Levitico ܟܗ̈ܢܐ 22

¹ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

² ܐܶܡܰܪ ܠܰܐܗܪܽܘܢ ܘܠܰܒܢܰܘ̈ܗܝ. ܘܢܶܬܢܰܙܪܽܘܢ ܡܶܢ ܩܽܘ̈ܕܫܶܐ ܕܰܒܢܰܝ̈ ܝܺܣܪܳܐܶܝܠ. ܘܠܳܐ ܢܛܰܢܦܽܘܢ ܫܡܳܐ ܕܩܽܘܕܫܝ. ܡܶܛܽܠ ܕܰܡܩܰܕܫܺܝܢ ܐܶܢܽܘܢ ܠܺܝ. ܐܶܢܳܐ ܐ̱ܢܳܐ ܡܳܪܝܳܐ.

³ ܐܶܡܰܪ ܠܗܽܘܢ ܠܕܳܖ̈ܰܝܗܽܘܢ. ܟܽܠ ܓܰܒܪܳܐ ܕܢܶܩܪܽܘܒ ܡܶܢ ܟܽܠܶܗ ܙܰܪܥܟܽܘܢ ܠܩܽܘܕܫܳܐ ܕܰܡܩܰܕܫܺܝܢ ܒܢܰܝ̈ ܝܺܣܪܳܐܶܝܠ ܠܡܳܪܝܳܐ. ܟܰܕ ܛܰܢܦܽܘܬܶܗ ܐܺܝܬ ܥܠܰܘܗܝ. ܬܺܐܒܰܕ ܢܰܦܫܳܐ ܗܳܝ ܡܶܢ ܩܕܳܡ ܥܰܝ̈ܢܰܝ. ܐܶܢܳܐ ܐ̱ܢܳܐ ܡܳܪܝܳܐ.

⁴ ܓܒܰܪ ܓܒܰܪ ܡܶܢ ܙܰܪܥܶܗ ܕܰܐܗܪܽܘܢ. ܘܗܽܘ ܓܪܶܒ ܐܰܘ ܕܳܐܶܒ. ܡܶܢ ܩܽܘܕܫܳܐ ܠܳܐ ܢܶܐܟܽܘܠ ܥܕܰܡܳܐ ܕܡܶܬܕܰܟܶܐ. ܘܡܰܢ ܕܢܶܩܪܽܘܒ ܠܟܽܠܳܗ̇ ܛܰܡܐܽܘܬܳܐ ܕܢܰܦܫܳܐ. ܐܰܘ ܓܰܒܪܳܐ ܕܢܶܦܽܘܩ ܡܶܢܶܗ ܙܰܪܥܳܐ ܕܡܰܕܡܟܳܐ.

⁵ ܐܰܘ ܓܰܒܪܳܐ ܕܢܶܩܪܽܘܒ ܠܟܽܠ ܪܰܚܫܳܐ ܕܛܡܰܐ ܠܶܗ. ܐܰܘ ܒܐ̱ܢܳܫܳܐ ܕܛܡܰܐ ܠܶܗ ܒܟܽܠܳܗ̇ ܛܰܡܐܽܘܬܶܗ.

⁶ ܘܟܽܠ ܢܰܦܫܳܐ ܕܬܶܩܪܽܘܒ ܠܶܗ. ܬܶܗܘܶܐ ܛܰܡܐܳܐ ܥܕܰܡܳܐ ܠܪܰܡܫܳܐ. ܘܠܳܐ ܢܶܐܟܽܘܠ ܡܶܢ ܩܽܘܕܫܳܐ. ܐܶܠܳܐ ܐܶܢ ܐܰܫܺܝܓ ܒܶܣܪܶܗ ܒܡܰܝ̈ܳܐ.

⁷ ܘܰܒܡܰܥܖ̈ܳܒܰܝ ܫܶܡܫܳܐ ܢܶܬܕܰܟܶܐ. ܘܗܳܝܕܶܝܢ ܢܶܐܟܽܘܠ ܡܶܢ ܩܽܘܕܫܳܐ. ܡܶܛܽܠ ܕܠܰܚܡܶܗ ܗܽܘ.

⁸ ܘܦܰܓܪܳܐ ܕܰܬܒܺܝܪ ܠܚܰܝܽܘܬܳܐ ܠܳܐ ܢܶܐܟܽܘܠ. ܕܠܳܐ ܢܶܬܛܰܡܰܐ ܒܶܗ. ܐܶܢܳܐ ܐ̱ܢܳܐ ܡܳܪܝܳܐ.

⁹ ܘܢܶܛܪܽܘܢ ܢܛܽܘܖ̈ܳܬܝ. ܘܠܳܐ ܢܩܰܒܠܽܘܢ ܥܠܰܝܗܽܘܢ ܚܛܳܗ̈ܶܐ ܘܰܢܡܽܘܬܽܘܢ ܒܗܽܘܢ. ܡܶܛܽܠ ܕܛܰܘܶܫܘ ܢܰܦ̈ܫܳܬܗܽܘܢ. ܐܶܢܳܐ ܐ̱ܢܳܐ ܡܳܪܝܳܐ ܕܰܡܩܰܕܶܫ ܐ̱ܢܳܐ ܠܗܽܘܢ.

¹⁰ ܘܟܽܠ ܢܽܘܟܪܳܝܳܐ ܠܳܐ ܢܶܐܟܽܘܠ ܩܽܘܕܫܳܐ. ܬܰܘܬܳܒܳܐ ܕܟܳܗܢܳܐ. ܘܰܐܓܺܝܪܳܐ ܠܳܐ ܢܶܐܟܽܘܠ ܩܽܘܕܫܳܐ.

¹¹ ܘܟܳܗܢܳܐ ܟܰܕ ܢܶܙܒܶܢ ܢܰܦܫܳܐ. ܙܒܺܝܢ ܟܶܣܦܶܗ ܢܶܐܟܽܘܠ ܡܶܢ ܠܰܚܡܶܗ. ܘܺܝܠܺܝ̈ܕܰܝ ܒܰܝܬܶܗ. ܗܶܢܽܘܢ ܢܶܐܟܠܽܘܢ ܡܶܢ ܠܰܚܡܶܗ.

¹² ܘܒܰܪܬ ܟܳܗܢܳܐ ܟܰܕ ܬܶܗܘܶܐ ܠܓܰܒܪܳܐ ܢܽܘܟܪܳܝܳܐ. ܐܳܦ ܗܺܝ ܡܶܢ ܦܽܘܪܫܳܢܳܐ ܕܩܽܘܕܫܳܐ ܠܳܐ ܬܶܐܟܽܘܠ.

¹³ ܘܒܰܪܬ ܟܳܗܢܳܐ ܟܰܕ ܬܶܗܘܶܐ ܐܰܪܡܰܠܬܳܐ. ܘܰܫܒܺܝܩܬܳܐ. ܘܰܒܢܰܝ̈ܐ ܠܰܝܬ ܠܳܗ̇. ܘܬܶܗܦܽܘܟ ܠܒܶܝܬ ܐܰܒܽܘܗ̇. ܐܰܝܟ ܕܰܒܛܰܠܝܽܘܬܳܗ̇ ܡܶܢ ܠܰܚܡܳܐ ܕܰܐܒܽܘܗ̇ ܬܶܐܟܽܘܠ. ܘܟܽܠ ܢܽܘܟܪܳܝܳܐ ܠܳܐ ܢܶܐܟܽܘܠ ܡܶܢܶܗ.

¹⁴ ܘܓܰܒܪܳܐ ܕܢܶܐܟܽܘܠ ܩܽܘܕܫܳܐ ܒܛܽܘܥܝܰܝ. ܢܰܘܣܶܦ ܚܰܕ ܡܶܢ ܚܰܡܫܳܐ ܥܠܰܘܗܝ. ܘܢܶܬܠܺܝܘܗܝ ܠܟܳܗܢܳܐ ܩܽܘܕܫܳܐ.

¹⁵ ܘܠܳܐ ܢܛܰܘܫܽܘܢ ܒܢܰܝ̈ ܝܺܣܪܳܐܶܝܠ ܩܽܘܕ̈ܫܶܐ ܕܰܡܦܰܪܫܺܝܢ ܠܡܳܪܝܳܐ.

¹⁶ ܘܢܶܫܩܠܽܘܢ ܥܠܰܝܗܽܘܢ ܥܰܘܠܳܐ ܘܰܚܛܳܗܳܐ ܡܳܐ ܕܳܐܟܠܺܝܢ ܡܶܢ ܩܽܘܕܫܰܝ̈ܗܽܘܢ. ܡܶܛܽܠ ܕܶܐܢܳܐ ܐ̱ܢܳܐ ܡܳܪܝܳܐ ܕܰܡܩܰܕܶܫ ܐ̱ܢܳܐ ܠܗܽܘܢ. ܢܳܡܽܘܣܳܐ ܕܢܶܕܖ̈ܶܐ ܘܰܕܩܽܘܖ̈ܒܳܢܶܐ ܕܢܶܬܩܰܪܒܽܘܢ ܕܠܳܐ ܡܽܘܡ ܠܡܳܪܝܳܐ.

¹⁷ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

¹⁸ ܡܰܠܶܠ ܥܰܡ ܐܰܗܪܽܘܢ ܘܰܒܢܰܘ̈ܗܝ. ܘܥܰܡ ܟܽܠܗܽܘܢ ܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܓܒܰܪ ܓܒܰܪ ܡܶܢ ܒܶܝܬ ܝܺܣܪܳܐܶܝܠ. ܘܡܶܢ ܐܰܝܠܶܝܢ ܕܡܶܬܦܢܶܝܢ ܠܘܳܬܝ. ܕܥܳܡܪܺܝܢ ܒܺܝܣܪܳܐܶܝܠ. ܕܰܢܩܰܪܶܒ ܩܽܘܪܒܳܢܶܗ ܡܶܢ ܟܽܠ ܢܶܕܖ̈ܰܝܟܽܘܢ. ܘܡܶܢ ܟܽܠ ܦܽܘܖ̈ܫܳܢܰܝܟܽܘܢ ܕܰܡܩܰܪܒܺܝܢ ܠܡܳܪܝܳܐ. ܝܰܩܕܳܐ ܫܰܠܡܳܐ.

¹⁹ ܠܩܽܘܒܳܠܳܐ. ܕܶܟܪܳܐ ܕܠܰܝܬ ܒܶܗ ܡܽܘܡܳܐ. ܡܶܢ ܬܰܘܖ̈ܶܐ ܘܡܶܢ ܐܶܡܖ̈ܶܐ. ܐܰܘ ܡܶܢ ܥܶܙ̈ܶܐ.

²⁰ ܟܽܠ ܕܺܐܝܬ ܒܶܗ ܡܽܘܡܳܐ. ܠܳܐ ܬܩܰܪܒܽܘܢ. ܡܶܛܽܠ ܕܠܳܐ ܗܳܘܶܐ ܠܟܽܘܢ ܠܨܶܒܝܳܢܳܐ.

²¹ ܘܓܰܒܪܳܐ ܕܰܢܩܰܪܶܒ ܕܶܒܚܳܐ ܫܰܠܡܳܐ ܠܡܳܪܝܳܐ. ܠܡܶܦܪܰܫ ܢܶܕܪܳܐ. ܐܰܘ ܦܽܘܪܫܳܢܳܐ. ܡܶܢ ܬܰܘܖ̈ܶܐ ܐܰܘ ܡܶܢ ܥܳܢ̈ܳܐ. ܡܳܐ ܕܠܰܝܬ ܒܶܗ ܡܽܘܡܳܐ. ܢܶܬܩܰܒܰܠ. ܐܶܢ ܟܽܠ ܡܽܘܡ ܠܰܝܬ ܒܶܗ.

²² ܕܰܥܘܺܝܪ. ܐܰܘ ܕܰܬܒܺܝܪ. ܐܰܘ ܕܰܚܙܳܙ. ܐܰܘ ܕܰܪܫܳܠ. ܐܰܘ ܕܰܓܪܶܒ. ܐܰܘ ܕܩܰܣܕܳܢ. ܠܳܐ ܬܩܰܪܒܽܘܢ ܚܰܕ ܡܶܢ ܗܳܠܶܝܢ ܠܡܳܪܝܳܐ. ܘܩܽܘܪܒܳܢܳܐ ܡܶܢ ܗܳܠܶܝܢ ܠܳܐ ܬܣܺܝܡܽܘܢ ܥܰܠ ܡܰܕܒܚܳܐ ܠܡܳܪܝܳܐ.

²³ ܘܬܰܘܪܳܐ. ܘܶܐܡܪܳܐ ܕܰܣܪܺܝܥܳܐ ܐܶܕܢܶܗ. ܐܰܘ ܕܟܰܪܝܳܐ ܐܶܠܺܝܬܶܗ. ܠܦܽܘܪܫܳܢܳܐ ܬܶܥܒܕܺܝܘܗܝ. ܒܪܰܡ ܕܶܝܢ ܠܢܶܕܪܳܐ ܠܳܐ ܢܶܬܩܰܒܰܠ.

²⁴ ܘܕܰܪܨܺܝܨ. ܘܕܰܦܣܺܝܩ. ܘܕܰܩܛܺܝܥ. ܠܳܐ ܬܩܰܪܒܽܘܢ ܠܡܳܪܝܳܐ. ܘܠܳܐ ܬܶܥܒܕܽܘܢ ܒܰܐܪܥܟܽܘܢ.

²⁵ ܘܡܶܢ ܝܰܕ ܒܰܪ ܢܽܘܟܪܳܝܳܐ. ܠܳܐ ܬܩܰܪܒܽܘܢ ܠܰܚܡܳܐ ܕܰܐܠܳܗܟܽܘܢ ܡܶܢ ܗܳܠܶܝܢ ܟܽܠܗܽܘܢ. ܡܶܛܽܠ ܕܰܡܚܰܒܠܺܝܢ ܐܶܢܽܘܢ. ܘܡܽܘܡܳܐ ܐܺܝܬ ܒܗܽܘܢ. ܘܠܳܐ ܡܶܬܩܰܒܠܺܝܢ ܡܶܢܟܽܘܢ.

²⁶ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

²⁷ ܬܰܘܪܳܐ. ܐܰܘ ܐܶܡܪܳܐ. ܐܰܘ ܓܰܕܝܳܐ ܟܰܕ ܢܶܬܺܝܠܶܕ. ܢܶܗܘܶܐ ܫܰܒܥܳܐ ܝܰܘܡܺܝ̈ܢ ܒܳܬܰܪ ܐܶܡܶܗ. ܘܡܶܢ ܝܰܘܡܳܐ ܕܰܬܡܳܢܝܳܐ ܘܰܠܗܰܠ ܢܶܬܩܰܒܰܠ ܩܽܘܪܒܳܢܶܗ. ܩܽܘܪܒܳܢܳܐ ܠܡܳܪܝܳܐ.

²⁸ ܘܬܰܘܪܳܐ ܐܰܘ ܥܶܪܒܳܐ. ܠܶܗ ܘܠܰܒܪܶܗ ܠܳܐ ܬܶܟܣܽܘܢ ܒܝܰܘܡܳܐ ܚܰܕ.

²⁹ ܘܶܐܢ ܬܕܰܒܚܽܘܢ ܕܶܒܚܳܐ ܕܬܰܘܕܺܝܬܳܐ ܠܡܳܪܝܳܐ. ܠܩܽܘܒܳܠܳܐ ܕܽܘܒܚܽܘܗܝ.

³⁰ ܘܒܶܗ ܒܝܰܘܡܳܐ ܗܰܘ ܢܶܬܶܐܟܶܠ. ܘܠܳܐ ܬܰܘܬܪܽܘܢ ܡܶܢܶܗ ܠܨܰܦܪܳܐ. ܐܶܢܳܐ ܐ̱ܢܳܐ ܡܳܪܝܳܐ.

³¹ ܛܰܪܘ ܦܽܘܩܕܳܢܰܝ̈. ܘܰܥܒܶܕܘ ܐܶܢܽܘܢ. ܐܶܢܳܐ ܐ̱ܢܳܐ ܡܳܪܝܳܐ.

³² ܘܠܳܐ ܬܛܰܢܦܽܘܢ ܫܡܳܐ ܕܩܽܘܕܫܝ. ܕܶܐܬܩܰܕܰܫ ܒܰܝܢܳܬ ܒܢܰܝ̈ ܝܺܣܪܳܐܶܝܠ. ܐܶܢܳܐ ܐ̱ܢܳܐ ܡܳܪܝܳܐ ܕܰܡܩܰܕܶܫ ܐ̱ܢܳܐ ܠܟܽܘܢ.

³³ ܕܰܐܦܶܩܬܟܽܘܢ ܡܶܢ ܐܰܪܥܳܐ ܕܡܶܨܪܶܝܢ. ܕܶܐܗܘܶܐ ܠܟܽܘܢ ܐܰ‌ܠܳܗܳܐ. ܐܶܢܳܐ ܐ̱ܢܳܐ ܡܳܪܝܳܐ.