1 Samuele ܫܡܘܐܝܠ 3

¹ ܘܛܠܝܐ ܫܡܘܐܝܠ ܡܫܡܫ ܗܘܐ ܩܕܡ ܡܪܝܐ ܩܕܡ ܥܠܝ ܟܗܢܐ ܘܦܬܓܡܗ ܕܡܪܝܐ ܝܩܪ ܗܘܐ ܒܝ̈ܘܡܬܐ ܗܢܘܢ ܠܝܬ ܚܙܘܐ ܕܓܠܐ

² ܘܗܘܐ ܒܝ̈ܘܡܬܐ ܗܢܘܢ ܘܥܠܝ ܕܡܟ ܒܕܘܟܬܗ ܘܥܝܢ̈ܘܗܝ ܫܪܝ ܝܩܪ̈ܢ ܘܠܐ ܡܫܟܚ ܗܘܐ ܠܡܚܙܐ

³ ܘܫܪܓܗ ܕܡܪܝܐ ܥܕܟܝܠ ܠܐ ܕܥܟ ܘܫܡܘܐܝܠ ܕܡܟ ܒܗܝܟܠܗ ܕܡܪܝܐ ܕܬܡܢ ܩܒܘܬܗ ܕܐܠܗܐ

⁴ ܘܩܪܐ ܡܪܝܐ ܠܫܡܘܐܝܠ ܘܐܡܪ ܗܐ ܐܢܐ

⁵ ܘܪܗܛ ܠܘܬ ܥܠܝ ܘܐܡܪ ܗܐ ܐܢܐ ܕܩܪܝܬܢܝ ܘܐܡܪ ܠܐ ܩܪܝܬ ܙܠ ܕܡܟ ܘܐܙܠ ܕܡܟ

⁶ ܘܐܘܣܦ ܬܘܒ ܡܪܝܐ ܠܡܩܪܐ ܠܫܡܘܐܝܠ ܘܩܡ ܫܡܘܐܝܠ ܘܐܙܠ ܠܘܬ ܥܠܝ ܘܐܡܪ ܗܐ ܐܢܐ ܕܩܪܝܬܢܝ ܘܐܡܪ ܠܐ ܩܪܝܬ ܒܪܝ ܙܠ ܕܡܟ

⁷ ܘܫܡܘܐܝܠ ܥܕܟܝܠ ܠܐ ܝܕܥ ܠܡܪܝܐ ܘܥܕܟܝܠ ܠܐ ܐܬܓܠܝ ܥܠܘܗܝ ܦܬܓܡܗ ܕܡܪܝܐ

⁸ ܘܐܘܣܦ ܬܘܒ ܡܪܝܐ ܠܡܩܪܐ ܠܫܡܘܐܝܠ ܕܬܠܬ ܙܒܢܝ̈ܢ ܘܩܡ ܫܡܘܐܝܠ ܘܐܙܠ ܠܘܬ ܥܠܝ ܘܐܡܪ ܗܐ ܐܢܐ ܕܩܪܝܬܢܝ ܘܐܬܒܝܢ ܥܠܝ ܕܡܪܝܐ ܩܪܐ ܠܛܠܝܐ

⁹ ܘܐܡܪ ܥܠܝ ܠܫܡܘܐܝܠ ܙܠ ܕܡܟ ܘܐܢ ܢܩܪܝܟ ܐܡܪ ܡܠܠ ܡܪܝܐ ܡܛܠ ܕܫܡ̇ܥ ܥܒܕܟ ܘܐܙܠ ܫܡܘܐܝܠ ܘܕܡܟ ܒܕܘܟܬܗ

¹⁰ ܘܐܬܐ ܡܪܝܐ ܘܩܡ ܘܩܪܐ ܬܪ̈ܬܝܢ ܙܒܢܝ̈ܢ ܫܡܘܐܝܠ ܫܡܘܐܝܠ ܘܐܡܪ ܫܡܘܐܝܠ ܡܠܠ ܡܪܝܐ ܡܛܘܠ ܕܫܡ̇ܥ ܥܒܕܟ

¹¹ ܘܐܡܪ ܡܪܝܐ ܠܫܡܘܐܝܠ ܗܐ ܥܒܕ ܐܢܐ ܦܬܓܡܐ ܒܐܝܣܪܝܠ ܕܟܠ ܕܢܫܡܥܝܘܗܝ ܢܨܠܢ ܬܪ̈ܬܝܗܝܢ ܐ̈ܕܢܘܗܝ

¹² ܒܝܘܡܐ ܗ̇ܘ ܘܐܩܝܡ ܥܠ ܥܠܝ ܟܠ ܕܐܡܪܬ ܥܠ ܒܝܬܗ ܫܘܪܝܐ ܘܓܡܘܪܝܐ

¹³ ܘܐܚܘܝܘܗܝ ܕܕܐܢ ܐܢܐ ܠܒܝܬܗ ܠܥܠܡ ܒܥܘܠܐ ܕܝܕܥ ܗܘܐ ܕܡܨܥܪܝܢ ܗܘܘ ܗܠܝܢ ܒܢ̈ܘܗܝ ܠܥܡܐ ܘܠܐ ܟܐܐ ܒܗܘܢ

¹⁴ ܡܛܠ ܗܢܐ ܐܡܝܬ ܠܕܒܝܬ ܥܠܝ ܘܠܐ ܢܬܚܣܐ ܥܘܠܐ ܕܒܝܬ ܥܠܝ ܒܕܒܚ̈ܐ ܘܒܩܘܪ̈ܒܢܐ ܥܕܡܐ ܠܥܠܡ

¹⁵ ܘܕܡܟ ܫܡܘܐܝܠ ܥܕܡܐ ܠܨܦܪܐ ܘܦܬܚ ܬܪܥܐ ܕܒܝܬܗ ܕܡܪܝܐ ܘܫܡܘܐܝܠ ܕܚܠ ܕܢܚܘܐ ܚܙܘܐ ܠܥܠܝ

¹⁶ ܘܩܪܐ ܥܠܝ ܠܫܡܘܐܝܠ ܘܐܡܪ ܫܡܘܐܝܠ ܒܪܝ ܘܐܡܪ ܗܐ ܐܢܐ

¹⁷ ܘܐܡܪ ܠܗ ܡܢܐ ܗܘ ܦܬܓܡܐ ܕܐܡܪ ܠܟ ܡܪܝܐ ܠܐ ܬܒܗܬ ܡܢܝ ܗܟܢܐ ܢܥܒܕ ܠܟ ܐܠܗܐ ܘܗܟܢܐ ܢܘܣܦ ܠܟ ܐܢ ܬܟܣܐ ܡܢܝ ܡܠܬܐ ܡܢ ܟܠ ܦܬ̈ܓܡܐ ܕܐܡܪ ܠܟ ܡܪܝܐ

¹⁸ ܘܚܘܝܗ ܫܡܘܐܝܠ ܟܠܗܝܢ ܡ̈ܠܐ ܘܠܐ ܟܣܝ ܡܢܗ ܘܐܡܪ ܥܠܝ ܡܪܝܐ ܗܘ ܟܠ ܕܫܦܝܪ ܒܥܝ̈ܢܘܗܝ ܢܥܒܕ

¹⁹ ܘܝܕܥ ܫܡܘܐܝܠ ܕܡܪܝܐ ܗܘܐ ܥܡܗ ܘܠܐ ܐܪܡܝ ܡܢ ܟܠܗܝܢ ܡ̈ܠܘܗܝ ܥܠ ܐܪܥܐ

²⁰ ܘܝܕܥ ܟܠܗ ܐܝܣܪܝܠ ܡܢ ܕܢ ܘܥܕܡܐ ܠܒܪܫܒܥ ܕܐܬܗܝܡܢ ܫܡܘܐܝܠ ܢܒܝܐ ܠܐܠܗܐ

²¹ ܘܐܘܣܦ ܬܘܒ ܡܪܝܐ ܠܡܬܓܠܝܘ ܒܫܝܠܘ ܒܦܬ̈ܓܡܘܗܝ