Deuteronomio ܬܢܝܢ ܢܡܘܣܐ 22

¹ ܠܳܐ ܬܶܚܙܶܐ ܬܰܘܪܶܗ ܕܰܐܚܽܘܟ ܐܰܘ ܢܶܩܝܶܗ ܟܰܕ ܛܳܥܶܝܢ ܘܬܰܗܡܶܐ ܡܶܢܗܽܘܢ. ܐܶܠܳܐ ܡܰܗܦܳܟܽܘ ܐܰܗܦܶܟ ܐܶܢܽܘܢ ܠܶܗ.

² ܘܶܐܢ ܠܳܐ ܩܰܪܺܝܒ ܠܳܟ ܐܰܚܽܘܟ ܘܠܳܐ ܝܳܕܰܥ ܐܰܢ̱ܬ ܠܶܗ. ܐܰܥܶܠ ܐܶܢܽܘܢ ܠܓܰܘ ܒܰܝܬܳܟ. ܘܢܶܗܘܽܘܢ ܠܘܳܬܟ ܥܕܰܡܳܐ ܕܬܳܒܰܥ ܠܗܽܘܢ ܐܰܚܽܘܟ. ܘܦܰܢܳܐ ܐܶܢܽܘܢ ܠܶܗ.

³ ܗܳܟܰܢܳܐ ܥܒܶܕ ܠܬܰܘܪܶܗ. ܘܠܰܚܡܳܪܶܗ. ܘܰܠܬܰܟܣܺܝܬܶܗ. ܘܗܳܟܰܢܳܐ ܥܒܶܕ ܠܟܽܠ ܐܰܒܶܕܬܳܐ ܕܳܐܒܕܳܐ ܡܶܢܶܗ ܘܡܶܫܟܰܚ ܐܰܢ̱ܬ ܠܳܗ̇. ܫܰܠܺܝܛ ܠܳܟ ܕܬܰܗܡܶܐ.

⁴ ܠܳܐ ܬܶܚܙܶܐ ܚܡܳܪܶܗ ܕܰܒܥܶܠܕܒܳܒܳܟ ܐܰܘ ܬܰܘܪܶܗ ܟܰܕ ܪܡܶܝܢ ܒܽܐܘܪܚܳܐ ܘܬܰܗܡܶܐ ܡܶܢܗܽܘܢ. ܐܶܠܳܐ ܡܩܳܡܽܘ ܐܰܩܺܝܡ ܐܶܢܽܘܢ ܥܰܡܶܗ.

⁵ ܠܳܐ ܢܶܗܘܽܘܢ ܡܳܐܢ̈ܶܐ ܕܓܰܒܪܳܐ ܥܰܠ ܐܰܢ̱ܬܬܳܐ. ܘܠܳܐ ܢܶܠܒܰܫ ܓܰܒܪܳܐ ܡܳܐܢ̈ܶܐ ܕܰܐܢ̱ܬܬܳܐ. ܡܶܛܽܠ ܕܰܛܡܰܐ ܗܽܘ ܩܕܳܡ ܡܳܪܝܳܐ ܐܰܠܳܗܳܟ ܟܽܠܡܰܢ ܕܥܳܒܶܕ ܗܳܠܶܝܢ.

⁶ ܘܟܰܕ ܬܶܫܟܰܚ ܩܶܢܳܐ ܕܨܶܦܪܳܐ ܩܕܳܡܰܝܟ ܒܽܐܘܪܚܳܐ. ܒܟܽܠ ܐܺܝܠܳܢ ܐܰܘ ܥܰܠ ܐܰܪܥܳܐ. ܦܰܖ̈ܽܘܓܶܐ ܐܰܘ ܒܢ̈ܳܬܳܐ. ܘܶܐܡܳܐ ܩܰܦܺܝܦܳܐ ܥܰܠ ܦܰܖ̈ܽܘܓܶܐ. ܐܰܘ ܥܰܠ ܒܢ̈ܳܬܳܐ. ܠܳܐ ܬܶܣܰܒ ܐܶܡܳܐ ܥܰܡ ܒܢܶܝ̈ܗ̇.

⁷ ܐܶܠܳܐ ܡܰܦܪܳܚܽܘ ܐܰܦܪܰܚܶܝܗ̇ ܠܶܐܡܳܐ. ܘܰܒܢܶܝ̈ܗ̇ ܣܰܒ ܠܳܟ. ܕܢܰܛܐܶܒ ܠܳܟ ܘܢܶܣܓܽܘܢ ܝܰܘ̈ܡܳܬܳܟ.

⁸ ܘܡܳܐ ܕܒܳܢܶܐ ܐܰܢ̱ܬ ܒܰܝܬܳܐ ܚܰܕܬܳܐ. ܥܒܶܕ ܬܝܳܟܳܐ ܠܶܐܓܳܪܳܟ. ܕܠܳܐ ܢܶܦܶܠ ܡܶܢܶܗ ܐ̱ܢܳܫܳܐ. ܘܢܶܗܘܶܐ ܕܡܳܐ ܒܒܰܝܬܳܟ.

⁹ ܠܳܐ ܬܶܙܪܽܘܥ ܟܪܳܒܳܟ ܚܶܠܛܳܐ. ܕܠܳܐ ܬܶܬܩܰܕܰܫ ܥܠܰܠܬܶܗ ܕܙܰܪܥܳܐ ܕܙܳܪܰܥ ܐܰܢ̱ܬ ܘܰܥܠܰܠܬܶܗ ܕܟܰܪܡܳܐ.

¹⁰ ܠܳܐ ܬܶܕܒܰܪ ܦܰܕܳܢܳܐ ܒܬܰܘܪܳܐ ܘܒܰܚܡܳܪܳܐ ܐܰܟܚܕܳܐ.

¹¹ ܠܳܐ ܬܶܠܒܰܫ ܦܶܬܟܳܐ ܕܥܰܡܪܳܐ ܘܰܕܟܶܬܳܢܳܐ ܐܰܟܚܕܳܐ.

¹² ܓܕܺܝ̈ܠܳܬܳܐ ܥܒܶܕ ܠܳܟ ܥܰܠ ܐܰܪܒܰܥ ܟܶܢܦܰܘ̈ܗܝ ܕܡܰܪܛܽܘܛܳܟ. ܕܡܶܬܟܰܣܶܐ ܐܰܢ̱ܬ.

¹³ ܘܟܰܕ ܢܶܣܰܒ ܓܰܒܪܳܐ ܐܰܢ̱ܬܬܳܐ ܘܢܶܥܽܘܠ ܠܘܳܬܳܗ̇. ܘܢܶܣܢܶܝܗ̇.

¹⁴ ܘܢܶܓܽܘܪ ܒܳܬܪܳܗ̇ ܥܶܠܬܳܐ ܒܡ̈ܶܠܶܐ. ܘܢܰܦܶܩ ܥܠܶܝܗ̇ ܫܡܳܐ ܒܺܝܫܳܐ. ܘܢܺܐܡܰܪ ܐܰܢ̱ܬܬܳܐ ܗܳܕܶܐ ܢܶܣܒܶܬ. ܘܕܶܡܟܶܬ ܠܘܳܬܳܗ̇ ܘܠܳܐ ܐܶܫܟܚܶܬ ܠܳܗ̇ ܒܬܽܘ̈ܠܶܐ.

¹⁵ ܢܶܣܰܒ ܐܰܒܽܘܗ̇ ܕܰܛܠܺܝܬܳܐ ܘܶܐܡܳܗ̇. ܘܢܰܦܩܽܘܢ ܐܶܢܽܘܢ ܠܰܒܬܽܘ̈ܠܶܝܗ̇ ܕܰܛܠܺܝܬܳܐ ܠܘܳܬ ܣܳܒ̈ܶܐ ܕܰܩܪܺܝܬܳܐ ܠܬܰܪܥܳܐ.

¹⁶ ܘܢܺܐܡܰܪ ܐܰܒܽܘܗܝ ܕܰܛܠܺܝܬܳܐ ܠܣܳܒ̈ܶܐ. ܒܪܰܬܝ ܝܶܗܒܶܬ ܠܓܰܒܪܳܐ ܗܳܢܳܐ ܐܰܢ̱ܬܬܳܐ. ܘܰܣܢܳܗ̇.

¹⁷ ܘܗܳܐ ܓܳܐܰܪ ܒܰܬܪܳܗ̇ ܥܶܠܬܳܐ ܒܡ̈ܶܠܶܐ. ܘܳܐܡܰܪ ܕܠܳܐ ܐܶܫܟܚܶܬ ܒܬܽܘ̈ܠܶܐ. ܠܒܰܪܬܳܟ. ܘܗܳܠܶܝܢ ܒܬܽܘ̈ܠܶܐ ܕܰܒܪܰܬܝ. ܢܶܦܪܣܽܘܢ ܫܽܘܫܶܦܳܐ ܩܕܳܡ ܣܳܒ̈ܶܐ ܕܰܩܪܺܝܬܳܐ.

¹⁸ ܘܢܶܕܒܪܽܘܢܶܗ ܣܳܒ̈ܶܐ ܕܰܩܪܺܝܬܳܐ ܠܓܰܒܪܳܐ ܗܰܘ ܘܢܶܪܕܽܘܢܶܗ.

¹⁹ ܘܰܢܚܰܣܪܽܘܢܶܗ ܡܳܐܐ ܕܟܶܣܦܳܐ. ܘܢܶܬܠܽܘܢ ܠܰܐܒܽܘܗ̇ ܕܰܛܠܺܝܬܳܐ. ܥܰܠ ܕܰܐܦܶܩ ܫܡܳܐ ܒܺܝܫܳܐ ܥܰܠ ܒܬܽܘܠܬܳܐ ܒܰܪܬ ܝܺܣܪܳܐܶܝܠ. ܘܠܶܗ ܬܶܗܘܶܐ ܐܰܢ̱ܬܬܳܐ. ܘܠܳܐ ܢܶܫܬܰܠܰܛ ܠܡܶܫܒܩܳܗ̇ ܟܽܠܗܽܘܢ ܝܰܘ̈ܡܰܘܗܝ.

²⁰ ܘܶܐܢ ܡܶܢ ܩܽܘܫܬܳܐ ܗܘܳܬ ܡܶܠܬܳܐ ܗܳܕܶܐ. ܘܠܳܐ ܐܶܫܬܟܰܚܘ ܒܬܽܘ̈ܠܶܐ ܠܰܛܠܺܝܬܳܐ.

²¹ ܢܰܦܩܽܘܢܳܗ̇ ܠܰܛܠܺܝܬܳܐ ܠܬܰܪܥܳܐ ܕܒܶܝܬ ܐܰܒܽܘܗ̇. ܘܢܶܪܓܡܽܘܢܳܗ̇ ܒܟܺܐܦ̈ܶܐ ܐ̱ܢܳܫܰܝ̈ ܩܪܺܝܬܳܐ ܘܰܬܡܽܘܬ. ܥܰܠ ܕܥܶܒܕܰܬ ܒܶܗܬܬܳܐ ܒܺܝܣܪܳܐܶܝܠ. ܘܙܰܢܝܰܬ ܒܶܝܬ ܐܰܒܽܘܗ̇. ܘܒܰܥܰܪܘ ܒܺܝܫܬܳܐ ܡܶܢ ܒܰܝܢܳܬܟܽܘܢ.

²² ܘܟܰܕ ܢܶܫܬܟܰܚ ܓܰܒܪܳܐ ܕܕܳܡܶܟ ܥܰܡ ܐܰܢ̱ܬܰܬ ܓܰܒܪܳܐ. ܡܶܬܩܛܳܠܽܘ ܢܶܬܩܰܛܠܽܘܢ ܬܖ̈ܰܝܗܽܘܢ. ܓܰܒܪܳܐ ܕܰܕܡܶܟ ܥܰܡܳܗ̇. ܐܳܦ ܗܺܝ ܐܰܢ̱ܬܬܳܐ. ܘܒܰܥܰܪܘ ܒܺܝܫܬܳܐ ܡܶܢ ܝܺܣܪܳܐܶܝܠ.

²³ ܘܶܐܢ ܬܶܗܘܶܐ ܥܠܰܝܡܬܳܐ ܒܬܽܘܠܬܳܐ ܕܰܡܟܺܝܪܳܐ ܠܓܰܒܪܳܐ. ܘܢܶܫܟܚܺܝܗ̇ ܓܰܒܪܳܐ ܐ̱ܚܪܺܢܳܐ ܒܰܩܪܺܝܬܳܐ. ܘܢܶܕܡܰܟ ܥܰܡܳܗ̇.

²⁴ ܐܰܦܶܩܘ ܐܶܢܽܘܢ ܠܰܬܖ̈ܰܝܗܽܘܢ ܠܬܰܪܥܳܐ ܕܰܩܪܺܝܬܳܐ ܗܳܝ. ܘܰܪܓܽܘܡܘ ܐܶܢܽܘܢ ܒܟܺܐܦ̈ܶܐ. ܘܰܢܡܽܘܬܽܘܢ. ܥܰܠ ܕܠܳܐ ܒܰܓܢܰܬ ܗܳܝ ܥܠܰܝܡܬܳܐ ܒܰܩܪܺܝܬܳܐ. ܘܗܰܘ ܓܰܒܪܳܐ ܥܰܠ ܕܨܰܥܰܪ ܐܰܢ̱ܬܰܬ ܚܰܒܪܶܗ. ܘܒܰܥܰܪܘ ܒܺܝܫܬܳܐ ܡܶܢ ܒܰܝܢܳܬܟܽܘܢ.

²⁵ ܘܶܐܢ ܒܚܰܩܠܳܐ ܐܶܫܟܰܚ ܓܰܒܪܳܐ ܥܠܰܝܡܬܳܐ ܕܰܡܟܺܝܪܳܐ. ܘܰܐܚܕܳܗ̇ ܒܰܩܛܺܝܪܳܐ. ܘܰܕܡܶܟ ܥܰܡܳܗ̇. ܢܶܬܩܛܶܠ ܓܰܒܪܳܐ ܕܰܕܡܶܟ ܥܰܡܳܗ̇ ܒܰܠܚܽܘܕܰܘܗܝ.

²⁶ ܘܠܰܥܠܰܝܡܬܳܐ ܠܳܐ ܬܶܥܒܕܽܘܢ ܠܳܗ̇ ܡܶܕܶܡ. ܡܶܛܽܠ ܕܠܳܐ ܚܰܝܳܒܳܐ ܥܠܰܝܡܬܳܐ ܚܛܳܗܳܐ ܕܡܰܘܬܳܐ. ܐܰܝܟ ܕܩܳܐܶܡ ܓܶܝܪ ܓܰܒܪܳܐ ܥܰܠ ܓܰܒܪܶܗ ܘܩܳܛܶܠ ܠܶܗ. ܗܳܟܰܢܳܐ ܗܺܝ ܨܒܽܘܬܳܐ ܗܳܕܶܐ.

²⁷ ܡܶܛܽܠ ܕܰܒܚܰܩܠܳܐ ܗܽܘ ܐܶܫܟܚܳܗ̇. ܘܒܰܓܢܰܬ ܥܠܰܝܡܬܳܐ ܕܰܡܟܺܝܪܳܐ. ܘܠܰܝܬ ܕܰܡܦܰܨܷܶܐ ܠܳܗ̇.

²⁸ ܘܶܐܢ ܢܶܫܟܰܚ ܓܰܒܪܳܐ ܥܠܰܝܡܬܳܐ ܒܬܽܘܠܬܳܐ ܕܠܳܐ ܗܘܳܬ ܡܟܺܝܪܳܐ. ܘܢܶܐܚܕܺܝܗ̇ ܢܶܕܡܰܟ ܥܰܡܳܗ̇. ܘܢܶܫܬܰܟܚܽܘܢ.

²⁹ ܢܶܬܶܠ ܓܰܒܪܳܐ ܗܰܘ ܕܰܕܶܡܶܟ ܥܰܡܳܗ̇ ܠܰܐܒܽܘܗ̇ ܕܰܥܠܰܝܡܬܳܐ ܚܰܡܫܺܝܢ ܕܟܶܣܦܳܐ ܠܰܐܒܽܘܗ̇. ܘܠܶܗ ܬܶܗܘܶܐ ܐܰܢ̱ܬܬܳܐ ܚܠܳܦ ܕܨܰܥܪܳܗ̇. ܘܠܳܐ ܢܶܫܬܰܠܰܛ ܠܡܶܫܒܩܳܗ̇ ܟܽܠ ܝܰܘ̈ܡܰܝ ܚܰܝܰܘ̈ܗܝ.

³⁰ ܠܳܐ ܢܶܣܰܒ ܓܰܒܪܳܐ ܐܰܢ̱ܬܰܬ ܐܰܒܽܘܗܝ. ܘܠܳܐ ܢܶܓܠܶܐ ܟܶܢܦܳܐ ܕܰܐܒܽܘܗܝ.