Proverbi ܡܬ̈ܠܐ 8

¹ܡܛܠ ܗܢܐ ܚܟܡܬܐ ܐܟܪܙ ܘܣܘܟܠܐ ܢܥܢܝܟ²ܥܠ ܪܝܫ ܪ̈ܡܬܐ ܓܝܪ ܐܝܬܝܗ̇ ܚܟܡܬܐ ܘܒܝܬ ܐܘܪ̈ܚܬܐ ܘܥܠ ܝܕ ܫܒܝ̈ܠܐ ܩܝܡܐ³ܘܥܠ ܬܪ̈ܥܐ ܒܦܘܡܗ̇ ܩܪܝܐ ܘܒܡ̈ܥܠܢܐ ܕܬܪ̈ܥܐ ܕܟܪ̈ܟܐ ܡܫܬܒܚܐ⁴ܘܐܡܪܐ ܠܟܘܢ ܓܒܪ̈ܐ ܩܪܝܐ ܐܢܐ ܘܩܠܝ ܥܠ ܒܢ̈ܝ ܐܢܫܐ⁵ܕܢܣܬܟܠܘܢ ܫܒܪ̈ܐ ܥܪܝܡܘܬܐ ܘܚܣܝܪ̈ܝ ܪܥܝܢܐ ܢܣܬܟܠܘܢ ܒܠܒܗܘܢ⁶ܫܘܡܥܘܢܝ ܡܛܘܠ ܕܫܪܝܪܬܐ ܗܘ ܡܡܠܠܐ ܐܢܐ ܘܡܦܬܚ ܦܘܡܝ ܬܪܝܨܘܬܐ⁷ܩܘܫܬܐ ܗܘ ܓܝܪ ܪܢܐ ܦܘܡܝ ܘܛܡ̈ܐܢ ܩܕܡܝ ܣܦܘ̈ܬܐ ܕܓܠܬ̈ܐ⁸ܘܒܙܕܝܩܘܬܐ ܐ̈ܢܝܢ ܟܠܗܝܢ ܡ̈ܠܝ ܦܘܡܝ ܘܠܝܬ ܒܗܝܢ ܦܘܬܠܐ ܘܥܘܩܡܐ⁹ܘܟܠܗܝܢ ܓܠܝ̈ܢ ܐ̈ܢܝܢ ܠܐܝܢܐ ܕܡܫܬܘܕܥ ܠܗܝܢ ܘܬܪ̈ܝܨܢ ܐܢܝ̈ܢ ܠܐܝܢܐ ܕܨܒܐ ܠܡܕܥ ܐ̈ܢܝܢ¹⁰ܩܒܠܘ ܡܪܕܘܬܐ ܘܠܐ ܟܣܦܐ ܘܓܒܘ ܠܟܘܢ ܝܕܥܬܐ ܛܒ ܡܢ ܕܗܒܐ ܣܢܝܢܐ¹¹ܡܛܠ ܕܛܒܐ ܗܝ ܚܟܡܬܐ ܛܒ ܡܢ ܕܗܒܐ ܣܢܝܢܐ ܘܛܒ ܡܢ ܟܐ̈ܦܐ ܛܒܬ̈ܐ ܘܡܕܡ ܠܐ ܦܚܡ ܠܗ̇¹²ܐܢܐ ܚܟܡܬܐ ܒܪܝܬ ܥܪܝܡܘܬܐ ܘܝܕܥܬܐ ܘܬܪܥܝܬܐ ܐܢܐ ܩܢܝܐ¹³ܕܚܠܬܗ ܕܡܪܝܐ ܣܢܝܐ ܒܝܫܘܬܐ ܘܓܐܝܘܬܐ ܘܪܡܘܬܐ ܘܐܘܪܚܐ ܒܝܫܬܐ ܘܦܘܡܐ ܗܦܝܟܐ ܣܢܝܐ ܐܢܐ¹⁴ܕܝܠܝ ܗܝ ܬܪܥܝܬܐ ܘܝܘܠܦܢܐ ܕܝܠܝ ܗܘ ܣܘܟܠܐ ܘܕܝܠܝ ܗܝ ܓܢܒܪܘܬܐ¹⁵ܡܛܠܬܝ ܡ̈ܠܟܐ ܡܡܠܟܝܢ ܘܫ̈ܠܝܛܢܐ ܒܕܩܝܢ ܙܕܝܩܘܬܐ¹⁶ܡܛܘܠܬܝ ܫ̈ܠܝܛܢܐ ܡܫܬܠܛܝܢ ܘܪ̈ܘܪܒܢܐ ܘܟܠܗܘܢ ܕܝ̇ܢ̈ܐ ܕܙܕܝܩܘܬܐ¹⁷ܐܢܐ ܪܚܡܐ ܐܢܐ ܪ̈ܚܡܝ ܘܐܝܠܝܢ ܕܒܥܝܢ ܠܝ ܢܫܟܚܘܢܢܝ¹⁸ܥܘܬܪܐ ܘܐܝܩܪܐ ܕܝܠܝ ܗܘ ܘܩܢܝܢܐ ܥܬܝܩܐ ܘܙܕܝܩܘܬܐ¹⁹ܘܦܐܪ̈ܝ ܛܒܝܢ ܐܢܘܢ ܡܢ ܕܗܒܐ ܣܢܝܢܐ ܘܥ̈ܠܠܬܝ ܡܢ ܣܐܡܐ ܓܒܝܐ²⁰ܒܐܘܪܚܐ ܕܙܕܝܩܘܬܐ ܡܗܠܟܐ ܐܢܐ ܘܒܓܘ ܫܒܝ̈ܠܐ ܕܕܝܢܐ²¹ܕܐܘܪܬ ܠܪ̈ܚܡܝ ܣܒܪܐ ܘܣܝܡ̈ܬܗܘܢ ܐܡܠܐ²²ܡܪܝܐ ܒܪܢܝ ܒܪܝܫ ܒܪ̈ܝܬܗ ܘܡܢ ܩܕܡ ܥ̇ܒ̈ܕܘܗܝ ܟܠܗܘܢ²³ܘܡܢ ܩܕܡ ܥ̈ܠܡܐ ܐܬܩܢܢܝ ܘܡܢ ܪܫܝܬܐ ܘܡܢ ܩܕܡ ܕܢܬܩܢ ܐܪܥܐ²⁴ܥܕܠܐ ܢܗܘܘܢ ܬܗ̈ܘܡܐ ܐܬܝܠܕܬ ܘܥܕܠܐ ܢܗܘܘܢ ܡ̈ܝܐ ܒܡ̈ܒܘܥܐ²⁵ܘܥܕܠܐ ܢܬܩܢܘܢ ܛܘܪ̈ܐ ܘܩܕܡ ܪ̈ܡܬܐ ܐܬܒܛܢܬ²⁶ܥܕܠܐ ܢܥܒܕ ܐܪܥܐ ܘܢܚ̈ܠܐ ܘܪܝܫ ܥܦܪܗ̇ ܕܬܒܝܠ²⁷ܟܕ ܡܬܩܢ ܫܡܝܐ ܥܡܗ ܗܘܝܬ ܘܟܕ ܥܒܕ ܚܘܓܬܐ ܥܠ ܐ̈ܦܝ ܬܗ̈ܘܡܐ²⁸ܘܟܕ ܐܥܫܢ ܥܢ̈ܢܐ ܡܢ ܠܥܠ ܘܟܕ ܐܥܫܢ ܡܒ̈ܘܥܐ ܕܬܗ̈ܘܡܐ²⁹ܟܕ ܣܡ ܢܡܘܣܐ ܠܝܡܐ ܘܡ̈ܝܐ ܠܐ ܥܒܪܝܢ ܦܘܡܗ ܘܟܕ ܥܒܕ ܫܬܐ̈ܣܝܗ̇ ܕܐܪܥܐ³⁰ܥܡܗ ܡܬܩܢܐ ܗܘܝܬ ܒܝ ܚܕܐ ܗܘܐ ܟܠ ܝܘܡ ܘܒܟܠܙܒܢ ܩܕܡܘܗܝ ܚܕܝܐ ܗܘܝܬ³¹ܚܕܝܐ ܗܘܝܬ ܒܬܒܝܠ ܐܪܥܗ ܘܡܫܬܒܚܐ ܗܘܝܬ ܒܒ̈ܢܝ ܐܢܫܐ³²ܡܟܝܠ ܒܢ̈ܝܐ ܫܘܡܥܘܢܝ ܛܘܒܘܗܝ ܠܡ̇ܢ ܕܢܛܪ ܐܘܪ̈ܚܬܝ³³ܫܡܥܘ ܡܪܕܘܬܐ ܘܐܬܚܟܡܘ ܘܠܐ ܬܛܥܘܢ³⁴ܛܘܒܘܗܝ ܠܒܪܢܫܐ ܕܢܫܡܥܢܝ ܘܢܫܗܪ ܥܠ ܬܪ̈ܥܝ ܒܟܠܝܘܡ ܘܢܛܪ ܐ̈ܣܟܦܬܐ ܕܬܪ̈ܥܝ³⁵ܡܛܠ ܕܡܦܩ̈ܢܝ ܡܦܩ̈ܢܐ ܐܢܘܢ ܕܚ̈ܝܐ ܘܢܦܩ ܨܒܝܢܐ ܡܢ ܡܪܝܐ³⁶ܘܐܝܠܝܢ ܕܚܛܝܢ ܥܠܝ ܢܦܫܗܘܢ ܢܟܝܢ ܘܟܠܗܘܢ ܣ̈ܢܐܝ ܪ̈ܚܡܐ ܐܢܘܢ ܕܡܘܬܐ

Cambia Bibbia

Confronta con un'altra Bibbia

Versetti esaminati