Deuteronomio ܬܢܝܢ ܢܡܘܣܐ 28

¹ ܘܶܐܢ ܬܶܫܡܰܥ ܒܩܳܠܶܗ ܕܡܳܪܝܳܐ ܐܰܠܳܗܳܟ. ܘܬܶܛܰܪ ܘܬܶܥܒܶܕ ܟܽܠܗܽܘܢ ܦܽܘܩܕܳܢܰܘ̈ܗܝ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ. ܢܶܥܒܕܳܟ ܡܳܪܝܳܐ ܐܰ‌ܠܳܗܳܐ ܠܥܶܠ ܡܶܢ ܟܽܠܗܽܘܢ ܥܰܡ̈ܡܶܐ ܕܰܐܪܥܳܐ.

² ܢܺܐܬܝ̈ܳܢ ܥܠܰܝܟ ܗܳܠܶܝܢ ܟܽܠܗܶܝܢ ܒܽܘܖ̈ܟܳܬܳܐ. ܘܢܰܕܖ̈ܟܳܢܳܟ. ܟܰܕ ܬܶܫܡܰܥ ܒܩܳܠܶܗ ܕܡܳܪܝܳܐ ܐܰܠܳܗܳܟ.

³ ܒܪܺܝܟ ܐܰܢ̱ܬ ܒܰܩܪܺܝܬܳܐ. ܒܪܺܝܟ ܐܰܢ̱ܬ ܒܚܰܩܠܳܐ.

⁴ ܒܪܺܝܟܺܝܢ ܦܺܐܖ̈ܶܐ ܕܟܰܪܣܳܟ. ܘܦܺܐܖ̈ܶܐ ܕܰܐܪܥܳܟ. ܘܝܰܠܕܳܐ ܕܰܒܥܺܝܪܳܟ. ܘܒܰܩܖ̈ܶܐ ܕܬܰܘܖ̈ܰܝܟ. ܘܰܓܙܳܖ̈ܶܐ ܕܥܳܢ̈ܳܟ.

⁵ ܒܪܺܝܟ ܣܰܠܳܟ. ܘܳܐܨܽܘܬܳܟ.

⁶ ܒܪܺܝܟ ܐܰܢ̱ܬ ܒܡܰܥܠܳܟ. ܒܪܺܝܟ ܐܰܢ̱ܬ ܒܡܰܦܩܳܟ.

⁷ ܘܢܰܫܠܶܡ ܡܳܪܝܳܐ ܠܰܒܥܶܠܕܒܳܒܰܝ̈ܟ ܕܩܳܝܡܺܝܢ ܥܠܰܝܟ ܩܕܳܡܰܝܟ ܟܰܕ ܬܒܺܝܪܺܝܢ. ܒܽܐܘܪܚܳܐ ܚܕܳܐ ܢܶܦܩܽܘܢ ܥܠܰܝܟ. ܘܒܰܫܒܰܥ ܐܽܘܖ̈ܚܳܢ ܢܶܥܪܩܽܘܢ ܡܶܢ ܩܕܳܡܰܝܟ.

⁸ ܢܶܦܩܽܘܕ ܡܳܪܝܳܐ ܒܽܘܪܟܬܳܐ ܒܰܐܘܨܖ̈ܰܝܟ. ܘܰܒܟܽܠ ܡܶܕܶܡ ܕܡܰܘܫܶܛ ܐܰܢ̱ܬ ܐܺܝܕܳܟ. ܘܰܢܒܰܪܟܳܟ ܒܰܐܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ.

⁹ ܢܩܺܝܡܳܟ ܠܶܗ ܡܳܪܝܳܐ ܥܰܡܳܐ ܩܰܕܺܝܫܳܐ. ܐܰܝܟ ܕܺܝܡܳܐ ܠܳܟ. ܐܶܢ ܬܶܛܰܪ ܟܽܠܗܽܘܢ ܦܽܘܩܕܳܢܰܘ̈ܗܝ ܕܡܳܪܝܳܐ ܐܰܠܳܗܳܟ. ܘܰܬܗܰܠܶܟ ܒܽܐܘܖ̈ܚܳܬܶܗ.

¹⁰ ܘܢܶܚܙܽܘܢ ܟܽܠܗܽܘܢ ܥܰܡ̈ܡܶܐ ܕܰܐܪܥܳܐ. ܕܰܫܡܶܗ ܕܡܳܪܝܳܐ ܐܶܬܩܪܺܝ ܥܠܰܝܟ. ܘܢܶܕܚܠܽܘܢ ܡܶܢܳܟ.

¹¹ ܘܢܰܘܬܪܳܟ ܡܳܪܝܳܐ ܠܛܳܒܬܳܐ. ܒܦܺܐܖ̈ܶܐ ܕܟܰܪܣܳܟ ܘܰܒܝܰܠܕܳܐ ܕܰܒܥܺܝܪܳܟ. ܘܰܒܦܺܐܖ̈ܶܐ ܕܰܐܪܥܳܟ. ܒܰܐܪܥܳܐ ܕܺܝܡܳܐ ܡܳܪܝܳܐ ܠܰܐܒܳܗܰܝ̈ܟ ܠܡܶܬܰܠ ܠܳܟ.

¹² ܢܶܦܬܰܚ ܠܳܟ ܡܳܪܝܳܐ ܐܰܘܨܪܶܗ ܛܳܒܳܐ ܫܡܰܝܳܐ. ܘܢܶܬܶܠ ܡܶܛܪܳܐ ܕܰܐܪܥܳܟ ܒܙܰܒܢܶܗ. ܘܰܢܒܰܪܶܟ ܟܽܠܗܽܘܢ ܥܒܳܕ̈ܶܐ ܕܺܐܝܕܰܝ̈ܟ. ܬܰܘܙܶܦ. ܠܥܰܡ̈ܡܶܐ ܣܰܓܺܝ̈ܐܶܐ. ܘܰܐܢ̱ܬ ܠܳܐ ܬܺܐܙܰܦ. ܘܬܶܫܬܰܠܰܛ ܒܥܰܡ̈ܡܶܐ ܣܰܓܺܝ̈ܐܶܐ. ܘܒܳܟ ܠܳܐ ܢܶܫܬܰܠܛܽܘܢ.

¹³ ܢܶܥܒܕܳܟ ܡܳܪܝܳܐ ܪܺܝܫܐ ܘܠܳܐ ܕܽܘܢܒܬܳܐ ܘܬܶܗܘܶܐ ܠܥܶܠ ܘܠܳܐ ܬܶܗܘܶܐ ܠܬܰܚܬ. ܟܰܕ ܬܶܫܡܰܥ ܦܽܘܩܕܳܢܰܘ̈ܗܝ ܕܡܳܪܝܳܐ ܐܰܠܳܗܳܟ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ. ܘܬܶܛܰܪ ܘܬܶܥܒܶܕ ܐܶܢܽܘܢ.

¹⁴ ܘܠܳܐ ܬܶܣܛܶܐ ܡܶܢ ܟܽܠܗܽܘܢ ܦܽܘܩ̈ܕܳܢܶܐ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ. ܠܳܐ ܠܝܰܡܺܝܢܳܐ ܘܠܳܐ ܠܣܶܡܳܠܳܐ. ܘܠܳܐ ܬܺܐܙܰܠ ܒܳܬܰܪ ܐܰܠܳܗ̈ܶܐ ܕܥܰܡ̈ܡܶܐ. ܘܠܳܐ ܬܶܦܠܽܘܚ ܐܶܢܽܘܢ. ܠܰܘ̈ܛܳܬܳܐ.

¹⁵ ܘܶܐܢ ܠܳܐ ܬܶܫܡܰܥ ܒܩܳܠܶܗ ܕܡܳܪܝܳܐ ܐܰܠܳܗܳܟ. ܘܠܳܐ ܬܶܛܰܪ ܘܠܳܐ ܬܶܥܒܶܕ ܟܽܠܗܽܘܢ ܦܽܘܩܕܳܢܰܘ̈ܗܝ ܘܢܳܡܽܘܣܰܘ̈ܗܝ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ. ܢܺܐܬܝ̈ܳܢ ܥܠܰܝܟ ܗܳܠܶܝܢ ܟܽܠܗܶܝܢ ܠܰܘ̈ܛܳܬܳܐ. ܘܢܰܕܖ̈ܟܳܢܳܟ.

¹⁶ ܠܺܝܛ ܐܰܢ̱ܬ ܒܰܩܪܺܝܬܳܐ. ܠܺܝܛ ܐܰܢ̱ܬ ܒܚܰܩܠܳܐ.

¹⁷ ܠܺܝܛ ܣܰܠܳܟ. ܘܳܐܨܽܘܬܳܟ.

¹⁸ ܠܺܝܛܺܝܢ ܦܺܐܖ̈ܶܐ ܕܟܰܪܣܳܟ. ܘܦܺܐܖ̈ܶܐ ܕܰܐܪܥܳܟ. ܘܒܰܩܖ̈ܶܐ ܕܬܰܘܖ̈ܰܝܟ. ܘܰܓܙܳܖ̈ܶܐ ܕܥܳܢ̈ܳܟ.

¹⁹ ܠܺܝܛ ܐܰܢ̱ܬ ܒܡܰܥܠܳܟ. ܠܺܝܛ ܐܰܢ̱ܬ ܒܡܰܦܩܳܟ.

²⁰ ܢܫܰܕܰܪ ܥܠܰܝܟ ܡܳܪܝܳܐ ܚܽܘܣܪܳܢܳܐ. ܘܰܕܠܽܘܚܝܳܐ. ܘܰܟܐܳܬܳܐ ܒܟܽܠ ܡܶܕܶܡ ܕܡܰܘܫܶܛ ܐܰܢ̱ܬ ܐܺܝܕܳܟ ܕܬܶܥܒܶܕ. ܥܕܰܡܳܐ ܕܢܰܘܒܕܳܟ. ܘܰܥܕܰܡܳܐ ܕܰܢܣܺܝܦܳܟ ܒܰܥܓܰܠ. ܡܶܛܽܠ ܒܺܝܫܽܘܬܳܐ ܕܰܥܒܳܕܰܝ̈ܟ. ܕܰܫܒܰܩܬܳܢܝ.

²¹ ܢܫܰܕܰܪ ܥܠܰܝܟ ܡܳܪܝܳܐ ܡܰܘܬܳܢܳܐ. ܥܕܰܡܳܐ ܕܢܰܘܒܕܳܟ ܡܶܢ ܐܰܪܥܳܐ ܕܥܳܐܶܠ ܐܰܢ̱ܬ ܠܬܰܡܳܢ ܠܡܺܐܪܬܳܗ̇

²² ܢܶܡܚܶܝܟ ܡܳܪܝܳܐ ܒܬܶܡܗܳܐ. ܘܰܒܩܰܠܳܦܺܝܬܳܐ. ܘܰܒܝܰܩܕܳܢܳܐ. ܘܰܒܫܰܠܗܶܒܺܝܬܳܐ. ܘܰܒܝܰܪܩܳܢܳܐ. ܘܰܒܚܰܪܒܳܐ. ܘܰܒܪܽܘܚܳܐ ܕܫܰܘܒܳܐ. ܘܢܶܪܕܦܽܘܢܳܟ ܥܕܰܡܳܐ ܕܢܰܘܒܕܽܘܢܳܟ.

²³ ܘܢܶܗܘܽܘܢ ܫܡܰܝܳܐ ܕܰܠܥܶܠ ܡܶܢ ܪܺܝܫܳܟ ܢܚܳܫܳܐ. ܘܰܐܪܥܳܐ ܕܰܬܚܽܘܬܰܝܟ ܦܰܪܙܠܳܐ.

²⁴ ܢܶܬܶܠ ܡܳܪܝܳܐ ܡܶܛܪܳܐ ܕܰܐܪܥܳܟ ܐܰܒܩܳܐ. ܘܥܰܦܪܳܐ ܡܶܢ ܫܡܰܝܳܐ ܢܳܚܶܬ ܥܠܰܝܟ ܥܕܰܡܳܐ ܕܢܰܘܒܕܳܟ.

²⁵ ܢܶܬܒܪܳܟ ܡܳܪܝܳܐ ܩܕܳܡ ܒܥܶܠܕܒܳܒܰܝ̈ܟ. ܒܽܐܘܪܚܳܐ ܚܕܳܐ ܬܶܦܽܘܩ ܥܠܰܝܗܽܘܢ. ܘܒܰܫܒܰܥ ܐܽܘܖ̈ܚܳܢ ܬܶܥܪܽܘܩ ܡܶܢ ܩܕܳܡܰܝܗܽܘܢ. ܘܬܶܗܘܶܐ ܠܙܰܘܥܬܳܐ ܠܟܽܠܗܶܝܢ ܡܰܠܟ̈ܘܳܬܳܐ ܕܰܐܪܥܳܐ.

²⁶ ܘܬܶܗܘܶܐ ܫܠܰܕܳܟ ܡܶܐܟܽܘܠܬܳܐ ܠܦܳܪܰܚܬܳܐ ܕܰܫܡܰܝܳܐ. ܘܰܠܚܰܝܽܘܬܳܐ ܕܰܐܪܥܳܐ ܘܠܰܝܬ ܕܡܰܟܶܫ.

²⁷ ܢܶܡܚܶܝܟ ܡܳܪܝܳܐ ܒܫܽܘܚܢܳܐ ܕܡܶܨܖ̈ܳܝܶܐ. ܘܒܰܛܚܽܘܪܳܐ. ܘܰܒܓܰܪܒܳܐ. ܘܰܒܢܰܚܒܳܐ. ܕܠܳܐ ܬܶܫܟܰܚ ܠܡܶܬܐܰܣܳܝܽܘ.

²⁸ ܢܶܡܚܶܝܟ ܡܳܪܝܳܐ ܒܟܰܡܗܽܘܬܳܐ ܘܒܰܥܘܳܪܳܐ. ܘܰܒܬܶܡܗܳܐ ܕܠܶܒܳܐ.

²⁹ ܘܰܗܘܰܝܬ ܡܳܐܶܫ ܒܛܰܗܪܳܐ. ܐܰܝܟ ܕܡܳܐܶܫ ܥܘܺܝܪܳܐ ܒܚܶܫܽܘܟܳܐ. ܘܠܳܐ ܬܶܣܰܩ ܐܽܘܪܚܳܟ ܠܪܺܝܫ. ܘܰܗܘܰܝܬ ܕܒܺܝܪ ܒܰܩܛܺܝܪܳܐ. ܘܰܛܠܺܝܡ ܟܽܠܗܽܘܢ ܝܰܘ̈ܡܳܬܳܟ. ܘܠܳܐ ܢܶܗܘܶܐ ܡܰܢ ܕܦܳܪܶܩ ܠܳܟ.

³⁰ ܐܰܢ̱ܬܬܳܐ ܬܶܡܟܽܘܪ. ܘܓܰܒܪܳܐ ܐ̱ܚܪܺܢܳܐ ܢܶܣܒܺܝܗ̇. ܒܰܝܬܳܐ ܬܶܒܢܶܐ. ܘܠܳܐ ܬܶܬܶܒ ܒܶܗ. ܟܰܪܡܳܐ ܬܶܨܽܘܒ. ܘܠܳܐ ܬܶܥܨܽܘܪ ܡܶܢܶܗ.

³¹ ܬܰܘܪܳܟ ܢܶܬܢܟܶܣ ܩܕܳܡܰܝܟ ܘܠܳܐ ܬܶܐܟܽܘܠ ܡܶܢܶܗ. ܘܰܚܡܳܪܳܟ ܢܶܬܕܒܰܪ ܡܶܢܳܟ ܒܰܩܛܺܝܪܳܐ ܘܠܳܐ ܢܶܬܦܢܶܐ ܠܳܟ. ܥܳܢ̈ܳܟ ܬܶܫܬܠܶܡ ܠܰܒܥܠܕܒܳܒܰܝ̈ܟ ܘܠܰܝܬ ܕܰܡܦܰܨܶܐ.

³² ܒܢܰܝ̈ܟ ܘܰܒ̈ܢܳܬܳܟ ܢܶܫܬܰܠܡܽܘܢ ܠܥܰܡܳܐ ܐ̱ܚܪܺܢܳܐ. ܘܥܰܝܢܰܝ̈ܟ ܢܶܚܙ̈ܝܳܢ. ܘܬܶܕܘܶܐ ܥܠܰܝܗܽܘܢ ܟܽܠܶܗ ܝܰܘܡܳܐ. ܘܠܳܐ ܬܶܣܦܰܩ ܒܺܐܝܕܰܝ̈ܟ.

³³ ܦܺܐܖ̈ܶܐ ܕܰܐܪܥܳܟ. ܘܟܽܠܳܗ̇ ܠܶܐܘܬܳܟ. ܢܶܐܟܽܘܠ ܥܰܡܳܐ ܕܠܳܐ ܝܳܕܰܥ ܐܰܢ̱ܬ ܠܶܗ. ܘܰܗܘܰܝܬ ܛܠܺܝܡ ܘܰܐܠܺܝܨ ܟܽܠܗܽܘܢ ܝܰܘ̈ܡܳܬܳܟ.

³⁴ ܘܰܗܘܰܝܬ ܟܡܰܗ ܡܶܢ ܚܶܙܘܳܐ ܕܥܰܝܢܰܝ̈ܟ ܕܚܳܙܶܐ ܐܰܢ̱ܬ.

³⁵ ܢܶܡܚܶܝܟ ܡܳܪܝܳܐ ܒܫܽܘܚܢܳܐ ܒܺܝܫܳܐ ܥܰܠ ܒܽܘܖ̈ܟܰܝܟ. ܘܥܰܠ ܫܳܩܰܝ̈ܟ. ܕܠܳܐ ܬܶܫܟܰܚ ܠܡܶܬܰܐܣܳܝܽܘ ܡܶܢ ܦܰܣܬܳܐ ܕܪܶܓܠܳܟ ܘܰܥܕܰܡܳܐ ܠܡܽܘܚܳܟ.

³⁶ ܢܶܕܒܪܳܟ ܡܳܪܝܳܐ ܠܳܟ ܘܰܠܡܰܠܟܳܟ ܕܰܐܩܺܝܡܬ ܥܠܰܝܟ. ܠܘܳܬ ܥܰܡܳܐ ܕܠܳܐ ܝܺܕܰܥܬ ܐܰܢ̱ܬ ܘܰܐܒܳܗܰܝ̈ܟ. ܘܬܶܦܠܽܘܚ ܬܰܡܳܢ ܠܰܐܠܳܗ̈ܶܐ ܐ̱ܚܖ̈ܳܢܶܐ ܕܩܰܝܣܳܐ ܘܰܕܟܺܐܦܳܐ.

³⁷ ܘܬܶܗܘܶܐ ܠܬܶܡܗܳܐ. ܘܰܠܡܰܬܠܳܐ. ܘܰܠܪܶܢܝܳܐ ܒܟܽܠܗܽܘܢ ܥܰܡ̈ܡܶܐ ܕܰܢܒܰܕܪܳܟ ܡܳܪܝܳܐ ܠܬܰܡܳܢ.

³⁸ ܙܰܪܥܳܐ ܣܰܓܺܝ ܬܰܦܶܩ ܚܰܩܠܳܟ. ܘܩܰܠܺܝܠ ܬܶܚܡܽܘܠ. ܡܶܛܽܠ ܕܢܶܐܟܠܺܝܘܗܝ ܩܰܡܨܳܐ.

³⁹ ܟܰܪܡܳܐ ܬܶܨܽܘܒ ܘܬܶܦܠܽܘܚ. ܘܚܰܡܪܳܐ ܠܳܐ ܬܶܫܬܶܐ. ܘܠܳܐ ܬܶܚܡܽܘܠ. ܡܶܛܽܠ ܕܳܐܟܠܳܐ ܠܶܗ ܬܰܘܠܥܳܐ.

⁴⁰ ܙܰܝ̈ܬܶܐ ܢܶܗܘܽܘܢ ܠܳܟ ܒܟܽܠܶܗ ܬܚܽܘܡܳܟ. ܘܡܶܫܚܳܐ ܠܳܐ ܬܶܡܫܽܘܚ. ܡܶܛܽܠ ܕܢܶܬܪܽܘܢ ܙܰܝܬܰܝ̈ܟ.

⁴¹ ܒܢܰܝ̈ܳܐ ܘܰܒܢ̈ܳܬܳܐ ܬܰܘܠܶܕ. ܘܠܳܐ ܢܶܗܘܽܘܢ ܕܺܝܠܳܟ. ܡܶܛܽܠ ܕܰܒܫܶܒܝܳܐ ܢܺܐܙܽܠܘܢ.

⁴² ܟܽܠܗܽܘܢ ܐܺܝܠܳܢܰܝ̈ܟ ܘܦܺܐܖ̈ܶܐ ܕܰܐܪܥܳܟ. ܢܶܐܟܽܘܠ ܐܶܢܽܘܢ ܨܰܪܨܽܘܪܳܐ.

⁴³ ܘܥܳܡܽܘܪܳܐ ܕܰܒܓܰܘܳܟ ܢܶܬܬܪܺܝܡ ܥܠܰܝܟ ܠܥܶܠ. ܘܰܐܢ̱ܬ ܬܶܚܽܘܬ ܠܬܰܚܬ.

⁴⁴ ܗܽܘ ܢܰܘܙܦܳܟ. ܘܰܐܢ̱ܬ ܠܳܐ ܬܰܘܙܦܺܝܘܗܝ. ܗܽܘ ܢܶܗܘܶܐ ܪܺܝܫܳܐ. ܘܰܐܢ̱ܬ ܬܶܗܘܶܐ ܕܽܘܢܒܬܳܐ.

⁴⁵ ܘܢܺܐܬܝ̈ܳܢ ܥܠܰܝܟ ܗܳܠܶܝܢ ܟܽܠܗܶܝܢ ܠܰܘ̈ܛܳܬܳܐ. ܘܢܰܕܖ̈ܟܳܢܳܟ. ܘܢܶܖ̈ܕܦܳܢܳܟ ܥܕܰܡܳܐ ܕܢܰܘ̈ܒܕܳܢܳܟ. ܡܶܛܽܠ ܕܠܳܐ ܫܡܰܥܬ ܒܩܳܠܶܗ ܕܡܳܪܝܳܐ ܐܰܠܳܗܳܟ. ܘܠܳܐ ܢܛܰܪܬ ܦܽܘܩܕܳܢܰܘ̈ܗܝ ܘܢܳܡܽܘܣܰܘ̈ܗܝ ܕܦܰܩܕܳܟ.

⁴⁶ ܘܢܶܗܘ̈ܝܳܢ ܒܳܟ ܐܳܬܘ̈ܳܬܳܐ ܘܬܶܕܡܖ̈ܳܬܳܐ. ܘܰܒܙܰܪܥܳܟ ܠܥܳܠܰܡ.

⁴⁷ ܥܰܠ ܕܠܳܐ ܦܠܰܚܬ ܠܡܳܪܝܳܐ ܐܰܠܳܗܳܟ ܒܚܰܕܽܘܬܳܐ ܘܰܒܛܳܒܽܘܬ ܠܶܒܳܐ. ܡܶܢ ܣܽܘܓܳܐܐ ܕܟܽܠ ܡܶܕܶܡ.

⁴⁸ ܘܬܶܦܠܽܘܚ ܠܰܒܥܶܠܕܒܳܒܰܝ̈ܟ. ܕܰܢܫܰܕܰܪ ܐܶܢܽܘܢ ܡܳܪܝܳܐ ܥܠܰܝܟ. ܒܟܰܦܢܳܐ ܘܰܒܨܶܗܝܳܐ. ܘܰܒܥܰܪܛܶܠܳܝܽܘܬܳܐ. ܘܰܒܚܽܘܣܪܳܢܳܐ ܕܟܽܠ ܡܶܕܶܡ. ܘܢܶܬܶܠ ܢܺܝܪܳܐ ܕܦܰܪܙܠܳܐ ܥܰܠ ܨܰܘܪܳܟ ܥܕܰܡܳܐ ܕܢܰܘܒܕܳܟ.

⁴⁹ ܢܰܝܬܶܐ ܥܠܰܝܟ ܡܳܪܝܳܐ ܥܰܡܳܐ ܡܶܢ ܪܽܘܚܩܳܐ ܡܶܢ ܣܰܘܦܶܝ̈ܗ̇ ܕܰܐܪܥܳܐ. ܐܰܝܟ ܕܛܳܐܶܣ ܢܶܫܪܳܐ. ܥܰܡܳܐ ܕܠܳܐ ܫܳܡܰܥ ܐܰܢ̱ܬ ܠܶܫܳܢܶܗ.

⁵⁰ ܥܰܡܳܐ ܕܚܰܨܺܝ̈ܦܳܢ ܐܰܦܰܘ̈ܗܝ. ܕܠܳܐ ܒܳܗܶܬ ܡܶܢ ܐܰܦܰܝ̈ ܣܳܒ̈ܶܐ. ܘܥܰܠ ܛܠܳܝ̈ܶܐ ܠܳܐ ܡܪܰܚܶܡ.

⁵¹ ܘܢܶܐܟܽܘܠ ܝܰܠܕܳܐ ܕܰܒܥܺܝܪܳܟ. ܘܦܺܐܖ̈ܶܐ ܕܰܐܪܥܳܟ. ܥܕܰܡܳܐ ܕܢܰܘܒܕܳܟ. ܘܠܳܐ ܢܶܫܒܽܘܩ ܠܳܟ ܠܳܐ ܥܒܽܘܪܳܐ. ܘܠܳܐ ܚܰܡܪܳܐ. ܘܠܳܐ ܡܶܫܚܳܐ. ܘܠܳܐ ܒܰܩܖ̈ܶܐ ܕܬܰܘܖ̈ܶܐ. ܘܠܳܐ ܓܙܳܖ̈ܶܐ ܕܥܳܢ̈ܳܐ. ܥܕܰܡܳܐ ܕܢܰܘܒܕܳܟ.

⁵² ܘܢܶܐܠܨܳܟ ܒܟܽܠܗܶܝܢ ܩܽܘܖ̈ܝܳܟ. ܥܕܰܡܳܐ ܕܢܶܟܒܽܘܫ ܫܽܘܖ̈ܰܝܟ ܖ̈ܳܡܶܐ ܘܥܰܫܺܝܢ̈ܶܐ. ܕܰܬܟܺܝܠ ܐܰܢ̱ܬ ܥܠܰܝܗܽܘܢ ܒܟܽܠܶܗ ܐܰܪܥܳܟ. ܘܢܶܐܠܨܳܟ ܒܟܽܠܗܶܝܢ ܩܽܘܖ̈ܝܳܟ. ܒܟܽܠܳܗ̇ ܐܰܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ.

⁵³ ܘܬܶܐܟܽܘܠ ܦܺܐܖ̈ܶܐ ܕܟܰܪܣܳܟ. ܒܶܣܪܳܐ ܕܰܒܢܰܝ̈ܟ ܘܕܰܒܢ̈ܳܬܳܟ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ. ܬܶܐܟܽܘܠ ܐܶܢܽܘܢ ܒܽܐܘܠܨܳܢܳܐ. ܘܰܒܥܳܩܬܳܐ ܕܰܢܥܺܝܩ ܠܳܟ ܒܥܶܠܕܒܳܒܳܟ.

⁵⁴ ܓܰܒܪܳܐ ܕܰܡܥܰܕܰܢ ܒܳܟ. ܘܰܡܦܰܢܰܩ ܒܳܟ. ܬܶܚܽܘܪ ܥܰܝܢܶܗ ܒܰܐܚܽܘܗܝ. ܘܒܰܐܢ̱ܬܰܬ ܩܝܳܡܶܗ ܘܰܒܫܰܪܟܳܐ ܕܰܒܢܰܘ̈ܗܝ ܕܡܶܫܬܰܚܪܺܝܢ.

⁵⁵ ܘܠܳܐ ܢܶܬܶܠ ܠܚܰܕ ܡܶܢܗܽܘܢ ܡܶܢ ܒܶܣܪܳܐ ܕܰܒܢܰܘ̈ܗܝ ܕܳܐܟܶܠ. ܡܶܛܽܠ ܕܠܳܐ ܢܶܫܬܒܶܩ ܠܶܗ ܡܶܕܶܡ. ܒܽܐܘܠܨܳܢܳܐ ܘܰܒܥܳܩܬܳܐ ܕܰܢܥܺܝܩ ܠܳܟ ܒܥܶܠܕܒܳܒܳܟ ܒܟܽܠܗܶܝܢ ܩܽܘܖ̈ܝܳܟ.

⁵⁶ ܐܰܝܕܳܐ ܕܰܡܥܰܕܢܳܐ ܒܳܟ ܘܰܡܦܰܢܩܳܐ. ܕܠܳܐ ܢܰܣܝܰܬ ܦܰܣܬܳܐ ܕܪܶܓܠܳܗ̇ ܠܰܡܩܳܡ ܥܰܠ ܐܰܪܥܳܐ. ܡܶܢ ܥܽܘܕܳܢܳܗ̇ ܘܡܶܢ ܦܽܘܢܳܩܳܗ̇. ܬܚܽܘܪ ܥܰܝܢܳܗ̇ ܒܒܰܥܠܳܗ̇. ܘܒܰܒܪܳܗ̇. ܘܰܒܒܰܪܬܳܗ̇.

⁵⁷ ܘܒܰܫܠܺܝܬܳܐ ܕܢܳܦܩܳܐ ܡܶܢ ܒܶܝܬ ܖ̈ܶܓܠܶܝܗ̇. ܘܒܰܒܪܳܗ̇ ܕܬܺܐܠܰܕ ܟܰܕ ܬܶܐܟܽܘܠ ܐܶܢܽܘܢ. ܡܳܐ ܕܰܚܣܰܪ ܠܳܗ̇ ܟܽܠ. ܒܽܐܘܠܨܳܢܳܐ ܘܰܒܥܳܩܬܳܐ ܕܰܢܥܺܝܩ ܠܳܟ ܒܥܶܠܕܒܳܒܳܟ. ܒܟܽܠܗܶܝܢ ܩܽܘܖ̈ܝܳܟ.

⁵⁸ ܐܶܢ ܠܳܐ ܬܶܛܰܪ ܘܬܶܥܒܶܕ ܟܽܠܗܽܘܢ ܦܶܬܓܳܡ̈ܶܐ ܕܢܳܡܽܘܣܳܐ ܗܳܢܳܐ ܕܰܟܬܺܝܒܺܝܢ ܒܰܟܬܳܒܳܐ ܗܳܢܳܐ. ܘܬܶܕܚܰܠ ܡܶܢ ܫܡܳܐ ܗܳܢܳܐ ܡܫܰܒܚܳܐ ܘܰܕܚܺܝܠܳܐ ܕܡܳܪܝܳܐ ܐܰܠܳܗܳܟ.

⁵⁹ ܢܶܦܪܽܘܫ ܡܳܪܝܳܐ ܡܰܚ̈ܘܳܬܳܟ. ܘܡܰܚ̈ܘܳܬܳܐ ܕܙܰܪܥܳܟ. ܡܰܚ̈ܘܳܬܳܐ ܕܪܰܘܖ̈ܒܳܢ ܘܰܡܗܰܝܡ̈ܢܳܢ. ܘܟܺܐܒ̈ܶܐ ܕܒܺܝܫܺܝܢ. ܘܰܡܗܰܝܡܢܺܝܢ.

⁶⁰ ܘܢܰܝܬܶܐ ܥܠܰܝܟ ܟܽܠܗܶܝܢ ܡܰܚ̈ܘܳܬܳܐ ܕܡܶܨܖ̈ܳܝܶܐ ܕܕܳܚܶܠ ܐܰܢ̱ܬ ܡܶܢ ܩܕܳܡܰܝܗܶܝܢ. ܘܢܶܕܒ̈ܩܳܢ ܒܳܟ.

⁶¹ ܘܟܽܠ ܟܽܘܪܗܳܢ ܘܟܽܠ ܡܰܚ̈ܘܳܢ. ܕܠܳܐ ܟܬܺܝ̈ܒܳܢ ܒܰܟܬܳܒܳܐ ܗܳܢܳܐ ܕܢܳܡܽܘܣܳܐ. ܢܰܝܬܶܐ ܐܶܢܶܝܢ ܡܳܪܝܳܐ ܥܠܰܝܟ ܥܕܰܡܳܐ ܕܢܰܘܒܕܳܟ.

⁶² ܘܬܶܫܬܰܚܪܽܘܢ ܩܰܠܺܝܠ ܒܡܶܢܝܳܢܳܐ. ܕܰܣܓܺܝܬܽܘܢ ܗܘܰܝܬܽܘܢ ܛܳܒ ܐܰܝܟ ܟܰܘ̈ܟܒܶܐ ܕܒܰܫܡܰܝܳܐ. ܥܰܠ ܕܠܳܐ ܫܡܰܥܬ ܒܩܳܠܶܗ ܕܡܳܪܝܳܐ ܐܰܠܳܗܳܟ.

⁶³ ܘܰܐܝܟ ܕܰܚܕܺܝ ܡܳܪܝܳܐ ܥܠܰܝܟܽܘܢ ܕܢܰܛܐܶܒ ܠܟܽܘܢ ܘܢܰܣܓܶܝܟܽܘܢ. ܗܳܟܰܢܳܐ ܢܶܚܕܶܐ ܡܳܪܝܳܐ ܥܠܰܝܟܽܘܢ ܕܢܰܘܒܶܕܟܽܘܢ ܘܰܢܓܰܡܰܪܟܽܘܢ. ܘܬܶܫܬܰܩܠܽܘܢ ܡܶܢ ܐܰܪܥܳܐ ܕܥܳܐܶܠ ܐܰܢ̱ܬ ܠܬܰܡܳܢ ܠܡܺܐܪܬܳܗ̇

⁶⁴ ܘܰܢܒܰܕܪܳܟ ܡܳܪܝܳܐ ܒܟܽܠܗܽܘܢ ܥܰܡ̈ܡܶܐ. ܡܶܢ ܣܰܘ̈ܦܶܝܗ̇ ܕܰܐܪܥܳܐ ܘܰܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ. ܘܬܶܦܠܽܘܚ ܬܰܡܳܢ ܠܰܐܠܳܗ̈ܶܐ ܐ̱ܚܖ̈ܳܢܶܐ ܕܩܰܝܣܳܐ. ܘܰܕܟܺܐܦܳܐ. ܕܠܳܐ ܝܺܕܰܥܬ ܐܰܢ̱ܬ ܘܰܐܒܳܗܰܝ̈ܟ.

⁶⁵ ܘܰܒܥܰܡ̈ܡܶܐ ܗܳܢܽܘܢ ܠܳܐ ܬܶܫܠܶܐ. ܘܠܳܐ ܢܶܗܘܶܐ ܢܝܳܚܳܐ ܠܦܰܣܰܬ ܪܶܓܠܳܟ. ܐܶܠܳܐ ܢܶܬܶܠ ܠܳܟ ܡܳܪܝܳܐ ܬܰܡܳܢ ܠܶܒܳܐ ܙܰܝܳܥܳܐ. ܘܚܶܫܟܳܐ ܕܥܰܝ̈ܢܶܐ. ܘܕܽܘܝܳܒܳܐ ܕܢܰܦܫܳܐ.

⁶⁶ ܘܢܶܗܘܽܘܢ ܚܰܝܰܝ̈ܟ ܬܠܶܝܢ ܡܶܢ ܩܒܽܘܠ. ܘܬܶܗܘܶܐ ܕܳܚܶܠ ܒܺܐܝܡܳܡܳܐ ܘܰܒܠܺܠܝܳܐ. ܘܠܳܐ ܬܗܰܝܡܶܢ ܒܚܰܝܰܝ̈ܟ.

⁶⁷ ܒܨܰܦܪܳܐ ܬܺܐܡܰܪ ܐܶܡܰܬܝ ܕܶܝܢ ܗܘܳܐ ܪܰܡܫܳܐ. ܘܰܒܪܰܡܫܳܐ ܬܺܐܡܰܪ ܐܶܡܰܬܝ ܕܶܝܢ ܗܘܳܐ ܨܰܦܪܳܐ. ܡܶܢ ܕܶܚܠܬܳܐ ܕܠܶܒܳܟ ܕܕܳܚܶܠ ܐܰܢ̱ܬ. ܘܡܶܢ ܚܶܙܘܳܐ ܕܥܰܝܢܰܝ̈ܟ ܕܚܳܙܶܐ ܐܰܢ̱ܬ.

⁶⁸ ܘܢܰܗܦܟܳܟ ܡܳܪܝܳܐ ܠܡܶܨܪܶܝܢ ܒܶܐܠܦ̈ܶܐ. ܒܽܐܘܪܚܳܐ ܕܶܐܡܰܪ ܠܳܟ ܠܳܐ ܬܰܘܣܶܦ ܬܽܘܒ ܠܡܶܚܙܝܳܗ̇. ܘܬܶܙܕܰܒܢܽܘܢ ܬܰܡܳܢ ܠܰܒܥܶܠܕܒܳܒܰܝ̈ܟܽܘܢ. ܠܥܰܒ̈ܕܶܐ ܘܠܰܐܡ̈ܗܳܬܳܐ. ܘܠܰܝܬ ܕܙܳܒܶܢ.