Isaia ܐܫܥܝܐ 23

¹ ܡܫܩܠܐ ܕܨܘܪ ܐܝ̈ܠܠܝܢ ܐ̈ܠܦܐ ܕܬܪܫܝܫ ܡܛܠ ܕܐܬܒܙܙ ܡܢ ܒܝܬܐ ܡܝܬܝܢܐ ܘܡܢ ܐܪܥܐ ܕܟܬܝܡ ܐܬܓܠܝ ܠܢ

² ܫܬܘܩܘ ܥܡܘܪ̈ܐ̈ ܕܓܙܪܬܐ ܬܓܪܐ ܕܨܝܕܢ ܕܥܒ̇ܪ ܒܝܡܐ ܡܠܐܘܟ

³ ܒܡ̈ܝܐ ܣ̈ܓܝܐܐ ܙܪܥܐ ܕܬܓܪܐ ܚܨܕܐ ܕܢܗܪܐ ܥܠܠܬܗ ܗܘܬ ܬܐܓܘܪܬܐ ܠܥܡ̈ܡܐ

⁴ ܒܗܬܝ ܨܝܕܢ ܡܛܠ ܕܐܡܪ ܝܡܐ ܘܥܘܫܢܗ ܕܝܡܐ ܠܐ ܚܒ̇ܠܬ ܘܠܐ ܝܠ̇ܕܬ ܘܠܐ ܪܒܝ̇ܬ ܓܕܘ̈ܕܐ ܐܦܠܐ ܪܡܪܡ̇ܬ ܒܬ̈ܘܠܬܐ

⁵ ܡܐ ܕܐܫܬܡܥ ܠܡܨܪܝܢ ܚܒ̈ܠܐ ܢܐܚܕܘܢ ܐܢܘܢ ܐܝܟ ܫܡܥܐ ܕܨܘܪ

⁶ ܥܒܪܘ ܠܬܪܫܝܫ ܐܝܠܠܘ ܥܡܘܪ̈ܐ̈ ܕܓܙܪܬܐ

⁷ ܗܕܐ ܗܝ ܠܟܘܢ ܥܫܝܢܬܐ ܕܡܢ ܝܘܡ̈ܬܐ ܩܕܡ̈ܝܐ ܩܕܡܝܗ̇ ܢܐ̈ܙܠܢ ܪ̈ܓܠܝܗ̇ ܕܬܥܡܪ ܒܪܘܚܩܐ

⁸ ܡܢܘ ܐܬܡܠܟ ܗܟܢܐ ܥܠ ܨܘܪ ܡܟܠܠܬܐ ܕܬܓܪ̈ܝܗ̇ ܪ̈ܘܪܒܢܐ ܘܟܢ̈ܥܢܝܗ̇ ܝܩܝܪ̈ܝܗ̇ ܕܐܪܥܐ

⁹ ܡܪܝܐ ܚܝܠܬܢܐ ܐܬܪܥܝ ܠܡܒܛܠܘ ܐܝܩܪܐ ܕܟܠ ܚܝܠ ܘܠܡܨܥܪܘ ܠܟܠܗܘܢ ܝܩܝܪ̈ܝܗ̇ ܕܐܪܥܐ

¹⁰ ܥܒܪܝ ܠܐܪܥܟܝ ܐܝܟ ܢܗܪܐ ܒܪܬ ܬܪܫܝܫ ܠܝܬ ܬܘܒ ܕܕܚ̇ܩ ܠܟܝ

¹¹ ܐܝܕܗ ܐܪܝܡ ܥܠ ܝܡܐ ܘܐܪܓܙ ܡ̈ܠܟܘܬܐ ܡܪܝܐ ܦܩܕ ܥܠ ܟܢܥܢ ܕܢܘܒܕ ܥܫ̈ܝܢܝܗ̇

¹² ܘܐܡܪ ܠܐ ܬܘܣܦܝܢ ܬܘܒ ܠܡܬܥܫܢܘ ܛܠܝܡܬܐ̈ ܒܬܘܠܬܐ ܒܪܬ ܨܝܕܢ ܩܘܡܝ ܥܒܪܝ ܠܟܬܝܡ ܘܐܦ ܬܡܢ ܠܐ ܢܢܝܚ ܠܟܝ

¹³ ܗܐ ܐܪܥܐ ܕܟ̈ܠܕܝܐ ܗܢܘ ܥܡܐ ܕܠܐ ܗܘܐ ܐܬܘܪܝܐ ܥܒܕܗ ܠܪܘܚܐ ܘܐܩܝܡ ܒܨ̈ܘܝܐ ܒܨܘ ܣܚܪ̈ܬܗ̇ ܘܥܒܕܘܗ̇ ܠܡܦܘܠܬܐ

¹⁴ ܐܝ̈ܠܠܝܢ ܐ̈ܠܦܐ ܕܬܪܫܝܫ ܡܛܠ ܕܐܬܒܙܙ ܥܘܫܢܟܝܢ

¹⁵ ܢܗܘܐ ܕܝܢ ܒܝܘܡܐ ܗ̇ܘ ܬܬܛܥܐ ܨܘܪ ܫܒܥܝܢ ܫ̈ܢܝܢ ܐܝܟ ܝ̈ܘܡܝ ܡܠܟܐ ܚܕ ܘܡܢ ܒܬܪ ܫܒܥܝܢ ܫ̈ܢܝܢ ܢܙܡܪܘܢ ܠܨܘܪ ܙܡܝܪܬܐ ܕܙܢܝܬܐ

¹⁶ ܣܒܝ ܟܢܪܐ ܘܐܬܟܪܟܝ ܩܪܝܬܐ ܙܢܝܬܐ ܕܐܬܛܥܝܬ ܩܘܫܝ ܫܦܝܪ ܐܣܓܝ ܙܡܪܐ ܕܬܬܕܟܪܝܢ

¹⁷ ܘܢܗܘܐ ܡܢ ܒܬܪ ܫܒܥܝܢ ܫ̈ܢܝܢ ܢܦܩܘܕ ܡܪܝܐ ܠܨܘܪ ܘܢܗܦܟܝܗ̇ ܠܐܓܝܪ̈ܬܗ̇ ܘܬܙܢܐ ܒܟܠܗܝܢ ܡ̈ܠܟܘܬܐ ܕܥܠ ܐ̈ܦܝ ܐܪܥܐ

¹⁸ ܘܬܗܘܐ ܬܐܓܘܪܬܗ̇ ܘܐܓܝܪ̈ܬܗ̇ ܩܘܕܫܐ ܠܡܪܝܐ ܠܐ ܢܬܬܣ̈ܝܡܢ ܒܝܬ ܓܙܐ ܘܠܐ ܢܬܢܛܪ̈ܢ ܐܠܐ ܠܕܥܡ̇ܪܝܢ ܩܕܡ ܡܪܝܐ ܬܗܘܐ ܬܐܓܘܪܬܗ̇ ܠܡܐܟܠ ܘܠܡܣܒܥ ܘܠܡܟܣܝܘ ܥܬܝܩ̈ܝܗ̇