Deuteronomio ܬܢܝܢ ܢܡܘܣܐ 17

¹ ܠܳܐ ܬܶܟܽܘܣ ܠܡܳܪܝܳܐ ܐܰܠܳܗܳܟ. ܬܰܘܪܳܐ ܐܰܘ ܐܶܡܪܳܐ ܕܺܐܝܬ ܒܶܗ ܡܽܘܡܳܐ. ܟܽܠ ܡܶܕܶܡ ܕܰܣܢܶܐ. ܡܶܛܽܠ ܕܰܛܡܰܐ ܗܽܘ ܩܕܳܡ ܡܳܪܝܳܐ ܐܰܠܳܗܳܟ.

² ܘܶܐܢ ܢܶܫܬܟܰܚ ܒܰܝܢܳܬܟܽܘܢ ܒܰܚܕܳܐ ܡܶܢ ܩܽܘܖ̈ܝܟܽܘܢ ܕܝܳܗܶܒ ܠܟܽܘܢ ܡܳܪܝܳܐ ܐܰܠܳܗܟܽܘܢ. ܓܰܒܪܳܐ ܐܰܘ ܐܰܢ̱ܬܬܳܐ. ܕܢܶܥܒܶܕ ܕܒܺܝܫ ܩܕܳܡ ܡܳܪܝܳܐ ܐܰܠܳܗܳܟ. ܘܢܶܥܒܰܪ ܥܰܠ ܩܝܳܡܶܗ.

³ ܘܢܺܐܙܰܠ ܘܢܶܦܠܽܘܚ ܠܰܐܠܳܗ̈ܶܐ ܐ̱ܚܖ̈ܳܢܶܐ. ܘܢܶܣܓܽܘܕ ܠܗܽܘܢ. ܐܰܘ ܠܫܶܡܫܳܐ. ܐܰܘ ܠܣܰܗܪܳܐ. ܐܰܘ ܠܟܽܠ ܚܰܝ̈ܠܰܘܳܬܳܐ ܕܰܫܡܰܝܳܐ ܕܠܳܐ ܦܰܩܕܶܬ.

⁴ ܘܰܢܚܰܘܢܳܟ. ܘܬܶܫܡܰܥ. ܘܰܬܥܰܩܶܒ ܫܰܦܺܝܪ ܐܶܢ ܫܰܪܺܝܪܳܐ ܗ̱ܝ ܡܶܠܬܳܐ. ܘܶܐܬܥܰܒܕܰܬ ܗܳܕܶܐ ܛܰܢܦܽܘܬܳܐ ܒܺܝܣܪܳܐܶܝܠ.

⁵ ܐܰܦܶܩܳܝܗܝ ܠܓܰܒܪܳܐ ܗܰܘ. ܐܰܘ ܠܰܐܢ̱ܬܬܳܐ ܗܳܝ. ܕܰܥܒܰܕܘ ܦܶܬܓܳܡܳܐ ܗܳܢܳܐ ܒܺܝܫܳܐ ܒܩܽܘܖ̈ܝܳܟ. ܐܶܢ ܓܰܒܪܰܐ ܗ̱ܘ ܐܰܘ ܐܰܢ̱ܬܬܳܐ. ܘܰܪܓܽܘܡܘ ܐܶܢܽܘܢ ܒܟܺܐܦ̈ܶܐ. ܘܰܢܡܽܘܬܽܘܢ.

⁶ ܥܰܠ ܦܽܘܡ ܬܪܶܝܢ ܣܳܗܕܺܝ̈ܢ. ܐܰܘ ܥܰܠ ܦܽܘܡ ܬܠܳܬܳܐ ܣܳܗ̈ܕܺܝܢ. ܢܶܬܩܛܶܠ ܡܰܢ ܕܚܰܝܳܒ ܡܰܘܬܳܐ. ܠܳܐ ܢܶܬܩܛܶܠ ܥܰܠ ܦܽܘܡܳܐ ܕܣܳܗܕܳܐ ܚܰܕ.

⁷ ܘܺܐܝܕܳܐ ܕܣܳܗ̈ܕܶܐ ܬܫܰܪܶܐ ܒܶܗ ܒܩܰܕܡܳܝܬܳܐ ܠܡܶܩܛܠܶܗ. ܘܺܐܝܕܳܐ ܕܟܽܠܶܗ ܥܰܡܳܐ ܒܰܐ̱ܚܪܳܝܬܳܐ. ܘܰܐܘܒܶܕܘ ܥܳܒܕܰܝ̈ ܒܺܝ̈ܫܳܬܳܐ ܡܶܢ ܒܰܝܢܳܬܟܽܘܢ.

⁸ ܘܟܰܕ ܢܶܬܟܰܣܶܐ ܡܶܢܟܽܘܢ ܦܶܬܓܳܡܳܐ ܕܕܺܝܢܳܐ. ܒܶܝܬ ܕܡܳܐ ܠܰܕܡܳܐ. ܘܒܶܝܬ ܕܺܝܢܳܐ ܠܕܺܝܢܳܐ. ܘܒܶܝܬ ܡܚܽܘܬܳܐ ܕܓܰܪܒܳܐ ܠܒܶܝܬ ܡܚܽܘܬܳܐ ܕܓܰܪܒܳܐ. ܦܶܬܓܳܡܳܐ ܕܚܶܪܝܳܢܳܐ ܒܩܽܘܖ̈ܝܟܽܘܢ. ܬܩܽܘܡ ܘܬܺܐܙܰܠ ܠܰܐܬܪܳܐ ܕܢܶܓܒܶܐ ܠܶܗ ܡܳܪܝܳܐ ܐܰܠܳܗܳܟ.

⁹ ܘܬܺܐܙܰܠ ܠܘܳܬ ܟܳܗܢܳܐ. ܐܰܘ ܠܘܳܬ ܠܶܘܳܝܳܐ. ܐܰܘ ܠܘܳܬ ܕܰܝܳܢܳܐ ܕܢܶܗܘܶܐ ܒܝܰܘ̈ܡܳܬܳܐ ܗܳܢܽܘܢ. ܘܰܬܫܰܐܶܠ. ܘܰܢܚܰܘܢܳܟ ܦܶܬܓܳܡܳܐ ܕܕܺܝܢܳܐ.

¹⁰ ܘܬܶܥܒܶܕ ܡܶܢ ܦܽܘܡ ܦܶܬܓܳܡܳܐ ܕܰܢܚܰܘܢܳܟ ܡܶܢ ܐܰܬܪܳܐ ܗܰܘ. ܐܰܝܟ ܕܶܐܡܰܪ ܡܳܪܝܳܐ. ܘܬܶܛܰܪ ܘܬܶܥܒܶܕ ܐܰܝܟ ܕܢܰܠܦܽܘܢܳܟ.

¹¹ ܡܶܢ ܦܽܘܡ ܢܳܡܽܘܣܳܐ ܕܰܢܚܰܘܢܳܟ. ܘܡܶܢ ܦܽܘܡ ܕܺܝܢܳܐ ܕܢܺܐܡܪܽܘܢ ܠܳܟ ܬܶܥܒܶܕ. ܘܠܳܐ ܬܶܣܛܶܐ ܡܶܢ ܦܽܘܡ ܦܶܬܓܳܡܳܐ ܕܰܢܚܰܘܢܳܟ. ܠܳܐ ܠܝܰܡܺܝܢܳܐ ܘܠܳܐ ܠܣܶܡܳܠܳܐ.

¹² ܘܓܰܒܪܳܐ ܕܢܶܥܒܶܕ ܒܡܰܪܳܚܽܘܬܳܐ. ܘܠܳܐ ܢܶܫܡܰܥ ܠܟܳܗܢܳܐ ܕܩܳܐܶܡ ܠܰܡܫܰܡܳܫܽܘ ܬܰܡܳܢ ܩܕܳܡ ܡܳܪܝܳܐ ܐܰܠܳܗܳܟ. ܐܰܘ ܠܕܰܝܳܢܳܐ. ܢܶܬܩܛܶܠ ܓܰܒܪܳܐ ܗܰܘ. ܘܰܐܘܒܶܕܘ ܥܳܒܕܰܝ̈ ܒܺܝ̈ܫܳܬܳܐ ܡܶܢ ܒܰܝܢܳܬܟܽܘܢ.

¹³ ܘܟܽܠܶܗ ܥܰܡܳܐ ܢܶܫܡܥܽܘܢ ܘܢܶܕܚܠܽܘܢ. ܘܬܽܘܒ ܠܳܐ ܢܰܡܪܚܽܘܢ.

¹⁴ ܘܟܰܕ ܬܶܥܽܘܠ ܠܰܐܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ. ܘܬܺܐܪܬܺܝܗ̇ ܘܬܶܬܶܒ ܒܳܗ̇. ܘܬܺܐܡܰܪ ܐܰܩܺܝܡ ܥܠܰܝ ܡܰܠܟܳܐ ܗܳܠܶܝܢ ܥܰܡ̈ܡܶܐ ܕܒܰܚܕܳܖ̈ܰܝ.

¹⁵ ܡܩܳܡܽܘ ܐܰܩܺܝܡ ܥܠܰܝܟ ܡܰܠܟܳܐ ܐܰܝܢܳܐ ܕܓܳܒܶܐ ܠܶܗ ܡܳܪܝܳܐ ܐܰܠܳܗܳܟ. ܡܶܢ ܒܰܝܢܳܬ ܐܰܚܰܝ̈ܟ ܐܰܩܺܝܡ ܥܠܰܝܟ ܡܰܠܟܳܐ. ܠܳܐ ܫܰܠܺܝܛ ܠܳܟ ܕܰܬܩܺܝܡ ܥܠܰܝܟ ܓܰܒܪܳܐ ܢܽܘܟܪܳܝܳܐ ܐܰܝܢܳܐ ܕܠܳܐ ܗܘܳܐ ܡܶܢ ܐܰܚܰܝ̈ܟ.

¹⁶ ܒܰܠܚܽܘܕ ܕܶܝܢ ܠܳܐ ܢܶܣܓܶܐ ܠܶܗ ܖ̈ܰܟܫܳܐ. ܕܠܳܐ ܢܰܗܦܟܺܝܘܗܝ ܠܥܰܡܳܐ ܠܡܶܨܪܶܝܢ ܟܰܕ ܢܶܣܓܽܘܢ ܠܶܗ ܖ̈ܰܟܫܳܐ. ܘܡܳܪܝܳܐ ܐܶܡܰܪ ܠܟܽܘܢ. ܠܳܐ ܬܰܘܣܦܽܘܢ ܬܽܘܒ ܠܡܶܗܦܰܟ ܒܽܐܘܪܚܳܐ ܗܳܕܶܐ.

¹⁷ ܘܠܳܐ ܢܰܣܓܶܐ ܠܶܗ ܢܶܫ̈ܶܐ ܕܠܳܐ ܢܰܣ̈ܛܝܳܢ ܠܶܒܶܗ. ܘܣܺܐܡܳܐ ܘܕܰܗܒܳܐ ܠܳܐ ܢܰܣܓܶܐ ܠܶܗ ܛܳܒ.

¹⁸ ܘܡܳܐ ܕܝܳܬܶܒ ܥܰܠ ܟܽܘܪܣܝܳܐ ܕܡܰܠܟܽܘܬܶܗ. ܢܶܟܬܽܘܒ ܠܶܗ ܦܰܪܫܰܓܢܶܗ ܕܢܳܡܽܘܣܳܐ ܗܳܢܳܐ ܒܣܶܦܪܳܐ. ܡܶܢ ܩܕܳܡ ܟܳܗܢܳܐ ܘܠܶܘܳܝܳܐ.

¹⁹ ܘܢܶܗܘܶܐ ܥܰܡܶܗ. ܘܢܶܗܘܶܐ ܩܳܪܶܐ ܒܶܗ ܟܽܠ ܝܰܘ̈ܡܰܝ ܚܰܝܰܘ̈ܗܝ. ܕܢܺܐܠܰܦ ܠܡܶܕܚܰܠ ܡܶܢ ܩܕܳܡ ܡܳܪܝܳܐ ܐܰܠܳܗܶܗ. ܘܢܶܛܰܪ ܟܽܠܗܽܘܢ ܦܶܬܓܳܡܰܘ̈ܗܝ ܕܢܳܡܽܘܣܳܐ ܗܳܢܳܐ ܘܦܽܘܩ̈ܕܳܢܶܐ ܗܳܠܶܝܢ. ܘܢܶܥܒܶܕ ܐܶܢܽܘܢ.

²⁰ ܕܠܳܐ ܢܶܬܬܪܺܝܡ ܠܶܒܶܗ ܡܶܢ ܐܰܚܰܘ̈ܗܝ. ܘܠܳܐ ܢܶܣܛܶܐ ܡܶܢ ܦܽܘܩ̈ܕܳܢܶܐ ܠܳܐ ܠܝܰܡܺܝܢܳܐ ܘܠܳܐ ܠܣܶܡܳܠܳܐ. ܕܢܰܣܓܶܐ ܝܰܘ̈ܡܳܬܳܐ ܕܡܰܠܟܽܘܬܶܗ ܗܽܘ ܘܰܒܢܰܘ̈ܗܝ ܒܰܝܢܳܬ ܒܢܰܝ̈ ܝܺܣܪܳܐܶܝܠ.