Lamentationes 3

VULGATA	NOVA VULGATA
1 (Aleph)Ego vir videns paupertatem meam in virga indignationis ejus.	1 ALEPH. Ego vir videns paupertatem meam in virga indignationis eius.
2 (Aleph)Me minavit, et adduxit in tenebras, et non in lucem.	2 ALEPH. Me minavit et adduxit in tenebras et non in lucem.
3 (Aleph)Tantum in me vertit et convertit manum suam tota die.	3 ALEPH. Tantum in me vertit et convertit manum suam tota die.
4 (Beth)Vetustam fecit pellem meam et carnem meam ; contrivit ossa mea.	4 BETH. Consumpsit pellem meam et carnem meam, contrivit ossa mea.
5 (Beth)Ædificavit in gyro meo, et circumdedit me felle et labore.	5 BETH. Aedificavit in gyro meo et circumdedit me felle et labore.
6 (Beth)In tenebrosis collocavit me, quasi mortuos sempiternos.	6 BETH. In tenebrosis collocavit me quasi mortuos sempiternos.
7 (Ghimel)Circumædificavit adversum me, ut non egrediar ; aggravavit compedem meum.	7 GHIMEL. Circumaedificavit adversum me, ut non egrediar, aggravavit compedem meum.
8 (Ghimel)Sed et cum clamavero, et rogavero, exclusit orationem meam.	8 GHIMEL. Sed et cum clamavero et rogavero, exclusit orationem meam.
9 (Ghimel)Conclusit vias meas lapidibus quadris ; semitas meas subvertit.	9 GHIMEL. Conclusit vias meas lapidibus quadris, semitas meas subvertit.
10 (Daleth)Ursus insidians factus est mihi, leo in absconditis.	10 DALETH. Ursus insidians factus est mihi, leo in absconditis.
11 (Daleth)Semitas meas subvertit, et confregit me ; posuit me desolatam.	11 DALETH. Semitas meas subvertit et confregit me, posuit me desolatam.
12 (Daleth)Tetendit arcum suum, et posuit me quasi signum ad sagittam.	12 DALETH. Tetendit arcum suum et posuit me quasi signum ad sagittam.
13 (He)Misit in renibus meis filias pharetræ suæ.	13 HE. Misit in renibus meis filias pharetrae suae.
14 (He)Factus sum in derisum omni populo meo, canticum eorum tota die.	14 HE. Factus sum in derisum omni populo meo, canticum eorum tota die.
15 (He)Replevit me amaritudinibus ; inebriavit me absinthio.	15 HE. Replevit me amaritudinibus, inebriavit me absinthio.
16 (Vau)Et fregit ad numerum dentes meos ; cibavit me cinere.	16 VAU. Et fregit in glarea dentes meos, depressit me cinere.
17 (Vau)Et repulsa est a pace anima mea ; oblitus sum bonorum.	17 VAU. Et repulsa est a pace anima mea, oblitus sum bonorum.
18 (Vau)Et dixi : Periit finis meus, et spes mea a Domino.	18 VAU. Et dixi: “ Periit splendor meus et spes mea a Domino ”.
19 (Zain)Recordare paupertatis, et transgressionis meæ, absinthii et fellis.	19 ZAIN. Recordare paupertatis et peregrinationis meae, absinthii et fellis.
20 (Zain)Memoria memor ero, et tabescet in me anima mea.	20 ZAIN. Memoria memor est et tabescit in me anima mea.
21 (Zain)Hæc recolens in corde meo, ideo sperabo.	21 ZAIN. Haec recolam in corde meo, ideo sperabo.
22 (Heth)Misericordiæ Domini, quia non sumus consumpti ; quia non defecerunt miserationes ejus.	22 HETH. Misericordiae Domini, quia non sumus consumpti, quia non defecerunt miserationes eius.
23 (Heth)Novi diluculo, multa est fides tua.	23 HETH. Novae sunt omni mane, magna est fides tua.
24 (Heth)Pars mea Dominus, dixit anima mea ; propterea exspectabo eum.	24 HETH. “ Pars mea Dominus, dixit anima mea; propterea exspectabo eum ”.
25 (Teth)Bonus est Dominus sperantibus in eum, animæ quærenti illum.	25 TETH. Bonus est Dominus sperantibus in eum, animae quaerenti illum.
26 (Teth)Bonum est præstolari cum silentio salutare Dei.	26 TETH. Bonum est praestolari cum silentio salutare Domini.
27 (Teth)Bonum est viro cum portaverit jugum ab adolescentia sua.	27 TETH. Bonum est viro, cum portaverit iugum ab adulescentia sua.
28 (Jod)Sedebit solitarius, et tacebit, quia levavit super se.	28 IOD. Sedebit solitarius et tacebit, cum istud imponitur ei.
29 (Jod)Ponet in pulvere os suum, si forte sit spes.	29 IOD. Ponet in pulvere os suum, si forte sit spes.
30 (Jod)Dabit percutienti se maxillam : saturabitur opprobriis.	30 IOD. Dabit percutienti se maxillam, saturabitur opprobriis.
31 (Caph)Quia non repellet in sempiternum Dominus.	31 CAPH. Quia non repellet in sempiternum Dominus.
32 (Caph)Quia si abjecit, et miserebitur, secundum multitudinem misericordiarum suarum.	32 CAPH. Quia si afflixit, et miserebitur secundum multitudinem misericordiarum suarum.
33 (Caph)Non enim humiliavit ex corde suo et abjecit filios hominum.	33 CAPH. Non enim humiliat ex corde suo et affligit filios hominum.
34 (Lamed)Ut conteret sub pedibus suis omnes vinctos terræ.	34 LAMED. Conterere sub pedibus suis omnes vinctos terrae.
35 (Lamed)Ut declinaret judicium viri in conspectu vultus Altissimi.	35 LAMED. Declinare iudicium viri in conspectu vultus Altissimi.
36 (Lamed)Ut perverteret hominem in judicio suo ; Dominus ignoravit.	36 LAMED. Pervertere hominem in iudicio suo, num Dominus haec ignorat?
37 (Mem)Quis est iste qui dixit ut fieret, Domino non jubente ?	37 MEM. Quis est iste, qui dixit, et factum est? Dominus non iussit?
38 (Mem)Ex ore Altissimi non egredientur nec mala nec bona ?	38 MEM. Ex ore Altissimi nonne egrediuntur et mala et bona?
39 (Mem)Quid murmuravit homo vivens, vir pro peccatis suis ?	39 MEM. Quid murmurabit homo vivens, vir pro peccatis suis?
40 (Nun)Scrutemur vias nostras, et quæramus, et revertamur ad Dominum.	40 NUN. “ Scrutemur vias nostras et quaeramus et revertamur ad Dominum.
41 (Nun)Levemus corda nostra cum manibus ad Dominum in cælos.	41 NUN. Levemus corda nostra cum manibus ad Dominum in caelos.
42 (Nun)Nos inique egimus, et ad iracundiam provocavimus ; idcirco tu inexorabilis es.	42 NUN. Nos inique egimus et rebelles fuimus; idcirco tu inexorabilis fuisti.
43 (Samech)Operuisti in furore, et percussisti nos ; occidisti, nec pepercisti.	43 SAMECH. Operuisti in furore et percussisti nos; occidisti nec pepercisti.
44 (Samech)Opposuisti nubem tibi, ne transeat oratio.	44 SAMECH. Opposuisti nubem tibi, ne transeat oratio.
45 (Samech)Eradicationem et abjectionem posuisti me in medio populorum.	45 SAMECH. In eradicationem et abiectionem posuisti nos in medio populorum.
46 (Phe)Aperuerunt super nos os suum omnes inimici.	46 PHE. Aperuerunt super nos os suum omnes inimici nostri.
47 (Phe)Formido et laqueus facta est nobis vaticinatio, et contritio.	47 PHE. Formido et fovea facta est nobis, vastatio et contritio ”.
48 (Phe)Divisiones aquarum deduxit oculus meus, in contritione filiæ populi mei.	48 PHE. Rivos aquarum deducit oculus meus in contritione filiae populi mei.
49 (Ain)Oculus meus afflictus est, nec tacuit, eo quod non esset requies.	49 AIN. Oculus meus lacrimas effundit nec tacet, eo quod non sit requies.
50 (Ain)Donec respiceret et videret Dominus de cælis.	50 AIN. Donec respiciat et videat Dominus de caelis.
51 (Ain)Oculus meus deprædatus est animam meam in cunctis filiabus urbis meæ.	51 AIN. Oculus meus affligit animam meam prae cunctis filiabus urbis meae.
52 (Sade)Venatione ceperunt me quasi avem inimici mei gratis.	52 SADE. Venatione venati sunt me quasi avem inimici mei gratis.
53 (Sade)Lapsa est in lacum vita mea, et posuerunt lapidem super me.	53 SADE. Perdiderunt in lacu vitam meam et iecerunt lapides super me.
54 (Sade)Inundaverunt aquæ super caput meum ; dixi : Perii.	54 SADE. Inundaverunt aquae super caput meum, dixi: “ Perii ”.
55 (Coph)Invocavi nomen tuum, Domine, de lacu novissimo.	55 COPH. Invocavi nomen tuum, Domine, de profunditate lacus.
56 (Coph)Vocem meam audisti ; ne avertas aurem tuam a singultu meo et clamoribus.	56 COPH. Vocem meam audisti: “ Ne avertas aurem tuam a singultu meo et clamoribus ”.
57 (Coph)Appropinquasti in die quando invocavi te ; dixisti : Ne timeas.	57 COPH. Appropinquasti in die, quando invocavi te, dixisti: “ Ne timeas ”.
58 (Res)Judicasti, Domine, causam animæ meæ, redemptor vitæ meæ.	58 RES. Iudicasti, Domine, causam animae meae, redemisti vitam meam.
59 (Res)Vidisti, Domine, iniquitatem illorum adversum me : judica judicium meum.	59 RES. Vidisti, Domine, afflictionem meam; iudica iudicium meum.
60 (Res)Vidisti omnem furorem, universas cogitationes eorum adversum me.	60 RES. Vidisti omnem furorem eorum, universas cogitationes eorum adversum me.
61 (Sin)Audisti opprobrium eorum, Domine, omnes cogitationes eorum adversum me.	61 SIN. Audisti opprobrium eorum, Domine, omnes cogitationes eorum adversum me.
62 (Sin)Labia insurgentium mihi, et meditationes eorum adversum me tota die.	62 SIN. Labia insurgentium mihi et meditationes eorum adversum me tota die.
63 (Sin)Sessionem eorum et resurrectionem eorum vide ; ego sum psalmus eorum.	63 SIN. Sessionem eorum et resurrectionem eorum vide; ego sum psalmus eorum.
64 (Thau)Redes eis vicem, Domine, juxta opera manuum suarum.	64 THAU. Reddes eis vicem, Domine, iuxta opera manuum suarum.
65 (Thau)Dabis eis scutum cordis, laborem tuum.	65 THAU. Dabis eis duritiam cordis, exsecrationem tuam.
66 (Thau)Persequeris in furore, et conteres eos sub cælis, Domine.	66 THAU. Persequeris in furore et conteres eos sub caelis tuis, Domine.