Isaia ܐܫܥܝܐ 13

¹ܡܫܩܠܐ ܕܒܒܠ ܕܚܙܐ ܐܫܥܝܐ ܒܪ ܐܡܘܨ²ܥܠ ܛܘܪ̈ܐ ܫ̈ܦܝܐ ܫܩܘܠܘ ܐܬܐ ܐܪܝܡܘ ܠܗܘܢ ܩܠܐ ܐܢܝܦܘ ܒܐܝܕܐ ܢܥܠܘܢ ܒܬܪ̈ܥܝܟܝ ܫ̈ܠܝܛܢܐ³ܐܢܐ ܦܩ̇ܕܬ ܠܡܩܕܫܝ ܘܩܪܝܬ ܠܓܢܒܪ̈ܐ ܒܪܘܓܙܝ ܘܡܬܥܫܢܝܢ ܒܓܐܝܘܬܝ⁴ܩܠܐ ܕܪܓܘܫܝܐ ܒܛܘܪܐ ܕܘܡܝܐ ܕܥܡ̈ܡܐ ܣ̈ܓܝܐܐ ܩܠܐ ܕܪܓܘܫܝܐ ܕܡ̈ܠܟܘܬܐ ܕܥܡ̈ܡܐ ܕܡܬܟܢܫܝܢ ܡܪܝܐ ܚܝܠܬܢܐ ܣܥ̇ܪ ܚܝ̈ܠܐ ܩܪ̈ܒܬܢܐ⁵ܐܬ̇ܝܢ ܡܢ ܪܘܚܩܐ ܘܡܢ ܣܘ̈ܦܝ ܫܡܝܐ ܡܪܝܐ ܘܡܐ̈ܢܐ ܕܪܘܓܙܗ ܠܡܚܒܠܘ ܠܟܠܗ̇ ܐܪܥܐ⁶ܐܝܠܠܘ ܡܛܠ ܕܩܪܝܒ ܗܘ ܝܘܡܗ ܕܡܪܝܐ ܘܐܝܟ ܒܙܬܐ ܡܢ ܫܠܝܐ ܢܐܬܐ⁷ܡܛܠ ܗܢܐ ܟܘܠܗܝܢ ܐ̈ܝܕܝܐ ܢܬܪ̈ܦܝܢ ܘܟܠܗ ܠܒܐ ܕܐܢܫܐ ܢܬܡܣܐ⁸ܘܢܬܕܠܚܘܢ ܘܨܘܪ̈ܢܐ ܘܚ̈ܒܠܐ ܐܝܟ ܕܝܠܕܬܐ ܢܐܚܕܘܢ ܐܢܘܢ ܘܢܬܡܗܘܢ ܓܒܪ ܒܚܒܪܗ ܘܐ̈ܦܐ ܕܫܠܗܒܝܬܐ ܐ̈ܦܝܗܘܢ⁹ܗܐ ܝܘܡܗ ܕܡܪܝܐ ܐ̇ܬܐ ܕܐܣܝܘ ܠܝܬ ܒܗ ܐܟܬܢ ܘܚܡܝܡ ܪܘܓܙܗ ܕܢܥܒܕܝܗ̇ ܠܐܪܥܐ ܠܚܘܪܒܐ ܘܚ̈ܛܝܝܗ̇ ܢܘܒܕ ܡܢܗ̇¹⁰ܡܛܠ ܕܟܘ̈ܟܒܐ ܕܫܡܝܐ ܘܚܝ̈ܠܘܬܗܘܢ ܠܐ ܢܢܗܪܘܢ ܢܚܫܟ ܫܡܫܐ ܒܡܦܩܗ ܘܢܘܗܪܗ ܕܣܗܪܐ ܠܐ ܢܢܗܪ¹¹ܐܦܩܘܕ ܒܝܫܬܐ ܥܠ ܬܒܝܠ ܘܥܠ ܪ̈ܫܝܥܐ ܥܘܠܗܘܢ ܐܒܛܠ ܪܡܘܬܐ ܕܫܒܗܪ̈ܢܐ ܘܓܐܝܘܬܐ ܕܥܫ̈ܝܢܐ ܐܡܟܟ¹²ܐܘܩܪ ܓܒܪܐ ܡܢ ܕܗܒܐ ܘܐܢܫܐ ܡܢ ܕܗܒܐ ܕܐܘܦܝܪ¹³ܡܛܠ ܗܢܐ ܠܫܡܝܐ ܐܪܓܙ ܘܬܙܘܥ ܐܪܥܐ ܡܢ ܕܘܟܬܗ̇ ܒܟܐܬܗ ܕܡܪܝܐ ܚܝܠܬܢܐ ܒܝܘܡܐ ܕܚܡܬܐ ܕܪܘܓܙܗ¹⁴ܢܗܘܘܢ ܐܝܟ ܛܒ̈ܝܐ ܕܥ̇ܪܩܝܢ ܘܐܝܟ ܥܢܐ ܕܠܝܬ ܠܗ̇ ܡܟܢܫܢܐ ܐܢܫ ܠܥܡܗ ܢܬܦܢܘܢ ܘܓܒܪ ܠܐܪܥܗ ܢܥܪܩܘܢ¹⁵ܟܠ ܕܢܫܬܟܚ ܢܬܕܩܪ ܘܟܠ ܕܢܬܬܘܣܦ ܢܦܠ ܒܚܪܒܐ¹⁶ܝ̈ܠܘܕܝܗܘܢ ܢܫܬܩܦܘܢ ܠܥܢܝ̈ܗܘܢ ܘܢܬܒܙܘܢ ܒ̈ܬܝܗܘܢ ܘܢܫܝ̈ܗܘܢ ܢܨܛܥܪ̈ܢ¹⁷ܗܐ ܡܥܝܪ ܐܢܐ ܥܠܝܟܘܢ ܠܡ̈ܕܝܐ ܕܟܣܦܐ ܠܐ ܚܫܝܒ ܠܗܘܢ ܘܒܕܗܒܐ ܠܐ ܡܨܛܒܝܢ¹⁸ܩܫ̈ܬܬܐ ܕܥ̈ܠܝܡܐ ܢܬܬܒܪ̈ܢ ܘܥܠ ܦܐܪ̈ܐ ܕܟܪܣܐ ܠܐ ܢܪܚܡܘܢ ܘܥܠ ܒ̈ܢܝܗܘܢ ܠܐ ܢܚ̈ܘܣܢ ܥܝ̈ܢܝܗܘܢ¹⁹ܘܬܗܘܐ ܒܒܠ ܚܝܠܐ ܕܡ̈ܠܟܘܬܐ ܘܫܘܒܚܐ ܕܓܐܝܘܬܐ ܕܟ̈ܠܕܝܐ ܐܝܟ ܕܗܦܟ ܐܠܗܐ ܠܣܕܘܡ ܘܠܥܡܘܪܐ²⁰ܠܐ ܬܬܒ ܠܥܠܡ ܘܠܐ ܬܫܪܐ ܠܕܪܕܪܝܢ ܘܠܐ ܢܫܪܘܢ ܬܡܢ ܥܪ̈ܒܝܐ ܘܪ̈ܥܘܬܐ ܠܐ ܢܪܥܘܢ ܬܡܢ²¹ܐܠܐ ܢܪ̈ܒܥܢ ܬܡܢ ܚܝ̈ܘܬܐ ܘܢܬܡܠܘܢ ܒܬ̈ܝܗܘܢ ܒܢ̈ܬ ܩ̈ܠܐ ܘܢܫܪ̈ܝܢ ܬܡܢ ܒܢ̈ܬ ܢܥܡ̈ܐ ܘܫܐ̈ܕܐ ܢܪܩܕܘܢ ܬܡܢ²²ܘܢܥܢܝ̈ܢ ܣܝܪ̈ܝܢܣ ܒܣܚܪ̈ܬܗܘܢ ܘܝܪ̈ܘܪܐ ܒܗܝ̈ܟܠܐ ܕܦܘܢܩ̈ܝܗܘܢ ܩܪܝܒ ܗܘ ܙܒܢܗ̇ ܠܡܐܬܐ ܘܝܘܡ̈ܬܗ̇ ܬܘܒ ܠܐ ܢܬܡܬܚܘܢ

Cambia Bibbia

Confronta con un'altra Bibbia

Versetti esaminati