Secondo libro dei Maccabei ܡܩܒܝ̈ܐ 13

¹ܒܫܢܬ ܡܐܐ ܕܝܢ ܘܐܪܒܥܝܢ ܘܬܫܥ ܐܬܐ ܐܢܛܝܟܘܣ ܐܘܦܛܘܪ ܥܠ ܝܗܘ̈ܕܝܐ²ܘܥܡܗ ܠܘܣܝܐܣ ܗܘ ܕܥܒܝܕ ܗܘܐ ܥܠ ܨܒ̈ܘܬܐ ܟܕ ܐܝܬ ܥܡܗ ܚܝܠܐ ܕܥܡ̈ܡܐ ܣܓܝܐ̈ܐ ܚܕܥܣܪܐ ܪ̈ܒܘܢ ܪ̈ܓܠܝܐ ܘܚܡܫܐ ܐ̈ܠܦܝܢ ܘܬܠܬܡܐܐ ܦܪ̈ܫܝܢ ܘܥܣܪܝܢ ܘܬܪܝܢ ܦܝ̈ܠܝܢ ܘܡܪ̈ܟܒܬܐ ܬܠܬܡܐܐ ܕܡܚܙܩܢ ܒܡ̈ܓܢܐ ܠܩܪܒܐ³ܐܦ ܡܢܠܐܘܣ ܕܝܢ ܐܙܠ ܘܚܠܛ ܥܡܗܘܢ ܘܒܥܐ ܗܘܐ ܡܢ ܐܢܛܝܟܘܣ ܘܡܬܟܫܦ ܠܗ ܕܢܐܙܠ ܥܠ ܣܘܚܦܐ ܕܐܬܪܗ ܘܕܒ̈ܢܝ ܡܕܝܢܬܗ ܘܠܐ ܠܥܘܕܪܢܗܘܢ ܡܛܠ ܕܡܣܟܐ ܗܘܐ ܕܢܐܙܠ ܘܢܩܘܡ ܒܪܫܢܘܬܐ⁴ܡܪܝܐ ܕܝܢ ܡܠܟ ܡ̈ܠܟܐ ܐܥܝܪ ܚܡܬܗ ܕܐܢܛܝܟܘܣ ܥܠ ܡܢܠܐܘܣ ܡܚܝܒܐ ܡܛܠ ܕܐܘܕܥܗ ܗܘܐ ܠܘܣܝܐܣ ܕܗܘܝܘ ܥܠܬܐ ܕܟܠܗܝܢ ܒܝܫ̈ܬܐ ܘܦܩܕ ܕܢܘܒܠܘܢܝܗܝ ܠܚܠܒ ܘܬܡܢ ܢܘܒܕܘܢܝܗܝ⁵ܐܝܬ ܗܘܐ ܕܝܢ ܬܡܢ ܡܓܕܠܐ ܕܚܡܫܝܢ ܐܡܝܢ ܕܡܠܐ ܗܘܐ ܩܛܡܐ ܕܐܝܬ ܗ̈ܘܝ ܠܗ ܓܝ̈ܓܠܐ ܘܒܐܘܡܢܘܬܐ ܡܬܢܓܕ ܗܘܐ⁶ܘܚܒܫܘܗܝ ܬܡܢ ܠܡܚܠܨ ܗܝܟܠܐ ܘܠܥܒܘܕܐ ܕܟܠܗܝܢ ܒܝܫ̈ܬܐ⁷ܘܒܗܢܐ ܬܫܢܝܩܐ ܡܝܬ ܡܚܝܒܐ ܘܪܫܝܥܐ ܘܠܐ ܐܫܬܘܝ ܐܦܠܐ ܕܢܬܩܒܪ ܒܐܪܥܐ ܡܢܠܐܘܣ ܘܟܐܢܐܝܬ ܩܒܠ ܦܘܪܥܢܐ⁸ܡܛܠ ܕܣܥܪ ܗܘܐ ܒܝܫ̈ܬܐ ܠܡܕܒܚܐ ܐܝܟܐ ܕܐܝܬ ܗܘܐ ܢܘܪܐ ܩܕܝܫܬܐ ܘܩܛܡܐ ܘܡܛܘܠ ܗܢܐ ܒܩܛܡܐ ܩܒܠ ܡܘܬܐ⁹ܡܠܟܐ ܕܝܢ ܐܝܬܘܗܝ ܗܘܐ ܥܕܟܝܠ ܒܚܡܬܐ ܘܒܪܥܝܢܐ ܩܫܝܐ ܥܠ ܝܗܘ̈ܕܝܐ ܘܡܬܚܫܒ ܗܘܐ ܕܢܣܥܘܪ ܠܗܘܢ ܒܝܫ̈ܬܐ ܣܓܝܐ̈ܬܐ ܝܬܝܪ ܡܢ ܐܒܘܗܝ¹⁰ܠܝܗܘܕܐ ܕܝܢ ܐܬܓܠܝܬ ܡܐܬܝܬܗ ܘܡܚܫܒܬܗ ܕܡܠܟܐ ܘܦܩܕ ܠܥܡܐ ܕܢܬܥܝܪܘܢ ܒܨܠܘܬܐ ܒܐܝܡܡܐ ܘܒܠܠܝܐ ܘܢܓܥܘܢ ܠܘܬ ܐܠܗܐ ܕܢܥܕܪ ܐܢܘܢ ܘܢܦܪܘܩ ܐܢܘܢ ܗܫܐ ܘܒܟܠ ܙܒܢ ܡܢ ܐܝܕܐ ܕܥܡ̈ܡܐ¹¹ܗܢܘܢ ܕܨܒܝܢ ܕܢܪܚܩܘܢ ܐܢܘܢ ܡܢ ܢܡܘܣܐ ܘܡܢ ܐܬܪܐ ܘܡܢ ܗܝܟܠܐ ܩܕܝܫܐ ܘܠܥܡܐ ܗܘ ܕܩܠܝܠ ܙܒܢܐ ܐܬܪܘܚ ܘܐܬܬܢܝܚ ܠܐ ܢܫܒܩܝܘܗܝ ܕܢܫܬܥܒܕ ܠܥܡ̈ܡܐ ܪ̈ܫܝܥܐ ܘܥܘܪ̈ܠܐ¹²ܟܠܗܘܢ ܕܝܢ ܨܠܝܘ ܘܓܥܘ ܗܟܢܐ ܘܒܥܘ ܡܢ ܐܠܗܐ ܡܪܚܡܢܐ ܒܒܟܬܐ ܣܓܝܐ̈ܬܐ ܟܕ ܐܝܬܝܗܘܢ ܗܘܘ ܒܨܘܡܐ ܬܠܬܐ ܝܘܡ̈ܝܢ ܘܕܠܐ ܫܠܝܘ ܪܡܝܢ ܗܘܘ ܥܠ ܐ̈ܦܝܗܘܢ ܘܓܥܝܢ ܘܡܢ ܒܬܪ ܬܠܬܐ ܝܘ̈ܡܝܢ ܒܥܐ ܡܢܗܘܢ ܝܗܘܕܐ ܘܒܝܐ ܐܢܘܢ ܕܢܐܟܠܘܢ¹³ܝܗܘܕܐ ܕܝܢ ܐܙܠ ܗܘ ܒܠܚܘܕܘܗܝ ܠܘܬ ܣ̈ܒܐ ܘܐܬܡܠܟ ܥܡܗܘܢ ܘܐܡܪ ܕܡܢ ܩܕܡ ܕܢܥܘܠ ܚܝܠܗ ܕܡܠܟܐ ܠܝܗܘܕܐ ܘܢܟܒܫܘܢ ܘܢܬܡܨܘܢ ܚܝܠܗ ܕܡܕܝܢܬܐ ܢܦܘܩ ܘܢܣܥܘܪ ܘܢܬܩܢ ܟܠܗܝܢ ܨܒܘ̈ܬܐ ܒܥܘܕܪܢܗ ܕܐܠܗܐ¹⁴ܘܣܡܗ ܡܕܒܪܢܘܬܐ ܒܐܝ̈ܕܝ ܐܠܗܐ ܒܪܘܝܗ ܕܥܠܡܐ ܘܒܥܐ ܡܢ ܐܝܠܝܢ ܕܥܡܗ ܕܓܢܒܪܐܝܬ ܢܬܟܬܫܘܢ ܘܢܫܠܡܘܢ ܢܦܫܗܘܢ ܥܕܡܐ ܠܡܘܬܐ ܥܠ ܐ̈ܦܝ ܢܡܘܣܐ ܘܗܝܟܠܐ ܘܡܕܝܢܬܐ ܘܐܬܪܐ ܘܒܢ̈ܝ ܥܡܐ ܘܟܢܫ ܟܠܗ ܚܝܠܗ ܘܐܬܛܝܒܘ ܒܡܘܪܥܝܡ¹⁵ܘܝܗܒ ܕܝܢ ܠܐܝܠܝܢ ܕܥܡܗ ܐܬܐ ܕܦܘܪܩܢܗ ܕܐܠܗܐ ܘܕܒܪ ܥܡܗ ܥܠܝܡ̈ܐ ܚܝ̈ܠܬܢܐ ܡܓ̈ܒܝܐ ܘܐܙܠ ܥܠ ܡܫܪܝܬܐ ܘܐܪܡܝ ܒܠܠܝܐ ܥܠ ܕܪܬܗ ܕܡܠܟܐ ܘܩܛܠ ܬܡܢ ܐܝܟ ܬܠܬܐ ܐ̈ܠܦܝܢ ܓܒܪ̈ܝܢ ܘܠܪܒܐ ܕܦܝ̈ܠܐ ܥܡ ܟܠܗ ܛܘܝܒܐ ܕܥܡܗ ܫܚܩ ܘܐܪܡܝ¹⁶ܘܡܠܐܘܗ ܠܟܠܗ ܡܫܪܝܬܐ ܙܘܥܬܐ ܘܫܓܘܫܝܐ ܘܗܦܟܘ ܡܢ ܬܡܢ ܒܒܘܣܡܐ ܘܒܚܕܘܬܐ¹⁷ܟܕ ܩܪܝܒ ܕܝܢ ܕܢܢܗܪ ܥܒܕܘ ܗܟܢܐ ܡܛܠ ܚܝܠܗ ܘܥܘܕܪܢܗ ܕܡܪܝܐ ܕܡܛܠ ܗܘܐ ܥܠܝܗܘܢ¹⁸ܡܠܟܐ ܕܝܢ ܟܕ ܛܥܡ ܘܚܙܐ ܓܢܒܪܘܬܗܘܢ ܘܠܒܝܒܘܬܗܘܢ ܕܝܗܘ̈ܕܝܐ ܨܒܐ ܗܘܐ ܕܒܐܘܡܢܘܬܐ ܘܒܢܟܠܐ ܢܟܒܘܫ ܐܢܘܢ¹⁹ܘܫܕܪ ܡܛܪܬܐ ܥܠ ܒܝܬ ܫܘܪ̈ܐ ܚܣ̈ܢܐ ܕܝܗܘ̈ܕܝܐ ܘܐܬܟܬܫܘ ܥܠܘܗܝ ܘܐܙܕܟܝܘ ܘܐܬܒܨܪܘ ܣܓܝ²⁰ܝܗܘܕܐ ܕܝܢ ܡܫܕܪ ܗܘܐ ܐܣܢܐ ܠܐܝܠܝܢ ܕܝܬܒܝܢ ܗܘܘ ܒܓܘ ܚܣ̈ܢܐ²¹ܘܐܙܠ ܪܘܕܩܣ ܡܢ ܐܪܥܐ ܕܝܗܘܕܐ ܘܓܠܐ ܪܐܙܗܘܢ ܠܒܥܠܕܒ̈ܒܝܗܘܢ ܘܦܩܕ ܘܐܫܟܚܘܗܝ ܘܩܛܠܘܗܝ²²ܘܬܢܐ ܬܘܒ ܡܠܟܐ ܘܐܬܐ ܥܠ ܒܝܬ ܫܘܪ̈ܐ ܘܝܗܒ ܝܡܝܢܐ ܘܢܣܒ ܘܫܩܠ²³ܘܐܙܠ ܥܠ ܕܒܝܬ ܝܗܘܕܐ ܘܐܬܟܬܫ ܥܡܗܘܢ ܘܐܙܕܟܝ ܘܗܦܟ ܟܕ ܣܒܪ ܗܘܐ ܥܠ ܦܝܠܝܦܘܣ ܗܘ ܕܡܩܡ ܗܘܐ ܠܗ ܥܠ ܨܒܘ̈ܬܐ ܒܐܢܛܝܟܝܐ ܕܢܡܪܕ ܥܠܘܗܝ ܨܒܐ ܘܥܒܕ ܫܠܡܐ ܥܡ ܝܗܘ̈ܕܝܐ ܘܐܫܬܥܒܕ ܠܗܘܢ ܘܐܝܡܐ ܠܗܘܢ ܘܐܩܝܡ ܥܡܗܘܢ ܪܚܡܘܬܐ ܘܩܪܒ ܩܘܪ̈ܒܢܐ ܘܝܩܪܗ ܠܗܝܟܠܐ ܪܘܪܒܐܝܬ ܐܦ ܥܠ ܐܬܪܐ ܪܚܡ²⁴ܘܠܡܩܒܝ ܩܒܠܗ ܒܚܘܒܐ ܣܓܝܐܐ ܘܫܒܩ ܪܫܐ ܘܡܕܒܪܢܐ ܡܢ ܦܛܠܡܐܣ ܘܥܕܡܐ ܠܓܙܪ ܠܗܓܡܢܝܕܝܣ²⁵ܘܐܙܠ ܠܦܛܘܠܘܡܐܘܣ ܘܡܬܬܥܝܩܝܢ ܗܘܘ ܦܛܘ̈ܠܡܝܐ ܥܠ ܩܝܡܐ ܕܐܩܝܡ ܗܘܐ ܥܡܗܘܢ ܘܡܬܚܡܬܝܢ ܗܘܘ ܥܠܘܗܝ ܪܘܪܒܐܝܬ ܘܨܒܝܢ ܗܘܘ ܕܢܫܪܘܢ ܩܝܡܐ ܕܐܩܝܡ ܥܡܗܘܢ²⁶ܘܩܪܒ ܠܘܣܝܐܣ ܩܕܡ ܒܝܡ ܘܢܦܩ ܠܗܘܢ ܪܘܚܐ ܘܐܦܝܣ ܐܢܘܢ ܘܫܝܢ ܐܢܘܢ ܘܕܒܪ ܡܢ ܬܡܢ ܠܐܢܛܝܘܟܝܐ ܗܟܢܐ ܗܘܬ ܐܘܪܚܗ ܘܡܐܬܝܬܗ ܕܡܠܟܐ

Cambia Bibbia

Confronta con un'altra Bibbia

Versetti esaminati