1 Samuele ܫܡܘܐܝܠ 13

¹ܘܟܕ ܫܢܬܐ ܚܕܐ ܘܬܪ̈ܬܝܢ ܐܡܠܟ ܫܐܘܠ ܒܡܠܟܘܬܗ ܥܠ ܐܝܣܪܝܠ²ܓܒܝ ܠܗ ܫܐܘܠ ܬܠܬܐ ܐ̈ܠܦܝܢ ܡܢ ܐܝܣܪܐܝܠ ܘܗܘܘ ܥܡ ܫܐܘܠ ܬܪ̈ܝܢ ܐ̈ܠܦܝܢ ܒܡܟܡܣ ܘܒܛܘܪܐ ܕܒܝܬ ܐܝܠ ܘܐܠܦ ܗܘܘ ܥܡ ܝܘܢܬܢ ܒܪܗ ܒܪܡܬܐ ܕܒܢܝܡܝܢ ܘܫܪܟܗ ܕܥܡܐ ܫܪܐ ܐܢܘܢ ܐܢܫ ܠܒܝܬܗ³ܘܡܚܐ ܝܘܢܬܢ ܠܩܝܡܐ ܕܦܠܫܬ̈ܝܐ ܒܓܒܥ ܘܫܡܥܘ ܦܠܫ̈ܬܝܐ ܘܫܐܘܠ ܩܪܐ ܒܫܝܦܘܪܐ ܒܟܠܗ̇ ܐܪܥܐ ܠܡܐܡܪ ܢܫܡܥܘܢ ܥܒܪ̈ܝܐ⁴ܘܟܠܗ ܐܝܣܪܝܠ ܕܡܚܐ ܫܐܘܠ ܠܩܝܡܐ ܕܦܠܫ̈ܬܝܐ ܘܚܣܢ ܐܝܣܪܐܝܠ ܠܦܠܫ̈ܬܝܐ ܘܐܬܟܢܫܘ ܥܡܐ ܒܬܪ ܫܐܘܠ ܠܓܠܓܠܐ⁵ܘܦܠܫ̈ܬܝܐ ܐܬܟܢܫܘ ܠܡܬܟܬܫܘ ܥܡ ܐܝܣܪܝܠ ܬܠܬܐ ܐ̈ܠܦܝܢ ܡܪ̈ܟܒܢ ܘܫܬܐ ܐ̈ܠܦܝܢ ܦܪ̈ܫܝܢ ܘܥܡܐ ܐܝܟ ܚܠܐ ܕܥܠ ܣܦܬ ܝܡܐ ܣܘܓܐܐ ܕܛܒ ܘܣܠܩܘ ܘܫܪܘ ܒܡܟܡܣ ܡܢ ܡܕܢܚܝܗ̇ ܕܒܝܬ ܐܝܠ⁶ܘܚܙܘ ܓܒܪ̈ܐ ܕܐܝܣܪܝܠ ܘܕܚܠܘ ܘܐܬܛܫܝܘ ܠܗܘܢ ܒܡܥܪ̈ܐ ܘܒܚ̈ܠܠܐ ܘܒܫ̈ܩܝܦܐ ܘܒܦܥܪ̈ܐ ܘܒܓܘ̈ܒܐ⁷ܘܥܒܪ̈ܝܐ ܥܒܪܘ ܝܘܪܕܢܢ ܠܐܪܥܐ ܕܓܕ ܘܕܓܠܥܕ ܘܫܐܘܠ ܥܕܟܝܠ ܒܓܠܓܠܐ ܗܘܐ ܘܟܠܗ ܥܡܐ ܥܡܗ⁸ܘܦܫ ܫܒܥܐ ܝܘܡ̈ܝܢ ܠܙܒܢܐ ܕܫܡܘܐܝܠ ܘܠܐ ܐܬܐ ܫܡܘܐܝܠ ܠܓܠܓܠܐ ܘܐܬܒܕܪ ܥܡܐ ܡܢ ܠܘܬ ܫܐܘܠ⁹ܘܐܡܪ ܫܐܘܠ ܩܪܒܘ ܠܝ ܥ̇ܠܬܐ ܘܐܣܩ ܕܒܚ̈ܐ ܫ̈ܠܡܐ ܠܥ̇ܠܬܐ¹⁰ܘܟܕ ܫ̇ܠܡ ܠܡܣܩܘ ܥ̇ܠܬܐ ܐܬܐ ܫܡܘܐܝܠ ܘܢܦܩ ܫܐܘܠ ܠܐܘܪܥܗ ܠܡܒܪܟܘܬܗ¹¹ܘܐܡܪ ܫܡܘܐܝܠ ܡܢܐ ܥܒܕܬ ܘܐܡܪ ܫܐܘܠ ܚܙܝܬ ܕܐܬܒܕܪ ܠܗ ܥܡܐ ܡܢܝ ܘܐܢܬ ܠܐ ܐܬܝܬ ܠܙܒ̈ܢܐ ܕܝܘܡ̈ܬܐ ܘܦܠܫ̈ܬܝܐ ܟܢܝܫܝܢ ܒܡܟܡܣ¹²ܘܐܡܪܬ ܕܠܡܐ ܢܚܬܘܢ ܦܠܫ̈ܬܝܐ ܥܠܝ ܠܓܠܓܠܐ ܘܐ̈ܦܝ ܡܪܝܐ ܠܐ ܚܙܝܬ ܘܐܡܪܚܬ ܘܐܣܩܬ ܥ̇ܠܬܐ¹³ܘܐܡܪ ܫܡܘܐܝܠ ܠܫܐܘܠ ܐܣܟܠܬ ܕܠܐ ܢܛܪܬ ܦܘܩܕܢܗ ܕܡܪܝܐ ܐܠܗܟ ܕܦܩܕܟ ܡܛܠ ܕܗܫܐ ܐܬܩܢ ܡܪܝܐ ܐܠܗܟ ܡܠܟܘܬܟ ܥܠ ܐܝܣܪܝܠ ܘܐܡܪ ܕܢܬܩܢܟ ܥܕܡܐ ܠܥܠܡ¹⁴ܡܟܝܠ ܡܠܟܘܬܟ ܠܐ ܬܩܘܡ ܡܛܠ ܕܓܒܐ ܠܗ ܡܪܝܐ ܓܒܪܐ ܐܝܟ ܠܒܗ ܘܦܩܕܗ ܡܪܝܐ ܠܡܕܒܪܘ ܠܥܡܗ ܡܛܠ ܕܠܐ ܢܛܪܬ ܟܠ ܕܦܩܕܟ ܡܪܝܐ ܐܠܗܟ¹⁵ܘܩܡ ܫܡܘܐܝܠ ܘܣܠܩ ܡܢ ܓܠܓܠܐ ܠܪܡܬܐ ܕܒܢܝܡܝܢ ܘܡܢܐ ܫܐܘܠ ܠܥܡܐ ܕܐܫܬܟܚ ܥܡܗ ܐܝܟ ܫܬܡܐܐ ܓܒܪ̈ܝܢ¹⁶ܘܫܐܘܠ ܘܝܘܢܬܢ ܒܪܗ ܝܬܒܝܢ ܒܓܒܥܬܐ ܕܒܢܝܡܝܢ ܘܦܠܫ̈ܬܝܐ ܫܪܝܢ ܒܡܟܡܣ¹⁷ܘܢܦܩܘ ܡܚ̈ܒܠܢܐ ܡܢ ܡܫܪܝܬܐ ܕܦܠܫ̈ܬܝܐ ܬܠܬܐ ܪ̈ܝܫܝܢ ܪܝܫܐ ܚܕ ܡܢܗܘܢ ܐܙ̇ܠ ܠܐܘܪܚܐ ܕܥܦܪ ܥܠ ܐܪܥܐ ܕܫܓܘܐܝܠ¹⁸ܘܪܝܫܐ ܐܚܪܢܐ ܐܙ̇ܠ ܠܐܘܪܚܐ ܕܒܝܬ ܚܘܪܢ ܘܪܝܫܐ ܐܚܪܢܐ ܦܢ̇ܐ ܠܐܘܪܚܐ ܕܬܚܘܡܐ ܕܚܐܪ ܠܢܚܠܐ ܕܨܒܥܘܢ ܘܠܡܕܒܪܐ¹⁹ܘܐܘܡܢܐ ܠܐ ܐܫܬܟܚ ܒܟܠܗ̇ ܐܪܥܐ ܕܐܝܣܪܝܠ ܡܛܠ ܕܐܡܪܘ ܦܠܫ̈ܬܝܐ ܕܠܐ ܢܥܒܕܘܢ ܥܒܪ̈ܝܐ ܣܝ̈ܦܐ ܘܡܘܪ̈ܢܝܬܐ²⁰ܘܢܚܬܘ ܟܠܗ ܐܝܣܪܝܠ ܠܘܬ ܦܠܫ̈ܬܝܐ ܠܡܠܛܫ ܐܢܫ ܡܓܠܗ ܘܣܟܬܗ ܘܟܘܠܒܗ ܘܡܣܣܗ²¹ܘܗܘܐ ܫܘܦܝܢܐ ܕܦܬܐ ܠܡܓܠܐ ܘܠܣܟܬܐ ܘܠܐܒܘܬܐ ܘܠܟܘܠܒܐ ܘܠܩܝܡܬܐ ܕܡܣܣܐ²²ܘܒܝܘܡܐ ܕܩܪܒܐ ܠܐ ܐܫܬܟܚ ܣܝܦܐ ܐܘ ܡܘܪܢܝܬܐ ܒܐܝܕܐ ܕܟܠܗ ܥܡܐ ܕܥܡ ܫܐܘܠ ܘܥܡ ܝܘܢܬܢ ܘܐܫܬܟܚ ܠܫܐܘܠ ܘܠܝܘܢܬܢ ܒܪܗ²³ܘܢܦܩܘ ܩܝܡܐ ܕܦܠܫ̈ܬܝܐ ܠܥܒܪܐ ܕܡܟܡܣ

Cambia Bibbia

Confronta con un'altra Bibbia

Versetti esaminati