¹⁰ ܘܟܳܗܢܳܐ ܪܰܒܳܐ ܡܶܢ ܐܰܚܰܘ̈ܗܝ. ܕܡܶܬܢܣܶܟ ܥܰܠ ܪܺܝܫܶܗ ܡܶܫܚܳܐ ܕܰܡܫܺܝܚܽܘܬܳܐ. ܘܕܰܡܫܰܡܠܶܐ ܐܺܝܕܰܘ̈ܗܝ ܠܡܶܠܒܰܫ ܡܳܐܢ̈ܶܐ. ܪܺܝܫܶܗ ܠܳܐ ܢܶܦܪܽܘܥ. ܘܡܳܐܢܰܘ̈ܗܝ ܠܳܐ ܢܨܰܪܶܐ.

¹¹ ܘܥܰܠ ܟܽܠ ܢܰܦܫܳܐ ܕܡܺܝܬܳܐ ܠܳܐ ܢܶܥܽܘܠ. ܘܒܰܐܒܽܘܗܝ ܘܒܶܐܡܶܗ ܠܳܐ ܢܶܬܛܰܢܰܦ.

¹² ܘܡܶܢ ܡܰܩܕܫܳܐ ܠܳܐ ܢܶܦܽܘܩ. ܘܠܳܐ ܢܛܰܢܶܦ ܡܰܩܕܫܳܐ ܕܰܐܠܳܗܶܗ. ܡܶܛܽܠ ܕܰܟܠܺܝܠܳܐ ܕܡܶܫܚܳܐ ܕܰܡܫܺܝܚܽܘܬܳܐ ܕܰܐܠܳܗܶܗ ܥܠܰܘܗܝ. ܐܶܢܳܐ ܐ̱ܢܳܐ ܡܳܪܝܳܐ.

¹³ ܘܗܽܘ ܗܳܢܳܐ ܐܰܢ̱ܬܬܳܐ ܒܬܽܘܠܬܳܐ ܢܶܣܰܒ.

¹⁴ ܘܰܐܪܡܰܠܬܳܐ. ܘܰܫܒܺܝܩܬܳܐ. ܘܰܡܛܰܢܦܳܐ ܒܙܳܢܝܽܘܬܳܐ. ܚܕܳܐ ܡܶܢ ܗܳܠܶܝܢ ܠܳܐ ܢܶܣܰܒ. ܐܶܠܳܐ ܒܬܽܘܠܬܳܐ ܡܶܢ ܥܰܡܶܗ ܢܶܣܰܒ ܐܰܢ̱ܬܬܳܐ.

¹⁵ ܘܠܳܐ ܢܛܰܘܶܫ ܙܰܪܥܶܗ ܒܥܰܡܶܗ. ܡܶܛܽܠ ܕܶܐܢܳܐ ܐ̱ܢܳܐ ܡܳܪܝܳܐ ܕܰܡܩܰܕܶܫ ܠܶܗ.

¹⁶ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

¹⁷ ܡܰܠܶܠ ܥܰܡ ܐܰܗܪܽܘܢ. ܘܶܐܡܰܪ ܠܶܗ. ܓܰܒܪܳܐ ܡܶܢ ܙܰܪܥܳܟ ܠܕܳܖ̈ܰܝܗܽܘܢ ܕܢܶܗܘܶܐ ܒܶܗ ܡܽܘܡܳܐ. ܠܳܐ ܢܶܬܩܰܪܰܒ ܠܰܡܩܰܪܳܒܽܘ ܠܰܚܡܳܐ ܕܰܐܠܳܗܶܗ.

¹⁸ ܡܶܛܽܠ ܕܟܽܠ ܓܰܒܪܳܐ ܕܺܐܝܬ ܒܶܗ ܡܽܘܡܳܐ ܠܳܐ ܢܶܬܩܰܪܰܒ. ܓܒܰܪ ܕܰܚܓܺܝܪ. ܐܰܘ ܥܘܺܝܪ ܐܰܘ ܣܪܳܡ. ܐܰܘ ܕܰܣܪܺܝܥܳܐ ܐܶܕܢܶܗ.

¹⁹ ܐܰܘ ܓܰܒܪܳܐ ܕܺܐܝܬ ܒܶܗ ܬܒܳܪܳܐ ܕܪܶܓܠܳܐ. ܐܰܘ ܬܒܳܪܳܐ ܕܺܐܝܕܳܐ.

²⁰ ܐܰܘ ܟܦܺܝܦ. ܐܰܘ ܙܥܽܘܪ. ܐܰܘ ܢܬܺܝܪܺܝܢ ܓܒܺܝܢܰܘ̈ܗܝ. ܐܰܘ ܓܗܰܪ. ܐܰܘ ܚܘܰܪܘܳܖ̈ܶܐ ܐܺܝܬ ܒܥܰܝܢܰܘ̈ܗܝ. ܐܰܘ ܐܺܝܬ ܒܶܗ ܓܰܪܒܳܐ. ܐܰܘ ܟܽܘܣܬܳܢ. ܐܰܘ ܕܰܚܕܳܐ ܐܶܫܟܶܗ.

²¹ ܟܽܠ ܓܰܒܪܳܐ ܕܺܐܝܬ ܒܶܗ ܡܽܘܡܳܐ. ܡܶܢ ܙܰܪܥܶܗ ܕܰܐܗܪܽܘܢ ܟܳܗܢܳܐ. ܠܳܐ ܢܶܬܩܰܪܰܒ ܠܰܡܩܰܪܳܒܽܘ ܩܽܘܪܒܳܢܶܗ ܕܡܳܪܝܳܐ. ܡܶܛܽܠ ܕܡܽܘܡܳܐ ܒܶܗ. ܠܠܰܚܡܳܐ ܕܰܐ‌ܠܳܗܳܐ ܠܳܐ ܢܶܬܩܰܪܰܒ ܠܰܡܩܰܪܳܒܽܘ.

²² ܠܰܚܡܳܐ ܕܰܐܠܳܗܶܗ ܒܶܝܬ ܩܕܽܘܫ ܩܽܘܕ̈ܫܶܐ. ܡܶܢ ܩܽܘܕܫܳܐ ܢܶܐܟܽܘܠ.

²³ ܒܪܰܡ ܕܶܝܢ ܠܓܰܘ ܡܶܢ ܐܰܦܰܝ̈ ܬܰܪܥܳܐ ܠܳܐ ܢܶܥܽܘܠ. ܘܰܠܡܰܕܒܚܳܐ ܠܳܐ ܢܶܬܩܰܪܰܒ. ܡܶܛܽܠ ܕܡܽܘܡܳܐ ܐܺܝܬ ܒܶܗ. ܘܠܳܐ ܢܛܰܘܶܫ ܡܰܩܕܰܫܝ. ܡܶܛܽܠ ܕܶܐܢܳܐ ܐ̱ܢܳܐ ܡܳܪܝܳܐ ܕܰܡܩܰܕܶܫ ܐ̱ܢܳܐ ܠܗܽܘܢ.

²⁴ ܘܶܐܡܰܪ ܡܽܘܫܶܐ ܠܰܐܗܪܽܘܢ ܘܠܰܒܢܰܘ̈ܗܝ. ܘܰܠܟܽܠܗܽܘܢ ܒܢܰܝ̈ ܝܺܣܪܳܐܶܝܠ.