1 Samuele ܫܡܘܐܝܠ 7

¹ ܘܶܐܬܰܘ ܐ̱ܢܳܫܰܝ̈ ܩܽܘܪܝܰܬ ܢܰܥܪܺܝܢ. ܘܰܐܣܩܽܘܗܝ ܠܳܐܪܽܘܢܶܗ ܕܡܳܪܝܳܐ. ܘܰܐܝܬܝܽܘܗܝ ܠܒܶܝܬ ܐܰܒܺܝܢܳܕܳܒ ܕܒܰܓܒܰܥܬܳܐ. ܘܩܰܕܶܫ ܠܶܐܠܺܝܥܳܙܳܪ ܒܪܶܗ. ܘܰܢܛܰܪ ܐܳܪܽܘܢܶܗ ܕܡܳܪܝܳܐ.

² ܘܰܗܘܳܐ ܡܶܢ ܝܰܘܡܳܐ ܕܺܝܬܶܒ ܐܳܪܽܘܢܳܐ ܒܩܽܘܪܝܰܬ ܢܰܥܪܺܝܢ. ܘܰܣܓܺܝܘ ܝܰܘ̈ܡܳܬܳܐ. ܘܰܗܘܰܝ̈ ܐܰܝܟ ܥܶܣܪܺܝܢ ܫܢܺܝ̈ܢ. ܘܶܐܫܬܕܺܝܘ ܟܽܠܗܽܘܢ ܕܒܶܝܬ ܝܺܣܪܳܐܶܝܠ ܒܳܬܰܪ ܡܳܪܝܳܐ.

³ ܘܶܐܡܰܪ ܫܡܽܘܐܶܝܠ ܠܟܽܠܶܗ ܒܶܝܬ ܝܺܣܪܳܐܶܝܠ. ܐܶܢ ܒܟܽܠܶܗ ܠܶܒܟܽܘܢ ܡܶܬܦܢܶܝܢ ܐ̱ܢܬܽܘܢ ܠܘܳܬ ܡܳܪܝܳܐ. ܐܰܥܒܰܪܘ ܐܰܠܳܗ̈ܶܐ ܢܽܘܟܖ̈ܳܝܶܐ ܡܶܢ ܒܰܝܢܳܬܟܽܘܢ ܘܓܶܢ̈ܝܳܬܳܐ. ܘܰܐܬܩܶܢܘ ܠܶܒܟܽܘܢ ܠܘܳܬ ܡܳܪܝܳܐ. ܘܦܽܘܠܚܽܘܗܝ ܠܶܗ ܒܰܠܚܽܘܕܘܗܝ. ܘܰܢܦܰܨܶܝܟܽܘܢ ܡܶܢ ܐܺܝܕܳܐ ܕܰܦܠܶܫ̈ܬܳܝܶܐ.

⁴ ܘܰܐܥܒܰܪܘ ܒܢܰܝ̈ ܝܺܣܪܳܐܶܝܠ ܒܰܥܠܳܐ ܘܓܶܢ̈ܝܳܬܳܐ. ܘܰܦܠܰܚܘ ܠܡܳܪܝܳܐ ܒܰܠܚܽܘܕܰܘܗܝ.

⁵ ܘܶܐܡܰܪ ܫܡܽܘܐܶܝܠ. ܟܰܢܶܫܘ ܠܟܽܠܶܗ ܝܺܣܪܳܐܶܝܠ ܠܡܰܨܦܝܳܐ. ܘܶܐܨܰܠܶܐ ܥܠܰܝܟܽܘܢ ܩܕܳܡ ܡܳܪܝܳܐ.

⁶ ܘܶܐܬܟܰܢܰܫܘ ܠܡܰܨܦܝܳܐ. ܘܰܡܠܰܘ ܡܰܝ̈ܳܐ ܘܶܐܫܰܕܘ ܩܕܳܡ ܡܳܪܝܳܐ. ܘܨܳܡܘ ܒܝܰܘܡܳܐ ܗܰܘ. ܘܶܐܡܰܪܘ ܡܶܛܽܠ ܕܰܚܛܰܝܢ ܠܡܳܪܝܳܐ. ܘܕܳܢ ܫܡܽܘܐܶܝܠ ܠܰܒܢܰܝ̈ ܝܺܣܪܳܐܶܝܠ ܒܡܰܨܦܝܳܐ.

⁷ ܘܰܫܡܰܥܘ ܦܠܶܫܬܳܝ̈ܶܐ ܕܶܐܬܟܰܢܰܫܘ ܒܢܰܝ̈ ܝܺܣܪܳܐܶܝܠ ܠܡܰܨܦܝܳܐ. ܘܰܣܠܶܩܘ ܛܖ̈ܽܘܢܶܐ ܕܰܦܠܶܫ̈ܬܳܝܶܐ ܥܰܠ ܝܺܣܪܳܐܶܝܠ. ܘܰܫܡܰܥܘ ܒܢܰܝ̈ ܝܺܣܪܳܐܶܝܠ ܘܰܕܚܶܠܘ ܡܶܢ ܩܕܳܡ ܦܠܶܫܬܳܝ̈ܶܐ.

⁸ ܘܶܐܡܰܪܘ ܒܢܰܝ̈ ܝܺܣܪܳܐܶܝܠ ܠܰܫܡܽܘܐܶܝܠ. ܠܳܐ ܬܶܫܬܽܘܩ ܡܶܢܰܢ ܠܰܡܨܰܠܳܝܽܘ ܩܕܳܡ ܡܳܪܝܳܐ ܐܰܠܳܗܰܢ. ܕܢܶܦܪܩܰܢ ܡܶܢ ܐܺܝܕܳܐ ܕܰܦܠܶܫ̈ܬܳܝܶܐ.

⁹ ܘܰܢܣܰܒ ܫܡܽܘܐܶܝܠ ܐܶܡܪܳܐ ܚܰܕ ܕܚܰܠܒܳܐ. ܘܰܐܣܩܶܗ ܥܠܳܬܳܐ ܓܡܺܝܪܬܳܐ ܠܡܳܪܝܳܐ. ܘܨܰܠܺܝ ܫܡܽܘܐܶܝܠ ܩܕܳܡ ܡܳܪܝܳܐ ܥܰܠ ܒܢܰܝ̈ ܝܺܣܪܳܐܶܝܠ. ܘܰܥܢܳܝܗܝ ܡܳܪܝܳܐ.

¹⁰ ܘܰܗܘܳܐ ܫܡܽܘܐܶܝܠ ܡܰܣܶܩ ܥܠܳܬܳܐ. ܘܰܦܠܶܫܬܳܝ̈ܶܐ ܩܪܶܒܘ ܠܡܶܬܟܰܬܳܫܽܘ ܥܰܡ ܝܺܣܪܳܐܶܝܠ. ܘܰܪܥܶܡ ܡܳܪܝܳܐ ܒܩܳܠܳܐ ܪܳܡܳܐ ܒܝܰܘܡܳܐ ܗܰܘ ܥܰܠ ܦܠܶܫܬܳܝ̈ܶܐ. ܘܕܰܠܰܚ ܐܶܢܽܘܢ. ܘܶܐܬܬܒܰܪܘ ܩܕܳܡ ܝܺܣܪܳܐܶܝܠ.

¹¹ ܘܰܢܦܰܩܘ ܐ̱ܢܳܫ̈ܳܐ ܕܺܝܣܪܳܐܶܝܠ ܡܶܢ ܡܰܨܦܝܳܐ. ܘܰܪܕܰܦܘ ܠܰܦܠܶܫܬܳܝ̈ܶܐ ܘܰܚܪܰܒܘ ܐܶܢܽܘܢ. ܥܕܰܡܳܐ ܠܬܰܚܬ ܡܶܢ ܒܶܝܬ ܝܳܫܳܢ.

¹² ܘܰܢܣܰܒ ܫܡܽܘܐܶܝܠ ܟܺܐܦܳܐ ܚܕܳܐ. ܘܣܳܡ ܒܶܝܬ ܡܰܨܦܝܳܐ ܠܒܶܝܬ ܝܳܫܳܢ. ܘܰܩܪܳܐ ܫܡܳܗ̇ ܟܺܐܦܳܐ ܕܥܽܘܕܪܳܢܳܐ. ܘܶܐܡܰܪ ܥܕܰܡܳܐ ܠܗܳܪܟܳܐ ܥܰܕܪܰܢ ܡܳܪܝܳܐ.

¹³ ܘܶܐܬܬܒܰܪܘ ܦܠܶܫܬܳܝ̈ܶܐ. ܘܠܳܐ ܐܰܘܣܶܦܘ ܬܽܘܒ ܦܠܶܫܬܳܝ̈ܶܐ ܠܡܶܐܬܳܐ ܠܰܬܚܽܘܡܳܐ ܕܺܝܣܪܳܐܶܝܠ. ܘܰܗܘܳܬ ܐܺܝܕܶܗ ܕܡܳܪܝܳܐ ܒܰܦܠܶܫܬܳܝ̈ܶܐ. ܟܽܠܗܽܘܢ ܝܰܘ̈ܡܳܬܶܗ ܕܰܫܡܽܘܐܶܝܠ.

¹⁴ ܘܰܐܗܦܶܟܘ ܩܽܘܖ̈ܝܳܐ ܕܰܢܣܰܒܘ ܦܠܶܫܬܳܝ̈ܶܐ ܡܶܢ ܝܺܣܪܳܐܶܝܠ ܠܺܝܣܪܳܐܶܝܠ. ܡܶܢ ܥܶܩܪܽܘܢ ܘܰܥܕܰܡܳܐ ܠܓܳܬ. ܘܰܬܚܽܘ̈ܡܰܝܗܶܝܢ. ܘܦܰܨܺܝ ܡܳܪܝܳܐ ܠܺܝܣܪܳܐܶܝܠ ܡܶܢ ܐܺܝܕܳܐ ܕܰܦܠܶܫ̈ܬܳܝܶܐ. ܘܰܗܘܳܐ ܫܠܳܡܳܐ ܒܶܝܬ ܝܺܣܪܳܐܶܝܠ ܠܳܐܡܽܘܖ̈ܳܝܶܐ.

¹⁵ ܘܕܳܢ ܫܡܽܘܐܶܝܠ ܠܰܒܢܰܝ̈ ܝܺܣܪܳܐܶܝܠ ܟܽܠ ܝܰܘ̈ܡܰܝ ܚܰܝܰܘ̈ܗܝ.

¹⁶ ܘܳܐܙܶܠ ܗܘܳܐ ܡܶܢ ܫܢܳܐ ܠܰܫܢܳܐ. ܘܡܶܬܟܪܶܟ ܠܒܶܝܬ ܐܺܝܠ. ܘܰܠܓܰܠܓܳܠܳܐ. ܘܰܠܡܰܨܦܝܳܐ. ܘܕܳܐܶܢ ܠܺܝܣܪܳܐܶܝܠ ܘܰܠܟܽܠܗܽܘܢ ܐܰܬܖ̈ܰܘܳܬܳܐ ܗܳܠܶܝܢ.

¹⁷ ܘܗܳܦܶܟ ܗܘܳܐ ܠܪܳܡܬܳܐ. ܡܶܛܽܠ ܕܬܰܡܳܢ ܗܘܳܐ ܒܰܝܬܶܗ. ܘܬܰܡܳܢ ܕܳܐܶܢ ܗܘܳܐ ܠܺܝܣܪܳܐܶܝܠ. ܘܰܒܢܳܐ ܬܰܡܳܢ ܡܰܕܒܚܳܐ ܠܡܳܪܝܳܐ.