Salmi ܡܙܡܘܪܐ 45

² ܐܒܥ ܠܒܝ ܦܬ̈ܓܡܐ ܛܒ̈ܐ ܘܐܡܪ ܥܒ̈ܕܝ ܡܠܟܐ ܠܫܢܝ ܩܢܝܗ ܕܣܦܪܐ ܡܗܝܪܐ

³ ܕܫܦܝܪ ܒܚܙܘܗ ܡܢ ܒܢ̈ܝ ܐܢܫܐ ܐܬܢܣܟܘ ܪ̈ܚܡܐ ܥܠ ܣܦܘ̈ܬܟ ܡܛܠ ܗܢܐ ܒܪܟܟ ܐܠܗܐ ܠܥܠܡ

⁴ ܐܪܡܐ ܣܝܦܐ ܒܚ̈ܨܝܟ ܓܢܒܪܐ ܗܕܪܟ ܘܫܘܒܚܟ

⁵ ܘܫܘܒܚܟ ܙܟܐ ܪܟܒ ܥܠ ܡܠܬܐ ܕܩܘܫܬܐ ܡܘܟܟܐ ܕܙܕܝܩܘܬܐ ܢܡܘܣܟ ܒܕܚܠܬܐ ܕܝܡܝܢܟ

⁶ ܓܐܪ̈ܝܟ ܫܢܝܢܝܢ ܘܥܡ̈ܡܐ ܢܦܠܘܢ ܬܚܘܬܝܟ ܒܠܒܐ ܕܒ̈ܥܠܕܒܒܘܗܝ ܕܡܠܟܐ

⁷ ܟܘܪܣܝܗ ܕܐܠܗܐ ܠܥܠܡ ܥܠܡܝܢ ܫܒܛܐ ܦܫܝܛܐ ܫܒܛܐ ܕܡܠܟܘܬܟ

⁸ ܪܚܡܬ ܙܕܝܩܘܬܐ ܘܣܢܝܬ ܥܘܠܐ ܡܛܠ ܗܢܐ ܡܫܚܟ ܐܠܗܐ ܐܠܗܟ ܡܫܚܐ ܕܚܕܘܬܐ ܝܬܝܪ ܡܢ ܚܒܪ̈ܝܟ

⁹ ܡܘܪܐ ܘܩܣܝܐ ܘܐܣ̈ܛܩܛܐ ܡܒܣܡܝܢ ܟܠܗܘܢ ܠܒ̈ܘܫܝܟ ܡܢ ܗܝܟܠܐ ܪܝܫܝܐ ܘܡܢ ܠܘܬܝ ܚܕܝܘܟ

¹⁰ ܒܪܬ ܡܠܟܐ ܒܫܘܒܚܐ ܩܡܬ ܘܡܠܟܬܐ ܡܢ ܝܡܝܢܟ ܒܠܒܘܫܐ ܕܕܗܒܐ ܕܐܘܦܝܪ

¹¹ ܫܡܥܝ ܒܪܬܝ ܘܚܙܝ ܘܨܠܝ ܐܕܢܟܝ ܘܛܥܝ ܥܡܟܝ ܘܒܝܬ ܐܒܘܟܝ

¹² ܕܢܬܪܓܪܓ ܡܠܟܐ ܠܫܘܦܪܟܝ ܡܛܠ ܕܗܘܝܘ ܡܪܟܝ ܣܓܘܕܝ ܠܗ

¹³ ܘܒܪܬ ܨܘܪ ܬܣܓܘܕ ܠܗ ܒܩܘܪ̈ܒܢܐ ܐ̈ܦܝܟܝ ܢܒܥܘܢ ܥܬܝܪ̈ܘܗܝ ܕܥܡܐ

¹⁴ ܘܟܘܠܗ ܫܘܒܚܐ ܕܒܪܬ ܡܠܟܐ ܡܢ ܠܓܘ ܘܡܨܒܬ ܠܒܘܫܗ̇ ܒܕܗܒܐ ܛܒܐ

¹⁵ ܒܩܘܪ̈ܒܢܐ ܬܐܙܠ ܠܡܠܟܐ ܘܢܘܒ̈ܠܢ ܒܬ̈ܘܠܬܐ ܚܒܪ̈ܬܗ̇ ܒܬܪܗ̇

¹⁶ ܘܢܐ̈ܙܠܢ ܒܚܕܘܬܐ ܘܒܒܣܝܡܘܬܐ ܘܢ̈ܥܠܢ ܠܗܝܟܠܗ ܕܡܠܟܐ

¹⁷ ܚܠܦ ܐ̈ܒܗܝܟܝ ܢܗܘܘܢ ܒܢܝ̈ܟܝ ܥܒܕ ܐܢܘܢ ܫ̈ܠܝܛܐ ܒܟܠܗ̇ ܐܪܥܐ

¹⁸ ܕܢܬܕܟܪ ܫܡܟ ܒܟܠ ܕܪ ܘܕܪ ܡܛܠ ܗܢܐ ܢܘܕܘܢ ܠܟ ܥܡ̈ܡܐ ܠܥܠܡ ܥܠܡܝܢ