Levitico ܟܗ̈ܢܐ 20

¹ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

² ܐܶܡܰܪ ܠܰܒܢܰܝ̈ ܝܺܣܪܳܐܶܝܠ. ܓܒܰܪ ܓܒܰܪ ܡܶܢ ܒܢܰܝ̈ ܝܺܣܪܳܐܶܝܠ. ܘܡܶܢ ܐܰܝܠܶܝܢ ܕܡܶܬܦܢܶܝܢ ܠܘܳܬܝ. ܕܥܳܡܪܺܝܢ ܒܺܝܣܪܳܐܶܝܠ. ܕܢܰܪܡܶܐ ܡܶܢ ܙܰܪܥܶܗ ܒܢܽܘܟܪܳܝܬܳܐ. ܡܶܬܩܛܳܠܽܘ ܢܶܬܩܛܶܠ ܓܰܒܪܳܐ ܗܰܘ. ܘܥܰܡܳܐ ܕܰܐܪܥܳܐ ܢܶܪܓܡܽܘܢܶܗ ܒܟܺܐܦ̈ܶܐ.

³ ܘܶܐܢܳܐ ܐܶܬܶܠ ܪܽܘܓܙܝ ܒܓܰܒܪܳܐ ܗܰܘ. ܘܰܐܘܒܕܺܝܘܗܝ ܡܶܢ ܓܰܘ ܥܰܡܶܗ. ܥܰܠ ܕܰܐܪܡܺܝ ܡܶܢ ܙܰܪܥܶܗ ܒܢܽܘܟܪܳܝܬܳܐ. ܕܰܢܛܰܡܰܐ ܡܰܩܕܰܫܝ. ܘܰܢܛܰܡܰܐ ܫܡܳܐ ܕܩܽܘܕܫܝ.

⁴ ܘܶܐܢ ܢܰܪܟܢܽܘܢ ܥܰܝܢܰܝ̈ܗܽܘܢ ܥܰܡܳܐ ܕܰܐܪܥܳܐ ܡܶܢ ܓܰܒܪܳܐ ܗܰܘ ܕܰܐܪܡܺܝ ܡܶܢ ܙܰܪܥܶܗ ܒܢܽܘܟܪܳܝܬܳܐ. ܕܠܳܐ ܢܶܩܛܠܽܘܢܶܗ.

⁵ ܐܶܥܒܶܕ ܐܶܢܳܐ ܪܽܘܓܙܝ ܒܓܰܒܪܳܐ ܗܰܘ ܘܰܒܫܰܪܒܬܶܗ. ܘܰܐܘܒܕܺܝܘܗܝ ܘܰܠܟܽܠ ܕܛܳܥܶܝܢ ܒܳܬܪܶܗ. ܥܰܠ ܕܛܳܥܶܝܢ ܒܳܬܰܪ ܢܽܘܟܪܳܝܬܳܐ ܡܶܢ ܓܰܘ ܥܰܡܗܽܘܢ.

⁶ ܘܢܰܦܫܳܐ ܕܬܺܐܙܰܠ ܒܳܬܰܪ ܙܰܟܽܘܖ̈ܶܐ. ܘܝܰܕܽܘ̈ܥܶܐ. ܕܬܶܛܥܶܐ ܒܳܬܰܪܗܽܘܢ. ܐܶܬܶܠ ܪܽܘܓܙܝ ܒܢܰܦܫܳܐ ܗܳܝ. ܘܰܐܘܒܕܺܝܗ̇ ܡܶܢ ܥܰܡܳܗ̇.

⁷ ܐܶܬܩܰܕܰܫܘ ܘܰܗܘܰܘ ܩܰܕܺܝܫܺܝܢ. ܡܶܛܽܠ ܕܶܐܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ.

⁸ ܛܰܪܘ ܦܽܘܩܕܳܢܰܝ̈ ܘܰܥܒܶܕܘ ܐܶܢܽܘܢ. ܐܶܢܳܐ ܐ̱ܢܳܐ ܡܳܪܝܳܐ ܕܰܡܩܰܕܶܫ ܐ̱ܢܳܐ ܠܟܽܘܢ.

⁹ ܘܓܰܒܪܳܐ ܕܰܢܨܰܚܶܐ ܠܰܐܒܽܘܗܝ ܘܠܶܐܡܶܗ. ܡܶܬܩܛܳܠܽܘ ܢܶܬܩܛܶܠ. ܠܰܐܒܽܘܗܝ ܘܠܶܐܡܶܗ ܨܰܚܺܝ. ܕܡܶܗ ܥܠܰܘܗܝ.

¹⁰ ܘܓܰܒܪܳܐ ܕܰܢܓܽܘܪ ܐܰܢ̱ܬܰܬ ܓܰܒܪܳܐ. ܘܰܢܓܽܘܪ ܐܰܢ̱ܬܰܬ ܚܰܒܪܶܗ. ܡܶܬܩܛܳܠܽܘ ܢܶܬܩܰܛܠܽܘܢ ܓܰܝܳܪܳܐ ܘܓܰܝܳܪܬܳܐ.

¹¹ ܘܓܰܒܪܳܐ ܕܢܶܕܡܰܟ ܥܰܡ ܐܰܢ̱ܬܰܬ ܐܰܒܽܘܗܝ. ܦܽܘܪܣܳܝܳܐ ܕܰܐܒܽܘܗܝ ܓܠܳܐ. ܡܶܬܩܛܳܠܽܘ ܢܶܬܩܰܛܠܽܘܢ ܬܖ̈ܰܝܗܽܘܢ. ܘܕܶܡܗܽܘܢ ܥܠܰܝܗܽܘܢ.

¹² ܘܓܰܒܪܳܐ ܕܢܶܕܡܰܟ ܥܰܡ ܟܰܠܬܶܗ. ܡܶܬܩܛܳܠܽܘ ܢܶܬܩܰܛܠܽܘܢ ܬܖ̈ܰܝܗܽܘܢ. ܡܶܛܽܠ ܕܰܚܛܺܝܬܳܐ ܥܒܰܕܘ. ܕܶܡܗܽܘܢ ܥܠܰܝܗܽܘܢ.

¹³ ܘܓܰܒܪܳܐ ܕܢܶܕܡܰܟ ܥܰܡ ܕܶܟܪܳܐ ܡܰܕܡܟܳܐ ܕܰܐܢ̱ܬܬܳܐ. ܛܰܢܦܽܘܬܳܐ ܥܒܰܕܘ ܬܖ̈ܰܝܗܽܘܢ. ܡܶܬܩܛܳܠܽܘ ܢܶܬܩܰܛܠܽܘܢ. ܘܕܶܡܗܽܘܢ ܥܠܰܝܗܽܘܢ.

¹⁴ ܘܓܰܒܪܳܐ ܕܢܶܣܰܒ ܐܰܢ̱ܬܬܳܐ ܘܶܐܡܳܗ̇. ܚܛܺܝܬܳܐ ܗܺܝ ܒܢܽܘܪܳܐ ܢܰܘܩܕܽܘܢܶܗ ܠܶܗ ܘܰܠܗܶܝܢ. ܘܠܳܐ ܬܶܗܘܶܐ ܚܛܺܝܬܳܐ ܒܰܝܢܳܬܟܽܘܢ.

¹⁵ ܘܓܰܒܪܳܐ ܕܢܶܕܡܰܟ ܥܰܡ ܒܥܺܝܪܳܐ ܡܶܬܩܛܳܠܽܘ ܢܶܬܩܛܶܠ. ܘܳܐܦ ܗܺܝ ܒܥܺܝܪܳܐ ܬܶܬܪܓܶܡ.

¹⁶ ܘܰܐܢ̱ܬܳܬܳܐ ܕܬܶܩܪܽܘܒ ܠܘܳܬ ܒܥܺܝܪܳܐ ܕܬܶܬܪܟܶܒ ܡܶܢܳܗ̇. ܩܛܽܘܠܘ ܐܰܢ̱ܬܬܳܐ ܘܳܐܦ ܠܰܒܥܺܝܪܳܐ. ܡܶܬܩܛܳܠܽܘ ܢܶܬܩܰܛܠܽܘܢ. ܘܕܶܡܗܽܘܢ ܥܠܰܝܗܽܘܢ.

¹⁷ ܘܓܰܒܪܳܐ ܕܢܶܣܰܒ ܚܳܬܶܗ ܒܰܪܬ ܐܰܒܽܘܗܝ. ܐܰܘ ܒܰܪܬ ܐܶܡܶܗ. ܘܢܶܚܙܶܐ ܦܽܘܪܣܳܝܳܗ̇. ܘܳܐܦ ܗܺܝ ܬܶܚܙܶܐ ܦܽܘܪܣܳܝܶܗ. ܚܶܣܕܰܐ ܗ̱ܘ. ܢܺܐܒܕܽܘܢ ܩܕܳܡ ܒܢܰܝ̈ ܥܰܡܗܽܘܢ. ܦܽܘܪܣܳܝܳܐ ܕܚܳܬܶܗ ܓܠܳܐ. ܥܰܘܠܗܽܘܢ ܢܩܰܒܠܽܘܢ.

¹⁸ ܘܓܰܒܪܳܐ ܕܢܶܕܡܰܟ ܥܰܡ ܐܰܢ̱ܬܬܳܐ ܟܶܦܣܳܢܺܝܬܳܐ. ܘܢܶܓܠܶܐ ܦܽܘܪܣܳܝܳܗ̇. ܡܰܒܽܘܥܳܗ̇ ܓܠܳܐ. ܘܗܺܝ ܓܠܳܬ ܡܰܒܽܘܥܳܐ ܕܰܕܡܳܗ̇. ܢܺܐܒܕܽܘܢ ܬܖ̈ܰܝܗܽܘܢ ܡܶܢ ܓܰܘ ܥܰܡܗܽܘܢ.

¹⁹ ܘܦܽܘܪܣܳܝܶܗ ܕܚܳܬܳܗ̇ ܕܶܐܡܳܟ ܘܰܕܚܳܬܶܗ ܕܰܐܒܽܘܟ ܠܳܐ ܬܶܓܠܶܐ. ܡܶܛܽܠ ܕܩܰܖ̈ܺܝܒܳܢ ܐܶܢܶܝܢ. ܦܽܘܪܣܳܝ ܥܰܘܠܗܽܘܢ ܢܩܰܒܠܽܘܢ.

²⁰ ܘܓܰܒܪܳܐ ܕܢܶܕܡܰܟ ܥܰܡ ܐܰܢ̱ܬܰܬ ܕܳܕܶܗ. ܦܽܘܪܣܳܝܳܐ ܕܕܳܕܶܗ ܓܠܳܐ. ܚܛܺܝܬܗܽܘܢ ܢܩܰܒܠܽܘܢ. ܘܰܕܠܳܐ ܒܢܺܝ̈ܢ ܢܡܽܘܬܽܘܢ.

²¹ ܘܓܰܒܪܳܐ ܕܢܶܣܰܒ ܐܰܢ̱ܬܰܬ ܐܰܚܽܘܗܝ. ܥܰܘܠܰܐ ܗ̱ܘ. ܡܶܛܽܠ ܕܦܽܘܪܣܳܝܳܐ ܕܰܐܚܽܘܗܝ ܓܠܳܐ. ܕܠܳܐ ܒܢܺܝ̈ܢ ܢܶܗܘܽܘܢ.

²² ܛܰܪܘ ܟܽܠܗܽܘܢ ܦܽܘܩܕܳܢܰܝ̈. ܘܕܺܝ̈ܢܰܝ. ܘܰܥܒܶܕܘ ܐܶܢܽܘܢ. ܘܠܳܐ ܬܣܰܪܶܩܟܽܘܢ ܐܰܪܥܳܐ ܕܡܰܥܶܠ ܐ̱ܢܳܐ ܠܟܽܘܢ ܠܳܗ̇ ܠܡܶܬܰܒ ܒܳܗ̇.

²³ ܘܠܳܐ ܬܗܰܠܟܽܘܢ ܒܢܳܡܽܘܣ̈ܶܐ ܕܥܰܡ̈ܡܶܐ ܕܫܳܕܶܐ ܐ̱ܢܳܐ ܡܶܢ ܩܕܳܡܰܝܟܽܘܢ. ܡܶܛܽܠ ܕܗܳܠܶܝܢ ܟܽܠܗܶܝܢ ܥܒܰܕܘ. ܘܥܳܩܰܬ ܠܺܝ ܒܗܽܘܢ.

²⁴ ܘܶܐܡܪܶܬ ܠܟܽܘܢ ܕܰܐܢ̱ܬܽܘܢ ܬܺܐܪܬܽܘܢ ܐܰܪܥܗܽܘܢ. ܘܶܐܢܳܐ ܐܶܬܠܺܝܗ̇ ܠܟܽܘܢ ܘܬܺܐܪܬܽܘܢܳܗ̇. ܐܰܪܥܳܐ ܕܡܰܪܕܝܳܐ ܚܰܠܒܳܐ ܘܕܶܒܫܳܐ. ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ. ܕܰܦܪܰܫܬܟܽܘܢ ܡܶܢ ܥܰܡ̈ܡܶܐ.

²⁵ ܦܪܽܘܫܘ ܒܶܝܬ ܒܥܺܝܪܳܐ ܕܟܺܝܬܳܐ ܠܛܰܡܰܐܬܳܐ. ܘܒܶܝܬ ܦܳܪܰܚܬܳܐ ܕܟܺܝܬܳܐ ܠܛܰܡܰܐܬܳܐ. ܘܠܳܐ ܬܛܰܡܐܽܘܢ ܢܰܦ̈ܫܳܬܟܽܘܢ ܒܰܒܥܺܝܪܳܐ ܘܰܒܦܳܪܰܚܬܳܐ. ܘܰܒܟܽܠܳܗ̇ ܪܰܚܫܳܐ ܕܰܐܪܥܳܐ. ܕܦܶܪܫܶܬ ܠܟܽܘܢ ܠܛܰܡܐܽܘܬܳܐ.

²⁶ ܘܬܶܗܘܢ ܠܺܝ ܩܰܕܺܝܫܺܝܢ. ܡܶܛܽܠ ܕܶܐܢܳܐ ܡܳܪܝܳܐ ܩܰܕܺܝܫ ܐ̱ܢܳܐ. ܘܰܦܪܰܫܬܟܽܘܢ ܡܶܢ ܥܰܡ̈ܡܶܐ ܕܬܶܗܘܢ ܠܺܝ.

²⁷ ܘܓܰܒܪܳܐ ܐܰܘ ܐܰܢ̱ܬܬܳܐ ܕܺܐܝܬ ܒܗܽܘܢ ܙܰܟܽܘܖ̈ܶܐ ܐܰܘ ܝܰܕܽܘ̈ܥܶܐ. ܡܶܬܩܛܳܠܽܘ ܢܶܬܩܰܛܠܽܘܢ. ܘܰܒܟܺܐܦ̈ܶܐ ܢܶܪܓܡܽܘܢ ܐܶܢܽܘܢ. ܘܕܶܡܗܽܘܢ ܥܠܰܝܗܽܘܢ.