| 1 ܘܒܫܢܬ ܥܣܪ̈ܝܢ ܘܬܡܢܐ. ܒܬܪܥܣܪܐ ܒܝܪܚܐ ܩܕܡܝܐ. ܗ̣ܘܐ ܦܬܓܡܐ ܒܒܝܬܗ ܕܢܒܘܟܕܢܨܪ ܡ̇ܠܟܐ̣. ܠܡܬܬܒܥܘ ܡܢ ܟܠܗ̇ ܐܪܥܐ ܐܝܟ ܕܐܡ̣ܪ | |
| 2 ܘܩ̣ܪܐ ܠܟܠܗܘܢ ܥܒ̣̈ܕܘܗܝ ܘܪ̈ܘܪܒܢܘܗܝ̣. ܘܓܠܐ ܠܗܘܢ ܪܐܙܐ ܕܠܒܗ. ܘܗ̣ܘܐ ܕܟܕ ܫ̇ܠܡ ܠܡܐܡܪ ܒܝܫ̣ܬܐ ܥܠ ܟܠܗ̇ ܐܪܥܐ̣ | |
| 3 ܩܒܠܘ ܐܦ ܗ̣ܢܘܢ ܠܡܘܒܕܘ ܠܟܠܗܘܢ ܐܢܫܐ. ܐܝܠܝܢ ܕܠܐ ܐܫܬܡܥܘ. ܠܡܠܬ ܦܘܡܗ | |
| 4 ܘܗ̣ܘܐ ܕܟܕ ܫ̇ܠܡ ܪܥܝܢܗܘܢ̇ ܩ̣ܪܐ ܢܒܘܟܕܢܨܪ ܡ̇ܠܟܐ ܕܐܬܘܪ ܠܐܠܦܪܢܐ ܪܒ ܚܝܠܗ̣. ܡܛܠ ܕܬܪܝܢܗ ܗܘܐ ܘܐܡ̣ܪ ܠܗ | |
| 5 ܗܟܢܐ ܐܡ̇ܪ ܡ̇ܠܟܐ ܪܒܐ ܡܪܗ̇ ܕܟܠܗ̇ ܐܪܥܐ ܗܐ ܐܢܬ ܬܦܘܩ ܡܢ ܩܕܡܝ̣. ܘܬܕܒܪ ܥܡܟ ܓܒܪ̈ܐ ܕܥܫܝܢܝܢ ܪ̈ܓܠܝܐ ܡܐܐ ܘܥܣܪ̈ܝܢ ܐ̈ܠܦܝܢ. ܘܣܘܓܐܐ ܕܪ̈ܟܫܐ ܥܡ ܪ̈ܟܒܝܗܘܢ̣ ܬܪܥܣܪ ܐ̈ܠܦܝܢ | |
| 6 ܘܣܩ ܥܠ ܐ̈ܦܝ ܟܠܗ̇ ܐܪܥܐ ܕܡܥܪܒܐ̇. ܐܝܠܝܢ ܕܛܠܡܘ ܦܬܓܡܐ ܕܦܘܡܝ | |
| 7 ܘܬܐܡܪ ܠ̇ܗܘܢ ܕܢ̇ܛܝܒܘܢ ܠܝ ܐܪܥܐ̣ ܘܡ̈ܝܐ. ܡܛܠ ܕܢܦ̇ܩ ܐܢܐ ܥܠܝܗܘܢ ܒܚܡܬܝ. ܘܡܟܣܐ ܐܢܐ̣ ܐ̈ܦܝ ܟܠܗ̇ ܐܪܥܐ̇. ܒܪ̈ܓܠܝܐ ܕܚܝܠܝ. ܘܐܬܠ ܐܢܘܢ ܠܒܙܬܐ ܠܚܝܠܐ | |
| 8 ܘܢܬܡܠܘܢ ܢܚ̈ܠܝܗܘܢ ܘܪ̈ܓܠܬܗܘܢ ܡܢ ܩܛܝܠܝܗܘܢ ܘܢܗܪܐ ܢ̇ܓܕܦ ܡܢ ܩܛܝܠܝ̈ܗܘܢ̣. ܘܢܬܡܠܐ | |
| 9 ܘܐܕܒܪ ܫܒܝܬܗܘܢ ܒ̇ܣ̈ܘܦܝܗ̇ ܕܐܪܥܐ | |
| 10 ܘܐܢܬ ܦܘܩ ܘܐܚܘܕ ܠܝ ܟܘܠܗܘܢ ܬܚܘܡܝܗܘܢ̣. ܘܐܢ ܢܫܠܡܘܢ̇ ܛܪ ܐܢܘܢ ܠܝ ܥܕܡܐ ܠܝܘܡܐ̇ ܕܡܟܣܢܘܬܗܘܢ | |
| 11 ܘܥܠ ܐܝܠܝܢ ܕܠܐ ܡܬܛܦܝܣܝܢ̣. ܠܐ ܬܚܘܣ ܥܝܢܟ ܠܡܬܠ ܐܢܘܢ̇ ܠܩܛܠܐ ܘܠܒܙܬܐ ܠܟܠܗ̇ ܐܪܥܐ | |
| 12 ܡܛܠ ܕܚܝ ܐܢܐ ܘܡܠܟܘܬܝ ܕܡ̇ܠܠܬ. ܘܐܥܒܕ ܗܠܝܢ ܟܠܗܝܢ ܒܐܝ̈ܕܝ | |
| 13 ܘܐܢܬ̣ ܠܐ ܬܥܒܪ ܥܠ ܚܕ ܡܢ ܦܘܩܕ̈ܢܐ ܕܡܪܟ. ܐܠܐ ܡܫܡܠܝܘ ܬܫܡܠܐ̣. ܐܝܟܢܐ ܕܦܩܕܬܟ ܠܡܥܒܕ ܗܠܝܢ. | |
| 14 ܘܢܦ̣ܩ ܐܠܦܪܢܐ ܡܢ ܩܕܡ ܡܪܗ̣. ܘܩ̣ܪܐ ܠܡܪ̈ܘܬܐ ܘܠܪ̈ܒܝ ܚܝ̈ܠܐ ܘܠܩܝܘ̈ܡܐ ܕܚ̈ܝܠܐ ܕܐܬܘܪ̣ | |
| 15 ܘܡܢܐ ܓܒܪ̈ܐ ܓܒ̈ܝܐ ܠܩܪܒܐ ܐܝܟ ܕܦܩܕܗ ܡܪܗ̣. ܡܐܐ ܘܥܣܪ̈ܝܢ ܐ̈ܠܦܝܢ. ܘܦܪ̈ܫܐ̇ ܫܕ̈ܝܝ ܒܩܫ̈ܬܬܐ̣. ܬܪܥܣܪ ܐ̈ܠܦܝܢ | |
| 16 ܘܦ̣ܩܕ ܠܗܘܢ ܠܡܬܘܥܕܘ ܠܩܪܒܐ | |
| 17 ܘܕܒܪ ܓܡ̈ܠܐ ܘܚ̇ܡܪܐ ܕܢܫܩ̇ܠܘܢ ܬܪܣܝܗܘܢ ܣܘܓܐܐ̣ ܕܛܒ̇ ܘܥܪ̈ܒܐ̇ ܘܬܘܪ̈ܐ̇ ܘܥܢܐ ܠܡܐܟܘܠܬܗܘܢ ܕܠܐ ܡܢܝܢ | |
| 18 ܘܕܗܒܐ ܘܟܣܦܐ ܡܢ ܒܝܬܗ ܕܡ̇ܠܟܐ ܣܘܓܐܐ̣ ܕܛܒ | |
| 19 ܘܢܦ̣ܩ ܡܢ ܢܝܢܘܐ ܗܘ ܘܚܝܠܗ ܠܡܪܕܝܐ ܩܕܡ ܡ̇ܠܟܐ. ܘܢܟܣܐ ܐܦܝ̈ܗ̇ ܕܟܘܠܗ̇ ܐܪܥܐ ܕܡܥܪܒܐ. ܒܡܪ̈ܟܒ̇ܬܐ ܘܒܪܓܠܝܐ ܓ̇ܒܝܐ | |
| 20 ܘܢ̣ܦܩ ܥܡܗܘܢ ܚ̇ܠܘܛܐ̣ ܣܘܓܐܐ. ܐܝܟ ܩܡܨܐ ܘܐܝܟ ܚܠܐ ܕܐܪܥܐ ܘܠܝܬ ܗܘܐ ܡ̈ܢܝܢ ܠܣܟܗܘܢ | |
| 21 ܘܢܦ̣ܩ ܡܢ ܢܝܢܘܐ ܡܪܕܐ ܬܠܬܐ ܝܘܡ̈ܝܢ. ܠܘܩܒܠ ܦܩܥܬܐ ܕܒܝܬ ܩܛܝܠܬ. ܘܫܪܘ̣ ܠܘܩܒܠ ܒܝܬ ܩܛܝܠܬ. ܥܠ ܓܢܒ ܛܘ̣ܪܐ ܕܐ̈ܓܢܐ̇. ܕܡܢ ܣܡܠܐ ܕܩܝܠܝܩܝܐ ܥܠܝܬܐ | |
| 22 ܘܕܒ̣ܪ ܠܟܠܗ ܚܝܠܗ ܪ̈ܓܠܝܐ ܘܦܪ̈ܫܐ ܘܡܪ̈ܟܒܬܐ. ܘܫܩܠ ܡܢ ܬܡܢ ܠܛܘ̣ܪܐ | |
| 23 ܘܚܪܒ ܠܦܘ̈ܛܝܐ̣ ܘܠܠܘܕ̈ܝܐ. ܘܫܒܘ ܠܟܠܗܘܢ ܒ̈ܢܝ ܬܝܪܣ. ܘܠܒ̈ܢܝ ܪܥܡܣܝܣ. ܘܠܒ̈ܢܝ ܐܝܫܡܥܐܝܠ ܕܥ̇ܡ̇ܪܝܢ ܒܡܕܒܪܐ ܕܡܢ ܬܝܡܢܐ | |
| 24 ܘܟܠܘܢ ܐܪܥܐ ܕܟ̈ܠܕ̣ܝܐ ܘܥܒܪ ܦܪܬ. ܘܥܒܪܗ ܠܒܝܬ ܢܗܪ̈ܘܬܐ ܕܡܢ ܬܝܡܢܐ ܘܥ̣ܩܪ ܠܟܠܗܝܢ ܡܕܝ̈ܢܬܐ ܥܫܝ̈ܢܬܐ ܕܥܠ ܓܢܒ ܢܚܠܐ ܕܝܒ̇ܩ. ܘܥܕܡܐ ܕܐܬܘ ܠܝܡܐ | |
| 25 ܘܐܚܕܘ ܬܚܘܡܐ ܕܩܝܠܝܩܝܐ. ܘܚܪܒ ܠܟܠ ܕܩܐ̇ܡ ܠܩܘܒܠܗ. ܘܐ̣ܬܐ ܠܬܚܘܡܐ ܕܝܦܬ ܕܒܬܝܡܢܐ̇. ܥܠ ܐ̈ܦܝ ܟܠܗ̇ ܥ̇ܪܒ | |
| 26 ܘܐܬܟܪܟܘ ܠܟܠܗܘܢ ܒ̈ܢܝ ܡܕܝܢ. ܘܐܘܩܕܘ ܠܟܠܗܘܢ ܡܫܟ̈ܢܝܗܘܢ̇ ܘܫܒ̇ܘ ܛܝܪ̈ܝܗܘܢ̇ | |
| 27 ܘܢܚܬܘ ܠܚܩ̈ܠܬܐ ܕܕܪܡܣܘܩ. ܒܝܘ̈ܡܝ ܚܨܕܐ ܕܚ̈ܛܐ. ܘܐܘܩܕܘ ܠܟܠ ܚܩ̈ܠܬܗܘܢ̇ ܘܕܪܘ ܦܩܥܬܗܘܢ ܘܡܪܒܥܐ ܕܥܢܗܘܢ. ܘܒܩܪ̈ܝܗܘܢ. ܘܓܙܪ̈ܝܗܘܢ ܥܒܕܘ ܠܚܒ̇ܠܐ. ܘܒ̇ܙܘ ܡܕܝ̈ܢܬܗܘܢ. ܘܩܛܠܘ ܥܠܝܡ̈ܝܗܘܢ ܒܦܘܡܐ ܕܚܪܒܐ | |
| 28 ܘܢܦ̣ܠܬ ܕܚܠܬܐ ܘܪܬܝܬܐ̣. ܥܠ ܟܠ ܕܥ̇ܡܪܝܢ ܥܠ ܓܢܒ ܝܡܐ. ܘܒܨܘܪ ܘܒܨܝܕܢ. ܘܥܠ ܥ̇ܡܘܪ̈ܝܗ ܕܣܘܪܝ. ܘܥܠ ܟܠ ܕܥܡܪܝܢ ܒܠܒܢܐ. ܘܥܠ ܥ̇ܡܘܪ̈ܝܗ̇ ܕܐܫܕܘܕ ܘܕܐܫܩܠܘܢ ܘܕܥܙܐ. ܘܕܚ̣ܠܘ ܡܢܗ ܛܒ | |
