Proverbi ܡܬ̈ܠܐ 4

¹ܫܡܥܘ ܒ̈ܢܝܐ ܡܪܕܘܬܗ ܕܐܒܐ ܘܨܘܬܘ ܝܕܥܬܐ ܘܣܘܟܠܐ²ܡܛܠ ܕܝܘܠܦܢܐ ܛܒܐ ܝܗܒܬ ܠܟܘܢ ܢܡܘܣܝ ܠܐ ܬܫܒܩܘܢ³ܒܪܐ ܓܝܪ ܗܘܝܬ ܠܐܒܝ ܡܦܢܩܐ ܘܝܚܝܕܐ ܩܕܡ ܐܡܝ⁴ܘܐܠܦܢܝ ܘܐܡܪ ܠܝ ܬܬܚܝܠ ܡܠܬܝ ܒܠܒܟ ܛܪ ܦܘܩ̈ܕܢܝ ܘܚܝܝ ܘܢܡܘܣܝ ܐܝܟ ܒܒܬܐ ܕܥܝܢܐ⁵ܩܢܝ ܚܟܡܬܐ ܘܩܢܝ ܣܘܟܠܐ ܘܠܐ ܬܣܛܐ ܡܢ ܡܐܡܪܗ ܕܦܘܡܝ⁶ܠܐ ܬܫܒܩܝܗ̇ ܕܬܢܛܪܟ ܪܚܡܝܗ̇ ܕܬܫܘܙܒܟ⁷ܪܝܫ ܚܟܡܬܐ ܩܢܝ ܚܟܡܬܐ ܘܒܟܠܗ ܩܢܝܢܟ ܩܢܝ ܣܘܟܠܐ⁸ܚܒܒܝܗ̇ ܕܬܪܡܪܡܟ ܘܥܦܩܝܗ̇ ܕܬܝܩܪܟ⁹ܘܬܣܝܡ ܒܪܝܫܟ ܝܐܝܘܬܐ ܕܪܘܚܦܐ ܘܒܟܠܝܠܐ ܕܫܘܒܚܐ ܬܣܒܥܟ¹⁰ܫܡܥ ܒܪܝ ܘܩܒܠ ܡ̈ܠܝ ܘܢܣ̈ܓܝܢ ܫ̈ܢܝܐ ܕܚܝ̈ܝܟ¹¹ܐܘܪ̈ܚܬܐ ܕܚܟܡܬܐ ܐܠܦܬܟ ܘܗܠܟܬܟ ܒܫ̈ܒܝܠܐ ܬܪ̈ܝܨܐ¹²ܘܡܐ ܕܡܗܠܟ ܐܢܬ ܠܐ ܢܙܘܥ̈ܢ ܗ̈ܠܟܬܟ ܘܐܢ ܪܗܛ ܐܢܬ ܠܐ ܬܬܩܠ¹³ܚܡܣܢ ܒܡܪܕܘܬܝ ܘܠܐ ܬܫܒܩܝܗ̇ ܛܪܝܗ̇ ܡܛܠ ܕܗܝ ܗܝ ܚܝ̈ܝܟ¹⁴ܒܐܘܪܚܐ ܕܚ̈ܛܝܐ ܠܐ ܬܐܙܠ ܘܠܐ ܬܛܢ ܒܐܘܪܚܐ ܕܒܝܫ̈ܐ¹⁵ܘܒܐܬܪܐ ܕܫܪܝܢ ܠܐ ܬܥܒܪ ܒܗ ܐܠܐ ܣܛܝ ܘܥܒܪ ܡܢܗ¹⁶ܠܐ ܓܝܪ ܕܡܟܝܢ ܥܕܡܐ ܕܥܒܕܝܢ ܒܝܫܬܐ ܘܦܪܝܕܐ ܗܝ ܫܢܬܗܘܢ ܥܕܡܐ ܕܥܒܕܝܢ ܨܒܝܢܗܘܢ¹⁷ܡܛܠ ܕܡܐܟܘܠܬܗܘܢ ܡܐܟܘܠܬܐ ܗܝ ܕܥܘ̣ܠܐ ܘܚܡܪܐ ܕܥܬܐ ܫܬܝܢ¹⁸ܐܘܪܚܐ ܕܝܢ ܕܙܕܝܩ̈ܐ ܐܝܟ ܢܘܗܪܐ ܡܙܗܪܐ ܘܐܙܠ ܢܘܗܪܗ̇ ܥܕܡܐ ܕܬܩܢ ܝܘܡܐ¹⁹ܐܘܪܚܐ ܕܝܢ ܕܪ̈ܫܝܥܐ ܚܫܘܟܐ ܗܝ ܘܠܐ ܝܕܥܝܢ ܒܡܢܐ ܡܬܬܩܠܝܢ²⁰ܒܪܝ ܨܘܬ ܡ̈ܠܝ ܘܠܡܐܡܪܝ ܐܪܟܢ ܐܕܢܟ²¹ܠܐ ܢ̈ܙܠܢ ܒܥܝܢ̈ܝܟ ܐܠܐ ܛܪ ܐ̈ܢܝܢ ܒܓܘܗ ܕܠܒܟ²²ܡܛܠ ܕܚܝ̈ܐ ܐ̈ܢܝܢ ܠܡ̇ܢ ܕܡܫܟܚ ܠܗܝܢ ܘܒܣܪܗ ܟܠܗ ܡܐܣܐ²³ܒܟܠ ܙܘܗܪ ܛܪ ܠܒܟ ܡܛܠ ܕܡܢܗ ܗܘ ܡܦܩܢܐ ܕܚܝ̈ܐ²⁴ܐܥܒܪ ܡܢܟ ܦܘܡܐ ܥܩܝܡܐ ܘܪܢܝܐ ܕܥܬܐ ܐܪܚܩ ܡܢ ܣ̈ܦܘܬܟ²⁵ܥܝܢ̈ܝܟ ܒܬܪܝܨܘܬܐ ܢܚܘܪ̈ܢ ܘܬܡܪ̈ܝܟ ܢܬܪܨܘܢ ܠܩܘܒܠܟ²⁶ܐܥܒܪ ܪܓܠܟ ܡܢ ܫ̈ܒܝܠܐ ܒܝܫ̈ܐ ܘܟܠܗܝܢ ܐܘܪ̈ܚܬܟ ܢܬܩ̈ܢܢ²⁷ܠܐ ܬܣܛܐ ܠܝܡܝܢܐ ܘܠܣܡܠܐ ܐܠܐ ܐܥܒܪ ܪܓܠܟ ܡܢ ܒܝܫܬܐ

Cambia Bibbia

Confronta con un'altra Bibbia

Versetti esaminati