Giuditta ܝܗ̱ܘܕܝܬ 15

¹ ܘܟܕ ܫܡܥܘ ܐܝܠܝܢ ܕܒܡܫ̈ܟܢܐ̣ ܐܬܕܡܪܘ ܕܡܢܐ ܟܝ ܗ̣ܘܐ

² ܘܢܦ̣ܠܬ ܥܠܝܗܘܢ ܕܚܠܬܐ̣ ܘܪܬܝܬܐ. ܘܠܐ ܟܬܪܘ ܐܢܫ ܠܘܬ ܩܪܝܒܗ. ܐܠܐ ܐܬܗܦܟܘ ܘܥ̣ܪܩܘ ܐܟܚܕܐ. ܠܟܠ ܐܘܪ̈ܚܢ ܒܦܩܥ̈ܬܐ̣ ܘܒܛܘ̣ܪ̈ܐ

³ ܘܐܝܠܝܢ ܕܫܪܝܢ ܗܘܘ ܒܛܘ̣ܪ̈ܐ ܘܟܪܝܟܝܢ ܣ̇ܡܘ ܠܡܥ̣ܪܩ. ܘܗܝܕܝܢ ܒ̈ܢܝ ܐܝܣܪܐܝܠ ܣ̇ܡ̇ܘ ܥܠܝܗܘܢ. ܟܠܗܘܢ ܓܒܪ̈ܐ ܩܪ̈ܒܬܢܐ̣. ܘܐܬܢܟܣܘ ܥܠܝܗܘܢ

⁴ ܘܫܕܪ ܥܘܙܝܐ̣ ܠܟܠܗܘܢ ܬܚܘܡ̈ܐ ܕܐܝܣܪܝܠ. ܕܢܘܕܥܘܢ ܐܢܘܢ ܥܠ ܡܐ ܕܓ̣ܕܫ. ܘܢܦܩܘܢ ܟܠܗܘܢ̇ ܥܠ ܒܥܠܕ̈ܒܒܐ ܘܢܚܪܒܘܢ ܐܢܘܢ̇

⁵ ܘܟܕ ܫܡ̣ܥܘ ܒ̈ܢܝ ܐܝܣܪܝܠ ܟܠܗܘܢ ܐܟܚܕܐ̣. ܢܦ̣ܠܘ ܥܠܝܗܘܢ. ܘܡܩܛܠܝܢ ܗܘܘ ܒܗܘܢ ܥܕܡܐ ܠܚܘܒܐ. ܗܟܘܬ̇ ܒ̈ܢܝ ܐܪܫܠܡ ܕܐܬܘ̣ ܡܢ ܟܠ ܛܘ̣ܪ̈ܝܢ. ܡܛܠ ܕܐܫܬܡܥܘ ܠܗܘܢ ܟܠ ܡܐ ܕܐܬܥ̇ܒܕ ܠܡܫܪܝܬܐ ܕܒܥܠܕܒ̈ܒܝܗܘܢ. ܘܐܝܠܝܢ ܕܒܓܠܥܕ ܘܒܓܠܝܠܐ ܢܦܩ̣ܘ ܥܠܝܗܘܢ ܘܡܚܘ ܐܢܘܢ. ܡܚܘܬܐ ܪܒܬܐ ܥܕܡܐ ܕܥ̣ܒܪܘ ܕܪܡܣܘܩ ܘܬܚ̈ܘܡܝܗ̇

⁶ ܘܫܪܟܐ ܕܥܡܘܪ̈ܝܗ̇ ܕܒܝܬ ܦܠܘ̣. ܢܦܠ̣ܘ ܥܠ ܡܫܪ̈ܝܬܐ ܕܐܬܘܪ̣. ܘܒܙܘ ܘܫܒܘ ܘܥܬܪܘ ܛܒ

⁷ ܘܗܦܟܘ ܒ̈ܢܝ ܐܝܣܪܝܠ ܡܢ ܩܪܒܐ̣. ܘܐܫܬܠܛܘ ܒܫܪܟ̣ܐ ܕܡܕ̈ܝܢܬܐ ܕܒܛܘܪ̈ܐ ܘܒܦܩܥܬܐ̣. ܘܢܣ̣ܒܘ ܒܙܬܐ ܣܓܝܐܬܐ

⁸ ܘܐܬ̣ܐ ܝܘܝܩܝܡ ܟܗܢܐ ܪܒܐ. ܘܣ̈ܒܐ ܕܐܝܣܪܐܝܠ ܐܝܠܝܢ ܕܥ̇ܡܪܝܢ ܒܐܪܫܠܡ ܠܡܡܠܠܘ ܫ̇ܠܡܐ ܥܡ ܝܗܘܕܝܬ

⁹ ܘܟܕ ܢܦܩ̣ܬ ܠܘܬܗܘܢ ܟܪܟܘܗ̇ ܟܠܗ̇ܘܢ ܐܟܚܕܐ̣̇. ܘܐܡܪܘ. ܐܢܬܝ ܗܝ ܪܘܡܗ̇ ܕܐܪܫ̇ܠܡ. ܘܫܘܒܗܪܗ ܕܐܝܣܪܝܠ. ܘܬܫܒܘܚܬܗ ܕܥܡܢ

¹⁰ ܕܥܒܕܬܝ ܗܠܝܢ ܟܠܗܝܢ ܒܐܝܕ̈ܝܟܝ. ܘܥܒܕܬܝ ܛ̇ܒ̈ܬܐ ܥܡ ܐܝܣܪܐܝܠ. ܘܐܨܛܒܝ ܒܗܘܢ ܡܪܝܐ. ܘܬܗܘܝܢ ܒܪܝܟܐ ܠܡܪܝܐ. ܚܝܠܬܢܐ ܠܥܠܡ ܥܠܡܝܢ. ܘܐܡ̣ܪܘ ܟܠܗ ܥܡܐ̇ ܐܡܝܢ

¹¹ ܘܗܘܘ ܡܥܒܪܝܢ ܥܡܐ ܡܫܪ̈ܝܬܗܘܢ. ܕܐܬܘܪ̈ܝܐ ܥܕܡܐ ܠܬܠܬܐ ܝܘܡ̈ܝܢ. ܘܝܗܒ̣ܘ ܠܝܗܘܕܝܬ ܡܫܟܢܗ ܕܐܠܦܪܢܐ. ܘܟܠܗܘܢ ܡ̈ܐܢܝ ܡܫܟܢܗ. ܘܥܪܣܗ ܘܒܥܝܪܗ ܘܡܐ̈ܢܘܗܝ. ܘܢܣܒ̣ܬ ܘܣܡ̣ܬ ܐܢܘܢ ܥܠ ܟܘܕܢ̈ܘܬܐ ܘܟ̣ܕܢܬ ܥܓܠܬܗ̣̇. ܘܣܡ̣ܬ ܐܢܘܢ ܒܗܝܢ

¹² ܘܪܗܛ ܠܘܬܗ̇ ܟܠܗܝܢ. ܢܫ̈ܐ ܕܐܝܣܪܝܠ. ܘܟܪܟܗ̇. ܘܓܒ̈ܝ ܡܢܗܝܢ ܟܢܫ̈ܐ ܕܡܫܒܚܢܝ̈ܬܐ̣. ܘܢܣ̣ܒܬ ܣܘ̈ܟܐ ܕܕܩ̈ܠܐ̣ ܒܐܝܕܗ̇. ܘܝܗ̣ܒܬ ܠܢܫ̈ܐ ܕܥܡܗ̇

¹³ ܘܣܡ̣ܬ ܟ̈ܠܝܠܐ ܕܙܝܬܐ ܒܪܝܫܗ̇. ܗܝ̣ ܘܚܒܪܬܗ̇. ܘܐܬܘ ܟܠ ܪ̈ܘܪܒܢܐ ܕܒܝܬ ܐܝܣܪܝܠ̣. ܘܟܠ ܪ̈ܘܪܒܢܝܬܐ ܕܐܝܣܪܝܠ. ܘܐ̇ܬܝܢ ܗܘܘ ܥܡܗܝܢ ܟܘܠܗܘܢ ܒ̈ܢܝ ܐܝܣܪܝܠ̣. ܟܕ ܡܙܝܢܝܢ. ܘܣܝܡܝܢ ܟ̈ܠܝܠܐ ܘܬܫܒܘܚܬܐ ܒܦܘܡ̇ܗܘܢ

¹⁴ ܘܡܥܢܝܐ ܗܘܬ ܝܗܘܕܝܬ. ܒܬܘܕܝܬܗ ܠܟܠܗ ܐܝܣܪܝܠ. ܘܥ̇ܢܐ ܗܘܐ ܟܠܗ ܥܡܐ ܬܫܒܘܚܬܗ ܕܡܪܝܐ.