Deuteronomio ܬܢܝܢ ܢܡܘܣܐ 19

¹ ܘܟܰܕ ܢܰܘܒܶܕ ܡܳܪܝܳܐ ܐܰܠܳܗܳܟ ܥܰܡ̈ܡܶܐ ܕܡܳܪܝܳܐ ܐܰܠܳܗܳܟ ܝܳܗܶܒ ܠܟ ܐܰܪܥܗܽܘܢ. ܘܬܺܐܪܰܬ ܐܶܢܽܘܢ. ܘܬܶܬܶܒ ܒܩܽܘܖ̈ܝܗܽܘܢ. ܘܰܒܒܳܬܰܝ̈ܗܽܘܢ.

² ܬܠܳܬ ܩܽܘܖ̈ܝܳܐ ܦܪܽܘܫ ܠܳܟ ܒܓܰܘ ܐܰܪܥܳܟ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܝܽܘܪܬܳܢܳܐ.

³ ܛܰܝܶܒ ܐܽܘܪܚܳܐ. ܘܬܰܠܶܬ ܬܚܽܘܡܳܐ ܕܰܐܪܥܳܐ ܕܡܰܘܪܶܬ ܠܳܟ ܡܳܪܝܳܐ ܐܰܠܳܗܳܟ. ܕܢܶܗܘܶܐ ܥܳܪܶܩ ܠܬܰܡܳܢ ܟܽܠ ܩܳܛܽܘܠܳܐ.

⁴ ܘܗܳܢܰܘ ܙܶܕܩܶܗ ܕܩܳܛܽܘܠܳܐ ܕܩܳܛܶܠ ܠܚܰܒܪܶܗ ܘܚܳܝܶܐ. ܡܳܐ ܕܰܩܛܰܠ ܠܚܰܒܪܶܗ ܕܠܳܐ ܒܨܶܒܝܳܢܶܗ. ܘܠܳܐ ܣܳܢܶܐ ܗܘܳܐ ܠܶܗ ܡܶܢ ܐܶܬܡܳܠܝ ܘܡܶܢ ܡܢܳܬܡܳܠܝ.

⁵ ܘܡܰܢ ܕܢܶܥܽܘܠ ܥܰܡ ܚܰܒܪܶܗ ܠܥܳܒܳܐ ܕܩܰܝ̈ܣܶܐ ܠܡܶܦܣܰܩ. ܘܰܢܪܺܝܡ ܐܺܝܕܶܗ ܒܢܳܪܓܳܐ ܠܡܶܦܣܰܩ ܩܰܝ̈ܣܶܐ. ܘܢܶܫܬܡܶܛ ܦܰܪܙܠܳܐ ܡܶܢ ܩܰܝܣܳܐ. ܘܢܶܡܚܶܐ ܠܚܰܒܪܶܗ ܘܰܢܡܽܘܬ. ܗܳܢܳܐ ܢܶܥܪܽܘܩ ܠܰܚܕܳܐ ܡܶܢ ܗܳܠܶܝܢ ܩܽܘܖ̈ܝܳܐ ܘܢܺܚܶܐ.

⁶ ܕܠܳܐ ܟܰܕ ܢܶܪܕܽܘܦ ܬܳܒܰܥ ܥܝܳܪܬܳܐ ܕܰܕܡܳܐ ܒܳܬܰܪ ܩܳܛܽܘܠܳܐ ܒܚܰܡܺܝܡܽܘܬܳܐ ܕܠܶܒܶܗ. ܘܢܰܕܪܟܺܝܘܗܝ. ܟܰܕ ܬܶܗܘܶܐ ܣܰܓܺܝܐܳܐ ܐܽܘܪܚܳܐ. ܘܢܶܩܛܠܺܝܘܗܝ ܟܰܕ ܠܳܐ ܚܰܝܳܒ ܕܺܝܢܳܐ ܕܡܰܘܬܳܐ. ܠܳܐ ܓܶܝܪ ܣܳܢܶܐ ܗܘܳܐ ܠܶܗ ܡܶܢ ܐܶܬܡܳܠܝ ܘܡܶܢ ܡܢܳܬܡܳܠܝ.

⁷ ܡܶܛܽܠ ܗܳܢܳܐ ܡܦܰܩܶܕ ܐ̱ܢܳܐ ܠܳܟ. ܘܳܐܡܰܪ ܐ̱ܢܳܐ ܠܳܟ. ܕܬܶܦܪܽܘܫ ܠܳܟ ܬܠܳܬ ܩܽܘܖ̈ܝܳܐ.

⁸ ܘܟܰܕ ܢܪܰܘܰܚ ܡܳܪܝܳܐ ܐܰܠܳܗܳܟ ܬܚܽܘܡܳܟ. ܐܰܝܟ ܕܺܝܡܳܐ ܠܰܐܒܳܗܰܝ̈ܟ. ܘܢܶܬܶܠ ܠܳܟ ܟܽܠܳܗ̇ ܐܰܪܥܳܐ ܕܺܝܡܳܐ ܠܰܐܒܳܗܰܝ̈ܟ.

⁹ ܐܶܢ ܬܶܛܰܪ ܟܽܠܗܽܘܢ ܦܽܘܩ̈ܕܳܢܶܐ ܗܳܠܶܝܢ ܘܬܶܥܒܶܕ ܐܶܢܽܘܢ. ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ. ܕܬܶܪܚܰܡ ܠܡܳܪܝܳܐ ܐܰܠܳܗܳܟ ܘܰܬܗܰܠܶܟ ܒܽܐܘܖ̈ܚܳܬܶܗ ܟܽܠܗܽܘܢ ܝܰܘ̈ܡܳܬܳܐ. ܬܰܘܣܶܦ ܠܳܟ ܬܽܘܒ ܬܠܳܬ ܩܽܘܖ̈ܝܳܐ ܥܰܠ ܗܳܠܶܝܢ ܬܠܳܬ.

¹⁰ ܕܠܳܐ ܢܶܬܐܫܶܕ ܕܡܳܐ ܙܰܟܳܝܳܐ ܒܓܰܘ ܐܰܪܥܳܟ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ. ܘܢܶܬܚܫܶܒ ܥܠܰܝܟ ܕܡܳܐ ܙܰܟܳܝܳܐ.

¹¹ ܘܶܐܢ ܢܶܗܘܶܐ ܓܰܒܪܳܐ ܣܳܢܶܐ ܠܚܰܒܪܶܗ. ܘܢܶܟܡܰܢ ܠܶܗ. ܘܰܢܩܽܘܡ ܥܠܰܘܗܝ ܘܢܶܡܚܶܝܘܗܝ ܘܰܢܡܽܘܬ. ܘܢܶܥܪܽܘܩ ܠܶܗ ܠܰܚܕܳܐ ܡܶܢ ܗܳܠܶܝܢ ܩܽܘܖ̈ܝܳܐ.

¹² ܢܫܰܕܪܽܘܢ ܣܳܒ̈ܶܐ ܕܰܩܪܺܝܬܶܗ ܘܢܶܕܒܪܽܘܢܶܗ ܡܶܢ ܬܰܡܳܢ. ܘܢܰܫܠܡܽܘܢܶܗ ܠܬܳܒܰܥ ܥܝܳܪܬܳܐ ܕܰܕܡܳܐ ܘܢܶܩܛܠܺܝܘܗܝ.

¹³ ܘܠܳܐ ܬܚܽܘܣ ܥܰܝܢܳܟ ܥܠܰܘܗܝ ܕܬܶܩܛܠܺܝܘܗܝ. ܘܥܰܩܶܒ ܕܡܳܐ ܙܰܟܳܝܳܐ ܡܶܢ ܝܺܣܪܳܐܶܝܠ. ܘܢܰܛܐܶܒ ܠܳܟ.

¹⁴ ܘܠܳܐ ܬܫܰܢܶܐ ܬܚܽܘܡܳܐ ܕܡܶܢ ܥܳܠܰܡ. ܕܬܰܚܶܡܘ ܩܰܕܡܳܝ̈ܶܐ ܒܝܳܪܬܽܘܬܳܟ. ܕܬܺܐܪܰܬ ܒܰܐܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܠܡܺܐܪܬܳܗ̇

¹⁵ ܠܳܐ ܢܩܽܘܡ ܣܳܗܕܳܐ ܚܰܕ ܥܰܠ ܓܰܒܪܳܐ ܥܰܠ ܟܽܠ ܣܰܟܽܠܘܳܬܐ ܘܥܰܠ ܟܽܠ ܚܛܳܗܳܐ. ܒܟܽܠ ܚܛܳܗܳܐ ܕܢܶܚܛܶܐ. ܥܰܠ ܦܽܘܡ ܬܪܶܝܢ ܣܳܗ̈ܕܺܝܢ. ܐܰܘ ܥܰܠ ܦܽܘܡ ܬܠܳܬܳܐ ܣܳܗ̈ܕܺܝܢ. ܬܶܬܩܰܝܰܡ ܡܶܠܬܳܐ.

¹⁶ ܘܶܐܢ ܢܩܽܘܡ ܣܳܗܕܳܐ ܕܰܓܳܠܳܐ ܥܰܠ ܓܰܒܪܳܐ. ܘܢܰܣܗܶܕ ܥܠܰܘܗܝ ܥܰܘܠܳܐ.

¹⁷ ܢܩܽܘܡܽܘܢ ܬܖ̈ܰܝܗܽܘܢ ܓܰܒܖ̈ܶܐ ܕܺܐܝܬ ܠܗܽܘܢ ܕܺܝܢܳܐ ܩܕܳܡ ܡܳܪܝܳܐ. ܘܰܩܕܳܡ ܟܳܗ̈ܢܶܐ ܘܕܰܝܳܢ̈ܶܐ. ܕܢܶܗܘܽܘܢ ܒܝܰܘ̈ܡܳܬܳܐ ܗܳܢܽܘܢ.

¹⁸ ܘܰܢܥܰܩܒܽܘܢ ܕܰܝܳܢ̈ܶܐ ܫܰܦܺܝܪ. ܘܢܶܚܙܽܘܢ ܐܶܢ ܣܳܗܕܽܘܬܳܐ ܕܰܓܳܠܬܳܐ ܒܳܥܶܐ ܗܘܳܐ ܕܢܰܣܗܶܕ ܥܰܠ ܐܰܚܽܘܗܝ.

¹⁹ ܥܒܶܕܘ ܠܶܗ ܐܰܝܟ ܕܶܐܬܚܰܫܰܒ ܠܡܶܥܒܰܕ ܠܰܐܚܽܘܗܝ. ܘܒܰܥܰܪܘ ܒܺܝܫܬܳܐ ܡܶܢ ܒܰܝܢܳܬܟܽܘܢ.

²⁰ ܘܰܐܝܠܶܝܢ ܕܡܶܫܬܰܚܪܺܝܢ. ܢܶܫܡܥܽܘܢ ܘܢܶܕܚܠܽܘܢ. ܘܠܳܐ ܢܰܘܣܦܽܘܢ ܬܽܘܒ ܠܡܶܥܒܰܕ ܦܶܬܓܳܡܳܐ ܗܳܢܳܐ ܒܺܝܫܳܐ ܒܰܝܢܳܬܟܽܘܢ.

²¹ ܠܳܐ ܬܚܽܘܣ ܥܰܝܢܳܟ. ܐܶܠܳܐ ܢܰܦܫܳܐ ܚܠܳܦ ܢܰܦܫܳܐ. ܥܰܝܢܳܐ ܚܠܳܦ ܥܰܝܢܳܐ. ܫܶܢܳܐ ܚܠܳܦ ܫܶܢܳܐ. ܐܺܝܕܳܐ ܚܠܳܦ ܐܺܝܕܳܐ. ܪܶܓܠܳܐ ܚܠܳܦ ܪܶܓܠܳܐ.