Secondo libro dei Maccabei ܡܩܒܝ̈ܐ 12

¹ ܟܕ ܗ̈ܘܝ ܗܠܝܢ ܡ̈ܠܐ ܫܩܠ ܠܘܣܝܐܣ ܘܐܙܠ ܠܘܬ ܡܠܟܐ ܘܝܗܘ̈ܕܝܐ ܐܬܦܢܝܘ ܥܠ ܦܘܠܚܢܗܘܢ ܘܥܒܕܗܘܢ

² ܪ̈ܫܐ ܕܝܢ ܘܡܕܒܪ̈ܢܐ ܕܐܝܬ ܗܘܘ ܒܐܬܪ̈ܘܬܐ ܛܝܡܬܐܣ ܘܐܦܘܠܘܢܝܣ ܒܪ ܓܢܝ ܘܝܐܪܘܢܝܡܘܣ ܘܪܡܦܘܢ ܘܢܝܩܢܘܪ ܘܥܡܗܘܢ ܩܘܦܪ̈ܝܐ ܠܐ ܫܒܩܝܢ ܗܘܘ ܠܗܘܢ ܕܢܫܠܘܢ ܘܢܬܬܢܝܚܘܢ

³ ܒܢ̈ܝ ܝܘܦܐ ܕܝܢ ܗܟܢܐ ܥܒܕܘ ܪܘܫܥܐ ܪܒܐ ܘܐܦܝܣܘ ܠܝܗܘ̈ܕܝܐ ܕܥܡܗܘܢ ܕܢܬܒܘܢ ܥܡ ܢܝܫܝ̈ܗܘܢ ܘܒܢܝ̈ܗܘܢ ܒܩܪ̈ܩܘܪܐ ܟܕ ܠܐ ܐܝܬ ܗܘܐ ܠܗܘܢ ܚܕ ܥܡ ܚܕ ܠܐ ܒܥܠܕܒܒܘܬܐ ܘܠܐ ܡܨܘܬܐ

⁴ ܐܠܐ ܐܬܚܫܒܘ ܟܠܗܘܢ ܒܢ̈ܝ ܡܕܝܢܬܐ ܐܟܚܕܐ ܘܐܨܛܒܝܘ ܗܠܝܢ ܐܝܟ ܕܗܐ ܠܡ ܫܠܡܐ ܗܘ ܨܒܝܢ ܗܘܘ ܕܢܥܒܕܘܢ ܘܟܕ ܠܝܬ ܠܗܘܢ ܡܣܡ ܒܪܥܝܢܐ ܡܕܡ ܣܠܩܘ ܘܝܬܒܘ ܘܥܠܘ ܘܛܒܥܘ ܐܢܘܢ ܒܓܘ ܝܡܐ ܐܝܟ ܡܐܬܝܢ ܢܦܫ̈ܢ

⁵ ܘܟܕ ܫܡܥ ܝܗܘܕܐ ܒܝܫܬܐ ܘܪܘܫܥܐ ܕܗܘܐ ܒܒ̈ܢܝ ܥܡܗ ܦܩܕ ܠܐܢܫܐ ܕܥܡܗ

⁶ ܘܨܠܝ ܘܓܥܐ ܠܘܬ ܐܠܗܐ ܕܝܢܐ ܕܩܘܫܬܐ ܘܐܬܐ ܥܠ ܩܛܘ̈ܠܐ ܕܐܚܝ̈ܗܘܢ ܘܠܠܡܐܢܗܘܢ ܐܘܩܕܘ ܒܠܠܝܐ ܥܡ ܐ̈ܠܦܐ ܕܐܝܬ ܗ̈ܘܝ ܒܗ ܘܠܐܝܠܝܢ ܕܐܫܬܟܚܘ ܒܗܝܢ ܩܛܠܘ ܐܢܘܢ

⁷ ܘܟܕ ܐܪܓܫܘ ܒܢ̈ܝ ܡܕܝܢܬܐ ܐܚܕܘ ܬܪ̈ܥܐ ܘܗܘ ܗܦܟ ܘܐܬܐ ܠܗ ܡܛܠ ܕܬܘܒ ܒܥܐ ܗܘܐ ܕܢܐܙܠ ܥܠܝܗܘܢ ܘܡܬܚܫܒ ܗܘܐ ܕܢܥܩܪܝܗ ܠܝܘܦܐ ܥܡ ܝܬܒ̈ܝܗ

⁸ ܐܪܓܫ ܕܝܢ ܬܘܒ ܕܐܦ ܗܠܝܢ ܕܝܡܢܝܢ ܗܟܘܬ ܨܒܘ ܕܢܥܒܕܘܢ ܠܝܗܘ̈ܕܝܐ ܕܥܡܪܝܢ ܬܡܢ

⁹ ܘܐܙܠ ܠܬܡܢ ܒܠܠܝܐ ܘܐܘܩܕܗ ܠܠܡܢܐܢܗܘܢ ܥܡ ܟܠܡܕܡ ܕܐܝܬ ܗܘܐ ܒܗ ܐܝܟ ܕܢܬܚܙܐ ܙܗܪܐ ܕܢܘܪܐ ܕܝܩܕܢܗ ܥܕܡܐ ܠܐܘܪܫܠܡ ܡܐܬܝܢ ܕܐܪܒܥܝܢ ܐܣ̈ܛܕܘܢ

¹⁰ ܘܡܢ ܬܡܢ ܐܪܚܩܘ ܐܝܟ ܬܫܥܐ ܐܣ̈ܛܕܘܢ ܘܐܙܠܝܢ ܗܘܘ ܥܠ ܛܝܡܬܐܘܣ ܘܐܪܡܝܘ ܥܠܝܗܘܢ ܥܪ̈ܒܝܐ ܐܝܟ ܚܡܫܐ ܐ̈ܠܦܝܢ ܪ̈ܓܠܝܐ ܘܚܡܫܡܐܐ ܦܪ̈ܫܝܢ

¹¹ ܘܟܕ ܗܘܐ ܩܪܒܐ ܘܬܟܬܘܫܐ ܪܒܐ ܙܟܘ ܕܒܝܬ ܝܗܘܕܐ ܡܛܠ ܥܘܕܪܢܐ ܕܐܠܗܐ ܕܗܘܐ ܥܡܗܘܢ ܘܟܕ ܐܙܕܟܝܘ ܡܕܒܪ̈ܢܐ ܒܥܝܢ ܗܘܘ ܡܢ ܝܗܘܕܐ ܕܢܬܠ ܠܗܘܢ ܝܡܝܢܐ ܟܕ ܡܫܬܘܕܝܢ ܗܘܘ ܠܗ ܕܢܬܠܘܢ ܐܦ ܒܝܬ ܪܥܝܐ

¹² ܘܝܗܘܕܐ ܕܝܢ ܐܬܪܥܝ ܕܚܫܚܝܢ ܐܢܘܢ ܠܗ ܠܨܒܘ̈ܬܐ ܣܓܝܐ̈ܬܐ ܘܐܬܪܡܝ ܕܢܥܒܕ ܥܡܗܘܢ ܫܠܡܐ ܘܟܕ ܫܩܠܘ ܝܡܝܢܐ ܐܙܠܘ ܠܡܫܟ̈ܢܝܗܘܢ

¹³ ܝܗܘܕܐ ܕܝܢ ܐܪܡܝ ܥܠ ܡܕܝܢܬܐ ܚܕܐ ܥܫܝܢܬܐ ܕܟܪܝܟܐ ܘܡܚܙܩܐ ܒܫܘܪ̈ܝܗ ܘܥܡܪܝܢ ܗܘܘ ܒܗ ܥܡ̈ܡܐ ܣܓܝܐ̈ܐ ܘܫܡܗ ܕܝܢ ܩܨܦܐ

¹⁴ ܥܡܘܪ̈ܝܗ ܕܝܢ ܡܛܠ ܕܬܟܝܠܝܢ ܗܘܘ ܥܠ ܫܘܪܪܗܘܢ ܕܫܘܪ̈ܝܗ ܘܥܠ ܙܝܢܐ ܣܓܝܐܐ ܕܣܝܡ ܗܘܐ ܠܗܘܢ ܒܓܘܗ ܝܬܝܪܐܝܬ ܡܬܪܝܡܝܢ ܗܘܘ ܘܡܓܕܦܝܢ ܘܡܨܥܪܝܢ ܠܕܒܝܬ ܝܗܘܕܐ ܘܐܡܪܝܢ ܗܘܘ ܠܗܘܢ ܡ̈ܠܐ ܛܢ̈ܦܬܐ ܐܝܠܝܢ ܕܠܐ ܙܕܩ̈ܢ

¹⁵ ܕܒܝܬ ܝܗܘܕܐ ܕܝܢ ܨܠܝܘ ܘܓܥܘ ܠܘܬ ܐܠܗܐ ܚܝܠܬܢܐ ܕܥܠܡ̈ܐ ܠܗܘ ܕܕܠܐ ܒܟܐ̈ܦܐ ܘܕܠܐ ܡܐ̈ܟܢܣ ܘܐܘܡ̈ܢܘܬܐ ܕܒܢܝ̈ܢܫܐ ܣܚܦ ܠܫܘܪ̈ܝܗ ܕܐܝܪܝܚܘ ܒܝܘܡ̈ܬܗ ܕܝܫܘܥ ܘܐܬܩܪܒܘ ܘܐܬܛܪܝܘ ܒܫܘܪܐ ܐܝܟ ܚܝܘ̈ܬܐ ܘܣܚܦܘܗܝ ܠܫܘܪܗ

¹⁶ ܘܟܒܫܘܗ ܠܡܕܝܢܬܐ ܒܨܒܝܢܗ ܕܐܠܗܐ ܘܩܛܠܘ ܒܗ ܠܣ̈ܓܝܐܐ ܐܝܟܢܐ ܕܝܡܬܐ ܕܩܪܝܒܐ ܗܘܬ ܠܗܘܢ ܕܐܝܬ ܗܘܐ ܒܗ ܐܝܟ ܬܪܝܢ ܐ̈ܣܛܕܘܢ ܬܬܡܙܓ ܟܠܗ ܒܕܡܐ

¹⁷ ܘܫܩܠܘ ܡܢ ܬܡܢ ܘܐܙܠܘ ܐܝܟ ܫܒܥܡܐܐ ܘܚܡܫܝܢ ܐܣ̈ܛܕܘܢ ܘܥܠܘ ܠܟܪܟܐ ܠܘܬ ܝܗܘ̈ܕܝܐ ܗܢܘܢ ܕܡܬܩܪܝܢ ܛܘ̈ܒܝܢܐ

¹⁸ ܘܐܫܟܚܘܗܝ ܠܛܝܡܬܐܣ ܒܗ ܒܐܬܪܐ ܕܠܐ ܚܝܠ ܟܕ ܡܪ̈ܫܠܢ ܐܝܕܘ̈ܗܝ ܡܛܠ ܕܠܝܬ ܗܘܐ ܥܡܗ ܚܝܠܐ ܘܫܒܝܩܐ ܗܘܬ ܠܗ ܕܝܢ ܡܛܪܬܐ ܒܚܣܢܐ ܚܕ ܪܒܐ ܘܥܫܝܢܐ

¹⁹ ܕܘܣܝܬܐܘܣ ܕܝܢ ܘܣܘܣܝܦܛܪܣ ܡܕܒܪ̈ܢܐ ܘܪ̈ܫܐ ܡܢ ܕܒܝܬ ܡܩܒܝ ܐܙܠܘ ܘܩܛܠܘ ܠܗܢܘܢ ܕܫܒܝܩܝܢ ܗܘܘ ܠܗ ܠܛܝܡܬܐܘܣ ܒܚܣ̈ܢܐ ܝܬܝܪ ܡܢ ܥܣܪܐ ܐ̈ܠܦܝܢ ܓܒܪ̈ܝܢ

²⁰ ܡܩܒܝ ܕܝܢ ܟܢܫ ܚܝܠܐ ܕܥܡܗ ܘܦܠܓ ܐܢܘܢ ܡ̈ܢܘܢ ܡ̈ܢܘܢ ܘܐܩܝܡ ܪܫܐ ܥܠ ܟܠ ܚܕܐ ܚܕܐ ܡܢ ܡܢܘ̈ܬܐ ܘܐܙܠ ܥܠ ܛܝܡܬܐܘܣ ܕܐܬܐ ܗܘܐ ܥܠܝܗܘܢ ܒܬܪܬܥܣܪܐ ܪ̈ܒܘܢ ܚܝܠܐ ܕܪ̈ܓܠܝܐ ܘܦܪ̈ܫܐ ܬܪܝܢ ܐ̈ܠܦܝܢ ܘܚܡܫܡܐܐ

²¹ ܘܟܕ ܫܡܥ ܛܝܡܬܐܘܣ ܥܠ ܕܒܝܬ ܝܗܘܕܐ ܫܕܪ ܢܝܫܝ̈ܗܘܢ ܘܒܢܝ̈ܗܘܢ ܘܟܠܗ ܝܩܪܬܗܘܢ ܠܩܪܝܬܐ ܕܡܬܩܪܝܐ ܩܪܢܐ ܡܛܠ ܕܩܫܝܐ ܗܘܬ ܩܪܝܬܐ ܘܡܚܣܢܐ ܘܠܐ ܥܓܠ ܡܫܟܚܐ ܗܘܬ ܠܡܬܟܒܫܘ ܐܘ ܠܡܬܒܙܙܘ ܡܛܠ ܕܐܠܝܨܝܢ ܗܘܘ ܡܥ̈ܠܢܝܗ ܡܢ ܟܘܠܗܘܢ ܣܛܪ̈ܝܗ

²² ܘܟܕ ܐܬܚܙܝܬ ܕܝܢ ܡܫܪܝܬܗ ܩܕܡܝܬܐ ܕܝܗܘܕܐ ܢܦܠܬ ܕܚܠܬܐ ܘܙܘܥܬܐ ܥܠ ܒܥܠܕܒ̈ܒܐ ܒܨܒܝܢܗ ܕܐܠܗܐ ܐܚܝܕ ܟܠ ܕܐܬܓܠܝ ܥܠܝܗܘܢ ܘܝܗܒܘ ܟܘܠܗܘܢ ܠܡܥܪܩ ܘܐܢܫ ܠܣܛܪܗ ܥܪܩܝܢ ܗܘܘ ܐܝܟܢܐ ܕܚܕ ܒܚܕ ܐܙܠܝܢ ܗܘܘ ܘܣܠܩܝܢ ܘܚܕ ܡܢ ܚܕ ܡܬܕܓܫܝܢ ܗܘܘ ܘܡܣܬܪܚܝܢ ܗܕܡ̈ܝܗܘܢ ܡܛܠ ܕܣܝ̈ܦܝܗܘܢ ܫܡܝܛܝܢ ܗܘܘ

²³ ܝܗܘܕܐ ܕܝܢ ܪܕܦ ܗܘܐ ܒܬܪܗܘܢ ܬܩܝܦܐܝܬ ܘܡܩܛܠ ܗܘܐ ܒܗܘܢ ܒܪ̈ܫܝܥܐ ܩܛܠ ܕܝܢ ܒܗܘܢ ܐܝܟ ܬܠܬ ܪ̈ܒܘܢ ܓܒܪ̈ܐ

²⁴ ܘܗܘ ܕܝܢ ܛܝܡܬܐܘܣ ܢܦܠ ܒܐܝ̈ܕܝܗܘܢ ܕܒܝܬ ܕܘܣܝܬܐܘܣ ܘܣܘܣܝܦܛܪܣ ܘܐܚܕܘܗܝ ܘܒܥܐ ܗܘܐ ܡܢܗܘܢ ܘܡܬܟܫܦ ܗܘܐ ܠܗܘܢ ܕܢܫܒܩܘܢܝܗܝ ܟܕ ܚܝ ܘܗܢܘܢ ܕܝܢ ܡܛܠ ܕܠܣܓ̈ܝܐܐ ܡܢܗܘܢ ܐܝܬ ܗܘܘ ܨܐܕܘܗܝ ܐܚ̈ܐ ܘܒܢ̈ܝ ܫܪܒܬܐ

²⁵ ܘܗܘ ܕܝܢ ܐܫܬܘܕܝ ܗܘܐ ܠܗܘܢ ܕܢܪܦܐ ܐܢܘܢ ܟܕ ܚܝܝܢ ܘܒܗܬܘ ܡܢܗ ܡܛܠ ܚܝ̈ܐ ܕܐܚܝ̈ܗܘܢ ܘܫܒܩܘܗܝ ܟܕ ܚܝ

²⁶ ܝܗܘܕܐ ܕܝܢ ܡܩܒܝ ܢܦܩ ܥܠ ܐܬܪܐ ܕܡܬܩܪܐ ܗܘܐ ܩܪܢܐ ܘܐܛܪܓܛ ܘܩܛܠ ܬܡܢ ܥܣܪܝܢ ܘܚܡܫܐ ܐ̈ܠܦܝܢ

²⁷ ܘܡܢ ܒܬܪ ܕܐܙܕܟܝܘ ܗܠܝܢ ܘܐܬܩܛܠܘ ܐܬܚܙܩ ܝܗܘܕܐ ܥܡ ܚܝܠܗ ܘܐܙܠ ܥܠ ܥܦܪܘܢ ܡܕܝܢܬܐ ܥܫܝܢܬܐ ܕܥܡܪ ܗܘܐ ܒܗ ܠܘܣܝܐܣ ܘܟܢܫܐ ܕܥܡ̈ܡܐ ܣ̈ܓܝܐܐ ܘܥ̈ܠܝܡܐ ܥܫ̈ܝܢܐ ܘܚܝܠܬܢܐܝܬ ܡܬܟܬܫܝܢ ܗܘܘ ܥܠ ܫܘܪ̈ܝܗ ܒܓܐܪ̈ܐ ܘܒܢܝܙ̈ܟܐ ܘܒܟܘܠ ܡܐ̈ܢܝ ܩܪܒܐ

²⁸ ܕܒܝܬ ܝܗܘܕܐ ܕܝܢ ܨܠܝܘ ܘܓܥܘ ܠܘܬ ܐܠܗܐ ܗܘ ܕܡܨܐ ܒܚܝܠܐ ܠܡܫܚܩ ܘܠܡܬܒܪ ܠܟܠܗ ܥܘܫܢܐ ܕܒܥܠܕܒ̈ܒܐ ܘܐܫܠܡܗ ܠܡܕܝܢܬܐ ܒܐܝܕܝ̈ܗܘܢ ܘܥܠܘ ܘܟܒܫܘܗ ܘܩܛܠܘ ܒܗ ܐܝܟ ܥܣܪܝܢ ܘܚܡܫܐ ܐ̈ܠܦܝܢ

²⁹ ܘܡܢ ܬܡܢ ܫܩܠܘ ܘܐܙܠܘ ܠܒܝܫܢ ܕܪܚܝܩܐ ܡܢ ܐܘܪܫܠܡ ܐܝܟ ܫܬܡܐܐ ܐܣ̈ܛܕܘܢ

³⁰ ܘܐܘܕܝܘ ܗܘܘ ܕܝܢ ܝܗܘ̈ܕܝܐ ܕܝܬܒܝܢ ܗܘܘ ܒܗ ܥܠ ܒܢ̈ܝ ܡܕܝܢܬܐ ܕܣܓܝ ܡܢܝܚܝܢ ܗܘܘ ܠܗܘܢ ܘܐܚܝܕܝܢ ܒܐܝܩܪܗܘܢ

³¹ ܘܩܒܠܘ ܛܝܒܘܬܗܘܢ ܕܒܝܬ ܝܗܘܕܐ ܘܐܪܥܘ ܐܢܘܢ ܒܫܠܡܐ ܘܡܢ ܬܡܢ ܐܬܘ ܠܐܘܪܫܠܡ ܕܢܥܒܕܘܢ ܥܕܥܕܐ ܕܦܛܝܪ̈ܐ

³² ܘܡܢ ܒܬܪ ܦܢܛܝܩܘܣܛܐ ܐܙܠܘ ܥܠ ܓܘܪܓܝܐ ܪܫܐ ܘܡܕܒܪܢܐ ܕܐܕܘ̈ܡܝܐ

³³ ܢܦܩ ܕܝܢ ܥܠܝܗܘܢ ܒܬܠܬܐ ܐ̈ܠܦܝܢ ܪ̈ܓܠܝܝܢ ܘܐܪܒܥܡܐܐ ܦܪ̈ܫܝܢ

³⁴ ܘܟܕ ܫܪܝܘ ܠܡܩܪܒܘ ܢܦܠܘ ܐܢܫܐ ܩܠܝܠ ܡܢ ܐܕܘܡ̈ܝܐ

³⁵ ܕܘܣܬܐܘܣ ܕܝܢ ܡܢ ܛܘܒܝ̈ܢܐ ܦܪܫܐ ܘܓܒܪܐ ܚܝܠܬܢܐ ܐܚܕܗ ܠܓܘܪܓܝܐ ܒܟܠܡܝܕܝܢ ܕܝܠܗ ܘܢܓܝܕ ܗܘܐ ܘܡܝܬܐ ܠܗ ܒܚܝܠܐ ܡܛܠ ܕܨܒܐ ܗܘܐ ܕܟܕ ܚܝ ܢܝܬܝܘܗܝ ܠܡܚܝܒܐ ܘܐܣܬܩܒܠ ܚܕ ܡܢ ܦܠܚܘ̈ܗܝ ܓܒܪܐ ܬܪܩܝܐ ܘܡܚܝܗܝ ܥܠ ܟܬܦܗ ܘܩܛܥܗ ܘܥܪܩ ܓܘܪܓܝܐ ܘܐܙܠ ܠܫܡܪܝܢ

³⁶ ܕܒܝܬ ܥܙܪܝ ܕܝܢ ܝܬܝܪܐܝܬ ܡܩܪܒܝܢ ܗܘܘ ܘܡܩܛܠܝܢ ܘܓܥܐ ܝܗܘܕܐ ܠܘܬ ܡܪܝܐ ܚܝܠܬܢܐ ܕܢܗܘܐ ܠܗܘܢ ܡܥܕܪܢܐ ܘܝܗܒ ܗܘ ܥܠܝܗܘܢ ܒܩܕܡܐ

³⁷ ܟܕ ܡܙܡܪ ܗܘܐ ܒܬܫܒܚ̈ܬܐ ܒܩܠܐ ܕܐܒܗ̈ܬܐ ܘܫܪܝ ܠܡܩܛܠܘ ܒܗܘܢ ܘܐܙܕܟܝܘ ܕܒܝܬ ܓܘܪܓܝܐ ܘܥܪܩܘ

³⁸ ܘܫܩܠ ܡܢ ܬܡܢ ܝܗܘܕܐ ܗܘ ܘܚܝܠܗ ܘܐܬܐ ܠܕܘܠܡܐ ܡܕܝܢܬܐ ܘܟܕ ܩܪܒܬ ܕܝܢ ܫܒܬܐ ܐܝܟ ܥܝܕܗܘܢ ܐܬܩܕܫܘ ܘܐܫܒܬܘ ܥܠ ܕܘܟܬܗܘܢ

³⁹ ܠܝܘܡܐ ܕܝܢ ܐܚܪܢܐ ܐܬܘ ܠܘܬ ܝܗܘܕܐ ܘܐܡܪܘ ܠܗ ܕܢܣܒܘܢ ܘܢܩܒܪܘܢ ܦܓܪ̈ܐ ܕܗܢܘܢ ܕܢܦܠܘ ܒܩܒܪ̈ܐ ܕܐܒܗܝ̈ܗܘܢ

⁴⁰ ܘܐܫܟܚܘ ܕܝܢ ܬܚܝܬ ܠܒܘ̈ܫܐ ܕܐܢܫ ܐܢܫ ܡܢܗܘܢ ܟܕ ܡܛܫܝܢ ܕܗܒܐ ܡܢ ܦܬܟܪ̈ܐ ܕܝܡܢܝܢ ܡܢ ܗܢܘܢ ܕܦܩܕ ܢܡܘܣܐ ܠܝܗܘ̈ܕܝܐ ܕܠܐ ܢܬܛܪܘܢ ܠܗܘܢ ܘܐܬܝܕܥܬ ܘܐܬܗܝܡܢܬ ܗܕܐ ܠܟܠܗܘܢ ܕܡܛܠ ܗܕܐ ܗܘ ܨܒܘܬܐ ܢܦܠܘ

⁴¹ ܘܟܘܠܗܘܢ ܒܪܟܘ ܘܐܘܕܝܘ ܥܠ ܕܝܢܗ ܟܐܢܐ ܕܐܠܗܐ ܗܘ ܕܐܝܠܝܢ ܕܡ̈ܛܫܝܢ ܗܘ ܡܝܬܐ ܘܡܚܘܐ ܒܓܠܝܐ

⁴² ܘܫܪܝܘ ܠܡܨܠܝܘ ܘܠܡܒܥܐ ܡܢ ܐܠܗܐ ܟܠܗܘܢ ܕܠܐ ܡܛܠ ܗܕܐ ܬܬܟܬܒ ܠܗܘܢ ܚܛܝܬܐ ܡܫܠܡܢܝܬܐ ܝܗܘܕܐ ܕܝܢ ܓܢܒܪܐ ܒܥܐ ܗܘܐ ܘܡܬܟܫܦ ܡܢ ܟܠܗ ܥܡܐ ܕܢܛܪܘܢ ܢܦܫܗܘܢ ܘܢܙܕܗܪܘܢ ܡܢ ܚܛܗ̈ܐ ܘܐܡܪ ܗܘܐ ܠܗܘܢ ܕܗܐ ܩܕܡ ܥܝܢܝ̈ܟܘܢ ܚܙܝܬܘܢ ܡܕܡ ܕܓܕܫ ܠܗܠܝܢ

⁴³ ܐܪܡܝ ܕܝܢ ܥܠ ܥܡܐ ܟܠܗ ܕܢܬܠܘܢ ܟܣܦܐ ܘܓܒܐ ܬܠܬܐ ܐ̈ܠܦܝܢ ܕܟܣܦܐ ܘܫܕܪ ܠܐܘܪܫܠܡ ܕܢܩܪܒܘܢ ܩܘܪ̈ܒܢܐ ܥܠ ܐ̈ܦܝܗܘܢ ܘܟܐܢܐܝܬ ܘܙܕܩܐܝܬ ܥܒܕ ܡܛܠ ܣܒܪܐ ܕܩܝܡܬܐ ܕܡܢ ܒܝܬ ܡܝ̈ܬܐ

⁴⁴ ܐܠܘ ܠܐ ܓܝܪ ܕܡܣܟܐ ܗܘܐ ܘܡܣܒܪ ܠܩܝܡܬܐ ܕܡܢ ܒܝܬ ܡܝ̈ܬܐ ܦܟܝܗܘܬܐ ܗܘܬ ܗܕܐ ܘܫܛܝܘܬܐ ܕܚܠܦ ܡܝ̈ܬܐ ܐܢܫ ܢܨܠܐ ܘܢܩܪܒ ܩܘܪ̈ܒܢܐ

⁴⁵ ܚܐܪ ܗܘܐ ܓܝܪ ܘܡܣܟܐ ܠܐܓܪܐ ܘܠܣܒܪܐ ܘܢܝܚܐ ܕܥܬܝܕ ܠܐܝܠܝܢ ܕܫܟܒܝܢ ܒܙܕܝܩܘܬܐ ܘܡܛܠ ܗܕܐ ܫܕܪ ܕܢܚܣܘܢ ܥܠ ܚܛܗ̈ܝܗܘܢ ܕܗܢܘܢ ܕܫܟܒܘ