Proverbi ܡܬ̈ܠܐ 22

¹ܡܝܬܪ ܗܘ ܫܡܐ ܡܢ ܥܘܬܪܐ ܣܓܝܐܐ ܘܛܒܐ ܡܪܚܡܢܘܬܐ ܡܢ ܕܗܒܐ ܘܡܢ ܣܐܡܐ²ܥܬܝܪܐ ܘܡܣܟܢܐ ܦܓܥܘ ܚܕ ܒܚܕ ܘܠܬܪ̈ܝܗܘܢ ܡܪܝܐ ܥܒ̣ܕ³ܥܪܝܡܐ ܚܙܐ ܒܝܫܐ ܕܡܬܢܓܕ ܘܥܫܝܢܐܝܬ ܐܬܪܕܝ ܣ̈ܟܠܐ ܕܝܢ ܥܒܪܘ ܥܠܘܗܝ ܘܚܣܪܘ⁴ܥܩܒ̈ܝܗ̇ ܕܡܟܝܟܘܬܐ ܕܚܠܬܗ ܕܡܪܝܐ ܘܥܘܬܪܐ ܘܐܝܩܪܐ ܘܚ̈ܝܐ⁵ܢܫ̈ܒܐ ܘܦܚ̈ܐ ܒܐܘܪܚܐ ܥܣܩܬܐ ܘܡ̇ܢ ܕܢܛܪ ܢܦܫܗ ܢܬܪܚܩ ܡܢܗܘܢ⁶ܕܡܟܣ ܠܛܠܝܐ ܥܠ ܦܘܡܗ̇ ܕܐܘܪܚܗ ܐܦܢ ܢܩܫ ܠܐ ܢܣܛܐ ܡܢܗ̇⁷ܥܬܝܪܐ ܢܫܬܠܛ ܒܗ ܡܣܟܢܐ ܘܥܒ̣ܕܐ ܢܘܙܦ ܠܡ̇ܢ ܕܡܘܙܦ ܗܘܐ ܠܗ⁸ܕܙܪܥ ܥܘ̣ܠܐ ܢܚܨܘܕ ܥܬܐ ܘܫܒܛܐ ܕܐܟܬܗ ܢܓܡܘܪ⁹ܡ̇ܢ ܕܛܒܐ ܥܝܢܗ ܗܘ ܢܬܒܪܟ ܡܛܠ ܕܝܗܒ ܡܢ ܠܚܡܗ ܠܡܣܟܢܐ¹⁰ܐܘܒܕ ܠܒܝܫܐ ܘܐܦܩ ܠܚܪܝܝܐ ܘܒܛܠ ܕܝܢܐ ܘܨܥܪܐ ܕܠܐ ܐܢ ܢܬܒ ܒܟܢܘܫܬܐ ܠܟܠܟܘܢ ܢܨܥܪ¹¹ܪܚܡ ܐܠܗܐ ܠܐܝܢܐ ܕܕܟܐ ܒܠܒܗ ܘܡܪܚܡ ܥܠ ܣ̈ܦܘܬܐ ܕܪ̈ܚܡܘܗܝ ܕܡܠܟܐ¹²ܥܝܢ̈ܘܗܝ ܕܡܪܝܐ ܢܛܪ̈ܢ ܝܕܥܬܐ ܘܡܘܒ̈ܕܢ ܡ̈ܠܐ ܕܓ̈ܠܬܐ¹³ܐܡܪ ܚܒܢܢܐ ܡܐ ܕܡܫܬܕܪ ܐܪܝܐ ܒܐܘܪܚܐ ܘܗܐ ܩܛܠܐ ܒܫ̈ܘܩܐ¹⁴ܓܘܡܨܐ ܥܡܝܩܐ ܦܘܡܗ̇ ܕܢܘܟܪܝܬܐ ܘܐܝܢܐ ܕܪܓܙ ܥܠܘܗܝ ܡܪܝܐ ܢܦܠ ܬܡܢ¹⁵ܫܛܝܘܬܐ ܡܦܪܕܐ ܠܒܗ ܕܛܠܝܐ ܘܫܒܛܐ ܕܡܪܕܘܬܐ ܡܪܚܩ ܡܢܗ¹⁶ܕܬܐܟ ܠܡܣܟܢܐ ܡܣܓܐ ܒܝܫܬܗ ܘܕܝܗܒ ܠܥܬܝܪܐ ܚܘܣܪܢܐ ܗܘ ܠܢܦܫܗ¹⁷ܐܪܟܢ ܐܕܢܟ ܘܫܡܥ ܡ̈ܠܐ ܕܚ̈ܟܝܡܐ ܘܣܝܡ ܠܒܟ ܠܝܕܥܬܝ¹⁸ܡܛܘܠ ܕܒܣܝ̈ܡܢ ܐܢܝ̈ܢ ܛܪ ܐ̈ܢܝܢ ܒܟܪܣܟ ܘܢ̈ܬܩܢܢ ܐܝܟ ܚܕܐ ܥܠ ܣ̈ܦܘܬܟ¹⁹ܕܢܗܘܐ ܬܘܟܠܢܟ ܥܠ ܡܪܝܐ ܐܘܕܥܬܟ ܝܘܡܢܐ²⁰ܘܗܐ ܟܬܒܬ ܐ̈ܢܝܢ ܠܟ ܥܠ ܬܠܬ ܙܒ̈ܢܝܢ²¹ܕܐܘܕܥܟ ܡܠ̣ܟܐ ܘܝܕܥܬܐ ܘܫܠܝܐ ܘܡ̈ܠܐ ܕܩܘܫܬܐ ܕܬܗܦܟ ܡܠܬܐ ܕܩܘܫܬܐ ܠܡ̇ܢ ܕܫܕܪܟ²²ܠܐ ܬܬܘܟ ܠܡܣܟܢܐ ܡܛܠ ܕܡܣܟܝܢ ܗܘ ܘܠܐ ܬܡܟܟ ܠܒܝ̇ܫܐ ܒܬܪܥܐ²³ܡܛܠ ܕܡܪܝܐ ܕܐ̇ܢ ܕܝܢܗܘܢ ܘܡܬܦܪܥ ܥܘܠܒܢܐ ܕܢܦܫܗܘܢ²⁴ܠܐ ܬܗܘܐ ܪܚܡܐ ܠܓܒܪܐ ܚܡܬܢܐ ܘܥܡ ܓܒܪܐ ܕܡܠܐ ܪܘܓܙܐ ܠܐ ܬܥܘܠ²⁵ܕܠܐ ܬܐܠܦ ܢܡ̈ܘܣܘܗܝ ܘܬܫܟܚ ܬܘܩܠܬܐ ܠܢܦܫܟ²⁶ܠܐ ܬܬܠ ܢܦܫܟ ܠܥܪܒܘܬܐ ܒܕܒܗ̇ܬ ܐܢܬ ܡܢ ܦܪ̈ܨܘܦܐ²⁷ܐܢ ܠܝܬ ܠܟ ܓܝܪ ܡܢ ܐܬܪ ܕܬܦܪܘܥ ܢܣܒܝܢ ܬܫܘܝܬܐ ܡܢ ܬܚܘܬܝܟ²⁸ܠܐ ܬܫܢܐ ܬܚܘܡܐ ܕܡܢ ܥܠܡ ܕܥܒܕܘ ܐ̈ܒܗܝܟ²⁹ܐܢ ܚܙܝܬ ܓܒܪܐ ܕܡܗܝܪ ܒܥ̇ܒܕܗ ܩܕܡ ܡ̈ܠܟܐ ܢܩܘܡ ܘܠܐ ܢܩܘܡ ܩܕܡ ܚܫܝ̈ܟܐ

Cambia Bibbia

Confronta con un'altra Bibbia

Versetti esaminati