Tobia ܛܘܒܝܛ 13

Peshitta	Miqra 'al pi ha-Mesorah
1 ܘܛܘܒܝܛ ܟܬܒ ܗ̣ܘܐ ܨܠܘܬܐ ܒܐܪܘܙܐ ܘܐܡ̣ܪ. ܡܒܪܟܐ ܗ̣ܘ ܐܠܗܐ ܗ̇ܘ ܕܚܝ ܠܥܠܡܝܢ̣. ܘܡܠܟܘܬܐ ܕܝܠܗ.
2 ܡܛܠ ܕܗ̣ܘ ܡܢܓܕ ܘܡܪܚܡ. ܡܚܬ ܠܫܝܘܠ ܘܡ̇ܣܩ. ܘܠܐ ܐܝܬ ܗ̇ܘ ܕܢܥܪܘܩ ܡܢ ܐܝܕܐ ܕܝܠܗ
3 ܐܘܕܘ ܠܗ ܒܢ̈ܝܐ ܕܐܝܣܪܝܠ ܩܕܡ ܥܡ̈ܡܐ̣. ܡܛܠ ܕܗ̣ܘ ܒܕܪܟܘܢ ܒܗܘܢ̣
4 ܬܡܢ ܚܘܘ ܪܒܘܬܐ ܕܝܠܗ ܘܪܡܪܡܘܢܝܗܝ ܩܕܡ ܟܠ ܕܚܝ̣. ܡܛܠ ܕܗܘܝܘ ܡܪܝܐ ܕܝܠܢ̣. ܘܐܠܗܐ ܐܒܐ ܕܝܠܢ ܒܟܠܗܘܢ ܥܠ̈ܡܐ
5 ܡ̇ܢܓܕ ܠܢ ܒܥ̈ܘܠܐ ܕܝܠܢ̣. ܘܬܘܒ ܢܪܚܡ ܘܢܟܢܫ ܠܢ ܡܢ ܟܠܗܘܢ ܥܡ̈ܡܐ̇. ܡܢ ܐܝܟܐ ܕܐܢ ܬܬܒܕܪܘܢ ܒܗܘܢ
6 ܐܢ ܬܬܦ̣ܢܘܢ ܠܘܬܗ̣ ܒܟܠܗ ܠܒܐ ܕܝܠܟܘܢ ܘܒܟܠܗ̇ ܢܦܫܐ ܠܡܥܒܕ ܩܕܡܘܗܝ ܫܪܪܐ̣. ܗܝܕܝܢ ܢܬܦ̣ܢܐ ܠܘܬܟܘܢ. ܘܠܐ ܢ̇ܛܫܐ ܠܦܪܨܘܦܐ ܕܝܠܗ ܡܢܟܘܢ. ܘܚ̣ܙܘ ܗܠܝܢ ܕܥ̇ܒܕ ܥܡܟܘܢ ܘܐܘܕܘ ܠܗ ܒܟܠܗ ܦܘܡܐ ܕܝܠܟܘܢ ܘܒܪܟܘ ܠܡܪܝܐ ܕܙܕܝܩܘܬܐ̣. ܘܪܡܪܡܘ ܠܡ̇ܠܟܐ ܕܥ̈ܠܡܐ.. ܐܢܐ ܒܐܪܥܐ ܕܫܒܝܬܐ ܕܝܠܝ ܡܘܕܐ ܐܢܐ ܠܗ̣. ܘܡܚܘܐ ܐܢܐ ܚܝܠܐ ܕܪܒܘܬܐ ܕܝܠܗ ܠܥܡܐ ܚܛܝܐ.. ܐܬܦܢܘ ܚ̈ܛܝܐ ܘܥܒܕܘ ܙܕܝܩܘܬܐ ܩܕܡܘܗܝ. ܡܢ ܝܕ̇ܥ ܐܢ ܒ̇ܥܐ ܠܟܘܢ̇. ܘܥ̇ܒܕ ܡܪܚܡܢܘܬܐ ܠܟܘܢ
7 ܠܐܠܗܐ ܡܪܡܪܡ ܐܢܐ̣. ܘܢܦܫܐ ܕܝܠܝ ܠܡܠܟܘܬܐ ܕܫܡܝܐ. ܘܬܪܘܙ ܒܪ̈ܒܘܬܐ ܕܝܠܗ
8 ܢܐܡܪܘܢ ܟܠܗܘܢ ܘܢܘܕܘܢ ܠܗ ܒܐܘܪܫܠܡ
9 ܡܕܝܢܬܗ ܕܩܕܫܐ. ܡ̇ܢܓܕ ܥܠ ܥ̇ܒ̈ܕܐ ܕܒܢ̈ܝܐ ܕܝܠܟܝ. ܘܬܘܒ ܡܪܚܡ ܥܠ ܒ̈ܢܝܐ ܕܙ̈ܕܝܩܐ
10 ܐܘܕܝ ܠܡܪܝܐ ܛܒܐܝܬ̣ ܘܒܪܟܝ ܠܡ̇ܠܟܐ ܕܥ̈ܠܡܐ̣. ܐܝܟܢܐ ܕܬܘܒ ܡܫ̣ܟܢܐ ܕܝܠܗ ܢܬܒܢܐ ܒܟܝ̣. ܥܡ ܚܕܘܬܐ̇. ܘܢܚ̇ܕܐ ܒܟܝ ܠܫ̈ܒܝܐ̇. ܘܢܚܒ ܒܟܝ ܠܕܘ̈ܝܐ̣. ܒܟܠܗܘܢ ܕܪ̈ܐ ܕܥܠܡܐ
11 ܥܡ̈ܡܐ ܣ̈ܓܝܐܐ ܡܢ ܪܘܚܩܐ ܢܐܬܘܢ ܠܘܬ ܫܡܗ ܕܡܪܝܐ ܐܠܗܐ̣. ܟܕ ܩܘܪ̈ܒܢܐ ܒܐ̈ܝܕܝܐ ܐܝܬ ܠܗܘܢ ܩܘܪ̈ܒܢܐ ܠܡ̇ܠܟܐ ܕܫܡܝܐ. ܕܪܐ ܕܕܪ̈ܐ ܢܬܠ ܐܪܘܙܐ ܀
12 ܠܝܛܝܢ ܟܠܗܘܢ ܗ̇ܢܘܢ ܕܣܢܝܢ ܠܟܝ. ܡܒܪ̈ܟܐ ܢܗܘܘܢ ܐܝܬܝܗܘܢ ܟܠܗܘܢ ܗ̇ܢܘܢ ܕܡܚܒܝܢ ܠܟܝ̣. ܠܥܠܡ
13 ܚܕܝ ܘܐܪܘܙܝ ܒܒ̈ܢܝܐ ܕܙܕ̈ܝܩܐ̣. ܡܛܠ ܕܢܬܟܢܫܘܢ ܘܢܒܪܟܘܢ ܠܡܪܝܐ ܙܕܝܩܐ
14 ܡܐ ܛܘܒ̈ܬܢܐ ܐܝܬܝܗܘܢ ܗܢܘܢ ܕܡܚܒܝܢ ܠܟܝ ܢܚܕܘܢ ܥܠ ܫܝܢܐ ܕܝܠܟܝ. ܛܘܒ̈ܬܢܐ ܐܢܘܢ ܗ̇ܢܘܢ ܕܐܬܬܥܝܩܘ ܥܠ ܟܠܗܘܢ ܢܓ̈ܕܐ ܕܝܠܟܝ̣. ܡܛܠ ܕܒܟܝ ܢܚܕܘܢ ܟܕ ܚܙܝܢ ܟܠܗ̇ ܬܫܒܘܚܬܐ ܕܝܠܟܝ. ܘܬܬܒܣܡ ܠܥܠܡ ܢܦܫܐ ܕܝܠܟܝ
15 ܒܪܟܘ ܠܐܠܗܐ ܠܡ̇ܠܟܐ ܗ̇ܘ ܪܡܐ
16 ܡܛܠ ܕܬܬܒܢܐ ܐܘܪܫܠܡ ܒܣܐܦܝܪܐ̣ ܘܒܐܙܡܪܓܕܐ̣. ܘܒܟܐܦܐ ܡܝܩܪܬܐ. ܫܘܪܐ ܕܝܠܟܝ ܦܘܪ̈ܩܣܐ ܘܦܪܘܡܐܟܘܢܐ ܒܕܗܒܐ ܕܟܝܐ
17 ܘܦܠܛܘ̈ܬܐ ܕܐܘܪܫܠܡ̣. ܒܒܪ̈ܘܠܐ ܘܒܐܢܬܪܩܘܣ ܘܒܟܐܦܐ ܕܡܢ ܣܘܦܝܪ ܢܬܬ̇ܩܦܣܘܢ
18 ܘܢܐܡܪܘܢ ܟܠܗܘܢ ܫܘ̈ܩܐ ܕܝܠܗ̇ ܗܠܠܘܝܐ. ܘܢܫܒܚܘܢ ܟܕ ܐܡܪܝܢ ܡܒܪܟܐ ܗ̣ܘ ܐܠܗܐ̇. ܗ̇ܘ ܕܪܡܪܡ ܠܟܠܗܘܢ ܥ̈ܠܡܐ̇