1 Samuele ܫܡܘܐܝܠ 17

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31

Gen Es Lv Nm Dt Gs Gdc Rt 1Sam 2Sam 1Re 2Re 1Cr 2Cr Esd Ne Tb Gdt Est 1Mac 2Mac Gb Sal pr Qo Ct Sap Sir Is Ger Lam Ez Dn

¹ܘܟܢܫܘ ܦܠܫ̈ܬܝܐ ܡܫܪ̈ܝܬܗܘܢ ܠܩܪܒܐ ܘܐܬܟܬܫܘ ܒܣܘܦܐ ܕܝܗܘܕܐ ܘܫܪܘ ܒܝܬ ܣܘܦܐ ܠܒܝܬ ܥܪܩܐ ܒܐܦܪܣܡܝܢ²ܘܫܐܘܠ ܘܓܒܪ̈ܐ ܕܐܝܣܪܝܠ ܐܬܟܢܫܘ ܘܫܪܘ ܒܥܘܡܩܐ ܕܒܛܡܬܐ ܘܣܕܪܘ ܩܪܒܐ ܠܘܩܒܠ ܦܠܫ̈ܬܝܐ³ܘܦܠܫ̈ܬܝܐ ܩܝܡܝܢ ܥܠ ܛܘܪܐ ܡܟܐ ܘܐܝܣܪܝܠ ܩܝܡܝܢ ܥܠ ܛܘܪܐ ܡܟܐ ܘܢܚܠܐ ܒܝܢܬܗܘܢ⁴ܘܢܦܩ ܓܒܪܐ ܓܢܒܪܐ ܡܢ ܡܫܪܝܬܐ ܕܦܠܫ̈ܬܝܐ ܓܘܠܝܕ ܫܡܗ ܡܢ ܓܬ ܪܘܡܗ ܫܬ ܐ̈ܡܝܢ ܘܙܪܬ⁵ܘܣܢܘܪܬܐ ܕܢܚܫܐ ܒܪܝܫܗ ܘܫܪܝܢܐ ܕܛܣܐ ܠܒܝܫ ܘܡܬܩܠܐ ܕܫܪܝܢܗ ܚܡܫܐ ܐ̈ܠܦܝܢ ܡܬܩ̈ܠܝܢ ܕܢܚܫܐ⁶ܘܒܪ̈ܙܢܩܐ ܕܢܚܫܐ ܒܪ̈ܓܠܘܗܝ ܘܛܪܦܢܣܐ ܕܢܚܫܐ ܒܝܬ ܟܬ̈ܦܬܗ⁷ܘܩܝܣܐ ܕܢܝܙܟܗ ܐܝܟ ܢܘܠܐ ܕܓܪ̈ܕܝܝܐ ܘܫܢܢܐ ܕܢܝܙܟܗ ܡܢ ܫܬܡܐܐ ܡܬܩ̈ܠܝܢ ܕܦܪܙܠܐ ܘܫܩ̇ܠ ܣܟܪܐ ܐ̇ܙܠ ܩܕܡܘܗܝ⁸ܘܩܡ ܘܩܪܐ ܠܣܕܪ̈ܐ ܕܐܝܣܪܝܠ ܘܐܡܪ ܠܗܘܢ ܠܡܢܐ ܢܦܩܝܢ ܐܢܬܘܢ ܠܡܣܕܪ ܩܪܒܐ ܗܐ ܐܢܐ ܦܠܫܬܝܐ ܘܐܢܬܘܢ ܥܒ̈ܕܘܗܝ ܕܫܐܘܠ ܓܒܘ ܠܟܘܢ ܓܒܪܐ ܕܢܦܘܩ ܥܠܝ⁹ܐܢ ܐܫܟܚ ܠܡܬܟܬܫܘ ܥܡܝ ܘܢܩܛܠܢܝ ܢܗܘܐ ܠܟܘܢ ܥܒ̈ܕܐ ܘܐܢ ܐܢܐ ܐܙܟܝܘܗܝ ܘܐܩܛܠܝܘܗܝ ܬܗܘܘܢ ܠܢ ܥܒ̈ܕܐ ܘܬܦܠܚܘܢܢ¹⁰ܘܐܡܪ ܦܠܫܬܝܐ ܐܢܐ ܚܣܕܬ ܠܣܕܪ̈ܘܗܝ ܕܐܝܣܪܝܠ ܝܘܡܢܐ ܗܒܘ ܠܝ ܓܒܪܐ ܢܬܟܬܫ ܐܝܟ ܚܕܐ¹¹ܘܫܡܥ ܫܐܘܠ ܘܟܠܗ ܐܝܣܪܝܠ ܡ̈ܠܘܗܝ ܕܦܠܫܬܝܐ ܘܙܥܘ ܘܕܚܠܘ ܛܒ¹²ܘܕܘܝܕ ܒܪ ܓܒܪܐ ܗܘܐ ܐܦܪܬܝܐ ܡܢ ܒܝܬ ܠܚܡ ܕܝܗܘܕܐ ܘܫܡܗ ܐܝܫܝ ܘܠܗ ܬܡܢܝܐ ܒܢܝ̈ܢ ܘܓܒܪܐ ܒܝ̈ܘܡܘܗܝ ܕܫܐܘܠ ܣܐܒ ܘܥܠ ܒܫ̈ܢܝܐ¹³ܘܐܙܠܘ ܬܠܬܐ ܒܢ̈ܘܗܝ ܕܐܝܫܝ ܪ̈ܘܪܒܐ ܒܬܪ ܫܐܘܠ ܠܩܪܒܐ ܘܫܡ̈ܗܝܗܘܢ ܐܠܝܒ ܒܘܟܪܗ ܘܬܢܝܢܗ ܐܒܝܢܕܒ ܘܬܠܝܬܝܐ ܫܡܐ¹⁴ܘܕܘܝܕ ܗܘܐ ܙܥܘܪܐ¹⁵ܘܗܘ ܕܘܝܕ ܗܦܟ ܗܘܐ ܡܢ ܠܘܬ ܫܐܘܠ ܘܐܙܠ ܠܡܪܥܐ ܥܢܐ ܕܐܒܘܗܝ ܒܝܬ ܠܚܡ¹⁶ܘܩܪܒ ܦܠܫܬܝܐ ܡܩܕܡ ܘܡܚܫܟ ܘܩܡ ܐܪ̈ܒܥܝܢ ܝܘܡ̈ܝܢ¹⁷ܘܐܡܪ ܐܝܫܝ ܠܕܘܝܕ ܒܪܗ ܐܘܒܠ ܠܐ̈ܚܝܟ ܣܐܐ ܩܠܝܬ̈ܐ ܘܥܣܪ̈ ܕܠܚܡܐ ܘܐܪܗܛ ܠܡܫܪܝܬܐ ܠܐ̈ܚܝܟ¹⁸ܘܥܣܪ̈ ܓܘܒ̈ܢܐ ܗܠܝܢ ܕܚܠܒܐ ܐܘܒܠ ܠܪܒ ܐܠܦܐ ܘܐ̈ܚܝܟ ܦܩܘܕ ܒܫܠܡܐ ܘܣܒܪܬܗܘܢ ܐܝܬܐ ܠܝ¹⁹ܘܫܐܘܠ ܘܟܠܗܘܢ ܓܒܪ̈ܐ ܕܐܝܣܪܝܠ ܒܥܘܡܩܐ ܕܒܛܡܬܐ ܡܬܟܬܫܝܢ ܥܡ ܦܠܫܬ̈ܝܐ²⁰ܘܩܕܡ ܕܘܝܕ ܒܨܦܪܐ ܘܫܒܩ ܥܢܐ ܥܠ ܢܛܘܪ̈ܐ ܘܫܩܠ ܘܐܙܠ ܐܝܟ ܕܦܩܕܗ ܐܝܫܝ ܘܐܬܐ ܠܡܫܪܝܬܐ ܠܢܚܠܐ ܕܢܦ̇ܩ ܠܣܕܪܐ ܘܝܒܒܘ ܠܩܪܒܐ²¹ܘܐܣܬܕܪܘ ܐܝܣܪܝܠ ܘܦܠܫ̈ܬܝܐ ܣܕܪܐ ܠܘܩܒܠ ܣܕܪܐ²²ܘܐܢܝܚ ܕܘܝܕ ܡܐ̈ܢܐ ܡܢܗ ܥܠ ܓܢܒ ܡܐ̈ܢܐ ܘܪܗܛ ܠܣܕܪܐ ܘܫܐܠ ܒܫܠܡܐ ܕܐ̈ܚܘܗܝ²³ܘܥܕ ܗܘ ܡܡܠܠ ܥܡܗܘܢ ܗܐ ܓܒܪܐ ܓܢܒܪܐ ܣ̇ܠܩ ܓܘܠܝܕ ܦܠܫܬܝܐ ܫܡܗ ܡܢ ܓܬ ܡܢ ܣܕܪܐ ܕܦܠܫ̈ܬܝܐ ܘܐܡܪ ܡ̈ܠܐ ܗܠܝܢ ܘܫܡܥ ܕܘܝܕ²⁴ܘܟܠܗܘܢ ܓܒܪ̈ܐ ܕܐܝܣܪܝܠ ܟܕ ܚܙܐܘܗܝ ܠܓܢܒܪܐ ܕܚܠܘ ܘܥܪܩܘ ܡܢ ܩܕܡܘܗܝ²⁵ܘܐܡܪܘ ܓܒܪ̈ܐ ܕܐܝܣܪܝܠ ܚܙܝܬܘܢ ܓܒܪܐ ܗܢܐ ܕܠܡܚܣܕܘܬܗ ܠܐܝܣܪܝܠ ܣܠܩ ܓܒܪܐ ܕܢܩܛܠܝܘܗܝ ܢܥܬܪܝܘܗܝ ܡܠܟܐ ܥܘܬܪܐ ܪܒܐ ܘܒܪܬܗ ܢܬܠ ܠܗ ܘܠܒܝܬ ܐܒܘܗܝ ܢܥܒܕ ܡܚܪ̈ܪܐ ܒܐܝܣܪܝܠ²⁶ܘܐܡܪ ܕܘܝܕ ܠܓܒܪ̈ܐ ܕܩܝܡܝܢ ܠܘܬܗ ܡܢܐ ܢܬܥܒܕ ܠܓܒܪܐ ܕܢܩܛܠܝܘܗܝ ܠܦܠܫܬܝܐ ܗܢܐ ܥܘܪܠܐ ܘܢܥܒܪ ܚܣܕܐ ܡܢ ܐܝܣܪܝܠ ܡܛܠ ܕܡܢܘ ܦܠܫܬܝܐ ܗܢܐ ܥܘܪܠܐ ܕܡܚܣܕ ܠܣܕܪ̈ܘܗܝ ܕܐܠܗܐ ܚܝܐ²⁷ܘܐܡܪܘ ܠܗ ܥܡܐ ܐܝܟ ܡܠܬܐ ܗܕܐ ܕܗܟܢܐ ܢܬܥܒܕ ܠܓܒܪܐ ܕܢܩܛܠܝܘܗܝ²⁸ܘܫܡܥ ܐܠܝܒ ܐܚܘܗܝ ܩܫܝܫܐ ܟܕ ܐܡܪ ܠܓܒܪ̈ܐ ܘܐܬܚܡܬ ܪܘܓܙܗ ܕܐܠܝܒ ܥܠ ܕܘܝܕ ܘܐܡܪ ܠܗ ܡܢܐ ܢܚܬܬ ܘܥܠ ܡ̇ܢ ܫܒܩܬ ܥܢܐ ܗܠܝܢ ܩܠܝܠ ܕܒܡܕܒܪܐ ܐܢܐ ܝܕܥ ܐܢܐ ܡܪܚܘܬܟ ܘܒܝܫܘܬ ܠܒܟ ܕܠܡܚܙܐ ܗܘ ܩܪܒܐ ܢܚܬܬ²⁹ܘܐܡܪ ܕܘܝܕ ܡܢܐ ܥܒܕܬ ܗܫܐ ܗܐ ܡܠܬܐ ܗܝ³⁰ܘܐܬܦܢܝ ܡܢ ܠܘܬܗ ܠܓܒܐ ܐܚܪܢܐ ܘܐܡܪ ܐܝܟ ܡܠܬܐ ܗܕܐ ܘܐܬܝܒܘܗܝ ܥܡܐ ܦܬܓܡܐ ܐܝܟ ܦܬܓܡܐ ܩܕܡܝܐ³¹ܘܐܫܬܡܥ ܡ̈ܠܐ ܕܡܠܠ ܕܘܝܕ ܩܕܡ ܫܐܘܠ ܘܕܒܪܗ³²ܘܐܡܪ ܕܘܝܕ ܠܫܐܘܠ ܠܐ ܢܦܠ ܠܒܗ ܕܐܕܡ ܥܠܘܗܝ ܥܒܕܟ ܐ̇ܙܠ ܘܡܬܟܬܫ ܥܡ ܦܠܫܬܝܐ ܗܢܐ³³ܘܐܡܪ ܫܐܘܠ ܠܕܘܝܕ ܠܐ ܡܫܟܚ ܐܢܬ ܠܡܐܙܠ ܥܠ ܦܠܫܬܝܐ ܗܢܐ ܠܡܬܟܬܫܘ ܥܡܗ ܡܛܠ ܕܛܠܝܐ ܐܢܬ ܘܗܘ ܓܒܪܐ ܗܘ ܩܪܒܬܢܐ ܡܢ ܛܠܝܘܬܗ³⁴ܘܐܡܪ ܕܘܝܕ ܠܫܐܘܠ ܪܥܐ ܗܘܐ ܥܒܕܟ ܠܐܒܝ ܥܢܐ ܘܐܬܐ ܐܪܝܐ ܘܕܐܒܐ ܘܫܩܠ ܐܡܪܐ ܡܢ ܓܙܪܐ³⁵ܘܢܦܩܬ ܒܬܪܗ ܘܡܚܝܬܗ ܘܐܥܕܝܬܗ ܡܢ ܦܘܡܗ ܘܐܬܡܪܡܪ ܥܠܝ ܘܐܚܕܬܗ ܒܕܩܢܗ ܘܡܚܝܬܗ ܘܩܠܝܬܗ³⁶ܘܐܦ ܐܪܝܐ ܘܐܦ ܕܐܒܐ ܩܛܠ ܥܒܕܟ ܢܗܘܐ ܦܠܫܬܝܐ ܗܢܐ ܥܘܪܠܐ ܐܝܟ ܚܕ ܡܢܗܘܢ ܡܛܠ ܕܚܣܕ ܠܣܕܪ̈ܘܗܝ ܕܐܠܗܐ ܚܝܐ³⁷ܘܐܡܪ ܕܘܝܕ ܡܪܝܐ ܕܦܨܝܢܝ ܡܢ ܐܝܕܐ ܕܐܪܝܐ ܘܡܢ ܐܝܕܐ ܕܕܐܒܐ ܗܘ ܢܦܨܝܢܝ ܡܢ ܐܝܕܘ̈ܗܝ ܕܦܠܫܬܝܐ ܗܢܐ ܘܐܡܪ ܫܐܘܠ ܠܕܘܝܕ ܙܠ ܘܡܪܝܐ ܢܗܘܐ ܥܡܟ³⁸ܘܐܠܒܫ ܫܐܘܠ ܠܕܘܝܕ ܡܐ̈ܢܘܗܝ ܘܣܡ ܣܢܘܪܬܐ ܕܢܚܫܐ ܒܪܝܫܗ ܘܐܠܒܫܗ ܫܪܝܢܐ³⁹ܘܐܣܪ ܕܘܝܕ ܣܝܦܗ ܠܥܠ ܡܢ ܡܐ̈ܢܘܗܝ ܘܠܐ ܨܒܐ ܠܡܐܙܠ ܡܛܠ ܕܠܐ ܢܣܝ ܐܢܘܢ ܘܐܥܒܪ ܐܢܘܢ ܕܘܝܕ ܡܢܗ⁴⁰ܘܢܣܒ ܚܘܛܪܗ ܒܐܝܕܗ ܘܓܒܐ ܠܗ ܚܡܫܐ ܫ̈ܥܥܝܢ ܕܟܐܦܐ ܡܢ ܚܠܐ ܘܣܡ ܐܢܘܢ ܒܡܐܢܐ ܕܝܠܗ ܕܪ̈ܥܘܬܐ ܒܬܪܡܠܗ ܘܩܠܥܗ ܒܐܝܕܗ ܘܩܪܒ ܠܘܬ ܦܠܫܬܝܐ⁴¹ܘܗܐ ܦܠܫܬܝܐ ܐܬܐ ܘܩܪܒ ܠܘܬ ܕܘܝܕ ܘܓܒܪܐ ܫܩ̇ܠ ܣܟܪܐ ܩܕܡܘܗܝ⁴²ܘܐܕܝܩ ܦܠܫܬܝܐ ܘܚܙܐ ܠܕܘܝܕ ܘܒܣܪ ܥܠܘܗܝ ܡܛܠ ܕܛܠܝܐ ܣܡܩܪܝ ܗܘܐ ܘܫܦܝܪ ܚܙܘܗ⁴³ܘܐܡܪ ܦܠܫܬܝܐ ܠܕܘܝܕ ܟܠܒܐ ܐܢܐ ܕܐܬܐ ܐܢܬ ܥܠܝ ܒܚܘܛܪܐ ܘܨܚܝ ܦܠܫܬܝܐ ܠܕܘܝܕ ܒܐ̈ܠܗܘܗܝ⁴⁴ܘܐܡܪ ܦܠܫܬܝܐ ܠܕܘܝܕ ܬܐ ܠܘܬܝ ܘܐܬܠܝܘܗܝ ܒܣܪܟ ܠܥܘܦܐ ܕܫܡܝܐ ܘܠܚܝܘܬܐ ܕܕܒܪܐ⁴⁵ܘܐܡܪ ܕܘܝܕ ܠܦܠܫܬܝܐ ܐܢܬ ܐܬܐ ܐܢܬ ܥܠܝ ܒܣܝܦܐ ܘܒܢܝܙܟܐ ܘܒܣܟܪܐ ܘܐܢܐ ܐܬܐ ܐܢܐ ܥܠܝܟ ܒܫܡܗ ܕܡܪܝܐ ܐܠܗܐ ܨܒܐܘܬ ܕܣܕܪ̈ܐ ܕܐܝܣܪܝܠ ܚܣܕܬ⁴⁶ܝܘܡܢܐ ܢܫܠܡܟ ܡܪܝܐ ܒܐ̈ܝܕܝ ܘܐܩܛܠܟ ܘܐܣܒ ܪܝܫܟ ܡܢܟ ܘܐܬܠ ܫ̈ܠܕܐ ܕܡܫܪ̈ܝܬܐ ܕܦܠܫ̈ܬܝܐ ܝܘܡܢܐ ܠܚܝܘܬܐ ܕܕܒܪܐ ܘܠܥܘܦܐ ܕܫܡܝܐ ܘܢܕܥܘܢ ܟܠܗ̇ ܐܪܥܐ ܕܐܝܬ ܐܠܗܐ ܠܐܝܣܪܝܠ⁴⁷ܘܢܕܥܘܢ ܟܠܗ ܟܢܫܐ ܗܢܐ ܕܠܐ ܗܘܐ ܒܣܝܦܐ ܘܒܢܝܙܟܐ ܦܪܩ ܡܪܝܐ ܡܛܠ ܕܕܡܪܝܐ ܗܘ ܩܪܒܐ ܘܢܫܠܡܟܘܢ ܒܐ̈ܝܕܝܢ⁴⁸ܘܗܐ ܦܠܫܬܝܐ ܐܬܐ ܘܩܪܒ ܠܐܘܪܥܗ ܕܕܘܝܕ ܘܐܣܬܪܗܒ ܕܘܝܕ ܘܪܗܛ ܠܣܕܪܐ ܠܐܘܪܥܗ ܕܦܠܫܬܝܐ⁴⁹ܘܐܘܫܛ ܕܘܝܕ ܐܝܕܗ ܠܡܐܢܗ ܘܢܣܒ ܡܢ ܬܡܢ ܟܐܦܐ ܘܐܟܪܟ ܘܡܚܝܗܝ ܠܦܠܫܬܝܐ ܒܝܬ ܥܝܢ̈ܘܗܝ ܘܛܒܥܬ ܟܐܦܐ ܒܝܬ ܥܝ̈ܢܘܗܝ ܘܢܦܠ ܥܠ ܐ̈ܦܘܗܝ ܥܠ ܐܪܥܐ⁵⁰ܘܥܫܢ ܕܘܝܕ ܡܢ ܦܠܫܬܝܐ ܒܩܠܥܐ ܘܒܟܐܦܐ ܘܡܚܝܗܝ ܠܦܠܫܬܝܐ ܘܩܛܠܗ ܘܣܝܦܐ ܠܝܬ ܒܐܝܕܗ ܕܕܘܝܕ⁵¹ܘܪܗܛ ܕܘܝܕ ܘܩܡ ܥܠ ܦܠܫܬܝܐ ܘܢܣܒ ܣܝܦܗ ܘܫܡܛܗ ܡܢ ܚܠܬܗ ܘܩܛܠܗ ܘܦܣܩ ܪܝܫܗ ܘܚܙܘ ܦܠܫ̈ܬܝܐ ܕܡܝܬ ܓܢܒܪܗܘܢ ܘܥܪܩܘ⁵²ܘܩܡܘ ܐܢܫܐ ܕܐܝܣܪܝܠ ܘܕܝܗܘܕܐ ܘܐܬܠܒܒܘ ܘܪܕܦܘ ܠܦܠܫ̈ܬܝܐ ܥܕܡܐ ܠܡܥܠܢܐ ܕܢܚܠܐ ܘܥܕܡܐ ܠܢܚܠܐ ܕܥܩܪܘܢ ܘܢܦܠܘ ܩ̈ܛܝܠܐ ܕܦܠܫ̈ܬܝܐ ܒܐܘܪܚܐ ܕܫܪܝܢ ܘܥܕܡܐ ܠܓܬ ܘܥܕܡܐ ܠܥܩܪܘܢ⁵³ܘܗܦܟܘ ܒܢ̈ܝ ܐܝܣܪܝܠ ܕܪܕܦܝܢ ܗܘܘ ܒܬܪ ܦܠܫ̈ܬܝܐ ܘܒܙܘ ܡܫܪ̈ܝܬܗܘܢ⁵⁴ܘܢܣܒ ܕܘܝܕ ܪܝܫܗ ܕܦܠܫܬܝܐ ܘܐܝܬܝܗ ܠܐܘܪܫܠܡ ܘܡܐ̈ܢܘܗܝ ܣܡ ܒܡܫܟܢܗ⁵⁵ܘܟܕ ܚܙܝܗܝ ܫܐܘܠ ܠܕܘܝܕ ܕܢܦܩ ܠܐܘܪܥܗ ܕܦܠܫܬܝܐ ܐܡܪ ܠܐܒܢܝܪ ܪܒ ܚܝܠܗ ܒܪ ܡܢܘ ܛܠܝܐ ܗܢܐ ܘܐܡܪ ܐܒܢܝܪ ܚܝܐ ܗܝ ܢܦܫܟ ܡܠܟܐ ܕܠܐ ܝܕܥ ܐܢܐ⁵⁶ܘܐܡܪ ܡܠܟܐ ܫܐܠ ܐܢܬ ܒܪ ܡܢܘ ܗܢܐ ܥܠܝܡܐ⁵⁷ܘܟܕ ܗܦܟ ܕܘܝܕ ܟܕ ܩܛܠܗ ܠܦܠܫܬܝܐ ܕܒܪܗ ܐܒܢܝܪ ܘܐܥܠܗ ܩܕܡ ܫܐܘܠ ܘܪܝܫܗ ܕܦܠܫܬܝܐ ܒܐܝܕܗ⁵⁸ܐܡܪ ܠܗ ܫܐܘܠ ܒܪ ܡ̇ܢ ܐܢܬ ܛܠܝܐ ܐܡܪ ܠܗ ܕܘܝܕ ܒܪ ܥܒܕܟ ܐܝܫܝ ܕܡܢ ܒܝܬ ܠܚܡ

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31

Gen Es Lv Nm Dt Gs Gdc Rt 1Sam 2Sam 1Re 2Re 1Cr 2Cr Esd Ne Tb Gdt Est 1Mac 2Mac Gb Sal pr Qo Ct Sap Sir Is Ger Lam Ez Dn

Altre sezioni del sito

Utility

SCRUTATIO

1 Samuele ܫܡܘܐܝܠ 17

Confronta con un'altra Bibbia

Cambia Bibbia