Proverbi ܡܬ̈ܠܐ 3

¹ܒܪܝ ܠܐ ܬܛܥܐ ܢܡܘܣܝ ܘܦܘܩ̈ܕܢܝ ܢܛܪ ܠܒܟ²ܡܛܠ ܕܢܘܓܪܐ ܕܝܘܡ̈ܬܐ ܘܫ̈ܢܝܐ ܕܚ̈ܝܐ ܢܬܬܘܣ̈ܦܢ ܠܟ³ܘܫܠܡܐ ܘܛܝܒܘܬܐ ܘܩܘܫܬܐ ܠܐ ܢܫܒܩܘܢܟ ܐܠܐ ܩܛܘܪ ܐܢܘܢ ܒܨܘܪܟ ܘܟܬܘܒ ܐܢܘܢ ܥܠ ܠܘܚ̈ܐ ܕܠܒܟ⁴ܕܬܫܟܚ ܪ̈ܚܡܐ ܘܛܝܒܘܬܐ ܘܣܘܟܠܐ ܩܕܡ ܐܠܗܐ ܘܩܕܡ ܒܢ̈ܝ ܐܢܫܐ⁵ܣܒܪ ܒܡܪܝܐ ܡܢ ܟܠܗ ܠܒܟ ܘܥܠ ܚܟܡܬܐ ܕܢܦܫܟ ܠܐ ܬܬܟܠ⁶ܕܥܝܗܝ ܒܟܠܗܝܢ ܐܘܪ̈ܚܬܟ ܘܗ̣ܘ ܬܪܨ ܫܒܝ̈ܠܝܟ⁷ܠܐ ܬܗܘܐ ܚܟܝܡ ܒܥܝܢ̈ܝ ܢܦܫܟ ܐܠܐ ܕܚܠ ܡܢ ܡܪܝܐ ܘܣܛܝ ܡܢ ܒܝܫܬܐ⁸ܕܬܗܘܐ ܐܣܝܘܬܐ ܠܒܣܪܟ ܘܕܘܗܢܐ ܠܓܪ̈ܡܝܟ⁹ܝܩܪ ܠܡܪܝܐ ܡܢ ܩܢܝܢܟ ܘܡܢ ܪܝܫ ܟܠܗܝܢ ܥ̈ܠܠܬܟ¹⁰ܘܢܬܡܠܘܢ ܐܘܨܪ̈ܝܟ ܣܒܥܐ ܘܡܥܨܪ̈ܬܟ ܢܒ̈ܥܢ ܚܡܪܐ¹¹ܒܪܝ ܡܪܕܘܬܗ ܕܡܪܝܐ ܠܐ ܬܣܠܐ ܘܠܐ ܬܡܐܢ ܠܟ ܒܡܟܣܢܘܬܗ¹²ܡܛܠ ܕܠܡ̇ܢ ܕܪܚܡ ܠܗ ܡܪܝܐ ܪܕܐ ܠܗ ܐܝܟ ܐܒܐ ܕܪܕܐ ܠܒܪܗ¹³ܛܘܒܘܗܝ ܠܒܪܢܫܐ ܕܐܫܟܚ ܚܟܡܬܐ ܘܠܒܪ ܒܣܪܐ ܕܐܫܟܚ ܣܘܟܠܐ¹⁴ܡܛܠ ܕܛܒܐ ܗܝ ܬܐܓܘܪܬܗ̇ ܡܢ ܬܐܓܘܪܬܐ ܕܣܐܡܐ ܘܡܢ ܕܗܒܐ ܣܢܝܢܐ ܡܝܬܪ̈ܢ ܥ̈ܠܠܬܗ̇¹⁵ܝܩܝܪܐ ܗܝ ܓܝܪ ܡܢ ܟܐ̈ܦܐ ܛܒ̈ܬܐ ܘܡܕܡ ܠܐ ܦܚܡ ܠܗ̇¹⁶ܢܘܓܪܐ ܕܝܘܡ̈ܬܐ ܒܝܡܝܢܗ̇ ܘܥܘܬܪܐ ܘܐܝܩܪܐ ܒܣܡܠܗ̇¹⁷ܐܘܪ̈ܚܬܗ̇ ܐܘܪ̈ܚܬܐ ܐܢܝ̈ܢ ܒܣܝ̈ܡܬܐ ܘܟܠܗܘܢ ܫ̈ܒܝܠܝܗ̇ ܫܠܡܐ¹⁸ܐܝܠܢܐ ܗܝ ܕܚ̈ܝܐ ܠܐܝܠܝܢ ܕܡܚܡ̈ܣܢܝܢ ܒܗ̇ ܘܐܝܠܝܢ ܕܡܣܟܝܢ ܠܗ̇ ܛ̇ܘܒܝܗܘܢ¹⁹ܡܪܝܐ ܒܚܟܡܬܗ ܣܡ ܫܬܐ̈ܣܝܗ̇ ܕܐܪܥܐ ܘܐܬܩܢ ܫܡܝܐ ܒܣܘܟܠܗ²⁰ܘܒܝܕܥܬܗ ܐܬܒܙܥܘ ܬܗ̈ܘܡܐ ܘܥܢ̈ܢܐ ܪܣ ܛܠܐ²¹ܒܪܝ ܠܐ ܢܙܠ ܒܥܝܢ̈ܝܟ ܠܡܛܪ ܝܘܠܦܢܝ ܘܬܪ̈ܥܝܬܝ²²ܘܢܗܘܘܢ ܚ̈ܝܐ ܠܢܦܫܟ ܘܪܘܚܦܐ ܠܨܘܪܟ²³ܘܗܝܕܝܢ ܬܗܠܟ ܒܐܘܪ̈ܚܬܟ ܒܣܒܪܐ ܘܒܪܓܠܟ ܠܐ ܬܬܩܠ²⁴ܘܬܕܡܟ ܘܠܐ ܬܕܚܠ ܘܬܫܟܒ ܘܬܒܣܡ ܠܟ ܫܢܬܟ²⁵ܘܠܐ ܬܕܚܠ ܡܢ ܕܠܘܚܝܐ ܕܡܢ ܫܠܝܐ ܘܡܢ ܚܐܦܐ ܕܚ̈ܛܝܐ ܡܐ ܕܐܬܐ²⁶ܡܛܠ ܕܡܪܝܐ ܢܗܘܐ ܥܡܟ ܘܢܢܛܪ ܪܓܠܟ ܕܠܐ ܬܬܨܝܕ²⁷ܠܐ ܬܬܟܠܐ ܠܡܥܒܕ ܕܫܦܝܪ ܟܡܐ ܕܣܦܩܐ ܒܐ̈ܝܕܝܟ ܠܡܥܒܕ²⁸ܘܟܕ ܐܝܬ ܠܟ ܠܐ ܬܐܡܪ ܠܚܒܪܟ ܕܙܠ ܘܬܐ ܬܘܒ ܡܚܪ ܘܐܬܠ ܠܟ²⁹ܠܐ ܬܬܚܫܒ ܒܝܫܬܐ ܥܠ ܚܒܪܟ ܕܝܬܒ ܥܡܟ ܒܫܠܝܐ³⁰ܠܐ ܬܕܘܢ ܥܡ ܒܪܢܫܐ ܒܥܬܐ³¹ܘܠܐ ܬܛܢ ܒܓܒܪܐ ܥܘܠܐ ܘܠܐ ܬܨܒܐ ܒܟܠܗܝܢ ܐܘܪ̈ܚܬܗ³²ܡܛܠ ܕܛܡܐ ܗܘ ܥܘܠܐ ܩܕܡ ܡܪܝܐ ܘܫܘ̈ܥܝܬܗ ܕܡܪܝܐ ܥܡ ܬܪ̈ܝܨܐ³³ܠܘܛܬܗ ܕܡܪܝܐ ܒܒܬ̈ܝܗܘܢ ܕܥܘ̈ܠܐ ܘܕܝܪܗܘܢ ܕܙܕܝܩ̈ܐ ܢܒܪܟ³⁴ܘܢܣܚܘܦ ܠܡܡܝ̈ܩܢܐ ܘܥܠ ܚܟܝ̈ܡܐ ܢܪܚܦ³⁵ܐܝܩܪܐ ܢܐܪܬܘܢ ܚܟܝ̈ܡܐ ܘܣܟ̈ܠܐ ܢܩܒܠܘܢ ܨܥܪܐ

Cambia Bibbia

Confronta con un'altra Bibbia

Versetti esaminati