Deuteronomio ܬܢܝܢ ܢܡܘܣܐ 10

¹ ܒܶܗ ܒܙܰܒܢܳܐ ܗܰܘ ܐܶܡܰܪ ܠܺܝ ܡܳܪܝܳܐ. ܦܣܽܘܠ ܠܳܟ ܬܰܪܬܶܝܢ ܠܽܘ̈ܚܶܐ ܕܟܺܐܦܳܐ ܐܰܝܟ ܩܰܕܡܳܝ̈ܬܳܐ. ܘܣܰܩ ܠܘܳܬܝ ܠܛܽܘܪܳܐ. ܘܰܥܒܶܕ ܠܳܟ ܩܺܐܒܽܘܬܳܐ ܕܩܰܝܣܳܐ.

² ܘܰܟܬܽܘܒ ܥܰܠ ܠܽܘ̈ܚܶܐ ܦܶܬܓܳܡ̈ܶܐ ܕܺܐܝܬ ܗܘܰܘ ܥܰܠ ܠܽܘ̈ܚܶܐ ܩܰܕܡܳܝ̈ܳܬܳܐ ܕܬܰܒܰܪܬ. ܘܣܺܝܡ ܐܶܢܶܝܢ ܒܩܺܐܒܽܘܬܳܐ.

³ ܘܥܶܒܕܶܬ ܩܺܐܒܽܘܬܳܐ ܕܩܰܝܣܳܐ ܕܶܐܫܟܳܪܥܳܐ. ܘܦܶܣܠܶܬ ܬܰܪܬܶܝܢ ܠܽܘ̈ܚܶܐ ܕܟܺܐܦܳܐ ܐܰܝܟ ܩܰܕܡܳܝ̈ܳܬܳܐ. ܘܣܶܠܩܶܬ ܠܛܽܘܪܳܐ. ܘܬܰܖ̈ܬܰܝܗܶܝܢ ܠܽܘ̈ܚܶܐ ܒܺܐܝܕܰܝ̈.

⁴ ܘܰܟܬܰܒ ܥܰܠ ܠܽܘ̈ܚܶܐ ܐܰܝܟ ܟܬܳܒܳܐ ܩܰܕܡܳܝܳܐ. ܥܶܣܪܳܐ ܦܶܬܓܳܡܺܝ̈ܢ ܕܡܰܠܶܠ ܡܳܪܝܳܐ ܥܰܡܟܽܘܢ ܒܛܽܘܪܳܐ ܡܶܢ ܓܰܘ ܢܽܘܪܳܐ ܒܝܰܘܡܳܐ ܕܰܟܢܽܘܫܝܳܐ. ܘܝܰܗܒ ܐܶܢܶܝܢ ܠܺܝ ܡܳܪܝܳܐ.

⁵ ܘܶܐܬܦܢܺܝܬ ܘܢܶܚܬܶܬ ܡܶܢ ܛܽܘܪܳܐ. ܘܣܳܡܶܬ ܐܶܢܶܝܢ ܠܠܽܘ̈ܚܶܐ ܒܩܺܐܒܽܘܬܳܐ ܕܥܶܒܕܶܬ. ܘܫܶܒܩܶܬ ܐܶܢܶܝܢ ܒܳܗ̇ ܐܰܝܟ ܕܦܰܩܕܰܢܝ ܡܳܪܝܳܐ.

⁶ ܘܰܒܢܰܝ̈ ܝܺܣܪܳܐܶܝܠ ܫܩܰܠܘ ܡܶܢ ܒܪܳܐܽܘܬ ܕܰܒܢܰܝ̈ ܝܰܥܩܳܢ ܠܡܽܘܣܳܪܳܐ. ܬܰܡܳܢ ܡܺܝܬ ܐܰܗܪܽܘܢ ܘܶܐܬܩܒܰܪ ܬܰܡܳܢ. ܘܟܰܗܶܢ ܐܶܠܺܝܥܳܙܳܪ ܒܪܶܗ ܒܳܬܪܶܗ.

⁷ ܘܡܶܢ ܬܰܡܳܢ ܫܩܰܠܘ ܠܓܳܕܓܳܕ. ܘܡܶܢ ܓܳܕܓܳܪ ܠܝܳܛܒܰܬ. ܠܰܐܪܥܳܐ ܕܖ̈ܶܓܠܳܬܳܐ ܕܡܰܝ̈ܳܐ.

⁸ ܒܶܗ ܒܙܰܒܢܳܐ ܗܰܘ ܦܪܰܫ ܡܳܪܝܳܐ ܠܫܰܒܛܳܐ ܕܠܶܘܺܝ. ܕܢܶܫܩܽܘܠ ܩܺܐܒܽܘܬܳܐ ܕܰܩܝܳܡܶܗ ܕܡܳܪܝܳܐ. ܘܕܰܢܩܽܘܡ ܩܕܳܡ ܡܳܪܝܳܐ ܘܰܢܫܰܡܫܺܝܘܗܝ. ܘܰܢܒܰܪܶܟ ܫܡܶܗ ܕܡܳܪܝܳܐ ܥܕܰܡܳܐ ܠܝܰܘܡܳܢܳܐ.

⁹ ܡܶܛܽܠ ܗܳܢܳܐ ܠܰܝܬ ܠܠܶܘܺܝ ܦܳܠܓܽܘܬܳܐ ܘܝܳܪܬܽܘܬܳܐ ܥܰܡ ܐܰܚܰܘ̈ܗܝ. ܡܳܪܝܳܐ ܗܽܘ ܓܶܝܪ ܝܳܪܬܽܘܬܶܗ ܐܰܝܟ ܕܶܐܡܰܪ ܠܶܗ ܡܳܪܝܳܐ ܐܰܠܳܗܳܟ.

¹⁰ ܘܶܐܢܳܐ ܩܳܡܶܬ ܩܕܳܡ ܡܳܪܝܳܐ ܒܛܽܘܪܳܐ ܐܰܝܟ ܝܰܘ̈ܡܳܬܳܐ ܩܰܕܡܳܝ̈ܶܐ. ܐܰܪܒܥܺܝܢ ܐܺܝܡܳܡܺܝ̈ܢ ܘܰܐܪܒܥܺܝܢ ܠܰܝܠܰܘ̈ܳܢ. ܘܫܰܡܥܰܢܝ ܡܳܪܝܳܐ ܐܳܦ ܒܙܰܒܢܳܐ ܗܰܘ. ܘܠܳܐ ܨܒܳܐ ܡܳܪܝܳܐ ܐܰܠܳܗܳܟ ܕܰܢܚܰܒܠܳܟ.

¹¹ ܘܶܐܡܰܪ ܠܺܝ ܡܳܪܝܳܐ. ܩܽܘܡ ܫܩܽܘܠ ܘܙܶܠ ܩܕܳܡ ܥܰܡܳܐ. ܘܢܶܥܠܽܘܢ ܘܢܺܐܪܬܽܘܢ ܐܰܪܥܳܐ ܕܺܝܡܺܝܬ ܠܰܐܒܳܗܰܝ̈ܗܽܘܢ ܠܡܶܬܰܠ ܠܗܽܘܢ.

¹² ܡܶܟܺܝܠ ܝܺܣܪܳܐܶܝܠ. ܡܳܢܳܐ ܫܳܐܶܠ ܠܳܟ ܡܳܪܝܳܐ ܐܰܠܳܗܳܟ. ܐܶܠܳܐ ܕܬܶܕܚܰܠ ܡܶܢ ܡܳܪܝܳܐ ܐܰܠܳܗܳܟ. ܘܰܬܗܰܠܶܟ ܒܽܐܘܖ̈ܚܳܬܶܗ. ܘܬܶܪܚܡܺܝܘܗܝ. ܘܬܶܦܠܽܘܚ ܠܡܳܪܝܳܐ ܐܰܠܳܗܳܟ ܡܶܢ ܟܽܠܶܗ ܠܶܒܳܟ ܘܡܶܢ ܟܽܠܳܗ̇ ܢܰܦܫܳܟ.

¹³ ܘܬܶܛܰܪ ܦܽܘܩܕܳܢܰܘ̈ܗܝ ܕܡܳܪܝܳܐ ܐܰܠܳܗܳܟ. ܘܢܳܡܽܘܣܰܘ̈ܗܝ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ ܕܢܰܛܐܶܒ ܠܳܟ.

¹⁴ ܕܡܳܪܝܳܐ ܐܶܢܽܘܢ ܐܰܠܳܗܳܟ ܫܡܰܝܳܐ ܘܰܫܡܰܝ̈ ܫܡܰܝܳܐ. ܘܰܐܪܥܳܐ ܘܟܽܠ ܕܺܐܝܬ ܒܳܗ̇.

¹⁵ ܘܒܰܐܒܳܗܰܝ̈ܟܽܘܢ ܒܰܠܚܽܘܕ ܨܒܳܐ ܡܳܪܝܳܐ. ܘܰܪܚܶܡ ܐܶܢܽܘܢ ܘܰܓܒܳܐ ܠܙܰܪܥܗܽܘܢ ܒܳܬܰܪܗܽܘܢ. ܡܶܢ ܟܽܠܗܽܘܢ ܥܰܡ̈ܡܶܐ ܐܰܝܟ ܕܝܰܘܡܳܢܳܐ.

¹⁶ ܓܙܽܘܪܘ ܥܽܘܪܠܘܳܬܳܐ ܕܠܶܒܟܽܘܢ. ܘܰܩܕܳܠܟܽܘܢ ܬܽܘܒ ܠܳܐ ܬܩܰܫܽܘܢ.

¹⁷ ܡܶܛܽܠ ܕܡܳܪܝܳܐ ܐܰܠܳܗܟܽܘܢ ܗܽܘܝܽܘ ܐܰܠܳܗ ܐܰܠܳܗܺܝ̈ܢ. ܘܡܳܪܶܐ ܡܳܖ̈ܰܘܳܬܳܐ. ܐܰ‌ܠܳܗܳܐ ܪܰܒܳܐ. ܘܓܰܢ̱ܒܪܳܐ. ܘܰܕܚܺܝܠܳܐ. ܕܠܳܐ ܢܳܣܶܒ ܒܰܐܦ̈ܶܐ. ܘܠܳܐ ܡܩܰܒܶܠ ܫܽܘܚܕܳܐ.

¹⁸ ܘܥܳܒܶܕ ܕܺܝܢܳܐ ܕܝܰܬܡ̈ܶܐ. ܘܕܰܐܖ̈ܡܠܳܬܳܐ. ܘܪܳܚܶܡ ܠܰܐܝܢܳܐ ܕܡܶܬܦܢܶܐ ܠܘܳܬܶܗ. ܘܝܳܗܶܒ ܠܶܗ ܠܰܚܡܳܐ ܘܬܰܟܣܺܝܬܳܐ.

¹⁹ ܪܚܰܡܘ ܠܰܐܝܠܶܝܢ ܕܡܶܬܦܢܶܝܢ ܠܘܳܬܶܗ. ܡܶܛܽܠ ܕܬܰܘܬܳܒ̈ܶܐ ܗܘܰܝܬܽܘܢ ܒܰܐܪܥܳܐ ܕܡܶܨܪܶܝܢ.

²⁰ ܡܶܢ ܡܳܪܝܳܐ ܐܰܠܳܗܳܟ ܕܚܰܠ. ܘܠܶܗ ܦܠܽܘܚ. ܘܠܶܗ ܐܶܬܢܰܩܦ. ܘܒܰܫܡܶܗ ܝܺܡܰܝ.

²¹ ܕܗܽܘܝܽܘ ܬܶܫܒܽܘܚܬܳܟ. ܘܗܽܘܝܽܘ ܐܰܠܳܗܳܟ. ܕܰܥܒܰܕ ܥܰܡܳܟ ܪܰܘܖ̈ܒܳܬܳܐ ܘܰܕܚܺܝ̈ܠܳܬܳܐ ܕܰܚܙܰܝ̈ ܥܰܝܢܰܝ̈ܟ.

²² ܒܫܰܒܥܺܝܢ ܢܰܦ̈ܫܳܢ ܢܚܶܬܘ ܐܰܒܳܗܰܝ̈ܟ ܠܡܶܨܪܶܝܢ. ܘܗܳܫܳܐ ܗܳܐ ܐܰܣܓܝܳܟ ܡܳܪܝܳܐ ܐܰܠܳܗܳܟ ܐܰܝܟ ܟܰܘܟ̈ܒܶܐ ܕܒܰܫܡܰܝܳܐ.