Giuditta ܝܗ̱ܘܕܝܬ 14

¹ ܘܐܡ̣ܪܬ ܠܗܘܢ ܝܗܘܕܝܬ. ܫܘܡܥܘܢܝ ܐܚܝ̈ ܣܒܘ ܪܫܐ ܗܢܐ̣. ܘܬܠܘ ܒܥܥܝܬܐ ܕܫܘܪܐ

² ܘܢܗܘܐ ܟܕ ܢܢܗܪ ܨ̣ܦܪܐ̣. ܘܢܦܘܩ ܫܡܫܐ ܥܠ ܐܪܥܐ̣. ܘܬܣܒܘܢ ܓܒܪ ܡܐ̈ܢܝ ܩܪܒܗ̣. ܘܬܦܩܘܢ ܟܠ ܓܒܪ ܚܝܠܬܢ ܠܒܪ ܡܢ ܡܕܝܢܬܐ̣. ܘܬܥܒܕܘܢ ܥܠܝܗܘܢ ܪܫܐ. ܘܬܦܩܘܢ ܐܝܟ ܕܠܦܩܥܬܐ. ܥܠ ܡܛܪܬܐ ܩܕܡܝܬܐ ܕܒ̈ܢܝ ܐܬܘܪ̣ ܘܠܐ ܬܚܬܘܢ.

³ ܘܗ̇ܝܕܝܢ ܢܣܒܘܢ ܗܢܘܢ ܙܝܢܗܘܢ. ܘܢܐܙܠܘܢ ܠܡ̇ܫܪܝܬܗܘܢ̇ ܘܢܥܝܪܘܢ ܠܪ̈ܒܝ ܚܝܠܗܘܢ. ܘܢܪܗܛܘܢ ܠܡܫܟܢܐ ܕܐܠܦܪܢܐ ܘܠܐ ܢܫܟܚܘܢܗ. ܘܬܦܠ ܥܠܝܗܘܢ ܕܚܠܬܐ. ܘܢܥܪܩܘܢ ܡܢ ܩܕܡܝܟܘܢ̇

⁴ ܘܬܐܙܠܘܢ ܐܢܬܘܢ ܟܘܠ ܕܥܡ̇ܪܝܢ ܒܬܚܘܡܐ ܕܐܝܣܪܝܠ̣. ܬܫܛܚܘܢ ܬܪܡܘܢ ܐܢܘܢ ܒܐܘܪ̈ܚܬܐ

⁵ ܩܕܡ ܕܝܢ ܕܬܥܒܕܘܢ ܗܠܝܢ. ܠܐܚܝܘܕ ܥܡܘܢܝܐ ܩܪܘ. ܕܢܚܙܐ̣ ܘܢܕܥ ܠܗ̇ܘ ܕܐܣܝ ܠܒܝܬ ܐܝܣܪܝܠ. ܘܠܗ ܫ̣ܕܪܘ ܠܘܬܢ ܐܝܟ ܕܠܡܘܬܐ

⁶ ܘܩܪܐܘܗܝ ܠܐܚܝܘܕ ܡܢ ܒܝܬܗ ܕܥܘܙܝܐ ܘܟܕ ܐܬ̣ܐ ܘܚ̣ܙܐ ܪܝܫܗ ܕܐܠܦܪܢܐ̣. ܒܐ̣ܝܕܗ ܕܓܒܪܐ ܚܕ ܒܟܢܘܫܬܐ ܕܥܡܐ ܢܦ̣ܠ ܥܠ ܐܦܘ̈ܗܝ. ܘܐܬܟ̣ܪܝܬ ܪܘܚܗ

⁷ ܘܟܕ ܐܚܕܘ ܐܩܝܡܘܗܝ̣. ܢܦ̣ܠ ܥܠ ܪ̈ܓܠܝܗ̇ ܕܝܗܘܕܝܬ ܘܣܓ̣ܕ ܩܕܡܝܗ̇ ܘܐܡ̣ܪ ܠܗ̇. ܒܪܝܟܐ ܐܢܬܝ ܒܟܠ ܥܡ. ܕܢܫܡܥܘܢ ܫܡܥ̇ܟܝ̣ ܘܢܕܚܠܘܢ̇

⁸ ܘܡܟܝܠ̣ ܚܘܝܐܢܢܝ ܟܘܠ ܡܐ ܕܥܒ̣ܕܬܝ ܒܝܘܡ̈ܬܐ ܗܠܝܢ. ܘܐܫܬ̣ܥܝܬ ܠܗ ܟܠ ܕܥܒܕܬܝ. ܡܢ ܝܘܡܐ ܕܢܦܩܬܝ ܘܥܕܡܐ ܠܝܘܡܐ ܕܡܠܠܬܝ ܥܡܗܘܢ

⁹ ܘܟܕ ܫ̣ܠܝܬ ܡܢ ܕܠܡܡܠܠܘ̣. ܩܥܘ ܥܡܐ ܒܩܠܐ ܪܡ̇ܐ. ܘܐܫܬܡܥ ܩܠ ܚܕܘܬܐ ܒܡܕܝܢܬܘܢ

¹⁰ ܘܟܕ ܚܙܐ ܐܚܝܘܕ ܟܘܠ ܕܥ̣ܒܕ ܐܠܗܐ ܠܐܝܣܪܝܠ. ܗܝܡܢ ܒܐܠܗܐ̣ ܘܓ̣ܙܪ ܒܣܪܐ ܕܥܘܪܠܘܬܗ. ܘܐܬܬܘܣܦ ܥܠ ܥܡܐ ܕܒܝܬ ܐܝܣܪܝܠ. ܥܕܡܐ ܠܝܘܡܢܐ

¹¹ ܘܟܕ ܣ̣ܠܩ ܫܦܪܐ̣. ܬܠܘ ܪܫܗ ܕܐܠܦܪܢܐ ܠܒܪ ܡܢ ܫܘܪܐ. ܘܫܩܠܘ ܓܒܪ ܡܐ̈ܢܝ ܙܝܢܗ̣. ܘܢܦܩܘ ܠܡܫܪܝܬܐ ܥܠ ܡܣܩܢܐ ܕܛܘ̣ܪ̈ܐ

¹² ܘܟܕ ܚܙܘ ܐܢܘܢ ܒ̈ܢܝ ܐܬܘܪ̣. ܫܕ̣ܪܘ ܥܠ ܪ̈ܘܪܒܢܝܗܘܢ. ܘܥܠ ܪ̈ܒܝ ܐܠܦ̈ܐ̣. ܘܥܠ ܟܠ ܫܠܝܛܢ̈ܝܗܘܢ

¹³ ܘܐܙܠܘ ܠܡܫܟܢܗ ܕܐܠܦܪܢܐ. ܘܐ̣ܡܪܘ ܠܒܘܓܐ ܕܩܐ̇ܡ ܗܘܐ ܥܠ ܟܠ ܥܒܝ̈ܕܬܗ. ܥܘܠ ܐܥܝܪܝܗܝ ܠܡܪܢ. ܡܛܠ ܕܐܡܪܚܘ ܓܒܪ̈ܐ ܠܡܚܬ ܥܠܝܢ ܠܩܪܒܐ. ܕܢܐܒܕܘܢ ܠܥܠܡ

¹⁴ ܘܐܙܠ ܒܘܓܐ ܘܢܩ̣ܫ ܒܕܪܬܐ̣ ܕܡܫܟܢܐ. ܡܛܠ ܕܣܒ̣ܪ ܗܘܐ ܕܥܡ ܝܗܘܕܝܬ ܕܡ̣ܝܟ ܗܘܐ

¹⁵ ܘܟܕ ܐܢܫ ܠܐ ܥܢܝܗܝ. ܦܬ̣ܚ ܘܥܠ ܠܩܝܛܘܢܐ. ܘܐܫܟܚܗ̇ ܠܐܠܦܪܢܐ ܟܕ ܫܕܐ ܥܪܛܠ. ܘܪܝܫܗ ܫܩܝܠ ܡܢܗ

¹⁶ ܘܓܥ̣ܐ ܒܩܠܐ ܪܡܐ ܘܒܒܟܬܐ ܘܒܬܢܚܬܐ ܘܒܓܥܬܐ ܪܒܬܐ ܨܪܝ ܠܒܘܫ̈ܘܗܝ

¹⁷ ܘܥܠ ܠܡܫܟܢܐ ܐܝ̇ܟܐ ܕܫܪܝܐ ܗܘܬ ܝܗܘܕܝܬ̣. ܘܠܐ ܐܫܟܚܗ̇. ܘܢܦ̣ܩ ܠܘܬ ܥܡܐ ܘܐܡ̣ܪ ܠܗܘܢ

¹⁸ ܛܠܡ̣ܘ ܥ̣̈ܒܕܐ ܡܪ̈ܝܗܘܢ. ܘܥܒܕܬ ܒܗܬܬܐ ܗܕܐ ܐܢܬܬܐ ܚܕܐ ܡܢ ܥܒܪ̈ܝܐ̇. ܒܒܝܬܗ ܕܢܒܘ ܟܕܢܨ̇ܪ. ܡܛܠ ܕܗܐ ܐܠܦܪܢܐ ܪܡ̣ܐ ܥܠ ܐܪܥܐ̣. ܘܪܫܗ̣̇ ܫܩܝܠ ܡܢܗ

¹⁹ ܘܟܕ ܫܡ̣ܥܘ ܡ̈ܠܘܗܝ ܪ̈ܒܝ ܚܝܠܐ ܕܐܬܘܪ. ܨ̇ܪܝܘ ܟܘܬܝ̈ܢܝܬܗܘܢ. ܘܐܬܕ̣ܠܚܬ ܢܦܫܗܘܢ ܛܒ ܒܓܘ ܡܫܪܝܬܐ