1 Samuele ܫܡܘܐܝܠ 8

¹ ܘܗܘܐ ܕܟܕ ܣܐܒ ܫܡܘܐܝܠ ܥܒܕ ܠܒܢ̈ܘܗܝ ܕܝܢ̈ܐ ܥܠ ܐܝܣܪܝܠ

² ܘܗܘܐ ܫܡ ܒܪܗ ܒܘܟܪܗ ܝܘܐܝܠ ܘܫܡ ܬܢܝܢܗ ܐܒܝܐ ܕܝܢ̈ܐ ܒܒܪܫܒܥ

³ ܘܠܐ ܗܠܟܘ ܒ̈ܢܘܗܝ ܒܐܘܪ̈ܚܬܗ ܘܐܨܛܠܝܘ ܒܬܪ ܢܟܠܐ ܘܢܣܒܘ ܫܘܚܕܐ ܘܨܠܘ ܕܝܢܐ

⁴ ܘܐܬܟܢܫܘ ܟܠܗܘܢ ܣ̈ܒܐ ܕܒܢ̈ܝ ܐܝܣܪܝܠ ܘܐܬܘ ܠܘܬ ܫܡܘܐܝܠ ܠܪܡܬܐ

⁵ ܘܐܡܪܘ ܠܗ ܗܐ ܐܢܬ ܣܐܒܬ ܘܒܢܝ̈ܟ ܠܐ ܡܗܠܟܝܢ ܒܐܘܪ̈ܚܬܟ ܗܫܐ ܗܒ ܠܢ ܡܠܟܐ ܕܢܕܘܢܢ ܐܝܟ ܟܠܗܘܢ ܥܡ̈ܡܐ

⁶ ܘܐܬܒܐܫ ܦܬܓܡܐ ܒܥܝܢ̈ܘܗܝ ܕܫܡܘܐܝܠ ܟܕ ܐܡܪܘ ܠܗ ܗܒ ܠܢ ܡܠܟܐ ܕܢܕܘܢܢ ܐܝܟ ܟܠܗܘܢ ܥܡ̈ܡܐ ܘܨܠܝ ܫܡܘܐܝܠ ܩܕܡ ܡܪܝܐ

⁷ ܘܐܡܪ ܡܪܝܐ ܠܫܡܘܐܝܠ ܫܡܥ ܒܩܠܗ ܕܥܡܐ ܠܟܠ ܕܐܡܪܝܢ ܠܟ ܡܛܠ ܕܠܐ ܗܘܐ ܠܟ ܐܣܠܝܘ ܐܠܐ ܠܝ ܐܣܠܝܘ ܕܠܐ ܐܡܠܟ ܥܠܝܗܘܢ

⁸ ܐܝܟ ܟܠ ܥܒ̈ܕܐ ܕܥܒܕܘ ܡܢ ܝܘܡܐ ܕܐܣܩܬ ܐܢܘܢ ܡܢ ܐܪܥܐ ܕܡܨܪܝܢ ܘܥܕܡܐ ܠܝܘܡܢܐ ܘܫܒܩܘܢܝ ܘܦܠܚܘ ܠܐ̈ܠܗܐ ܐܚܪ̈ܢܐ ܗܟܢܐ ܗܢܘܢ ܥܒܕܝܢ ܘܐܦ ܠܟ

⁹ ܘܗܫܐ ܫܡܥ ܒܩܠܗܘܢ ܒܪܡ ܡܣܗܕܘ ܣܗܕ ܒܗܘܢ ܘܚܘܐ ܐܢܘܢ ܢܡܘܣܗ ܕܡܠܟܐ ܕܡܡܠܟ ܥܠܝܗܘܢ

¹⁰ ܘܐܡܪ ܫܡܘܐܝܠ ܟܠܗܘܢ ܦܬܓܡ̈ܘܗܝ ܕܡܪܝܐ ܠܥܡܐ ܕܫܐܠܘ ܡܢܗ ܡܠܟܐ

¹¹ ܘܐܡܪ ܗܢܐ ܢܗܘܐ ܢܡܘܣܗ ܕܡܠܟܐ ܕܡܡܠܟ ܥܠܝܟܘܢ ܒܢܝ̈ܟܘܢ ܢܕܒܪ ܘܢܥܒܕ ܠܗ ܒܡܪ̈ܟܒܬܗ ܘܒܦܪ̈ܫܘܗܝ ܘܢܪܗܛܘܢ ܩܕܡ ܡܪ̈ܟܒܬܗ

¹² ܘܢܥܒܕ ܠܗ ܪ̈ܒܝ ܐ̈ܠܦܐ ܘܪ̈ܒܝ ܡܐ̈ܘܬܐ ܘܪ̈ܒܝ ܚܡܫܝܢ ܘܪ̈ܒܝ ܥܣܪܐ ܘܢܕܒܪܘܢ ܕܒܪܗ ܘܢܚܨܕܘܢ ܚܨܕܗ ܘܢܥܒܕܘܢ ܡܐ̈ܢܝ ܩܪܒܗ ܘܡܐ̈ܢܝ ܡܪ̈ܟܒܬܗ

¹³ ܘܒܢ̈ܬܟܘܢ ܢܕܒܪ ܠܙܩܪ̈ܬܐ ܘܠܛܚ̈ܢܬܐ ܘܠܐ̈ܦܝܬܐ

¹⁴ ܘܚ̈ܩܠܬܟܘܢ ܘܟܪ̈ܡܝܟܘܢ ܘܙܝ̈ܬܝܟܘܢ ܛܒ̈ܐ ܢܣܒ ܘܢܬܠ ܠܥܒ̈ܕܘܗܝ

¹⁵ ܘܙܪܥܟܘܢ ܘܟܪ̈ܡܝܟܘܢ ܢܥܣܪ ܘܢܬܠ ܠܡܗܝ̈ܡܢܘܗܝ ܘܠܥܒ̈ܕܘܗܝ

¹⁶ ܘܥܒ̈ܕܝܟܘܢ ܘܐܡ̈ܗܬܟܘܢ ܘܓܕܘ̈ܕܝܟܘܢ ܫܦܝܪ̈ܐ ܘܚܡܪܟܘܢ ܢܕܒܪ ܘܢܥܒܕ ܥܒܕܗ

¹⁷ ܘܥܢܟܘܢ ܢܥܣܪ ܘܐܢܬܘܢ ܬܗܘܘܢ ܠܗ ܥܒ̈ܕܐ

¹⁸ ܘܬܝܠܠܘܢ ܒܝܘܡܐ ܗ̇ܘ ܡܢ ܩܕܡ ܡܠܟܟܘܢ ܕܓܒܝܬܘܢ ܠܟܘܢ ܘܠܐ ܢܥܢܝܟܘܢ ܡܪܝܐ ܒܝܘܡܐ ܗ̇ܘ

¹⁹ ܘܠܐ ܨܒܘ ܥܡܐ ܠܡܫܡܥ ܒܩܠܗ ܕܫܡܘܐܝܠ ܘܐܡܪܘ ܠܗ ܠܐ ܗܟܢܐ ܐܠܐ ܡܠܟܐ ܢܗܘܐ ܥܠܝܢ

²⁰ ܘܢܗܘܐ ܐܦ ܚܢܢ ܐܝܟ ܟܘܠܗܘܢ ܥܡ̈ܡܐ ܘܢܕܘܢܢ ܡܠܟܢ ܘܢܦܘܩ ܩܕܡܝܢ ܘܢܬܟܬܫ ܬܟܬܘܫܢ

²¹ ܘܫܡܥ ܫܡܘܐܝܠ ܟܠܗܝܢ ܡ̈ܠܘܗܝ ܕܥܡܐ ܘܡܠܠ ܐ̈ܢܝܢ ܩܕܡ ܡܪܝܐ

²² ܘܐܡܪ ܡܪܝܐ ܠܫܡܘܐܝܠ ܫܡܥ ܒܩܠܗܘܢ ܘܐܡܠܟ ܠܗܘܢ ܡܠܟܐ ܘܐܡܪ ܫܡܘܐܝܠ ܠܐܢܫܐ ܕܐܝܣܪܝܠ ܙܠܘ ܐܢܫ ܠܩܪܝܬܗ