2 Samuele ܫܡܘܐܝܠ 13

¹ ܘܡܶܢ ܒܳܬܰܪܟܶܢ ܐܺܝܬ ܗܘܳܬ ܚܳܬܳܐ ܠܰܐܒܺܝܫܠܽܘܡ ܒܰܪ ܕܰܘܺܝܕ. ܘܰܫܡܳܗ̇ ܬܳܡܳܪ. ܘܪܰܚܡܳܗ̇ ܚܰܡܢܽܘܢ ܒܰܪ ܕܰܘܺܝܕ.

² ܘܶܐܬܬܥܺܝܩܰܬ ܠܚܰܡܢܽܘܢ ܥܰܠ ܐܰܦܰܝ̈ ܬܳܡܳܪ ܚܳܬܶܗ ܕܰܒܬܽܘܠܬܳܐ ܗ̱ܝ. ܘܠܳܐ ܡܶܫܟܰܚ ܗܘܳܐ ܚܰܡܢܽܘܢ ܕܢܺܐܡܰܪ ܠܳܗ̇ ܡܶܕܶܡ.

³ ܘܰܠܚܰܡܢܽܘܢ ܐܺܝܬ ܗܘܳܐ ܪܳܚܡܳܐ. ܘܰܫܡܶܗ ܝܽܘܢܳܕܳܒ ܒܰܪ ܫܰܡܳܐ ܐܰܚܽܘܗܝ ܕܕܰܘܺܝܕ. ܘܝܽܘܢܳܕܳܒ ܓܰܒܪܳܐ ܗܘܳܐ ܚܰܟܺܝܡܳܐ ܕܛܳܒ.

⁴ ܐܳܡܰܪ ܠܶܗ ܠܚܰܡܢܽܘܢ ܒܰܪ ܡܰܠܟܳܐ. ܡܳܢܰܘ ܕܗܳܟܰܢܳܐ ܐܳܙܶܠ ܐܰܢ̱ܬ ܡܶܢ ܨܦܰܪ ܠܰܨܦܰܪ. ܠܳܐ ܐܳܡܰܪ ܐܰܢ̱ܬ ܠܺܝ. ܐܳܡܰܪ ܠܶܗ ܚܰܡܢܽܘܢ. ܠܬܳܡܳܪ ܚܳܬܶܗ ܕܰܐܒܺܝܫܠܳܘܡ ܐܳܚܝ ܪܳܚܶܡ ܐ̱ܢܳܐ.

⁵ ܐܳܡܰܪ ܠܶܗ ܝܽܘܢܳܕܳܒ. ܕܡܰܟ ܥܰܠ ܥܰܪܣܳܟ ܘܶܐܬܟܰܪܗ. ܘܡܳܐ ܕܶܐܬܳܐ ܐܰܒܽܘܟ ܠܡܶܚܙܝܳܟ ܐܶܡܰܪ ܠܶܗ. ܬܺܐܬܶܐ ܬܳܡܳܪ ܚܳܬܝ ܬܰܘܟܠܰܢܝ ܠܰܚܡܳܐ. ܘܬܶܥܒܶܕ ܠܺܝ ܠܶܒܘ̈ܳܬܳܐ. ܕܶܐܚܙܶܐ ܘܶܐܠܥܰܣ ܡܶܢ ܐܺܝܕܶܝ̈ܗ̇.

⁶ ܘܰܕܡܶܟ ܚܰܡܢܽܘܢ ܘܶܐܬܟܪܰܗ. ܘܶܐܬܳܐ ܡܰܠܟܳܐ ܠܡܶܚܙܝܶܗ. ܘܶܐܡܰܪ ܠܶܗ ܚܰܡܢܽܘܢ ܠܡܰܠܟܳܐ. ܬܺܐܬܶܐ ܠܘܳܬܝ ܬܳܡܳܪ ܚܳܬܝ. ܘܬܶܥܒܶܕ ܠܥܺܢܰܝ̈ ܬܪܶܝܢ ܠܶܒܘ̈ܳܬܳܐ. ܘܶܐܠܥܰܣ ܡܶܢ ܐܺܝܕܶܝܗ̇.

⁷ ܘܰܫܠܰܚ ܕܰܘܺܝܕ ܠܬܳܡܳܪ. ܘܶܐܡܰܪ ܠܳܗ̇. ܙܶܠܝ ܠܒܶܝܬ ܚܰܡܢܽܘܢ ܐܰܚܽܘܟܝ. ܘܰܥܒܶܕܝ ܠܶܗ ܡܶܐܟܽܘܠܬܳܐ.

⁸ ܘܶܐܙܰܠܬ ܬܳܡܳܪ ܠܒܶܝܬ ܚܰܡܢܽܘܢ ܐܰܚܽܘܗ̇. ܘܗܽܘ ܕܳܡܶܟ ܗܘܳܐ. ܘܢܶܣܒܰܬ ܠܰܝܫܳܐ. ܠܳܫܰܬ ܘܥܶܒܕܰܬ ܠܶܒܘ̈ܳܬܳܐ.

⁹ ܘܢܶܣܒܰܬ ܠܶܒܘ̈ܳܬܳܐ ܘܣܳܡܰܬ ܩܕܳܡܰܘܗܝ. ܘܠܳܐ ܨܒܳܐ ܠܡܶܐܟܰܠ. ܐܳܡܰܪ ܚܰܡܢܽܘܢ. ܢܶܦܩܽܘܢ ܟܽܠܗܽܘܢ ܐ̱ܢܳܫ̈ܳܐ ܡܶܢ ܠܘܳܬܝ. ܘܰܢܦܰܩܘ ܟܽܠܗܽܘܢ ܐ̱ܢܳܫ̈ܳܐ ܡܶܢ ܠܘܳܬܶܗ.

¹⁰ ܐܳܡܰܪ ܠܳܗ̇ ܚܰܡܢܽܘܢ ܠܬܳܡܳܪ. ܐܰܥܶܠܝ ܠܺܝ ܡܶܐܟܽܘܠܬܳܐ ܠܩܰܝܛܽܘܢܳܐ. ܘܶܐܠܥܰܣ ܡܶܢ ܐܺܝܕܰܝ̈ܟܝ. ܘܢܶܣܒܰܬ ܬܳܡܳܪ ܠܶܒܘ̈ܳܬܳܐ ܕܥܶܒܕܰܬ. ܘܰܐܥܠܰܬ ܠܚܰܡܢܽܘܢ ܐܰܚܽܘܗ̇ ܠܩܰܝܛܽܘܢܳܐ.

¹¹ ܘܩܰܪܒܰܬ ܠܶܗ ܠܡܶܠܥܰܣ. ܘܰܐܚܕܳܗ̇ ܘܶܐܡܰܪ ܠܳܗ̇. ܬܳܝ ܕܡܰܟܝ ܥܰܡܝ ܚܳܬܝ.

¹² ܐܳܡܪܳܐ ܠܶܗ. ܠܳܐ ܐܳܚܝ. ܠܳܐ ܬܨܰܥܪܰܢܝ. ܠܳܐ ܘܳܠܶܐ ܕܢܶܬܥܒܶܕ ܗܳܟܰܢܳܐ ܒܺܝܣܪܳܐܶܝܠ.

¹³ ܐܶܢܳܐ ܠܰܐܝܟܳܐ ܐܰܘܒܶܠ ܚܶܣܕܝ. ܘܰܐܢ̱ܬ ܕܶܝܢ ܡܶܬܚܫܶܒ ܐܰܢ̱ܬ ܒܺܝܣܪܳܐܶܝܠ ܐܰܝܟ ܚܰܕ ܡܶܢ ܫܳܛܰܝ̈ܳܐ. ܗܳܫܳܐ ܐܶܡܰܪ ܠܡܰܠܟܳܐ ܘܠܳܐ ܟܳܠܶܐ ܠܺܝ ܡܶܢܳܟ.

¹⁴ ܘܠܳܐ ܨܒܳܐ ܠܡܶܫܡܥܳܗ̇. ܘܰܐܚܕܳܗ̇ ܘܚܰܣܢܳܗ̇. ܘܰܕܡܶܟ ܥܰܡܳܗ̇ ܘܨܰܥܪܳܗ̇.

¹⁵ ܘܰܣܢܳܗ̇ ܚܰܡܢܽܘܢ ܣܶܢܶܐܬܳܐ ܪܰܒܬܳܐ. ܘܣܶܓܝܰܬ ܣܶܢܶܐܬܳܐ ܕܰܣܢܳܗ̇. ܝܰܬܺܝܪ ܡܶܢ ܪܶܚܡܬܳܐ ܕܪܰܚܡܳܗ̇. ܘܶܐܡܰܪ ܠܳܗ̇ ܚܰܡܢܽܘܢ ܩܽܘܡܝ ܙܶܠܝ.

¹⁶ ܐܳܡܪܳܐ ܠܶܗ. ܡܶܟܺܝܠ ܕܰܥܒܰܕܬ ܒܺܝ ܒܺܝܫܬܳܐ ܗܳܕܶܐ ܪܰܒܬܳܐ. ܡܫܰܕܰܪ ܐܰܢ̱ܬ ܠܺܝ. ܘܠܳܐ ܨܒܳܐ ܠܡܶܫܡܥܳܗ̇.

¹⁷ ܘܰܩܪܳܐ ܠܛܰܠܝܳܐ ܡܫܰܡܫܳܢܶܗ. ܘܶܐܡܰܪ ܠܶܗ. ܐܰܦܶܩܝܗ̇ ܠܗܳܕܶܐ ܡܶܢ ܠܘܳܬܝ ܠܒܰܪ. ܘܰܐܚܽܘܕ ܬܰܪܥܳܐ ܒܰܐܦܶܝ̈ܗ̇.

¹⁸ ܘܢܶܣܒܰܬ ܬܳܡܳܪ ܩܶܛܡܳܐ ܘܰܐܪܡܝܰܬ ܒܪܺܝܫܳܗ̇. ܘܟܽܘܬܺܝܢܳܐ ܡܚܰܛܰܒܬܳܐ ܕܰܠܒܺܝܫܳܐ ܗܘܳܬ ܣܰܕܩܰܬ. ܘܣܳܡܰܬ ܐܺܝܕܶܝ̈ܗ̇ ܥܰܠ ܪܺܝܫܳܗ̇ ܘܡܰܝܠܠܳܐ ܘܳܐܙܳܠ̱ܐ.

¹⁹ ܐܳܡܰܪ ܠܳܗ̇ ܐܰܒܺܝܫܠܳܘܡ ܐܰܚܽܘܗ̇. ܚܰܡܢܽܘܢ ܐܰܚܽܘܟܝ ܕܡܶܟ ܠܘܳܬܶܟܝ.

²⁰ ܗܳܫܳܐ ܚܳܬܝ ܫܬܽܘܩܝ ܠܶܟܝ ܐܰܚܽܘܟܝ ܗܽܘ. ܠܳܐ ܬܺܐܬܶܐ ܥܰܠ ܒܳܠܶܟܝ ܗܳܕܶܐ ܥܒܺܝܕܬܳܐ. ܘܝܶܬܒܰܬ ܬܳܡܳܪ. ܘܬܰܡܺܝܗܳܐ ܗܘܳܬ ܒܶܝܬ ܐܰܒܺܝܫܠܳܘܡ ܐܰܚܽܘܗ̇.

²¹ ܘܕܰܘܺܝܕ ܡܰܠܟܳܐ ܫܡܰܥ ܒܟܽܠܗܶܝܢ ܡ̈ܶܠܶܐ ܗܳܠܶܝܢ. ܘܶܐܬܒܐܶܫ ܠܶܗ ܛܳܒ.

²² ܘܠܳܐ ܐܶܡܰܪ ܐܰܒܺܝܫܠܳܘܡ ܠܚܰܡܢܽܘܢ ܠܳܐ ܛܳܒܬܳܐ ܘܠܳܐ ܒܺܝܫܬܳܐ. ܡܶܛܽܠ ܕܰܣܢܳܝܗܝ ܐܰܒܺܝܫܠܳܘܡ ܠܚܰܡܢܽܘܢ. ܥܰܠ ܕܨܰܥܰܪ ܠܬܳܡܳܪ ܚܳܬܶܗ.

²³ ܘܰܠܥܶܕܳܢ ܒܥܶܕܳܢ. ܗܘܰܘ ܓܳܙܽܘܙ̈ܶܐ ܠܰܐܒܺܝܫܠܳܘܡ ܒܰܒܥܶܠ ܚܳܨܽܘܪ ܕܥܰܡ ܐܰܦܪܶܝܡ. ܘܙܰܡܶܢ ܐܰܒܺܝܫܠܳܘܡ ܠܟܽܠܗܽܘܢ ܒܢܰܝ̈ ܡܰܠܟܳܐ.

²⁴ ܘܶܐܬܳܐ ܐܰܒܺܝܫܠܳܘܡ ܠܘܳܬ ܡܰܠܟܳܐ. ܘܶܐܡܰܪ ܠܶܗ. ܓܳܙܽܘܙ̈ܶܐ ܐܺܝܬ ܠܥܰܒܕܳܟ. ܢܺܐܙܰܠ ܡܰܠܟܳܐ ܘܥܰܒܕܰܘ̈ܗܝ ܥܰܡ ܥܰܒܕܳܟ.

²⁵ ܘܶܐܡܰܪ ܠܶܗ. ܠܳܐ ܒܶܪܝ. ܠܳܐ ܢܺܐܙܰܠ ܟܽܠܰܢ ܕܠܳܐ ܢܺܐܩܰܪ ܥܠܰܝܟ. ܘܰܐܠܨܶܗ. ܘܠܳܐ ܨܒܳܐ ܕܢܺܐܙܰܠ ܥܰܡܶܗ. ܘܒܰܪܟܶܗ.

²⁶ ܐܳܡܰܪ ܠܶܗ ܐܰܒܺܝܫܠܳܘܡ. ܘܡܳܐ ܕܠܳܐ ܢܺܐܙܰܠ ܥܰܡܝ ܚܰܡܢܽܘܢ ܐܳܚܝ. ܐܳܡܰܪ ܠܶܗ ܡܰܠܟܳܐ. ܠܡܳܢܳܐ ܐܳܙܶܠ ܥܰܡܳܟ.

²⁷ ܘܰܐܠܨܶܗ ܐܰܒܺܝܫܠܳܘܡ. ܘܫܰܕܰܪ ܥܰܡܶܗ ܠܚܰܡܢܽܘܢ. ܘܰܠܟܽܠܗܽܘܢ ܒܢܰܝ̈ ܡܰܠܟܳܐ.

²⁸ ܘܦܰܩܶܕ ܐܰܒܺܝܫܠܳܘܡ ܠܥܰܒܕܰܘ̈ܗܝ. ܘܶܐܡܰܪ ܠܗܽܘܢ. ܡܳܐ ܕܰܫܦܰܪ ܠܶܒܶܗ ܕܚܰܡܢܽܘܢ ܒܚܰܡܪܳܐ. ܘܶܐܡܪܶܬ ܠܟܽܘܢ. ܡܚܰܐܗܝ ܠܚܰܡܢܽܘܢ ܘܩܽܘܛܠܽܘܗܝ. ܠܳܐ ܬܶܕܚܠܽܘܢ. ܐܶܢܳܐ ܗܽܘ ܦܰܩܶܕܬܟܽܘܢ. ܐܶܬܚܰܝܰܠܘ ܘܰܗܘܰܘ ܓܰܒܖ̈ܶܐ.

²⁹ ܘܰܥܒܰܕܘ ܥܰܒܕܰܘ̈ܗܝ ܕܰܐܒܺܝܫܠܳܘܡ ܐܰܝܟ ܕܦܰܩܶܕ ܐܶܢܽܘܢ ܐܰܒܺܝܫܠܳܘܡ. ܘܩܳܡܘ ܟܽܠܗܽܘܢ ܒܢܰܝ̈ ܡܰܠܟܳܐ. ܘܰܪܟܶܒܘ ܓܒܰܪ ܥܰܠ ܟܽܘܕܰܢܝܶܗ ܘܰܥܪܰܩܘ.

³⁰ ܘܥܰܕ ܗܶܢܽܘܢ ܒܽܐܘܪܚܳܐ. ܡܛܳܐ ܛܶܒܳܐ ܠܕܰܘܺܝܕ. ܕܩܰܛܶܠ ܐܶܢܽܘܢ ܐܰܒܺܝܫܠܳܘܡ ܠܟܽܠܗܽܘܢ ܒܢܰܝ̈ ܡܰܠܟܳܐ. ܘܠܳܐ ܫܒܰܩ ܡܶܢܗܽܘܢ ܐ̱ܢܳܫ.

³¹ ܘܩܳܡ ܡܰܠܟܳܐ ܘܣܰܕܶܩ ܠܒܽܘܫܰܘ̈ܗܝ. ܘܺܝܬܶܒ ܥܰܠ ܐܰܪܥܳܐ. ܘܟܽܠܗܽܘܢ ܥܰܒܕܰܘ̈ܗܝ ܩܳܝܡܺܝܢ ܟܰܕ ܡܣܰܕܩܺܝܢ ܠܒܽܘ̈ܫܰܝܗܽܘܢ.

³² ܘܰܥܢܳܐ ܝܽܘܢܳܕܳܒ ܒܰܪ ܫܰܡܳܐ ܐܰܚܽܘܗܝ ܕܕܰܘܺܝܕ. ܘܶܐܡܰܪ. ܠܳܐ ܢܶܣܒܰܪ ܡܳܪܝ ܡܰܠܟܳܐ ܕܟܽܠܗܽܘܢ ܒܢܰܝ̈ ܡܰܠܟܳܐ ܡܺܝܬܘ. ܡܶܛܽܠ ܕܚܰܡܢܽܘܢ ܗܽܘ ܒܰܠܚܽܘܕܘܗܝ ܡܺܝܬ. ܣܺܝܡܳܐ ܗܘܳܬ ܓܶܝܪ ܒܪܶܥܝܳܢܶܗ ܕܰܐܒܺܝܫܠܳܘܡ. ܡܶܢ ܝܰܘܡܳܐ ܕܨܰܥܰܪ ܠܬܳܡܳܪ ܚܳܬܶܗ.

³³ ܐܳܦ ܗܳܫܳܐ ܠܳܐ ܢܶܣܒܰܪ ܡܳܪܝ ܡܰܠܟܳܐ ܕܟܽܠܗܽܘܢ ܒܢܰܝ̈ ܡܰܠܟܳܐ ܡܺܝܬܘ. ܡܶܛܽܠ ܕܚܰܡܢܽܘܢ ܗܽܘ ܒܰܠܚܽܘܕܰܘܗܝ ܡܺܝܬ.

³⁴ ܘܰܥܪܰܩ ܠܶܗ ܐܰܒܺܝܫܠܳܘܡ. ܘܰܐܪܺܝܡ ܕܰܘܩܳܐ ܥܰܝܢܰܘ̈ܗܝ. ܘܰܚܙܳܐ ܐ̱ܢܳܫ̈ܳܐ ܣܰܓܺܝ̈ܐܶܐ ܕܳܐܬܶܝܢ ܒܽܐܘܪܚܳܐ. ܡܶܢ ܓܰܒܳܐ ܕܛܽܘܪܳܐ.

³⁵ ܘܶܐܡܰܪ ܠܶܗ ܝܽܘܢܳܕܳܒ ܠܡܰܠܟܳܐ. ܗܳܐ ܒܢܰܝ̈ ܡܰܠܟܳܐ ܐܶܬܰܘ. ܐܰܝܟܰܢܳܐ ܕܶܐܡܰܪ ܥܰܒܕܳܟ. ܗܳܟܰܢܳܐ ܗܘܳܐ.

³⁶ ܘܟܰܕ ܫܰܠܶܡ ܠܰܡܡܰܠܳܠܽܘ. ܐܶܬܰܘ ܒܢܰܝ̈ ܡܰܠܟܳܐ. ܘܰܐܪܺܝܡܘ ܩܳܠܗܽܘܢ ܘܰܒܟܰܘ. ܘܳܐܦ ܡܰܠܟܳܐ ܘܟܽܠܗܽܘܢ ܥܰܒܕܰܘ̈ܗܝ ܒܟܰܘ ܒܟܳܬܳܐ ܪܰܒܬܳܐ.

³⁷ ܘܰܐܒܺܝܫܠܳܘܡ ܥܪܰܩ. ܘܶܐܙܰܠ ܠܘܳܬ ܬܽܘܠܡܰܝ ܒܰܪ ܥܰܡܺܝܗܽܘܕ ܡܰܠܟܳܐ ܕܓܳܫܽܘܪ ܘܺܝܬܶܒ ܕܰܘܺܝܕ ܒܶܐܒܠܳܐ ܥܰܠ ܒܪܶܗ ܝܰܘ̈ܡܳܬܳܐ ܣܰܓܺܝ̈ܐܶܐ.

³⁸ ܘܰܐܒܺܝܫܠܳܘܡ ܥܪܰܩ. ܘܶܐܙܰܠ ܠܓܳܫܽܘܪ. ܘܰܗܘܳܐ ܬܰܡܳܢ ܬܠܳܬ ܫܢܺܝ̈ܢ.

³⁹ ܘܶܐܬܬܘܺܝ ܕܰܘܺܝܕ ܡܰܠܟܳܐ ܠܡܶܦܰܩ ܒܳܬܰܪ ܐܰܒܺܝܫܠܳܘܡ. ܡܶܛܽܠ ܕܶܐܬܒܰܝܰܐ ܥܰܠ ܚܰܡܢܽܘܢ ܕܡܺܝܬ.